भावनगर – गुजरातमधील भावनगर जिल्हयातील अलंग येथील जहाज तोडणी केंद्रामध्ये शनिवारी सकाळी मोठा स्फोट झाला. या स्फोटात पाच कामगारांचा मृत्यू झाला असून, १० जण जखमी झाले आहेत. जखमी कामगारांना भावनगर येथील रुग्णालयात दाखल करण्यात आले असून, त्यांची प्रकृती गंभीर आहे. जहाज तोडणी केंद्राच्या १३८ नंबरच्या युनिटमध्ये सकाळी साडेदहाच्या सुमारास जहाज तोडणीचे काम सुरु असताना हा स्फोट झाला.स्फोट नेमका कशामुळे झाला ते अजून स्पष्ट झालेले नाही. मात्र गॅस गळतीमुळे हा स्फोट झाला असण्याची शक्यता आहे. अलंग हे आशिया खंडातील सर्वात मोठे जहाज तोडणी केंद्र आहे. वर्षाला येथे २५० जहाजे तोडली जातात.

पांढरकवडा (यवतमाळ) –  येथील एका बिअर बारमध्ये काम करणाºया युवकाचा गळा दाबुन खून केला. शवविच्छेदन अहवालाने या घटनेचे गुढ उलगडे असून बारमालकासह दोन जणांना अटक केली.
कपिल गजानन ढाले रा. देवधरी असे मृतकाचे नाव आहे. १४ जून रोजी गंभीर अवस्थेत यवतमाळ येथे रुग्णालयात दाखल केल्यानंतर कपीलचा मृत्यू झाला होता. गजानन ढाले यांनी पोलिसात तक्रार देऊन घातपात झाल्याचा आरोप केला होता. याप्रकरणी पोलिसांनी अकस्मात मृत्यूची नोंद करुन मृतदेहाचे शवविच्छेदन करण्यात आले. दरम्यान नुकताच शवविच्छेदन अहवाल प्राप्त झाला असून कपिलचा गळा दाबुन खून केल्याचे नमुद केले आहे. त्यावरून पोलिसांनी तपासचक्रे वेगाने फिरवुन बिअर बार मालक प्रतीक बोरले व नोकर संदिप बोबडे या दोघांना ताब्यात घेतले. बोरले याच्या बिअर बारवर कपिल हा कामाला होता. चार दिवसापासून  तो कामावर जात नसल्याने दोघांनी त्याला मारहाण केली होती. यामध्ये तो गंभीर जखमी झाल्याने त्याला पांढरकवडा येथील रुग्णालयात प्राथमिक उपचार करुन यवतमाळ येथे हलविले होते. मात्र दुसºया दिवशी त्याचा मृत्यू झाला होता. पोलिसांनी शवविच्छेदन करुन अकस्मात मृत्यूची नोंद केली होती. दरम्यान नुकताच शवविच्छेदन अहवाल प्राप्त झाला असून कपिलचा मृत्यू गळा दाबल्याने झाल्याचे नमुद केले. त्यावरुन पोलिसांनी आरोपीविरुद्घ भादंवि कलम ३०२, ३४ अंतर्गत गुन्हा दाखल केला. अधिक तपास साहायक पोलीस निरीक्षक राखी गेडाम, पोलीस उपनिरीक्षक मडावी करीत आहे.

पांढरकवडा – तालुक्यात विविध दोन घटनेत विहिरीत बुडून तिन जणांचा मृत्यू झाल्याच्या घटना आज गुरूवारी घडल्या. शेतात विहीरीवर पाणी पिण्यासाठी गेलेल्या दोन जणांचा मृत्यू झाला. तर त्याना वाचविण्याच्या प्रयत्नात  एकाचा मृत्यू झाला.  या घटनेने तालुक्यात शोककळा पसरली आहे.
झिबला हुसेन परचाके (६०), चेंडकु रामपुरे (४०) रा. करंजी, अमित पुरुषोत्तम नवले (२५) रा. रामपूर कारेगाव  अशी मृतकांची नावे आहे. करंजी येथील कांबळे यांच शेतात झिबला व चेंडकु हे काम करीत होते. दरम्यान तहान लागल्याने झिबला हे शेतातीलच विहीरीवर पाणी पिण्यासाठी गेले होते. यावेळी तोल जाऊन ते विहीरीत पडले. ही बाब निदर्शनास येताच  त्याना वाचविण्यासाठी चेंडकुने विहीरीत उडी टाकली. त्यामध्ये त्या दोघांचाही पाण्यात बुडून मृत्यू झाला.
तर अमित नवले हा रामपूर कारेगाव येथील शेतकरी प्रकाश सहस्त्रबुद्घे याच्या शेतात गेला होता. दरम्यान सकाळी ७ वाजताच्या सुमारास पाणी पिण्यासाठी विहीरीवर गेला. यावेळी पाणी काढताना तोल जाऊन तो विहीरीत पडल्याने त्याचा मृत्यू झाला. या घटनांची माहिती मिळताच पोलिसांनी घटनास्थळ गाठून पंचनामे करून मृतदेह  शवविच्छेदनासाठी रुग्णालयात पाठविले. या घटनांनी तालुक्यात शोककळा पसरली आहे.

दुबई – जागतिक रॅपिड बुध्दीबळ स्पर्धेमध्ये भारताचा अव्वल बुध्दीबळपटू विश्वनाथन आनंदने जगज्जेत्या मॅग्नस कार्लसनला पराभवाचा धक्का दिला. मात्र कार्लसनला पराभूत करुनही, आनंदला या स्पर्धेमध्ये कास्यपदकावर समाधान मानावे लागले तर, कार्लसनला सुवर्णपदक मिळाले.
स्पर्धेच्या गुणांकन पध्दतीमुळे कार्लसनला पराभूत होऊनही सुवर्णपदक जिंकता आले. कार्लसनने पंधरापैकी सर्वाधिक अकरा गुण मिळवले. आनंद, फॅबियानो कारऊना आणि अलेक्झांडर मोरोझेवीच हे संयुक्तपणे १०.५ गुणांसह दुस-या स्थानावर होते. मात्र टायब्रेकमध्ये इटलीच्या फॅबियानोची आनंदपेक्षा सरस कामगिरी असल्याने त्याला रौप्य पदक मिळाले तर, आनंदने रशियाच्या मोरोझोवीचवर मात करत कास्यपदक पटकावले. कार्लसनला पराभूत केल्यानंतरचे आनंदचे तीन्ही सामने ड्रॉ झाले होते. याउलट कार्लसनला फक्त आनंदकडून पराभव स्वीकारावा लागला. कार्लसनने आठ विजय मिळवताना, सहा सामने ड्रॉ झाले त्यामुळे कार्लसन सुवर्णपदक मिळाले.

अमरावती – व्याघ्र प्रकल्पातील ढाकणा येथील वाघिणीच्या शिकार प्रकरणातील दोषी ३ आरोपींना ५ वर्षे सक्तमजुरीची शिक्षा आणि प्रत्येकी ९0 हजार रुपयांचा दंड अमरावती येथील मुख्य न्याय दंडाधिकारी जयंत राजे यांच्या न्यायालयाने ठोठावला आहे. तर यातीलच ३ आरोपींची पुराव्याअभावी निर्दोष मुक्तता झाली. मात्र एका वर्षात अतिशीघ्र गतीने तेही एकाच वर्षात वाघाच्या शिकार प्रकरणी आरोपींना शिक्षा ठोठावणारे हे भारतातील पहिले प्रकरण ठरले आहे.
यामध्ये आरोपी मधुसिंग लिहारसिंग राठोड (३0), चिंताराम लिहारसिंग राठोड (२८) आणि विनोद प्रेमलाल पवार निघेट रा. सिंधबन मोथाखेडा ता. चिखलदरा यांचा समावेश आहे. तर सागरलाल गोरेलाल पवार, मिश्रीलाल जुगदया चव्हाण दोघे रा. सिंधबन व नरवीलाल रुचलेसिंग पवार रा. सावलीखेडा यांची सुटका झाली आहे. मेळघाट व्याघ्र प्रकल्पाच्या गुगामल राष्ट्रीय उद्यानांतर्गत ढाकणा परिक्षेत्रातील बोरीपाटा राऊंडमध्ये येणार्‍या दक्षिण डोलार बिटमध्ये ४ मार्च २0१३ ला एका वाघिणीची राखीव वनक्षेत्रात शिकार करण्यात आली होती. आंतरराष्ट्रीय शिकारी रंजीत भाटिया (बावरिया) रा. हुशापूर पंजाब (६0) याने ४ आरोपींना लोखंडी चिमटा (ट्रॅप) दिला. त्या चारही आरोपींनी तो लोखंडी चिमटा घेऊन गाभाक्षेत्रातील धोकाग्रस्त व्याघ्र अधिवासात जाऊन सापळा रचला. ३ दिवसानंतर पुन्हा त्याच ठिकाणी गेल्यावर सापळ्य़ात एक पट्टेदार वाघीण अडकल्याचे दिसले. तेव्हा अनुकुचीदार भाला वाघिणीच्या तोंडात टाकून तिची हत्या करण्यात आली. वाघिणीच्या मिशा, नखे, हाडे, चामडे काढून ते दीड महिना घरात लपवून ठेवले व मांस समोरच्या दरीत फेकून दिले. यातील मधुसिंग राठोडने मध्यप्रदेशातील तुकईथळ रेल्वेस्थानकावर जाऊन वाघाचे अवशेष त्याच्या हवाली केले व सौद्यात ठरल्याप्रमाणे पैसे घेतले होते. दरम्यान, खबर्‍याने दिलेल्या गुप्त माहितीच्या आधारे मेळघाट वन्यजीव गुन्हे नियंत्रण शाखेच्या पथकाने लगेच आरोपींना अटक करून छडा लावला होता. या पथकाने संपूर्ण भारतात छापे मारून १३ जणांना अटक केली होती. १४ मे २0१३ हे प्रकरण न्यायालयात दाखल करण्यात आले. या प्रकरणात ३ वेगवेगळय़ा चार्जशीट दाखल केल्या होत्या. १६ मे २0१३ ला फाईल ओके करुन १२ फेब्रुवारी२0१४ ला कोर्टात पुरावे सादर करण्यात आले होते. गत २ महिन्यांपासून या प्रकरणाच्या निकालाबाबत वनखात्यासह निसर्गप्रेमी वन्यजीव अभ्यासकांची उत्सुकता शिगेला पोहोचली होती. अमरावती येथील मुख्य न्यायदंडाधिकारी जयंत राजे यांच्या न्यायालयाने मधुसिंग लिहारसिंग राठोड, चिंताराम राठोड, विनोद प्रेमलाल पवार तिघे रा. सिंधबन मोथाखेडा या तिघांना ५ वर्षे सक्तमजुरीची शिक्षा आणि प्रत्येकी ९0 हजारांचा दंड अशी शिक्षा सुनावली आहे. तर विनोद प्रेमलाल पवार, सागरलाल पवार आणि नटवीलाल पवार या तिघांची पुराव्याअभावी निर्दोष मुक्तता करण्यात आली आहे. याच प्रकरणात अनेश छात्रसिंग राठोड हा माफीचा साक्षीदार होता. मात्र त्याने वेळीच बयान बदलविल्याने त्याच्यावर खोटे बोलणे व शिकारीत सहभागी असल्याचा ठपका ठेवून अशा दोन ट्रायल चालविण्याचे आदेश न्यायालयाने बजावले आहेत. या प्रकरणात एकूण १४ आरोपींना अटक केली असून अद्यापही फरार आहे. जंगलातील अतिसंरक्षित क्षेत्रात आग पेटविणे, वाघ मारणे, व्याघ्र प्रकल्पात प्रवेश करणे, धोकाग्रस्त व्याघ्र अधिवासात शस्त्रास्त्र घेऊन शिरणे यासाठी प्रत्येकाला ५ वर्षे सक्तमजुरीची शिक्षा आणी प्रत्येकी ९0 हजाराचा दंड सुनावण्यात आला. टायगर पोचिंग (वाघाची शिकार)मध्ये जलदगतीने एका वर्षाच्या आत निकाल लागणे हे भारतातील पहिलेच प्रकरण म्हणावे लागेल. कारण आतापर्यंतच्या इतिहासात इतक्या वेगाने कुठल्याही प्रकरणाचा निकाल लागला नाही, हे विशेष. न्यायालयात वनविभागाच्या वतीने जिल्हा विशेष सरकारी वकील अँड़ उदय शशीकुमार देशमुख तर आरोपींच्या बाजूने अँड़ पी.बी. महल्ले यांनी काम पाहिले.

अमरावती : अनुसूचित जाती व अनुसूचित जमाती अत्याचार प्रतिबंधक अधिनियमांतर्गत दाखल झालेल्या प्रलंबित प्रकरणांचा (अट्रॉसिटी) तातडीने निपटारा करण्याचे निर्देश सोमवारी विभागीय आयुक्त डी.आर. बनसोड यांनी दिले.
विभागीय आयुक्त कार्यालयात विभागीय दक्षता समितीच्या व्हिडिओ कॉन्फरन्सिंगद्वारे आयोजित केलेल्या त्रैमासिक आढावा बैठकीत अध्यक्षस्थानावरुन श्री. बनसोड बोलत होते. यावेळी विशेष पोलीस महानिरीक्षक बिपीन बिहारी, अमरावती जिल्हा परिषदेचे मुख्य कार्यकारी अधिकारी अनिल भंडारी, समाजकल्याण विभागाचे प्रादेशिक उपायुक्त एल.आय. वाघमारे प्रामुख्याने उपस्थित होते. तर यवतमाळचे जिल्हाधिकारी अश्विन मुद्गल, यवतमाळचे जिल्हा पोलीस अधीक्षक रंजनकुमार शर्मा, अमरावतीचे जिल्हाधिकारी राहुल रंजन महिवाल, अकोल्याचे जिल्हाधिकारी अरुण शिंदे, वाशिमचे जिल्हाधिकारी रामचंद्र कुळकर्णी, वाशिमचे जिल्हा पोलीस अधीक्षक तुषार पाटील, वाशिम जिल्हा परिषदेचे मुख्य कार्यकारी अधिकारी श्री. जयवंशी, अकोल्याचे निवासी उपजिल्हाधिकारी बी.एन. इंगळे, अकोला जिल्हा परिषदेचे मुख्य कार्यकारी अधिकारी ओमप्रकाश देशमुख आदी व्हिडिओ कॉन्फरन्सिंगद्वारे बैठकीत सहभागी झाले.
बैठकीत सर्वप्रथम अनुसूचित जाती व अनुसूचित जमाती प्रतिबंधक अधिनियम 1989 अंतर्गत दाखल झालेले गुन्हे व मंजूर केलेल्या अर्थसहाय्याचा आढावा घेण्यात आला. विभागात यवतमाळ जिल्ह्यात प्रलंबित प्रकरणांची संख्या जास्त आहे. यवतमाळसह विभागातील सर्वच जिल्ह्यातील पोलीस यंत्रणेने जलद गतीने तपास करुन आरोपींवर लवकरात लवकर आरोपपत्र दाखल करण्याचे निर्देश विभागीय आयुक्तांनी दिले. प्रकरणे प्रलंबित राहणार नाहीत यासाठी आवश्यक उपाययोजना कराव्यात, असेही ते यावेळी म्हणाले.
कर्मवीर दादासाहेब गायकवाड सबळीकरण व स्वाभिमान योजनेअंतर्गत विभागात मार्च 2014 अखेर 97 एकर जमिनीचे वाटप झाले आहे. गेल्या वर्षीच्या तुलनेत यावर्षी दुप्पट जमिनीचे वाटप व्हावे अशी अपेक्षा विभागीय आयुक्तांनी व्यक्त केली. तसेच ज्या जिल्ह्यात या योजनेसाठी प्रस्ताव व लाभार्थी दोन्ही आहेत अशा जिल्ह्यांनाच निधी द्यावा, असेही विभागीय आयुक्तांनी सांगितले. जिल्हा परिषदेमार्फत राबविण्यात येणाऱ्या 20 टक्के सेस फंडातून घेण्यात आलेल्या कामांची जिल्हाधिकाऱ्यांनी नगरपालिकानिहाय तसेच उपविभागीय अधिकारी स्तरावर माहिती घेऊन खर्चाचे नियोजन करावे. रमाई घरकुल योजनेत जास्तीत जास्त प्रस्ताव मिळवून गोरगरीबांना निवारा उपलब्ध करुन देण्यासाठी यंत्रणेने प्रयत्न करावेत, अशी सूचनाही श्री. बनसोड यांनी केली.

यवतमाळ –  मध्यप्रदेशातून चोरट्या मार्गाने यवतमाळात येत असलेला गुटखा सापळा रचून जप्त करण्यात आला. ही कारवाई आज पहाटे विठ्ठलवाडी परिसरात करण्यात आली. शिवराज मधुकर मोहिते (२८)रा. बांगरनगर, यवतमाळ, प्रवीण गणेश वडतकर (३५)रा. वैद्यनगर यवतमाळ असे अटक करण्यात आलेल्या आरोपींची नावे आहे. चार्ली कमांडो पथक पहाटे ३ वाजता दरम्यान कॉटनमार्केट परिसरात गस्तीवर असताना धामणगावमार्गे यवतमाळात येत असलेल्या (एमएच३१ एडी ९९९) अ‍ॅम्बेसॅडर वाहनावर संशय आला. पथकातील कर्मचाºयांनी वाहनाला  थांबविण्याचा प्रयत्न केला असता पळ काढला. यामुळे काहीतरी काळेबेरं असल्याचा संशय पक्का झाला. लगेच चार्ली कमांडोने त्या वाहनाचा वंजारी फैलातून पाठलाग केला. सिनेस्टाईल गुंगारा देण्याचा प्रयत्न गुटखा तस्करांकडून होत असताना विठ्ठलवाडी परिसरात त्यांना अडवून वाहनाची तपासणी केली असता गुटखा आढळून आला. पानमसाला, गुटखा, सुगंधित तंबाखू  असा १ लाख ६० हजाराचा गुटखा व वाहन असा एकून २ लाख ४० हजाराचा ऐवज जप्त करण्यात आला. याप्रकरणी शहर पोलीस ठाण्यात आरोपीविरुध्द गुन्हा दाखल करून अटक करण्यात आली. ही कारवाई चार्ली पथकाचे प्रमुख सुनील डोंगरे, अमित पोयाम, महेंद्र भोवते यांनी केली.

मुंबई – पोलीस भरतीदरम्यान चार तरूणांचा मृत्यू झाल्याची गंभीर दखल घेत  उच्च न्यायालयाने राज्य सरकारला नोटीस बजावली आहे. येत्या सात दिवसांत या नोटीसीचे उत्तर देण्याचा आदेश न्यायालयाने दिला असून पुढील सुनावणी २३ जून रोजी होणार आहे.
मुंबईत सुरू असलेल्या पोलीस भरतीसाठी आलेल्या शारिरीक चाचणीपरीक्षेदरम्यान आत्तापर्यंत चार तरूणांचा मृत्यू झाला आहे. राहुल सपकाळ,  अंबादास सोनावणे, साईप्रसाद माळी आणि विशाल केदारे या चौघांना धावण्याच्या चाचणी दरम्यान चक्कर आली होती. रुग्णालयात उपचार सुरू असताना त्यांचा गेल्या आठवड्यात मृत्यू झाला. या घटनेचा सर्व स्तरांतून निषेध नोंडवण्यात आला होता, तसेच  मुंबई पोलिस आणि राज्य सरकार विरोधात अनेकांनी तीव्र संताप व्यक्त केला. गृहमंत्री आर. आर. पाटील यांनी या चारही तरूणांच्या कुटुंबियांना पाच लाख रुपयांची मदतही जाहीर केली होती. तसेच यापुढे पोलिस भरतीदरम्यान पाच किलोमीटरचे अंतर तीन किमी केली जाईल, असेही त्यांनी सांगितले होते.
दरम्यान उच्च न्यायालयाने या सर्व प्रकरणाची दखल  घेत उच्च ‘स्यू मोटो’ याचिका दाखल करुन घेतली. त्यावरील पुढील सुनावणी २३ जून रोजी होणार असून पोलीस दलासह राज्य सरकारलाही याप्रकरणी उत्तर द्यावे लागणार आहे.

नवी दिल्ली – भाजपचे दिवंगत नेते आणि माजी केंद्रीय ग्रामीण विकास मंत्री गोपीनाथ मुंडे यांच्या अपघाती मृत्यू प्रकरणाचा तपास सीबीआयने सुरु केला आहे. दिल्ली पोलिसांकडून तपास हाती घेतल्यानंतर केंद्रीय गुन्हे अन्वेक्षण विभागाने गुन्हा दाखल केला.
केंद्रीय गृहमंत्रालयाच्या आदेशानुसार सीबीआयने तपास सुरु केला आहे. महाराष्ट्रातील भाजप नेत्यांसह विविध पक्षीय नेत्यांनी गोपीनाथ मुंडे यांच्या अपघाती मृत्यूची सीबीआय चौकशी करण्याची मागणी केली होती. गोपीनाथ मुंडे यांच्या अकाली मृत्यूबद्दल अनेकांना संशय असल्याने केंद्रीय रस्ते वाहतूक मंत्री नितीन गडकरी आणि महाराष्ट्र भाजप प्रदेशाध्यक्ष देवेंद्र फडणवीस यांनी केंद्रीय गृहमंत्री राजनाथ सिंह यांना भेटून सीबीआय चौकशीची मागणी केली होती. तीन जून रोजी गोपीनाथ मुंडे दिल्ली विमानतळाकडे जात असताना त्यांच्या गा़डीला समोरुन आलेल्या इंडिका गाडीने धडक दिली होती. या अपघातात मुंडे यांचे निधन झाले होते. मुंडे यांच्या मानेला आणि यकृताला गंभीर मार लागला होता. अंतर्गत रक्तस्त्राव झाल्याने त्यांचा मृत्यू झाला होता. दिल्ली पोलिसांनी या प्रकरणी मुंडेंच्या गाडीला धडक देणा-या इंडिका कारचा चालक गुरविंदर सिंहच्या विरोधात गुन्हा दाखल केला आहे. गोपीनाथ मुंडे यांचा अपघाती मृत्यू असला तरी, हा अपघात नसून, घातपात असल्याची अनेकांना शंका आहे. त्यामुळे बीडमधील जनता आणि गोपीनाथ मुंडे यांचे समर्थक सीबीआय चौकशीची मागणी करत होते. गोपीनाथ मुंडे यांच्या अंत्यसंस्काराच्यावेळीही संतप्त झालेल्या बी़डच्या जनतेने सर्वपक्षीय नेत्यांच्या गाडयांना घेराव घालत सीबीआय चौकशीची मागणी केली होती.

थिम्पू – भारत शेजारधर्म पाळण्यासाठी कटिबध्द असून, सत्तांतर झाले तरी, त्याचा भारत-भूतान संबंधांवर कोणताही परिणाम होणार नाही. शेजारी देशांबरोबर उत्तम संबंध ठेवण्यासाठी आम्ही कटिबध्द आहोत असा विश्वास पंतप्रधान नरेंद्र मोदींनी भूतानच्या संसदेला दिला. दोन दिवसाच्या भूतान दौ-यावर आलेल्या नरेंद्र मोदींनी सोमवारी भूतानच्या संसदेच्या संयुक्त सभागृहाला संबोधित करताना हे विचार व्यक्त केले.
भारताने प्रगती केली तर, शेजारी देशांच्या विकासालाही चालना मिळेल. भारतात स्थिरता आणि विकास झाला तर, भूतानलाही त्याचा फायदा होईल असे मोदींनी सांगितले. मोदींनी हिंदीमधुन भूतानच्या संसदेला संबोधित केले. भूतानच्या राजेशाहीकडून लोकशाहीकडे झालेल्या प्रवासाबद्दल मोदींनी भूतानचे कौतुक केले. गेल्या सातवर्षात भूतानचा राजेशाहीकडून लोकशाहीकडे ज्या सहजतेने प्रवास झाला आहे. त्यातून राज्यकारभारातील परिपक्वता दिसून येते असे मोदी म्हणाले. भारताच्या भूतान बरोबरच्या ऐतिहासिक संबंधांचा दाखला देताना, मोदींनी आपले सरकार भूतानबरोबरचे संबंध अधिक सृदृढ करण्यासाठी काम करेल अशी ग्वाही यावेळी दिली. नरेंद्र मोदी यांनी आपल्या पहिल्या परदेश दौ-यासाठी भूतानची निवड करण्यामागेही अनेक कारणे आहेत. सामरिक दृष्टया भूतान भारतासाठी अत्यंत महत्वाचा देश आहे. गेल्या काही काळापासून चीनची भूतानबरोबर जवळीक वाढली आहे तसेच भारत विरोधात दहशतवादी कारवायांसाठीही भूतानच्या भूमीचा उपयोग होत आहे. त्यामुळे भारताच्या सुरक्षेच्या दृष्टीकोनातून नरेंद्र मोदी यांचा भूतान दौरा महत्वाचा होता.