तासगाव – तासगाव पोटनिवडणुकीच्या प्रचारातील भाषणादरम्यान आज राष्ट्रवादी काँग्रेसच्या खासदार सुप्रिया सुळे चक्कर येऊन व्यासपीठावरून कोसळल्यानं कार्यकर्त्यांमध्ये एकच गोंधळ उडाला. परंतु, त्या लगेचच शुद्धीवर आल्यानं सगळ्यांचीच काळजी मिटली. सुप्रिया सुळेंच्या डोक्याला किंचित मार लागल्याचं कळतं.
राज्याचे माजी गृहमंत्री आर. आर. पाटील यांच्या निधनामुळे रिक्त झालेल्या तासगाव-कवठेमहांकाळ विधानसभा मतदारसंघात येत्या ११ एप्रिलला पोटनिवडणूक होत आहे. आबांच्या पत्नी सुमन पाटील यांना राष्ट्रवादीनं उमेदवारी दिली आहे. त्यांच्या प्रचारासाठी आज श्रीराम हॉलमध्ये राष्ट्रवादीच्या महिला कार्यकर्त्यांचा मेळावा आयोजित करण्यात आला होता. त्यावेळी सुप्रिया सुळे यांनी मार्गदर्शन केलं. हे भाषण संपवताना अचानक त्यांना चक्कर आली आणि त्या पोडियमचा आधार घेता-घेता व्यासपीठावरून खालीच कोसळल्या. हा प्रकार पाहून कार्यकर्त्यांच्या काळजाचा ठोकाच चुकला. ताईंना नेमकं काय झालं, हे कुणालाच कळेना. पण सुप्रिया लगेचच शुद्धीवर आल्या. पाणी पिऊन त्यांनीच घाबरलेल्या कार्यकर्त्यांना सावरलं. तोपर्यंत, डॉक्टरांनीही सुप्रिया सुळे यांची प्राथमिक तपासणी केली आणि त्या ठीक असल्याचं सांगितलं, तेव्हा सगळ्यांनीच निःश्वास सोडला.
दरम्यान, सुप्रिया सुळे यांना चक्कर येण्याचं नेमकं कारण कळू शकलेलं नाही, पण उन्हाळ्यामुळे हा प्रकार घडला असावा. आपली तब्येत एकदम ठीक असल्याचं सुप्रियाताईंनी प्रसारमाध्यमांशी बोलताना स्पष्ट केलं.

मुंबई – अगोदरच दुष्काळ आणि त्यात अवकाळी पावसाने झोडपल्याने राज्यातील शेतकऱ्यांचे प्रचंड नुकसान झाले आहे. काही शेतकऱ्यांनी हा फटका सहन न झाल्याने आत्महत्या केली आहे. त्यामुळे शेतकऱ्यांना भरघोस मदत देण्यात यावी यासाठी विरोधकांनी विधानसभेत गोंधळ घातला. यावेळी शेतकऱ्यांना अधिवेशन संपेपर्यंत मदत जाहीर करू, असे आश्वासन मुख्यमंत्री देवेंद्र फडणवीस यांनी यावेळी दिले.त्यामुळे सरकार किती रुपयांची मदत जाहीर करते, याकडे शेतकऱ्यांच्या नजरा लागल्या आहेत.

डोंबिवली – डोंबिवली पूर्व परिसरात पहाटेच्या सुमारास एका २५ वर्षीय तरुणाची रस्त्यावर हत्या करण्यात आल्याची धक्कादायक घटना मंगळवारी घडली.
पहाटे साडेतीन ते चारच्या सुमारास पांडुरंगवाडी परिसरातील कांचन कुटीबर इमारतीसमोरील रस्त्यावर श्रेयस चारी नामक तरुणाची दारुच्या बाटलीने भोसकून हत्या केली. दरम्यान, पोलिसांनी या प्रकरणी एकाला ताब्यात घेतला असून तो संशयित श्रेयसचा मित्र असल्याचे समजते.या मित्रानेच श्रेयसची हत्या केल्याचा संशय पोलिसांनी व्यक्त केला आहे. डोंबिवलीत राहणारा श्रेयस ठाण्यातील रेमंड कंपनीत हार्डवेअर इंजीनियर या पदावर कार्यरत होता.