पांढरकवडा –  उच्च-नीचतेला व असमानतेला धर्माची साथ अथवा मान्यता मिळाल की, शोषक व्यवस्था निर्माण होत  असते. आज दलित, आदिवासी, अल्पसंख्याक, स्त्रीया आणि कामगार अशाच व्यवस्थेच्या मोठ्या प्रमाणात बळी होत  आहेत. डॉ. बाबासाहेब आंबेडकरांचे ‘जाती निर्मूलन’ हा ग्रंथ आणि त्याला महात्मा गांधी यांनी दिलेले प्रत्यूत्तर वाचल्यानंतर खोलात जावून संशोधन केले. आणि माझ्या हातून ‘डॉक्टर आणि संत’ हे प्रस्तावना पुस्तक लिहील्या गेले. जाती अस्तित्वाचे महात्मा गांधी यांनी समर्थन  केले. उलट डॉ. बाबासाहेब आंबेडकरांनी जाती निर्मूलनाच्या लढ्याला उच्च मानवी मुल्यांचे अधिष्ठान दिले, असे विचार आंतरराष्टÑीय ख्यातीच्या व बुकर आणि मॅगसेसेन पुरस्कार प्राप्त लेखिका अरुंधती रॉय यांनी व्यक्त केले.
येथील सामाजिक कार्यकर्ते प्रा. हरिश्चंद्र भेले, डॉ. लिला भेले यांच्या निवासस्थानी आयोजित कार्यक्रमात त्या बोलत होत्या. आधुनिक झगमगाटाच्या वातावरणातही लेखकांना लोकांच्या मनात जागा असल्याबद्दल समाधान व्यक्त करुन अरुंधती रॉय म्हणाल्या की, द. आॅफ्रिकेतील महात्मा गांधीच्या आंदोलना संदर्भात  इतिहास लेखनातून आणि पाठ्यपुस्तकातून चुकीचे सांगितल्या जात आहे. परिणामी अनेक आंदोलना बाबत गांधी-आंबेडकर यांच्यातील खरा वैचारिक संघर्ष पुढे आला नाही. सुरुवातीला प्रा. हरिश्चंद्र भेले यांनी प्रास्ताविक केले.  डॉ. लिला भेले, डॉ. अजित चाहल, प्राचार्य डॉ. रमजान विराणी, अ‍ॅड. पंकज शेटे, अ‍ॅड. माणिक चौधरी, प्रा. झिलपिलवार, प्रा. राहुल दखणे, प्रभुतींनी अरुंधती रॉय यांचे स्वागत केले. पांढरकवडा या आदिवासी बहुल परिसरासाठी हा एैतिहासीक क्षण असल्याचे उपस्थित मान्यवरांनी उद्गार काढले. यावेळी सुनिल सरदार, डॉ. ग्रँड उपस्थित होते.

हैदराबाद  (पीटीआय) – दोन गटांमध्ये झालेल्या जातीय हिंसाचारानंतर हैदराबादमधील राजेंद्रनगरमध्ये अनिश्चित काळासाठी संचारबंदी लागू करण्यात आली आहे. दरम्यान पोलिसांच्या गोळीबारात दोघांचा मृत्यू झाला.
बुधवारी पहाटे धार्मिक झेंडा जाळण्यावरुन या हिंसाचाराला सुरुवात झाली. बहादूरपूरामधील सिख चवानी भागात हा हिंसाचार झाला. झेंडा जाळण्याच्या घटनेसाठी दोन युवकांना जबाबदार धरुन, एका समाजाच्या गटाने या युवकांवर हल्ला केला. त्यानंतर या भागातील तणाव वाढला.
राजेंद्रनगरमध्ये काही घरांवर हल्ले झाले असून, या भागात जाळपोळीच्या घटना घडल्याचे वृत्त आहे. सायबराबादचे पोलिस आयुक्त सी.व्ही.आनंद आणि अन्य वरिष्ठ अधिका-यांनी घटनास्थळी जाऊन परिस्थितीचा आढावा घेतला.
मतमोजणीच्यावेळी सुरक्षेसाठी आलेल्या पोलिस आणि निमलष्करी दलाच्या सशस्त्र तुकडया या भागात तैनात करण्यात आल्या आहेत. वातावरणात तणाव असला तरी, परिस्थिती नियंत्रणात असल्याचे पोलिसांनी सांगितले. संवेदनशील भागात बंदोबस्त वाढवण्यात आला आहे.

२५५८व्या बुध्द पौर्णिमेनिमित्त पाटणा येथील बुद्ध स्तुपात बुधवारी भिक्खूंनी प्रार्थना केली.