युवक कॉंग्रेसच्या लोकसभा क्षेत्रीय अध्यक्षपदी राहुल ठाकरे
युवक कॉंग्रेस निवडणूक
यतवमाळ – यवतमाळ-वाशीम लोकसभा क्षेत्रात आज शुक्रवारी पार पडलेल्या युवक कॉंग्रेस पदाधिकाºयांच्या निवडणुकीत पुनश्च राहुल ठाकरे विराजमान झाले़ तब्बल १ हजार ४४ बुथस्तरीय युवक मतदारांनी ठाकरे यांना भरीव मते देत आपली पसंती दिली़
कॉंग्रेसमध्ये लोकशाही रुजावी म्हणून राहुल गांधी यांनी युवक कॉंग्रेसच्या पदाधिकाºयांची निवड निवडणुकीद्वारे करण्याचा पायंडा पाडला आहे़ त्या पार्श्वभूमीवर आज यवतमाळ-वाशीम लोकसभा क्षेत्रीय युवक कॉंग्रेसच्या निवडणुकीचे मतदान घेण्यात आले़ राहुल ठाकरे यांना पुनश्च ४४० बुथस्तरीय युवक मतदारांनी आपली मते दिल्याने ते अध्यक्षपदी विराजमान झाले़ वाशीम येथील गजानन भगत यांना १६० मते पडली असून, ते युवक कॉंग्रेसच्या उपाध्यक्षपदी निवडले गेले आहे़ यवतमाळातील अ‍ॅड़ रोहीत देशमुख यांना तिसºया पसंतीची १३५ मते पडल्याने लोकसभा क्षेत्राच्या महासचिवपदी ते निवडले गेले आहे़ मंगरुळपीर येथील श्रीहरी इंगोले यांना ८१, अनुसूचित जाती प्रवर्गातून नितीन गुघाने यांना ७५, वैभव जवादे ३५ तर मोहदा येथील रिजवान शेख यांना अल्पसंख्यांकाच्या प्रवर्गातून ३३ मते मिळाल्याने या सर्वांना युवक कॉंग्रेसचे सरचिटणीसपदी विराजमान होता आले़

प्राणघातक हल्ला;आरोपीस तीन वर्ष सक्तमजुरी
पांढरकवडा – झरी तालुक्यातील खरबडा येथील व्यक्तीवर प्राणघातक हल्ला करणाºया एका आरोपीला तीन वर्ष सक्तमजुरीची शिक्षा ठोठावली. पांढरकवडा येथील सत्र न्यायाधिश पी. एम. दुनेवार यांनी आज हा निकाल दिला.
संतोष नरसिंग जागरतवार रा. खरबडा असे शिक्षा झालेल्या आरोपीचे नाव आहे. १२ आॅगस्ट २००७ रोजी सकाळी ९.३० वाजताचे दरम्यान आरोपी संतोष व त्याचे वडील नरसिंग जागरतवार हे दोघे बैलबंडीने जात होते. अशातच शेख फकीर महंमद यांचे घराचे भिंतीला लागून बैल गाडी गेल्याने त्याच्यात वाद निर्माण झाला. यावेळी संतोषने शेख फकीर यांना मारहाण केली व त्याचे वडील नरसिंग याने मारहाण करण्यास चिथावनी दिली. यामध्ये शेख याना गंभीर दुखापत होऊन ते कोमात गेले होते. याप्रकरणी पाटण पोलिसांनी आरोपीविरुद्घ भादंवि कलम ३०७, ५०६,५०४ अंतर्गत गुन्हा दाखल केला. पोलिसांनी आरोपीस अटक करून न्यायालयात दोषारोपपत्र सादर केले. पांढरकवडा येथील सत्र न्यायाधिश पी. एम. दुनेवार यांच्या न्यायालयात या प्रकरणाची सुनावणी पार पडली. यामध्ये सरकारी पक्षाच्या वतीने एकुण १० साक्षीदार तपासण्यात आले. सरकारी पक्षाचे साक्ष पुरावा व युक्तीवाद ग्राह्य धरून न्यायालयाने आरोपी संतोष यास दोषी मानुन भादविचे कलम ३२५ अंतर्गत तीन वर्ष सक्तमजुरी व १ हजार रुपये दंडाची शिक्षा ठोठावली. सरकारी पक्षाच्या वतीने सरकारी अभियोक्ता प्रशांत मानकर यांनी काम पाहिले.

२४ पोलीस अधिकाºयांवर बदलीचे गंडातर
निवडणूक आयोगाचा दणका
यवतमाळ
दि. ३१ (स्थानिक प्रतिनिधी)
…………………………..
लोकसभा निवडणुकीच्या पाश्वर्भूमीवर निवडणूक आयोगाकडून आलेल्या परिपत्रकानुसार जिल्ह्यातील तीन वर्षे पूर्ण झालेल्या पोलिस अधिकाºयांच्या बदल्या कराव्या लागणार आहेत. निवडणूक आयोगाच्या आदेशाने जिल्ह्यातील २४ पोलीस अधिकाºयांवर बदलीचे गंडातर आले आहे.
आगामी लोकसभा निवडणूकीच्या पार्श्वभूमिवर केंद्रीय निवडणूक आयोगाकडून पोलिसांसाठी एक परिपत्रक जाहिर केले. त्यामध्ये म्हटले आहे की, गृह (स्वत:च्या) जिल्ह्यात नियुक्तीस असलेले आणि ३१ मे २०१४ रोजी एका जिल्ह्यात तीन वर्षे पूर्ण झालेल्या अधिकाºयायांची जिल्हाबाहेर बदली करावी. त्यानुसार माहिती संकलित करण्याचे काम सुरू आहे. जिल्ह्यात यानुसार बदल्या झाल्यास सुमारे १६ पोलीस निरीक्षक व ८ सहा. पोलीस निरीक्षक जिल्ह्याबाहेर बदलून जाण्याची शक्यता आहे. या परिपत्रकाचा चुकीचा अर्थ लावला जात असल्याचे काही अधिकाºयांचे म्हणणे आहे. त्यांच्या मतानुसार एक पोलिस ठाणे म्हणजे एक पद गृहित धरले जावे. एका पदावर तीन वर्षे पूर्ण झाली असतील, तर बदली करावी. त्यांना जिल्ह्याबाहेर बदलता कामा नये. असे झाले तरी या अधिकाºयांनी आणखी एक भीती व्यक्त केली आहे. ती म्हणजे अशा पद्धतीने बदल्या झाल्या तर गोंधळ उडणार आहे. त्या भागाची माहिती झालेले अधिकारी बदलून गेल्याने नव्या अधिकाºयांना तेथे माहिती घेऊन काम करणे कठीण जाणार आहे. त्याचा परिणाम कायदा व सुव्यवस्थेवर होऊ शकतो. अशा बदल्या करायच्या असतील तर त्या किमान एक वर्षे आधी केल्या जाव्यात, अशीही अधिकाºयांची अपेक्षा आहे.सध्या पोलिस अधिकाºयांमध्ये याच एका विषयाची चर्चा सुरू आहे. लोकसभेची निवडणूक जाहीर झाल्याने पूर्व तयारी म्हणून प्रतिबंधात्मक कारवाई आणि गोपनीय माहिती काढण्याचे काम केले जाते. मात्र, आपली बदली होणार आहे, तर कशाला पूर्व तयारी करा, अशा भावनेतून अधिकारी याकडे दुर्लक्ष करीत असल्याचे दिसून येते. याचा परिणाम निवडणूक काळातील कायदा व सुव्यवस्थेवर होऊ शकतो. राज्य सरकारने ठरविलेल्या धोरणानुसार कनिष्ठ अधिकाºयांच्या बदल्यांचे अधिकार पोलिस महासंचालकांना आहेत. त्यामुळे या बदल्यांचा प्रस्ताव महासंचालक तयार करून तो अंतिम मंजुरीसाठी सरकारकडे पाठवितील. केंद्रीय निवडणूक आयोगाचे परिपत्रक आले आहे. त्यानुसार जिल्ह्यात तीन वर्षे पूर्ण होणाºया अधिकाºयांची माहिती मागविली आहे. १५ फेबु्रवारीपूर्वी पोलिस निरीक्षक, सहा. पोलीस उपनिरीक्षकांच्या बदल्या करून अहवाल केंद्रीय निवडणूक आयोगाकडे पाठवावा अशा सुचनाही दिल्या आहे. निवडणूक आयोगाच्या आदेशाने जिल्ह्यातील २४ पोलीस अधिकाºयांवर बदलीचे गंडातर आले आहे.

मुंबईचे पोलिस आयुक्त सत्यपाल सिंह याचा राजीनामा
मुंबई- मुंबईचे पोलिस आयुक्त सत्यपाल सिंह याचा राजीनामा स्वीकारण्यात आल्याचे गृहमंत्री आर.आर.पाटील यांनी शुक्रवारी सांगितले. नव्या आयुक्तांची नियुक्ती होईपर्यंत हेंमत नगराळे यांच्याकडे तात्पुरती जबाबदारी देण्यात आली आहे.
सिंह हे पुढील वर्षी निवृत्त होणार होते. मात्र येत्या लोकसभा निवडणुकीमध्ये उमेदवार म्हणून उभे राहणार असल्याच्या पार्श्‍वभूमीवर त्यांनी राजीनामा दिला आहे.१९८०च्या तुकडीचे आयपीएस अधिकारी असलेले सिंह यांनी गुरुवारी राज्य गृह मंत्रालयाकडे राजीनामा सोपवला. तेथून सिंह यांचा राजीनामा मुख्यमंत्री कार्यालयाकडे पाठवण्यात आला आहे.सिंह हे मुंबई किंवा त्यांचे मूळ राज्य असलेल्या उत्तर प्रदेशमधून लोकसभा निवडणूक लढवण्याची शक्यता आहे. सिंह यांना भारतीय जनता पक्ष आणि आम आदमी पक्षाकडून लोकसभा निवडणुकीचे तिकीट मिळण्याची शक्‍यता आहे.

उत्तराखंडचे मुख्यमंत्री बहुगुणा यांचा राजीनामा
डेहराडून- उत्तराखंडचे मुख्यमंत्री विजय बहुगुणा यांनी शुक्रवारी राजीनामा दिला. पक्षातील वरिष्ठांच्या इच्छेनुसार मी राजीनामा देत असल्याचे बहुगुणा यांनी यावेळी सांगितले. बहुगुणा यांनी राज्यपाल अजीझ कुरेशी यांची भेट घेऊन राजीनामा दिला. तसेच कार्यवाहक प्रदेश अध्यक्ष यशपाल आर्या यांच्याकडेही राजीनामा सोपवला आहे.
बहुगुणा यांना मुख्यमंत्रीपदावरुन पायउतार व्हावे लागणार याची ब-याच दिवसांपासून चर्चा होती. गेल्या दोन वर्षांपासून उत्तराखंडचे मुख्यमंत्री म्हणून ते निष्प्रभ ठरले होते. विजय बहुगुणा यांच्या जागी केंद्रीय मंत्री हरीश रावत, खासदार सतपाल महाराज किंवा ज्येष्ठ मंत्री असलेल्या इंदिरा ह्रदयेश यांची मुख्यमंत्रीपदी निवड होण्याची शक्यता आहे. केंद्रीय मंत्री हरीश रावत यांचा पत्ता कट झाल्यास ते राज्यातील कॅबिनेट मंत्री प्रीतम सिंह यांच्या नावाची शिफारस करण्याची शक्यता आहे.

अपघातात दोन ठार
यवतमाळ : भरधाव कार झाडावर आदळून झालेल्या भीषण अपघातात दोन तरुण जागीच ठार तर दोन जण गंभीर जखमी झाले. अपघाताची ही घटना प्रजासत्ताक दिनाच्या पहाटे तालुक्यातील सरुळ गावाजवळ घडली. मृत दोघेही यवतमाळचे रहिवासी होते.
सागर उदय देशमुख (२0) रा. दत्तचौक यवतमाळ आणि स्वप्निल अशोक लोखंडे (२0) रा. वैद्यनगर यवतमाळ अशी मृतांची नावे आहे. तर विक्की अशोक सौरंगपते (२0) व स्वप्निल उईके (२0) रा. यवतमाळ अशी जखमींची नावे आहे. २५ जानेवारीच्या मध्यरात्री हे चौघे मित्र यवतमाळवरून कारने (एमएच-४0-टीसीडी-९९९) आर्वी येथे जात होते. बाभूळगावमार्गे जात असताना सरुळ गावापुढील एका वळणावर कार लिंबाच्या झाडावर जाऊन आदळली. धडक एवढी जबरदस्त होती की, कारचा चुराडा झाला. या अपघाताची माहिती बाभूळगाव पोलिसांना होताच पोलीस उपनिरीक्षक प्रभाकर बाळबुद्धे, सचिन शेलोकार, वाहतूक पोलीस अनिल सोळंके घटनास्थळी दाखल झाले.
झाडामध्ये फसलेली गाडी त्यांनी ओढून काढली. त्यावेळी कारमधील सागर व स्वप्निल मरण पावल्याचे आढळून आले. तर स्वप्निल उईके व विक्की सौरंगपते गंभीर जखमी असल्याचे आढळून आले. जखमींना रुग्णालयात हलविण्यात आले.
सागर देशमुख हा वडिलांच्या ट्रॅव्हल्स व्यवसायात मदत करायचा तर स्वप्निल लोखंडे हा दत्तचौकात असलेल्या वडिलांचा हॉटेल व्यवसाय सांभाळायचा. स्वप्निलच्या बहिणीचे लग्न ठरले असून सर्व परिवार लग्नाच्या तयारीत होता. घटनेने दत्तचौकात शोककळा पसरली.

……………………………………..

‘याहू’चे २७ कोटीहून अधिक ईमेल पासवर्ड हॅक
न्यूयॉर्क- ‘याहू’ संकेतस्थळावरील ईमेलचे यूझरनेम आणि पासवर्ड हॅक झाल्याची धक्कादायक बाब उघडकीस आली आहे. पासवर्ड हॅक झाल्याच्या वृत्ताला याहू कंपनीने दुजोरा दिला असला तरी नेमके किती इमेलचे पासवर्ड हॅक करण्यात आले आहेत त्याबद्दल मात्र याहूने कोणताही माहीती दिली नाही.
गुगलच्या जी-मेलपाठोपाठ ‘याहू’च्या मेल वापरणा-यांचा जगात दुसरा क्रमांक आहे. जगभरात २७ कोटी ३० लाख लोक याहू मेलचा वापर करतात. एकट्या अमेरिकेत आठ कोटी दहा लाख ई-मेलधारक असल्याचे फर्मस्कोर या संस्थेने केलेल्या संशोधनात आढळले आहे. हॅकर्स बनावट मॅसेज पाठवून इमेलचे पासवर्ड हॅक करत असल्याचे निदर्शनास आले आहे.
‘याहू’ने आपल्या अधिकृत ब्लॉगवर याची माहिती दिली. पासवर्ड हॅक केलेल्यांनी ‘याहू’च्या ईमेल अकाऊंटमधील नावे आणि ईमेल आयडी बघितले आहेत. तसेच या अकाऊंटमधून पाठवण्यात आलेले मेल्सही या चोरट्यांनी तपासले आहेत. तसेच ईमेल अकाऊंटधारकांकडून अधिक माहिती मिळवण्यासाठी हे चोरटे बनावट मेल पाठवू शकतात अशी शक्यताही आहे. त्यामुळे कोणत्याही मेलला उत्तर देताना सावधगिरी बाळगावी असे याहूकडून स्पष्ट करण्यात आले आहे.