कर्जत – रिव्हॉल्व्हर आणि चॉपरचा धाक दाखवून अल्पवयीन मुलीवर बलात्कार केल्याप्रकरणी कर्जत पोलिसांनी सिद्धांत डाळींबकर आणि त्याचा साथीदार पंकज मोरे या दोघांना अटक केली आहे. सिद्धांत डाळींबकर एका राजकीय पार्श्वभूमी असलेल्या कुटुंबाचा सदस्य आहे असल्यामुळे संपूर्ण घटनेला वेगळेच महत्त्व आले आहे. ठोस धागेदोरे मिळाल्यामुळेच सिद्धांत डाळींबकर आणि पंकज मोरेला अटक केल्याचे कर्जतचे पोलिस इन्स्पेक्टर आर. आर. पाटील यांनी सांगितले.
सिद्धांतने २०१२ पासून अनेकदा पीडितेला धाक दाखवून आपल्या आय २० कारमध्ये बसवले आणि तिच्यावर लैंगिक अत्याचार केले. प्रत्येक वेळी पंकज मोरे गाडी चालवत होता तसेच पीडितेचे फोटो काढत होता. या प्रकरणात पीडितेने तक्रार केल्यानंतर पोलिसांनी कारवाई केली असून आय २० कार जप्त केली आहे.
अल्पवयीन मुलीला पळवणे, अल्पवयीन मुलीवर बलात्कार करणे, अश्लील फोटो अथवा चित्रीकरण करणे, भारतीय शस्त्र कायदा तसेच बाल हक्क संरक्षण कायद्यातील कलमांतर्गत गंभीर आरोप ठेवून आरोपींविरोधात गुन्हा दाखल केल्याचे पोलिसांनी सांगितले. या प्रकरणात कायदेशीर कारवाई सुरु असल्याचेही पोलिसांनी सांगितले. दरम्यान, रायगड जिल्ह्यातील लैंगिक अत्याचारांचे प्रमाण वाढत असून हे प्रकार रोखण्यासाठी तातडीने ठोस उपाय करण्याची गरज असल्याचे दिशा केंद्राचे समन्वयक अशोक जंगले यांनी सांगितले.

मुंबई – संपूर्ण देशाचे लक्ष वेधून घेणा-या वांद्रे (पूर्व) विधानसभा मतदारसंघातील पोटनिवडणुकीसाठी उत्साहात मतदान सुरु आहे. सकाळी सात वाजल्यापासूनच नागरीकांमध्ये मतदानाचा उत्साह दिसून आला.
वांद्रे पूर्वमध्ये संध्याकाळी पाच वाजेपर्यंत सरासरी ४२ टक्के मतदानाची नोंद झाली आहे. मतदान क्रेंद्राबाहेर नागरिकांच्या मतदानासाठी रांगा लागल्या आहेत. सायंकाळी पाच वाजेपर्यंत मतदानाची प्रक्रिया सुरु राहणार आहे.
वांद्रे पूर्व पोटनिवडणुकीत शिवसेनेकडून दिवंगत बाळा सावंत यांच्या पत्नी तृप्ती सावंत निवडणूक लढवत आहेत. तर काँग्रेस पक्षाकडून ज्येष्ठ नेते नारायण राणे निवडणुकीच्या रिंगणात आहेत. नारायण राणे यांच्या यांच्या उमेदवारीमुळे ही निवडणूक देशव्यापी बातमी बनली आहे. या निवडणुकीत काँग्रेस, शिवसेनेसोबत एमआयएमही रिंगणात आहे.
या मतदासंघातून १० उमेदावार निवडणूक लढवत आहेत. यामध्ये चार अपक्ष उमेदवारांचा समावेश आहे. मतदानादरम्यान कोणतीही अनुचित घटना घडू नये यासाठी पोलिसांचा कडक बंदोबस्त ठेवण्यात आला आहे.
२०१४च्या निवडणुकीत या मतदारसंघात मोदींची हवा असूनही ४२ टक्के मतदान झाले होते. या निवडणुकीत ६० टक्क्यांपर्यंत मतदान करून घेण्यासाठी सर्व कार्यकर्ते भिडले असून, नारायण राणे यांनी गेल्या ११ दिवसांत हा मतदारसंघ पिंजून काढला आहे.
तासगाव-कवठे महांकाळमध्येही पोटनिवडणूक
राष्ट्रवादी काँग्रेसचे नेते आर.आर.पाटील यांच्या निधनानंतर रिक्त झालेल्या तासगाव-कवठे महांकाळमध्येही आज मतदान होत आहे. या मतदानालाही आठ वाजल्यापासून सुरुवात झाली असून दुपारी १२ वाजेपर्यंत १६.७ टक्के मतदान झाले आहे. या जागेवरुन पाटील यांच्या पत्नी सुमन पाटील निवडणूक लढवत आहेत. सुमन पाटील यांच्याविरोधात महत्त्वाच्या पक्षांनी आपला उमेदवार उभा केलेला नाही.