वाळूज – कुवेतमध्ये नोकरी मिळवून देण्याचे अमिष दाखवून ४० तरुणांची सुमारे ४० लाख रुपयांची फसवणूक झाल्याचे उघड झाले आहे. वाळूज एमआयडीसी भागात उघडलेल्या एका कंसल्टन्सी चालकाने त्यांची फसवणूक करून पलायन केले आहे. दरम्यान फसवणूक झालेल्या तरूणांनी वाळूज एमआयडीसी पोलिसात धाव घेतली आहे.
आकाश शर्मा याने काही महिन्यांपूर्वी साई इंटरनॅशनल सर्व्हिस (कन्सल्टन्सी) या नावाने बजाजनगर परिसरात कार्यालय उघडले होते. या कार्यालयातून कुवेत येथील कुवैत अॅटोमोटीव्ह इम्पोर्ट कंपनीत टर्नर, फिटर, इलेक्ट्रिशियन, कॉम्युटर ऑपरेटर, वेल्डर, चालक, टुल अॅन्ड डाय मेकर, फर्निचअर, काच स्लाईडिंग, प्लंबर आदी पदासाठी नोकरी मिळवून देण्याचे आमिष दाखवले. त्यांच्याकडून ८० हजारांपासून एक लाख रुपयांपर्यंत रक्कम घेतली. विदेशात जाण्यासाठी पासपोर्ट तयार करण्यासाठी रक्कम लागेल, असे त्याने सांगितले होते. त्याने तरुणांना व्हिसा, विमानाचे तिकीट, जॉब अॅग्रिमेंटची झेरॉक्स दाखवून स्वतःजवळच ठेवली.
दरम्यान त्याचा सुपरवायझर मोहम्मद अफरोज याने ४० जणांना शुक्रवारी (२८ नोव्हेंबर) बोलावले होते. ही मंडळी तेथे पोहोचल्यानंतर शर्माने त्यांना भेटणे टाळून सुपरवायझरमार्फत सेंट्रल गेस्ट हाऊस या लॉजवर थांबावे असे कळविले होते. काही पासपोर्टवर सह्या व शिक्के आण्ण्यासाठी जात असल्याचे सांगितले. त्याला शनिवारी (२९ नोव्हेंबर) फोन केला, पण त्याने अर्ध्या तासात येतो असे नंतर फोन बंद केला. रात्री दहाच्या सुमाराला लॉज मालकाने तुमची बुकिंग रात्री बारापर्यंत असल्याचे सांगून बाहेर पडण्यास सांगितले.