डॉ दिलीप चव्हाण

कल्याण -भिवंडीच्या इंदिरा गांधी मेमोरियल या सरकारी हॉस्पिटलात अमिकासीन या औषधामुळे १८ मुलांना उलट्या आणि जुलाब सुरू झाल्याची घटना रविवारी घडली. त्यामुळे पालक प्रचंड घाबरले होते. सुदैवाने हे इंजेक्शन कुणाच्याही जीवावर बेतले नाही. प्रसंगावधान राखत डॉक्टरांनी कॉन्ट्रन्स इंजेक्शन देत परिस्थीती नियंत्रणात आणून अनर्थ टाळला.
बदलत्या हवामानामुळे थंडी, ताप आणि न्युमोनियाच्या पेशंटमध्ये वाढ झाली असून भिवंडीच्या आयजीएम हॉस्पिटलमध्ये १ ते ७ वयोगटातील ३५ मुलांना उपचारासाठी दाखल करण्यात आले आहे. शनिवारी रात्री १० वाजता ड्युटीवर असलेल्या नर्सने नेहमीप्रमाणे यातील काही मुलांना अमिकासीन औषधाचा डोस दिला. त्यानंतर लगेचच यातील १८ मुलांना थंडी, उलट्या जुलाबचा त्रास होऊ लागला. त्यांचे हात पाय आखडले. यामुळे घाबरलेल्या पालकांनी हॉस्पिटलमध्ये एकच गोंधळ केला. मात्र हॉस्पिटलमधील वरिष्ठ डॉक्टरांनी तत्काळ बालरुग्ण विभागात धाव घेत सर्व मुलांवर उपचार सुरू केले. यातील दोन मुलांची प्रकृती अधिकच खालावल्यामुळे त्यांना ऑक्सिजन देण्यात आला. सुमारे ३ तासांनतर या मुलांच्या प्रकृतीत हळुहळू सुधारणा झाल्याचे डॉक्टरांनी सांगितले.
औषधांची तपासणी
या इंजेक्शनची मुदत संपलेली नव्हती, असा दावा डॉक्टर्स करत असले, तरी मुदत उलटल्यामुळेच ही रिअॅक्शन झाली असावा, असा संशय व्यक्त केला जात आहे. ही इंजेक्शन तपासणीसाठी पाठविण्यात आली असून त्याचा अहवाल आल्यानंतर रिअॅक्शनचे कारण कळू शकेल, अशी माहिती मुख्य वैद्यकीय अधिकारी नितीन मोकाशी यांनी सांगितले.