नागपूर : न्यू दिल्ली -पाँडीचेरी एस्क्प्रेसमधून नागपूर मार्गे कासवांची तस्करी होत असल्याचा प्रकार समोर आला आहे. याविषयी गुप्त माहिती रेल्वे पोलिसांच्या स्थानिक गुन्हे शाखेला मिळाली. त्यानुसार त्यांनी ही गाडी स्टेशनवर येताच पोलिसांनी तपासणी सुरु केली. त्यांना एस ९ क्रमांकाच्या डब्यातील बर्थ क्रमांक १५ खाली ठेवलेली बॅग संशयास्पद वाटली. पोलिसांनी तपासणी केली असता त्यात शंभर कासव आढळले. काही कासव मृतावस्थेत होते. याप्रकरणी पोलिसांनी दोघांना अटक केली. शिवकुमार सिद्दरांगु (२१) आणि ब्रभातबिहारी चंद्राबाबू (२७) अशी आरोपींची नावे आहेत. कासव वनविभागाकडे सुपूर्त करण्यात आले आहेत.

बीजिंग- दक्षिण चीनमधील हुबेई प्रांतातील यांगजी नदीत सोमवारी रात्री पर्यटकांना घेऊन जाणारे ‘इस्टर्न स्टार’ जहाज वादळामुळे बुडाले. जहाजावर ४५८ प्रवासी असून आत्तापर्यंत १० जणांची सुटका करण्यात यश आले आहे. बेपत्ता पर्यटकांचा शोध घेण्यात येत आहे.
चीनमधील प्रसारमाध्यमांनी दिलेल्या माहितीनुसार, पूर्वेकडील नानजिंग शहरापासून चाँगकिंग शहराकडे हे जहाज जात होते. या जहाजातून ४५८ प्रवासी प्रवास करत होते.
वादळामुळे जहाज बुडाल्याची माहिती मिळाल्यानंतर बचावकार्य तत्काळ राबविण्यात आले. मात्र सोसाट्याचे वारे आणि पाऊस अशा खराब हवामानामुळे बचावकार्यात अडथळे येत आहेत.
यातील काही पर्यटक पोहत किना-यावर आले, तर काही जणांना मच्छिमारांनी वाचविले आहे. मात्र अद्यापही ४०० जण बेपत्ता असल्याचे समजते.