यवतमाळ  –  पोलिसात दिलेली तक्रार मागे घे अन्यथा चेहरा विद्रुप करण्याची धमकी देत एका महिलेवर मंत्राचा प्रयोग करून हळद-कुंकू व अंगारा फेकल्याची घटना शनिवारी दुपारी पळसवाडी कॅम्पमध्ये घडली. महिलेच्या तक्रारीवरुन  शहर पोलिसांनी चार जणाविरुद्घ अंधश्रध्दा व अघोरी कृत्य प्रतिबंधक कायद्या अंतर्गत गुन्हा नोंदविला आहे.
प्रिया विनोद गोविंदानी (३२) या महिलेच्या दिराने परिसरातच राहणाºया उदासी कुटुंबातील सदस्याची पोलिसात तक्रार दिली होती. अशातच प्रिया गोविंदानी व सातवर्षीय मुलगी प्रांजली या दोघी दुपारी घरी असताना चार जणांनी त्यांच्या घरात प्रवेश केला. यावेळी आरोपी प्रताप रादलदास उदासी (४७), संजय रादलदास उदासी (४३), गोलू रामचंद्र उदासी (२१), जया प्रताप उदासी (४०) सर्व रा. पळसावाडी कॅम्प यानी दिराने पोलिसात दिलेली तक्रार मागे घ्या अन्यथा चेहरा विद्रुप करून टाकू असे धमकावित अश्लिल शिवीगाळ करून जीवे मारण्याची धमकी दिली. एवढ्यावरच न थांबता आरोपी जयाने मंत्र पुटपुटून सोबत आणलेले लिंबू, हळदी-कुंकू, तांदळाचे दाने आदी साहित्य प्रियाच्या पायावर फेकले. या प्रकाराने भयभित झाल्याने सदर महिलेने आरडा ओरड केली. यावेळी लगतच्या कारखान्यातील जीवन वाघमारे, सूरज बन, गजानन गिरी यांनी तिच्या घराकडे धाव घेतली असता आरोपींनी तेथून पळ काढला. सदर महिलेने हा प्रकार भ्रमणध्वनीवरून पतीला सांगितल्यानंतर शहर पोलिस ठाणे गाठून तक्रार दिली. त्यावरून पोलिसांनी चारही आरोपीविरुद्घ भादंवि कलम ४४८, ५०९, ५०६, ३४ व महाराष्टÑ अंधश्रध्दा व अधोरी कृत्य प्रतिबंधक कायद्या अंतर्गत गुन्हा दाखल केला असून तपास सुरूआहे. यापूर्वी एका युवकाने अंबिकानगरातील महिलेला तुझ्या पतीचा अपघाती मृत्यू टाळण्यासाठी पूजा करावी लागेल असे सांगितले होते. त्यासाठी  ५० हजार रुपये या युवकाने उकळून फसवणूक केली होती. अंधश्रध्देतून शहरात घडलेली ही दुसरी घटना आहे.