पुणे , दि. ६ – राज्य माध्यमिक आणि उच्च माध्यमिक शिक्षण मंडळाच्या वतीनं मार्च महिन्यात घेण्यात आलेल्या दहावीच्या परीक्षेचा ऑनलाइन निकाल येत्या ८ जून रोजी दुपारी एक वाजता जाहीर होणार आहे.
दहावीच्या निकालाच्या तारखांविषयी गेल्या आठवड्यापासून व्हॉट्सअॅपवर वेगवेगळे मेसेज फिरत होते. त्यामुळे विद्यार्थी आणि पालकांमध्ये संभ्रमाचं वातावरण निर्माण झालं होतं. त्याची गंभीर दखल घेऊन, शनिवारी दहावीच्या निकालाची तारीख जाहीर करण्याचं बोर्डाचे अध्यक्ष गंगाधर म्हमाणे यांनी स्पष्ट केलं होतं. त्यानुसारच, येत्या ८ जूनला दहावीचा ऑनलाइन निकाल जाहीर होईल, अशी घोषणा बोर्डानं केली आहे. मुंबई, पुणे, कोकण, नागपूर, अमरावती, औरंगाबाद, लातूर, नाशिक, कोल्हापूर या नऊ विभागीय मंडळांतर्फे मार्चमध्ये घेण्यात आलेल्या दहावीच्या परीक्षेला यंदा राज्यभरातून १७ लाख ३२ हजार ८९८ विद्यार्थी बसले होते. त्याच्या करिअरची दिशा परवाच्या निकालातून ठरणार आहे. यंदाच्या बारावीच्या निकालाची विक्रमी टक्केवारी पाहता, दहावीचा निकालही नवा विक्रम रचतो का, याबद्दल उत्सुकता आहे.