मुंबई- कॉम्प्यूटर आणि स्मार्टफोनच्या आहारी गेलेल्या १५ वर्षाच्या मुलाने आईने कॉम्प्यूटर बंद केल्याने तिच्यावर चाकूने हल्ला केल्याची धक्कादायक घटना पुण्यात घडली आहे. सुदैवाने या हल्ल्यात कोणीही जखमी झाले नसून या मुलावर सध्या मनोविकातज्ज्ञ उपचार करत आहेत.
पुण्यात राहणा-या १५ वर्षीय मुलाला त्याच्या आईवडिलांनी तीन वर्षांपूर्वी मोबाईल घेऊन दिला होता. सुरुवातीला फक्त अर्धा तास सर्फिंग आणि गेम खेळणारा हा मुलगा काही महिन्यांनी दिवसातील निम्मावेळ मोबाईल व कॉम्प्यूटरवरच खर्ची करु लागला. या नादात त्याने शाळेलाही दांडी मारली. मुलाच्या आईवडिलांनी त्याच्याशी बोलण्याचा प्रयत्न केला असता त्याने प्रतिसाद दिला नाही. याऊलट मला एकटे सोडून द्या, मला डिस्टर्ब करु नका असे तो सांगायचा. अखेरीस त्याच्या आईवडिलांनी मुलगा ऐवढा वेळ खोलीत बसून काय करतो हे बघण्यासाठी त्यावर पाळत ठेवली. यात तो कॉम्प्यूटर व मोबाईलद्वारे दिवसभर इंटरनेटवर चॅटिंग आणि सर्फिंग करत असल्याचे समोर आले. धक्कादायक बाब म्हणजे मोबाईलमध्ये इंटरनेट रिचार्ज करण्यासाठी त्याने आईवडिलांच्या बॅगेतून पैसे चोरल्याचे आढळले.
काही दिवसांपूर्वी मुलाची आई ज्या स्वतः पुण्यातील शाळेत शिक्षिका आहेत त्यांनी मुलाकडून मोबाईल हिसकावून घेण्याचा प्रयत्न केला व त्याचा कॉम्प्यूटरही बंद केला. यामुळे संतापलेल्या मुलाने घरातील चाकूने आईवरच हल्ला करण्याचा प्रयत्न केला. मात्र त्यांनी आरडाओरड सुरु केल्याने मुलाच्या वडिलांनी खोलीत धाव घेत त्याच्याकडून चाकू खेचून घेतला व पुढील अनर्थ टळला. या घटनेनंतर आईवडिलांनी त्यांच्या मुलाला मुंबईतील भायखळा येथील रुग्णालयात दाखल केले. रुग्णालयात त्याच्यावर मनोविकारतज्ज्ञांनी उपचार केले असून यात त्याला एकदा शॉक ट्रीटमेंटही द्यावी लागली आहे. कॉम्प्यूटर व मोबाईल फोनच्या आहारी गेलेल्या या मुलाचे मानसिक संतूलन ढासळल्याने ही घटना घडली अशी माहिती रुग्णालयातील डॉक्टरांनी एका इंग्रजी वृत्तपत्राला दिली.

पूराचे पाणी ओसरल्यानंतर भाविकांसाठी खुले झालेले वैष्णव देवी मंदिराचे मुख्य प्रवेशव्दार. जम्मू-काश्मीरमध्ये आलेल्या महापूरानंतर वैष्णवदेवी यात्रा स्थगित करण्यात आली होती.

मुजफ्फरनगर – लोकसभा निवडणुकीदरम्यान मुजफ्फरनगर येथे प्रचार करत असताना प्रक्षोभक भाषण केल्याप्रकरणी भाजपचे राष्ट्रीय अध्यक्ष अमित शहा यांच्याविरुद्ध पोलिसांनी आरोपपत्र दाखल केलं आहे. उत्तर प्रदेशमध्ये ४ एप्रिल रोजी शहा यांनी धार्मिक भावना भडकावणारे एक वादग्रस्त वक्तव्य केलं होतं. जाट समाजाच्या लोकांनी आपल्या अपमानाचा बदला घेण्याचं आव्हानं शहा यांनी एका प्रचारसभेत केलं होतं. तत्पूर्वी मुजफ्फरनगर येथे जातीय दंगल होऊन गेली होती. त्यामुळे परिसरात तणाव कायम होता.
मुजफ्फरनगर येथील कोर्टात अमित शहा यांच्या विरोधात चार्जशीट दाखल करण्यात आली आहे. शहा यांच्याविरुद्ध धार्मिक भावना दुखविण्याचा आरोप करण्यात आला आहे. भाजप नेते मतांचं ध्रुविकरण करण्यासाठी अशाप्रकारचे प्रक्षोभक भाषण करत असल्याचा आरोप विरोधकांनी केला होता. या आरोपपत्रात अमित शहा यांच्या विरोधात अनेक गंभीर कलमं लावण्यात आली असल्याचं सूत्रांचे म्हणणं आहे. लोकसभा निवडणुकीदरम्यान द्वारिका पुरी येथील एका घरात आयोजित सभेत शहा यांनी हे वादग्रस्त वक्तव्य केलं होतं. त्यानंतर नई मंडी येथे त्यांच्याविरोधात तक्रार दाखल करण्यात आली होती. लोकसभा निवडणुकीपूर्वी अमित शहा यांच्याकडे भाजपने उत्तर प्रदेशचे प्रभारीपद सोपविलं होतं.प्रक्षोभक भाषण करण्याबाबत सध्या चर्चेत असलेले अमित शहा हे भाजपचे दुसरे नेते आहेत. यापूर्वी भाजपचे खासदार आदित्यनाथ यांच्याविरुद्ध निवडणूक आयोगाने कारवाई केली असून भाषणांमध्ये प्रक्षोभक भाषा वापरत असल्याचं सांगत यूपीत त्यांच्यावर भाषणबंदी लावण्यात आली आहे.