नाशिक – नाशिकच्या दिंडोरी तालुक्यातील गोळशी येथे आरती हॉटेलमध्ये काल (बुधवारी) रात्री दहाच्या सुमारास सुरू झालेल्या वादाचे पर्यावसान हाणामारीत झाले आणि हॉटेल मालकासह तीनजणांचा मृत्यू झाला.
हॉटेलमध्ये वीटभट्टी आणि ट्रक व्यावसायिक किरण ढाकणे, ट्रकचालक श्रीराम शिखरे आणि अन्य एक व्यक्ती असे तिघेजण रात्री दहाच्या सुमारास जेवत होते. त्यावेळी टेबलवर शिखरे यांनी उलटी केली. हॉटेलमालक रमेश सोनवणे यांनी शिखरे यांना टेबल साफ करुन देण्यास सांगितले. यावरुन शिखरे आणि सोनवणे यांच्यात वाद झाला. वादाचे पर्यावसान हाणामारीत झाले आणि शिखरे यांचा मृत्यू झाला. ही घटना कळताच शिखरे यांना ओळखणा-या दहा-पंधरा जणांचा जमाव हॉटेलमध्ये आला. जमावाने केलेल्या हल्ल्यात हॉटेल मालक सोनवणे आणि हॉटेलचा आचारी मनोज गंभीर जखमी झाले. दोघांना नाशिक जिल्हा रुग्णालयात दाखल करण्यात आले. तिथेच त्यांचा मृत्यू झाला. पोलिसांनी या प्रकरणी चौकशीसाठी काहीजणांना ताब्यात घेतले आहे आणि घटनास्थळी कडेकोट पोलिस बंदोबस्त ठेवला आहे. हॉटेलमधील घटनेनंतर गोळशी आणि आसपासच्या भागात तणावाचे वातावरण आहे.