नवी दिल्ली, – लोकसभा निवडणुकीत काँग्रेसच्या दारुण पराभवानंतर प्रियंका गांधी या  राजकारणात उतरणार असल्याची चर्चा आहे. या वर्षी होणा-या विधानसभा निवडणुकीनंतर प्रियंका गांधी यांना काँग्रेसमध्ये महत्त्वाचे पद दिले जाऊ शकते अशी माहिती सूत्रांनी दिली असून त्यांच्याकडे पक्षाचे महासचिव किंवा उत्तरप्रदेशमधील प्रदेशाध्यक्ष पदाचा कार्यभार दिला जाऊ शकतो.
लोकसभा निवडणुकीपासून प्रियंका गांधी यांनी राजकारणात यावे अशी मागणी काँग्रेसचेच कार्यकर्ते करत होते. मात्र प्रियंका गांधी यांनी राजकारणात येणार नसल्याचे स्पष्ट केले होते. लोकसभा निवडणुकीत त्यांनी रायबरेली आणि अमेठी या मतदारसंघांमध्येच सोनिया गांधी व राहुल गांधींसाठी प्रचार केला होता. निवडणुकीत काँग्रेसच्या दारुण पराभवानंतर राहुल गांधींच्या नेतृत्वावर काँग्रेसमधील अनेक नेत्यांनी प्रश्नचिन्ह उपस्थित केले होते. या पार्श्वभूमीवर प्रियंका गांधी या राहुल गांधींना पाठबळ देण्यासाठी सक्रीय राजकारणात उतरण्याची शक्यता आहे. गांधी घराण्याशी जवळीक असलेल्या तीन नेत्यांनी या वृत्ताला दुजोरा दिला आहे. प्रियंका गांधी यांच्याकडे महासचिव किंवा उत्तरप्रदेश प्रदेशाध्यक्ष पद दिले जाऊ शकते. सध्या महासचिव पदावर जनार्दन त्रिवेदी तर उत्तरप्रदेशच्या प्रदेशाध्यक्ष पदावर निर्मल खत्री आहेत.
प्रियंका गांधी या काँग्रेस उपाध्यक्ष राहुल गांधी यांच्या नेतृत्वाखालीच पक्षात काम करतील. यामध्ये राहुल गांधी यांना डावलून प्रियंका गांधींना पुढे आणण्याचा प्रयत्न नाही असे एका काँग्रेस नेत्यांने इंग्रजी वृत्तपत्राला सांगितले. उत्तरप्रदेशमध्ये अमित शहा यांना काँग्रेसमधून फक्त प्रियंका गांधीच टक्कर देऊ शकतात असे काँग्रेस नेत्यांनी पक्षनेतृत्वाला सांगितले आहे. अमित शहांप्रमाणेच प्रियंका गांधी यांचाही कार्यकर्त्यांशी संपर्क चांगला असून या संघटन कौशल्याची पक्षाला आवश्यकता आहे. आता प्रियंका गांधींविषयीचा अंतिम निर्णय सोनिया गांधी आणि राहुल गांधी घेतील असे काँग्रेस नेत्यांनी स्पष्ट केले.

येवला : शहरापासून मनमाडकडे बारा कि.मी. अंतरावर असणाऱ्या तांदूळवाडी फाट्याजवळ व्हॅन व टेम्पो यांच्यात समोरासमोर झालेल्या भीषण अपघातात चार वर्षीय मुलासह सहा युवक ठार झाले. सदरची घटना रविवारी सकाळी सहा वाजेच्या दरम्यान घडली.
मारुती व्हॅनमधून (क्र. जीजे १८ एएस २९०१) मध्य प्रदेशातील नऊ भाविक शिर्डी येथे साईबाबांच्या दर्शनासाठी येत होते. सदरची व्हॅन तांदूळवाडी फाट्याजवळ हॉटेल मेवाडनजीक आली असता याचदरम्यान मनमाडच्या दिशेने निघालेला आयशर टेम्पो (क्र. एमपी ४६ जी ०७५३) यांच्यात जोरदार समोरासमोर धडक झाली. परिसरात हलक्या स्वरूपाचा पाऊसही सुरू होता.
भीषण अपघातामध्ये व्हॅनमधील पाच प्रवासी जागीच ठार झाले, तर अन्य चौघांना येवला ग्रामीण रुग्णालयात प्राथमिक उपचार करून नाशिक रुग्णालयात पुढील उपचारासाठी रवाना केले होते. मात्र, रस्त्यातच चौघांपैकी एकाचा मृत्यू झाला, तर अन्य तिघांपैकी दोघांची प्रकृती चिंताजनक आहे. अपघातातील मयतांपैकी चार जण मध्य प्रदेशातील डेहार (ता. कोकसे, जि. धार) येथील आहेत. त्यांची नावे अशी: जितेंद्र हनसिंग बगेर (२३), चेतन रमेश सिसोदिया (२१), शैलेंद्र पंकज बगेर (४), अनिल महेंद्र पटेल (२०), रवींद्र रणजितसिंग चव्हाण (३०, रा. गुडगु, ता. अली, जि. राजापूर, मध्य प्रदेश) आणि अनिल महेंद्र पटेल (१९) यांचा समावेश आहे. राहुल नानसी बामनिया (२२, रा. मानवतनगर, इंदूर) याच्या डाव्या पायाला गंभीर दुखापत झालेली आहे, तर अनिल चंद्रसिंग किराडे (२०, रा. डेहार, ता. कोकसे, जि. धार) याच्या डोक्याला जबर दुखापत झाली आहे. पंकज नारायण बगेर (२५) याच्या उजव्या पायाला गंभीर दुखापत झाली असून, त्यांच्यावर नाशिकच्या शासकीय ग्रामीण रुग्णालयात उपचार सुरू आहे.

नवी दिल्ली, –  महाराष्ट्र सदनात मराठी खासदारांना मिळालेली दुय्यम वागणूक, निकृष्ट भोजन व त्यानंतर मुस्लीम कर्मचा-याला चपाती भरवण्यावरून झालेला गोंधळ, या सर्व घटना अद्याप ताज्या असतानाचा महाराष्ट्र सदन पुन्हा एकदा चर्चैत आले आहे. महाराष्ट्र सदनाचे निवासी आयुक्त यांनी यंदा महाराष्ट्र सदनाता गणेशोत्सव साजरा न करण्याचा फतवा काढल्याचे वृत्त एका वृत्तपत्राने दिले आहे.
महाराष्ट्र सदनात दरवर्षी गणेशोत्सव मोठ्या उत्साहाता साजरा होतो, त्यानिमित्ताने दिल्लीतील सर्व मराठी बांधव एकत्र येतात. मात्र बिपिन मलिक यांचा या उत्सवाला विरोध असून गेल्या २-३ वर्षापांसून त्यांनी गणेशोत्सव बंद करावा, असा धोशा लावला आहे. यावर्षी त्यांनी गणेशोत्सवासाठी जागा देणेही नाकारले असून सदनात ‘बाप्पाची’ प्रतिष्ठापना करण्यास, पूजा करण्यास मनाई करत हा उत्सव साजरा न करण्याचा फतवा काढला आहे. ‘राज्य शासनाचा सदनात साज-या होणा-या गणेशोत्सवाशी काहीही संबंध नाही. राज्य शासन यात सहभागी होत नाही, त्यामुळे यावर्षी सदनात उत्सव साजरा होईल की नाही हे आपल्याला माहीत नाही’, असे मलिक यांनी सांगितल्याचे समजते. दिल्लीत १९९७ सालापासून गणेशोत्सव साजरा होतो. सदनातील अनेक कर्मचारी कठोर परिश्रम करून हा उत्सव उत्साहात साजरा करत असत. मात्र आता मलिक यांच्या या भूमिकेमुळे अनेक वर्षापांसून सुरू असलेली गणेशोत्सव साजरा करण्याची परंपरा खंडित होण्याची शक्यता आहे.

नवी दिल्ली – केंद्रीय लोकसेवा आयोग (यूपीएससी) परीक्षेत नव्याने सुरु करण्यात आलेली ‘सी-सॅट’ पद्धत रद्द करण्याचा सरकारचा कोणताही विचार नाही. परंतु ग्रेडिंग किंवा गुणवत्ता यादी तयार करताना इंग्रजीच्या गुणांचा समावेश करण्यात येणार नसल्याचे केंद्र सरकारने आज, सोमवारी स्पष्ट केले. केंद्रीय कार्मिक राज्यमंत्री जितेंद्र सिंह यांनी संसदेत ही माहिती दिली.
२०११ साली लोकसेवा आयोगाची परीक्षा देणाऱ्या उमेदवारांना पुन्हा एकदा संधी देण्यात येईल अशी माहिती सिंह यांनी दिली. परंतु ही स्पर्धा परीक्षा देणाऱ्या विद्यार्थ्यांना सरकारचे आश्वासन मंजूर नसल्याचे पुन्हा एकदा स्पष्ट झाले. यामुळे केवळ प्राथमिक परीक्षेत लाभ होणार असल्याचे विद्यार्थ्यांचे म्हणणे आहे. सी-सॅटमध्ये २० गुणांचे इंग्रजीचे प्रश्न असतात. ते गुण मेरिट यादीमध्ये सामिल केले जाणार नाही. म्हणजे प्राथमिक परीक्षेतील ४०० गुणांऐवजी ३८० गुणांच्या आधारे मेरिट लिस्ट तयार करण्यात येणार आहे. या निर्णयावर यूपीएससीचे अद्याप शिक्कामोर्तब झालेले नाही. याबाबत कार्मिक विभागाचे सचिव अरविंद वर्मा यांच्या अध्यक्षतेखाली स्थापन करण्यात आलेल्या तीन सदस्यांच्या समितीने गेल्या आठवड्यात सरकारला हवाल सादर केला आहे.