पुरी- उडिसामधील पुरी येथे भगवान जगन्‍नाथाच्‍या रथयात्रेत शनिवारी चेंगराचेंगरी झाली असून यामध्‍ये दोन भाविक ठार, तर 14 जण जखमी झाले आहेत. जखमींना कटकच्‍या रूग्‍नालयात दाखल करण्‍यात आले आहे. मृतांमध्‍ये विजयलक्ष्मी मोहंती (वय 65) या महिलेचा समावेश आहे.
या रथयात्रेत भगवान जगन्नाथ, त्यांचे बंधू भालभद्र आणि बहिण सुभद्रा यांचे तीन रथ असतात. भगवान जगन्नाथाचा रथ ओढणाऱ्या भक्तांना पहांडी असे म्हणतात. बाराव्या शतकापासूनची परंपरा असलेल्‍या या रथयात्रेला सकाळी मोठ्या थाटात सुरूवात झाली. लाखो भाविक रथ ओढत तीन किलोमीटर अंतरावर असलेल्या गुंदिचा मंदिराच्‍या दिशेने निघाले असताना ही चेंगराचेंगरी झाली आहे.

शासन व शिवसेना शेतकऱ्यांना समर्थपणे उभे करणार
यवतमाळ, दि.18 : पाऊस नसल्याने शेतकरी हवालदिल झाला आहे. त्याची अवस्था आणि अस्वस्थता आम्ही समजू शकतो. असे संकटं येतील आणि जातील, परंतु एकदा गेलेला जीव परत येत नाही. त्यामुळे कितीही संकटं आली तरी आत्महत्येचा विचार मनात आणू नका, शासन व शिवसेना पक्ष वैयक्तिकस्तरावर आपल्या सोबत आहे. काय लागेल ती मदत आम्ही करू, असा भावनिक आधार देत, राज्याचे परिवरहन मंत्री दिवाकर रावते यांनी आज दारव्हा तालुक्यातील हातणी येथील आत्महत्याग्रस्त शेतकरी स्व. उत्तमराव चौधरी यांच्या कुंभारकिन्ही शिवारातील शेतात बियाण्यांअभावी रखडलेली पेरणी पूर्ण करून दिली. यावेळी जिल्ह्याचे पालकमंत्री संजय राठोड हे प्रामुख्याने उपस्थित होते.
शिवसेना पक्षप्रमुख उद्धव ठाकरे यांच्या आदेशानुसार ना. दिवाकर रावते यांनी अडचणीतील शेतकऱ्यांना विशेषकरून आत्महत्याग्रस्त शेतकरी कुटुंबांना ‘पेरते व्हा’ असा संदेश देत त्यांना पक्षातर्फे शेतीसाठी सर्वतोपरी सहाय्य करण्यासाठी अभिनव असे सकारात्मक आंदोलन सुरू केले. 22 जून रोजी यवतमाळ जिल्ह्यातील काही आत्महत्याग्रस्त शेतकरी कुटुंबियांच्या सांत्वना भेटी दरम्यान अनुभवलेल्या शेतकऱ्यांच्या व्यथांनी अस्वस्थ होऊन ना. दिवाकर रावते व पालकमंत्री संजय राठोड यांनी जिल्ह्यातील जवळपास 3 हजार 500 आत्महत्याग्रस्त शेतकरी कुटुंबियांना शिवसेना पक्षातर्फे शेतीसाठी सर्वेतोपरी सहाय्य करण्याची घोषणा केली. त्यानुसार पालकमंत्री संजय राठोड यांनी कृषी दिनाचे औचित्य साधून 1 जुलै रोजी यवतमाळ नजीकच्या इचोरी येथील आत्महत्याग्रस्त शेतकरी अंकूश खडके यांच्या शेतात परेणी करून या उपक्रमाची सुरूवात केली होती. तेव्हापासून जिल्ह्यात शिवसैनिकांमार्फत अनेक शेतकऱ्यांना या प्रकारे मदत सुरू आहे. शिवसेनापक्षप्रमुख उद्धव ठाकरे यांच्या वाढदिवसापर्यंत चालणाऱ्या या उपक्रमात दारव्हा तालुक्यातील कुंभारकिन्ही शिवारात आज कापूस दिंडीचे प्रणेते, राज्याचे परिवहन मंत्री दिवाकर रावते प्रत्यक्ष सहभागी झाले होते.
हातणी येथील शेतकरी उत्तमराव चौधरी यांनी 2005 मध्ये कर्जबाजारीमुळे आत्महत्या केली होती. त्यांच्या पश्चात पत्नी व दोन मुले असून यावर्षी पैशाअभावी त्यांची कुंभारकिन्ही शिवारातील चार एकर शेती पडीक होती. ही बाब दारव्हा तालुक्यातील शिवसैनिकांना समजताच या कुटुंबाला मदत करण्यासाठी शिवसैनिक सरसावले. त्यानुसार आज दुपारी ना. दिवाकर रावते, ना. संजय राठोड यांच्या उपस्थितीत चौधरी यांच्या शेतात सोयाबीनची पेरणी करण्यात आली. यावेळी मंदा उत्तमराव चौधरी या महिला शेतकऱ्यासह त्यांचा मुलगा संदीप उपस्थित होते. ना. रावते व ना. राठोड यांनी शेतातील दोन तास पेरून दिले. त्यानंतर ना. संजय राठोड यांनी ट्रॅक्टर चालवून पेरणी करून दिली.
यावेळी पत्रकारांशी बोलताना, ना. रावते यांनी, आमचे ‘पेरते व्हा’ हे आंदोलन सकारात्मक स्वरूपाचे असून, अडचणीतील शेतकऱ्यांना खऱ्या अर्थाने त्याच्या घरापर्यंत, शेतापर्यंत जाऊन मदत करण्यासाठी आयोजिलेले आहे. शासन शेतकऱ्यांना मदत करतच आहे, परंतु शिवसेना या पक्षाचीही प्रथम बांधिलकी ही शेतकरी आणि सामान्य माणसांशी आहे. त्यामुळे हे घटक अडचणीत असताना आम्ही स्वस्थ नाही बसू शकत. पक्ष नेतृत्वाच्या आदेशाने आमच्याकडून शक्य ती मदत करून शेतकऱ्यांना दिलासा देण्याचा प्रयत्न आम्ही प्रामाणिकपणे करत आहोत, असे सांगितले. शेतकरी जगाचा पोषिंदा आहे. त्याला तुमची सहानुभूती नको तर, आपल्या पाठीशी खंबीरपणे कोणीतरी उभे आहे, हा विश्वास हवा आहे. तो विश्वास आम्ही त्यांना देत आहो. ‘घार उडे आकाशी, चित्त तिचे पिलापाशी’, ही शिवसेनेची शेतकरी हिताची भूमिका ठरली आहे, असेही ते यावेळी म्हणाले. शेतकरी आत्महत्याग्रस्त कुटुंबातील महिलांना स्वयंनिर्भर करण्यासाठी व उपजिविकेचे कायम साधन मिळावे यासाठी अशा कुटुंबांना लवकरच शेळी, गाय, शिलाई मशीनचे वाटप करण्यात येणार असल्याचे ना. रावते यांनी सांगितले.
शिवसैनिकांनी आमचे पडीक शेत नांगरून, वखरून दिले. पेरणीसाठी बियाणे, खत आणून दिले. बँकेने कर्ज नाकारल्यानंतर शिवसेनेने मदत दिली नसती तर यावर्षी शेती केलीच नसती, अशी प्रतिक्रिया शेतकरी मंदा चौधरी यांनी व्यक्त केली. ना. रावते व ना. राठोड यांनी पेरणी केल्यानंतर शिवसेनेचे उपतालुका प्रमुख विनोद चव्हाण, सुधाकर सिंगाते, अनिल खडसे यांनी या शेतातील पेरणी पूर्ण करून दिली. या कार्यक्रमात शिवसेना जिल्हाप्रमुखद्वय विश्वास नांदेकर, संतोष ढवळे, उपजिल्हाप्रमुख श्रीधर मोहोड, अरविंद गादेवार, दारव्हा तालुका प्रमुख मनोज सिंगी, दिग्रसचे राजकुमार वानखडे, नेरचे गजानन भोकरे यांच्यासह शिवसेनेचे सर्व पदाधिकारी, शिवसैनिक सहभागी झाले होते.
मातोश्रीवरून विचारणा
ना. दिवाकर रावते व ना. संजय राठोड हे कुंभारकिन्ही येथे चौधरी यांच्या शेतात पोहचताक्षणीच मुंबई येथून ‘मातोश्री’वरून शिवसेना पक्षप्रमुख उद्धव ठाकरे यांचा ना. रावते यांना फोन आला. यावेळी ना. रावते यांनी चौधरी यांचे शेत पडीक कसे राहिले व आता त्या शेतात शिवसैनिकांच्या वतीने काय काय केले जाणार आहे, याची कल्पना दिली. पलिकडून उद्धव ठाकरे यांनीही संबंधित शेतकरी महिलेची आस्थेवाईपणे विचारपूस करून तिला हवी ती मदत द्या, अशा सूचना ना. रावते यांना केल्या. यावेळी उद्धव ठाकरे यांनी ना. संजय राठोड यांच्याशीही संवाद साधून ते करीत असलेल्या उपक्रमाचे कौतूक करीत या उपक्रमात गरजू शेतकऱ्यांच्या मदतीत सातत्य ठेवण्याच्या सूचना केल्या.

शिवसेनेकडून दारव्हा येथे ६५० कुटुंबांना मोफत बियाणे व खताचे वाटप
यवतमाळ, दि. १८ – समाजाभिमूख आणि सकारात्मक आंदोलनांपासून शिवसेना कधीही दूर जाणार नाही, अशी ग्वाही देत शेतकरी हितासाठी शिवसेनेचे उपक्रम सातत्याने सुरू राहणार आहेत. शेतकऱ्यांना समर्थपणे उभे करणे, हेच शिवसेनेचे पूर्वीपासूनचे ध्येय आहे, असे प्रतिपादन कापूस दिंडीचे प्रणेते, राज्याचे परिवहनमंत्री दिवाकर रावते यांनी केले. दारव्हा येथे शिवसेनेच्या वतीने आयोजित आत्महत्याग्रस्त शेतकरी कुटुंबिंयांना मोफत बियाणे व खत वाटपाच्या कार्यक्रमात ते बोलत होते. दारव्हा येथील निधी मंगल कार्यालयात आयोजित या कार्यक्रमात पालकमंत्री संजय राठोड, शिवसेनेचे जिल्हाप्रमुखद्वय विश्वास नांदेकर, संतोष ढवळे आदी प्रामुख्याने उपस्थित होते.
पुढे बोलताना ना. रावते म्हणाले की, पावसाअभावी राज्यातील शेतकरी भीषण संकटातून जात आहे. अनेक ठिकाणी पेरणी उलटली, पावसाअभावी पिके करपत आहेत. दुबार पेरणीचे संकट शेतकऱ्यांवर ओढवले आहे. अशा स्थितीत आपल्या पाठीमागे कोणाचीतरी भक्कम साथ शेतकऱ्यांना हवी आहे, आणि ‘पेरते व्हा’ या आंदोलनाच्या माध्यमातून शिवसेना त्यांच्या सोबत आहे, हेच सांगायला मी आज येथे आलो आहे, असे ते म्हणाले. प्रथम शेतकरी हित ही शिवसेना पक्षप्रमुख उद्धव ठाकरे यांची भूमिका आहे. पक्षनेतृत्वाच्या भूमिकेला अनुसरूनच राज्यातील शिवसैनिक शेतकऱ्यांच्या उत्थानासाठी परिश्रम घेत असल्याचे त्यांनी सांगितले. आत्महत्या करू नका एवढीच कळकळीची विनंती मी शेतकऱ्यांना करतो, अशी भावनिक सादही ना. रावते यांनी यावेळी उपस्थित शेतकऱ्यांना घातली.
याप्रंसगी बोलताना पालकमंत्री संजय राठोड यांनी, जिल्ह्यात १ जुलैपासून शिवसेनेच्या वतीने आत्महत्याग्रस्त शेतकरी कुटुंबियांना शेतीसंदर्भात सर्वतोपरी मदत करण्याचा उपक्रम सुरू असल्याचे सांगितले. आतापर्यंत जिल्ह्यातील ६० च्या वर शेतकऱ्यांना शिवसैनिकांनी पेरणी करून दिली आहे. शिवसेना सत्तेत नव्हती तेव्हाही, आणि आता सत्तेत असतानाही कायम शेतकऱ्यांच्या पाठीशी आहे. मात्र संकटकाळात शेतकऱ्यांनी आत्महत्येसारखा पर्याय निवडून कुटुंबाला उघड्यावर पाडू नये, असे आवाहन ना. संजय राठोड यांनी केले.
आजच्या कार्यक्रमात दारव्हा, दिग्रस, नेर तालुक्यातील ६५० शेतकऱ्यांना सोयाबीन, तूर बियाण्यांचे व एसएसपी खताचे वाटप करण्यात आले. यावेळी ना. दिवाकर रावते व ना. संजय राठोड यांच्या हस्ते लक्ष्मी धुरट, माया चव्हाण, कमला राठोड, अनंत राऊत, कमला भोकरे, सतवा चव्हाण, शांता शेरे आदी शेतकऱ्यांना बियाणे व खतांचे वाटप करण्यात आले. त्यानंतर स्थानिक पदाधिकाऱ्यांनी उपस्थित शेतकऱ्यांना बियाणे व खतांचे वाटप केले. शिवसेनेतर्फे सर्व शेतकऱ्यांच्या घरी हे बियाणे पोहचवून देण्यात आले. कार्यक्रमात तूर, सोयाबीन व खताच्या प्रत्येकी ६५० बॅग वाटप करण्यात आल्या. या कार्यक्रमाला शिवसेनेचे उपजिल्हा प्रमुख श्रीधर मोहोड, प्रवीण शिंदे, अरविंद गादेवार, उमाकांत पापीनवार, राजेंद्र साकला, तालुका प्रमुख मनोज सिंगी, राजकुमार वानखडे, गजानन भोकरे, शहर प्रमुख सुधीर दातीर, संजय चोपडे, रवींद्र भारती, मनोज ढगले, पंडीत राठोड, महिला आघाडी प्रमुख लता चंदेल, जि.प.सदस्य संगीता इंगोले, पं.स.सदस्य माणिक मेश्राम, महिला आघाडीच्या जयश्री मिरासे, साधना वाणी, आशा डोंगरे, विद्यार्थी सेनेचे जिल्हाप्रमुख राजू दुधे, गजेंद्र चव्हाण, धनंजय सारखे, रवी तरटे आदी शिवसेना पदाधिकारी, शेकडो शिवसैनिक व शेतकरी उपस्थित होते. कार्यक्रमाचे संचालन अजय गाडगे यांनी केले.

इंजेक्शन टोचून घ्यायचे म्हटले की, लहान मुलेच नाही तर मोठय़ांचेसुद्धा हातपाय थरूथरू लागतात. म्हणूनच बर्‍याचदा इंजेक्शनऐवजी गोळ्यांची मागणी केली जाते. मात्र या समस्येवरचा उपाय शास्त्रज्ञांनी शोधून काढला आहे. त्यांनी एक अतिशय सूक्ष्म सुई असलेली पट्टी विकसित केली असून ती त्वचेमध्ये सहजपणे मिसळून जाईल. जपानच्या ओसाका विद्यापीठातील शास्त्रज्ञांनी या अनोख्या प्रकारची पट्टी तयार केली असून वेदनादायी इंजेक्शनला ती पर्याय ठरेल, असा त्यांचा दावा आहे. त्वचेमध्ये मिसळणारी ही पट्टी लसीकरण अधिक सोपे, सुरक्षित आणि कमी वेदनादायी बनविण्यास सक्षम आहे. बहुतांश लस सुईच्या मदतीने त्वचा वा स्नायूंमध्ये दिल्या जातात. ही पद्धत प्रभावी असली तरी त्यासाठी व्यक्ती धिराची व दक्ष असणे गरजेचे असते. कारण सुई घेण्याच्या नावानेच अनेकांच्या अंगावर काटा उभा राहतो. मात्र ही नवी सूक्ष्म सुई असलेल्या पट्टीला विरघळणार्‍या पदार्थांपासून बनविण्यात आली आहे. त्यामुळे तिच्यामध्ये सुईशी संबंधित कोणत्याही धोक्याची शक्यता नाही. या पट्टीचा वापर करण्यासाठी वैद्यकीय दक्षतेचीही गरज नाही. या संशोधनाचे प्रमुख शिंसाकू नकागावा यांनी सांगितले की, या पट्टीची सुगमता पाहता लसीकरणाला चालना देण्यासाठीही तिचा वापर केला जाऊ शकेल.