पुणे- पाळण्यातून पडू नये म्हणून सुरक्षेसाठी बांधलेली ओढणीच अवघ्या अकरा महिन्यांच्या चिमुरडीच्या जिवावर बेतली. झोपेत चुकून या ओढणीचा चिमुरडीच्या गळ्याला फास लागल्याने तिचा मृत्यू झाला. चिखलीतील जाधववाडी येथे रविवारी दुपारी सव्वा बाराच्या सुमारास ही दुर्घटना घडली.
सौम्या महेश तळोले असे या दुर्दैवी चिमुरडीचे नाव आहे. मे महिन्यात तिचा पहिला वाढदिवस साजरा केला जाणार होता. मात्र, त्यापूर्वीच काळाने तिच्यावर घाला घातला. पोलिसांकडून मिळालेल्या माहितीनुसार, सौम्याच्या आईने सौम्याला आंघोळ घालून पाळण्यात झोपवले होते. नेहमीप्रमाणे झोपेत उसळी मारल्यानंतर सौम्या पाळण्यातून खाली पडू नये यासाठी सौम्याला पाळण्यात ओढणीने बांधून ठेवण्यात आले होते. मात्र, झोपेतच ती खाली सरकत गेली आणि त्यामुळे सौम्याच्या गळ्याला ओढणीचा फास लागला.  ओढणीने फास लागलेल्या अवस्थेतच सौम्या पाळण्यातून लटकत असलेल्या अवस्थेत ती घरच्यांना आढळून आली.

लंडन- फळांचा राजा म्हणून केवळ भारतात नव्हे तर संपूर्ण जगात ओळखल्या जाणा-या  हापूस आंब्यासह अन्य चार भारतीय भाज्यांवर एक मे पासून युरोपीयन संघटनेतील २८ देशांनी बंदी घातली आहे. हापूससह अन्य भाज्यांवर घालण्यात आलेल्या या बंदीचा भारतीय कायदेतज्ञ आणि व्यापा-यांनी निषेध केला आहे.
यासंदर्भात आयोग्य विषयक समितीच्या बैठकीत हा निर्णय घेण्यात आला. २०१३मध्ये युरोपीय बाजारपेठेत भारतातून आयात केलेल्या फळे आणि भाज्यांमध्ये इतर भाज्यांवर प्रादूर्भाव करणारे कीटक आढळल्याने ही बंदी घालण्यात आली आहे. अर्थात समितीने ही बंदी तात्पूर्ती घातल्याचे स्पष्ट केले आहे. यात हापूस आणि आंबा, वांगी, आळू, कारले, पडवळ या भाज्यांचा समावेश आहे. एकट्या इंग्लंडमध्ये दरवर्षी तब्बल १६ दशलक्ष आंब्यांची निर्यात केली जाते.  ही बंदी हटवण्यासंदर्भातील पुनः विचार ३१ डिसेंबर २०१५ रोजी घेतला जाणार आहे. या बंदीमुळे लाखो डॉलर्सचा तोटा होण्याचा दावा व्यावसाईकांनी केला आहे. तर दुसरीकडे बंदी घालण्यात आलेली फळे आणि भाज्यांचे प्रमाण हे एकूण निर्यात केल्या जाणा-या भाज्यांच्या तुलनेत केवळ पाच टक्के असल्याचे सूत्रांनी म्हटले आहे.

नागपूर – काँग्रेसचे उपाध्यक्ष राहुल गांधी यांच्यावर टीका करताना दलितांबद्दल अवमानकारक वक्तव्य करणारे योगगुरू बाबा रामदेव यांच्याविरोधात नागपूरमध्ये अॅट्रॉसिटी अॅक्टखाली दोन गुन्हे दाखल करण्यात आले आहेत. रामदेव यांना तत्काळ अटक करण्याची मागणी तक्रारदाराने केली आहे.
नागपूरमधील पाचपावली पोलीस ठाण्यात रामदेव यांच्याविरोधात गुन्हा दाखल करण्यात आला आहे. याआधी लखनऊमध्येही रामदेव यांच्यावर गुन्हा नोंदवण्यात आला असून रामदेव यांच्यावर अटकेची टांगती तलवार फिरू लागली आहे.
राहुल हे दलितांच्या घरामध्ये हनिमून साजरे करण्यासाठी जातात, असे वादग्रस्त विधान रामदेव यांनी केले होते. त्यानंतर रामदेव यांच्याविरोधात देशभरातून दलित बांधवांकडून संतप्त प्रतिक्रिया उमटत आहेत. रामदेव यांच्यावर कठोर कारवाई करण्याच्या मागणीसाठी ठिकठिकाणी निदर्शने केली जात आहेत. या पार्श्वभूमीवर लखनऊ जिल्हा प्रशासनाने रामदेव यांच्या राजकीय योग शिबीरांवर १६ मेपर्यंत बंदी घातली आहे. रामदेव यांनी आपल्या वक्तव्याबद्दल खेद व्यक्त केला असला तरी दलितांचा राग काही शांत झालेला नाही. त्यामुळे हे प्रकरण आणखीनच चिघळण्याची शक्यता निर्माण झाली आहे.
अनुसूचित जाती आयोगाची नोटिस
राष्ट्रीय अनुसूचित जाती आयोगानेही उत्तर प्रदेश सरकारला नोटिस पाठवून रामदेव यांच्यावरील कारवाईची माहिती मागितली आहे. सरकारकडून रामदेव यांच्यावर आतापर्यंत कोणती कारवाई करण्यात आली?, जर कारवाई करण्यात आली नसेल ती का केली गेली नाही?, याचे लेखी उत्तर आयोगाचे अध्यक्ष पी.एल. पुनिया यांनी सरकारकडे मागितले आहे.

नागपूर – भाऊजी दप्तरी इंग्लिश स्कूलमध्ये विविध सांस्कृतिक कार्यक्रमांना प्रोत्साहन देण्यात येते. सदर शाळेने अल्पावधीतच उल्लेखनीय प्रगती केली असून २०१४-१५ या शैक्षणिक वर्षापासून ५ वा वर्ग सुरू करण्यात येत आहे. केजी   ते पाचवी पर्यंतच्या वर्गांना शाळेत प्रवेश देण्यात येत आहे.
शाळेची इमारत ही मातृसेवा संघाजवळ, कोठी रोड महाल या शहराच्या मध्यभागी असून पंडित बच्छराज व्यास विद्यालय व कनिष्ठ महाविद्यालयाशी संलग्नित आहे. ही शाळा संपूर्ण इंग्रजी माध्यमाची आहे. या शाळेमध्ये सीबीएसई पॅटर्नप्रमाणे सर्व अ‍ॅक्टिव्हीटी घेतल्या जातात. तसेच सर्व सण, उत्सव यांची माहिती विद्यार्थ्यांना व्हावी यासाठी ते शाळेत साजरे करण्यात येतात. शाळेची फी अत्यंत माफक आहे. यासोबतच दरवर्षी विद्यार्थ्यांची मोफत तपासणी केल्या जाते. यावर्षी महात्मे नेत्रपेढीतर्फे मोफत नेत्र तपासणी करण्यात आली. याशिवाय विद्यार्थ्याच्या कलागुणांना वाव देण्यासाठी कलाप्रदर्शन, छंद शिबिराचे आयोजन करण्यात येते. यात नृत्य, नाट्य, चित्रकला, हस्तकला, संस्कृत व इंग्रजीचे संभाषण वर्ग, अबॅस्कस आदी उपक्रम राबविण्यात येतात. तसेच विद्यार्थ्यांना दररोज नास्ताही देण्यात येतो. अधिक माहितीसाठी ९५९५३७४०६८, ९९२१७९६७३४ या क्रमांकावर संपर्क साधण्याचे आवाहन मुख्याध्यापिका देऊळवाडकर यांनी केले आहे.

यवतमाळ –  सावत्र बापानेच तब्बल पाच वर्ष मुलीवर अत्याचार केल्याची घटना आज घाटंजी तालुक्यातील तीवसाळा येथे उजेडात आली. याप्रकरणी पोलिसांनी नराधम बापास पोलिसांनी अटक केली.
माणिक मारोती भगत (५५) रा. तीवसाळा असे नराधमाचे नाव आहे. पहिल्या पत्नीचे निधन झाल्याने त्याने गावातीलच एका महिलेसोबत पुर्नविवाह केला. त्याला पहिल्या पत्नीचा  मुलगा व तीला पहिल्या पतीची एक मुलगी आहे. काही दिवसाने सुखी संसार सुरु असताना या नराधमाची १६ वर्षीय सावत्रमुलीवरच नजर पडली. घरी कोणी नसताना तो तीच्यासोबत जबरीने अत्याचार करत होता. ही माहिती कोणाला सांगितल्यास मारण्याची धमकही तो देत होता. त्यामुळे ही मुलगी बदनामी होईल म्हणून चुप्प राहत होत. २००९ पासून तर फेबु्रवारी २०१४ पर्यंत सतत हा किळसवाणा प्रकार सुरु होता. दरम्यान आज पिडीत मुलीने हा प्रकार आपल्या आईला सांगुन घाटंजी पोलिस ठाण्यात तक्रार दिली. त्यावरुन पोलिसांनी आरोपीविरुद्घ गुन्हा दाखल करून अटक केली. अधिक तपास सहा. पोलीस निरीक्षक एम.एम. राऊत करीत आहे.

पुणे – अंनिसचे अध्यक्ष डॉ. नरेंद्र दाभोलकर यांच्या हत्येप्रकरणी अटक करण्यात आलेल्या दोन आरोपींना आज पुणे कोर्टाने जामीन दिला. आरोपी मनिष नागोरी आणि विकास खंडेलवाल यांच्याविरुद्ध पुरेसे पुरावे नसल्याने कोर्टाने ५० हजार रुपयांच्या जातमुचलक्यावर जामीन दिला.
इचलकरंजीतील अट्टल गुन्हेगार मनिष नागोरी याने डॉ. नरेंद्र दाभोलकर यांच्या हल्लेखोरांना शस्त्र पुरविल्याचा संशयाप्रकरणी पुणे पोलिसांनी अटक केली होती. मनिष नागोरीवर बेकायदेशीर शस्त्रे विकल्याप्रकरणी आणि खून, खंडणीसारख्या अनेक प्रकरणांत कोल्हापूर जिल्ह्यातल्या वेगवेगळ्या पोलीस स्टेशनमध्ये त्याच्यावर गुन्हे नोंद आहेत.
या दोघांना जानेवारी महिन्यात अटक करण्यात आली होती. ९० दिवसांनंतरही आरोपपत्र दाखल करण्यात पुणे पोलिसांना अपयश आले होते. परिणामी, आरोपींनी जामिनासाठी अर्ज केला होता.

मुंबई- राज्यातील दुस-या टप्प्यात होत असलेल्या १९ लोकसभा मतदार संघात सरासरी ६१. ७१ टक्के मतदान झाले. यात सर्वात जास्त मतदान कोल्हापूर मतदार संघात ६८ टक्के तर सर्वात कमी मतदान सोलापूर आणि साताऱ्यामध्ये ५७ टक्के झाले आहे. काही तुरळक घटना वगळता सर्वच ठिकाणी शांततेत मतदान झाले. २००९ साली झालेल्या निवडणूकीत याच मतदार संघात सरासरी ५४. १४ मतदान झाले होते. त्यात यावर्षी जवळपास सहा टक्क्य़ांनी वाढ झाली आहे. सायंकाळी पाच वाजेपर्यंत मतदारसंघनिहाय मतदानाची टक्केवारी हिंगोली – ५८.३३ टक्के, परभणी – ५५.२१ टक्के, उस्मानाबाद – ५५.६१ टक्के, लातूर – ५८ टक्के, शिरुर – ५३.१० टक्के , मावळ – ५०.६५ टक्के, माढा – ५२ टक्के , सांगली – ५६.९१ टक्के, सातारा – ५०.३२ टक्के मतदान, कोल्हापूर – ६२ टक्के मतदान , हातकणंगले – ६१ टक्के मतदान , शिर्डी – ५४.६० टक्के , अहमदनगर – ५५ टक्के मतदान , बीड – ५५ टक्के , रत्नागिरी-सिंधुदुर्ग – ५३.६३ टक्के , सोलापूर – ४९ टक्के , नांदेड – ५५.३० टक्के , पुणे – ५१.२० टक्के , बारामती – ५०.५५ टक्के

लखनऊ – वाराणसी आणि अमेठी मतदारासंघातून प्रचार करण्यासाठी स्वच्छ मार्गाने पैसे हवेत, अशा आशयाचे ट्विट अरविंद केजरीवाल यांनी केले होते. त्यांच्या या ट्विटला प्रतिसाद म्हणून जगभरातून आम आदमी पक्षाच्या समर्थकांनी ८१ लाख रुपये देणगी दिली आहे. यातील १६ लाख एकट्या उत्तर प्रदेशातून मिळाले आहेत. अमेठीच्या लोकांनी २.१० लाख तर वाराणसीच्या लोकांनी २.५० लाख रुपये दिले आहेत.
आम आदमी पक्षाला लोकसबा निवडणूक लढवण्यासाठी आर्थिक चणचण भासत आहे. मंगळवारी संध्याकाळी अरविंद केजरीवाल ट्विट केले की, वाराणसी पोहचलो आहे. २० तारखेला अमेठीला जाणार आहे. मोदी आणि राहुल गांधींच्या विरोधात लढण्यासाठी स्वच्छ मार्गाने पैसे पाहिजेत. जर तुम्ही देणगी देऊ इच्छित साल तर मला मेसेज करा.’ काही तासातच १७०० लोकांनी हा ट्विट रिट्विट केला. तसेच आम आदमी पक्षाच्या देणगीतही वाढ होऊ लागली. बुधवारी संध्याकाळपर्यंत ६०० हून अधिक लोकांनी ८१.१० लाख रुपये देणगीस्वरुपात दिले. यात एक रुपयापासून ५० लाखापर्यंत देणगी देणारे समर्थक आहे. दिल्लीत राहणा-या नताशा हिने ५० लाख रुपये देणगी दिली आहे. अनेक लोकांनी ५० हजार ते एक लाख रुपये दिले आहेत. सर्वात जास्त लोकांनी ५०० ते ५००० रुपये देणगी दिली आहे. देशातून दिल्ली, कर्नाटक, महाराष्ट्र, उत्तर प्रदेश आणि राजस्थानातून सर्वाधिक देणगी आली आहे. तर विदेशातून युएई, अमेरिका, इंग्लंड आणि कॅनडातून लोकांनी देणगी दिली आहे. आम आदमी पक्षाचे प्रवक्ते सुधीर भारद्वाज यांनी सांगितले, की पक्षाच्या स्वयंसेवकांनी सोशल मीडियातून केलेल्या आवाहनाला उत्तम प्रतिसाद मिळत आहे. याच आवाहनामुळे पक्षाच्या आर्थिक अडचणी दूर होतील.

पटना – संपूर्ण देशात निवडणूकीच्या पाचव्या टप्प्यातील मतदान सुरु असताना बिहार येथील चंपारण जिल्ह्यातून गुरुवारी सुरक्षा रक्षकांनी पाच नक्षलवाद्यांना ताब्यात घेतले.
चंपारण जिल्ह्यातील वाडा बिशानपूर-राजेपूर या भागातून कारवाई करण्याच्या तयारीत असलेल्या पाच नक्षलवाद्यांना ताब्यात घेतल्याची माहिती पोलिस अधिका-यांनी दिली. या पाचही नक्षलवाद्यांची ओळख पटली असून श्रीनारायण प्रसाद(४५), गणेश कुमार(२५), राजेश राम(१८), राजेश ठाकूर(२२) आणि दीपल राम(१८) अशी त्यांची नावे आहेत. या पाचही जणांकडून दोन पिस्तुले, काही युद्ध सामग्री आणि इतर साहित्य हस्तगत करण्यात आले. निवडणुकीच्या पाचव्या टप्प्यात बिहारमध्ये सात जागांवर मतदान होत आहे. दुपारपर्य़ंत येथे २९ टक्क्याहून अधिक मतदानाची नोंद झाली आहे.

‘अनुमती’ सारख्या राष्ट्रीय आणि आंतरराष्ट्रीय पातळीवर गाजलेल्या चित्रपटानंतर ‘स्मिता फिल्म प्रोडक्शन’ आता पुन्हा एकदा प्रतिभावंत दिग्दर्शक गजेंद्र अहिरे यांच्यासमवेत प्रेक्षकांचे मनोरंजन करण्यास तयार झाले आहेत. ‘पोस्टकार्ड’ असे त्यांच्या नव्या चित्रपटाचे टायटल असून स्मिता विनय गानू आणि विनय गानू यांनी चित्रपटाची निर्मिती केली आहे. तर दिग्दर्शन, कथालेखन, संवादलेखन आणि गीतलेखन अशा विविध जबाबदा-या प्रतिभावंत दिग्दर्शक गजेंद्र अहिरे यांनी पार पाडल्या आहेत.
मानवी भाव-भावनांचा गुंता एका पोस्टमॅनच्या कथेच्या माध्यमातून प्रेक्षकांसमोर या चित्रपटातून येणार आहे. या चित्रपटाचे वैशिष्ट्य म्हणजे ‘अनुमती’ चित्रपटासारखीच तगडी स्टारकास्ट ‘पोस्टकार्ड’मध्ये सुद्धा आपल्या अभिनयाचे रंग उधळणार आहे. वेगवेगळ्या फिल्म फेस्टीवलमध्ये आधीच पसंती मिळालेला ‘पोस्टकार्ड’ हा चित्रपट येत्या २५ एप्रिलला प्रेक्षकांच्या भेटीस येणार आहे.१९६५ ते ७० या दरम्यानच्या काळाचा वेध या चित्रपटातून घेण्यात आलाय. एका पोस्टमॅनला नोकरी करताना आलेले अनुभव हा या चित्रपटाचा मुख्य केंद्रबिंदू आहे. घरोघरी पत्र टाकताना लोकांची दु:ख, आनंद याचा अनुभव पोस्टमॅनलाही येत असतो. त्यातील तीन घटनांचा साक्षीदार ठरलेल्या, त्यात गुंतलेला पोस्टमॅन, त्या घटनांमधून त्याला मिळालेली जीवन समृद्धता याचे चित्रण या चित्रपटातून करण्यात येत आहे. रूपक कथा ह्या फार्म मध्ये हा ‘पोस्टकार्ड’ चित्रपट सादर होतो. जो मानवी भावनांचा गुंता आणि नियतीची अढळता यातुन काही भावव्याकुळ माणसं ह्या कथेत समोर येतात. ‘स्मिता फिल्म प्रोडक्शन’ प्रस्तुत स्मिता विनय गानू व विनय गानू यांची निर्मिती असलेल्या ‘पोस्टकार्ड’ या चित्रपटात मराठी सिनेसृष्टीतील अनेक दिग्गज कलाकार आहेत. दिग्दर्शन, कथालेखन, संवादलेखन आणि गीतलेखन गजेंद्र अहिरे यांचे आहे. तर कलाकारांमध्ये ज्येष्ठ अभिनेते दिलीप प्रभावळकर, राष्ट्रीय पुरस्कार प्राप्त अभिनेता गिरीश कुलकर्णी, अभिनेते किशोर कदम, सुबोध भावे, अभिनेत्री सई ताम्हणकर, विभावरी देशपांडे, राधिका आपटे, सुहिता थत्ते, अभिनेता वैभव मांगले यांचा समावेश आहे. चित्रपटाचे छायांकन योगेश राजगुरू, संकलन मयूर हरदास तर संगीत गंधार संगोराम व पार्श्वसंगीत चैतन्य आडकर यांचे आहे. ध्वनी संयोजन नरेन्द्र भिडे, नृत्य संयोजन फुलवा खामकर तर कला दिग्दर्शन दत्ता लोंढे यांचे आहे. चित्रपटातील गाणी हरिहरन, कविता कृष्णमूर्ती, नंदिनी श्रीकर या गायकांनी गायिली आहे. कार्यकारी निर्माता म्हणून प्रशांत गोखले तर प्रोडक्शन मॅनेजर म्हणून रोहन शाह यांनी जबाबदारी पार पाडली.