दिग्रस,दि. २० – शहरातील सुभाषचंद्र बोस मार्केटमध्ये आग लागल्याने आठ दुकान जळुन खाक झाले. रविवारी मध्यरात्री ही घटना घडली असून यामध्ये २० लाखाचे नुकसान झाले आहे.
येथील सुभाषचंद्र बोस मार्केटमध्ये टिनाचे दुकाने आहेत. काल रविवारी रात्री दिग्रस पोलीस ठाण्यातील जमादार नारायण लोढे, पोेकॉ गणेश मसरे, साहेबराव चव्हाण हे गस्त ाालत होते. अशातच त्यांना या दुकानातून धुर निघतांना दिसला. त्यांनी लगेच दुकानाच्या फलकावरील लिहुन असलेल्या मोबाईल क्रमांकावर फोन करून या बाबत कळविले. नगर परिषद मुख्याधिकाºयांनाही माहीती देऊन अग्निशमन दलाच्या पथकाला पाचारण केले. तसेच यवतमाळ व दारव्हा नगर परिषदच्या अग्निशमन दलही तेथे पाहेचले होते. या आगीमध्ये आठ दुकाने जळुन खाक झाली असून २० लाखाचे नुकसान झाले. यामध्ये विष्णु जाधव यांची कॅन्टींग व हॉटेलमधील एक लाखाचे साहित्य जळून खाक झाले. विजय दारव्हेकर यांच्या दुकानातील फर्निचर, आलमाºया, टीव्ही संच, खुर्च्या, डायनिंग टेबल, कुलर असा एकुण १ लाख ५० हजाराचा माल जळाला. अशोक चव्हाण याच्या गोडाऊनमधून केबल बंडल, खुर्च्या, कुलर, मोटारी, ड्रेसिंग टेबल जळाले असून ४ लाख ६५ हजाराचे नुकसान झाले. तनवीर शमी पुतलाखान यांचे ५ लाख ६० हजार, म. हारुण खलीफा यांचे ४ लाख रुपये, अरुण डफडे यांचे २ लाख ८० हजार असे एकुण १९ लाख ५६ हजार रुपयाचे नुकसान झाले. यावेळी सहाय्यक पोलीस निरीक्षक पी.पी. राऊत, एस.एल. राठोड यांनी बंदोबस्त ठेवला होता.

चंद्रपूर : चंद्रपूर जिल्हा लिकर असोसिएशनसह अन्य दोन संघटनांनी दारूबंदीविरोधात सुप्रीम कोर्टात याचिका दाखल केल्याची माहिती चंद्रपूर जिल्हा लिकर असोसिएशनचे सल्लागार दीपक जायस्वाल यांनी दिली आहे. चंद्रपूर जिल्ह्यात १ एप्रिलपासून दारूबंदी लागू करण्यात आली आहे. त्याला स्थगिती देऊन दारू व्यावसायिकांना त्यांचा व्यवसाय येथेच पूर्ववत करू देण्यासाठी चंद्रपूर जिल्हा लिकर असोसिएशन, देशी-दारू संघटनेचे सचिव राजीव मारकवार व राजेंद्र दीक्षित यांनी ही याचिका दाखल केली आहे. वर्धा, गडचिरोलीप्रमाणेच चंद्रपुरात अवैध दारूविक्री केली जात असल्याचा आरोप करीत सरकारचा महसूल बुडत असल्याचेही जायस्वाल यांनी म्हटले आहे

कोल्हापूर – छत्रपती शिवाजी महाराजांना आग्र्याहून राजगडावर येण्यास चार महिन्यांचा कालावधी लागला. याशिवाय आग्र्याला पोहोचण्यापूर्वी ते मथुरेला गेले होते, या मतप्रवाहला बळकटी देणारी छत्रपती शिवाजी महाराजांचे पत्रे उपलब्ध झाली आहे. सह्याद्री इतिहास संशोधन केंद्राने शनिवारी शिवाजी महाराजांची अन्य अप्रकाशित सात पत्रे पत्रकार परिषदेत सादर केली. ही पत्रे नक्कल आणि तालिकांच्या स्वरुपात आहेत, अशी माहिती इतिहास संशोधक इंद्रजित सावंत यांनी शनिवारी दिली.
सावंत म्हणाले, ‘येथील पुराभिलेखागारातून ही पत्रे उपलब्ध झाली आहेत. त्यावर गेली सहा वर्षे संशोधन सुरू होते. ‌१७ ऑगस्ट १६६६ रोजी शिवाजी महाराजांची आग्र्याहून सुटका झाली. त्यानंतर ते २५ दिवसांत राजगडावर पोहचल्याचा मतप्रवाह आहे. दुसऱ्या मतप्रवाहानुसार ते चार महिन्यांनी म्हणजे २० नोव्हेंबर रोजी स्वराज्यात पोहोचले. शिवाजी महाराजांच्या ३ ऑक्टोबर १६६६ रोजीच्या पत्रात त्यांनी ‌मथुरेतील जयकृष्ण चोबे याला वर्षासन दिल्याची नोंद आहे. म्हणजे महाराज ३ ऑक्टोबर १६६६ पर्यंत मथुरेतच असल्याचे स्पष्ट होते. त्यामुळे आग्र्याहून सुटका झाल्यानंतर ते किमान ४७ दिवस मथुरेतच थांबल्याचे दिसते. सहाजिकच शिवाजी महाराज नोव्हेंबर महिन्यात राजगडावर पोहोचले या प्रवाहाला पत्रातून बळकटी मिळते.’
‘जयकृष्ण आणि जयराम चोबे यांनी वर्षासन आणि संकल्पित दिल्याची सनदही मिळाली आहे’ असे सांगून सावंत म्हणाले, ‘शिवाजी महाराज सप्टेंबर महिन्यात राजगडावर पोहचले अशी खबर औरंगजेबला देणारी मिर्झाराजे जयसिंग यांची पत्रे आहेत. महाराजांनी स्वतः राजगडावर पोहोचलो अशी अफवा पसरवली असावी किंवा दुसऱ्या कोणाला तरी शिवाजी बनवून पाठविले असावे असा एक तर्क करता येतो. शिवरायांच्या दक्षिण दिग्विजयामागे शहाजी महाराजांचे एक सरदार रघुनाथ पंडित अमात्य हनुमंते यांचे मोठे सहकार्य होते. संशोधकांना सापडलेल्या ३ सप्टेंबर १६७७ रोजीच्या पत्रात हनुमंते यांची ‘वार्षिक नेमणूक करून कर्नाटक देश तुम्हा स्वाधीन केला’ अशी नोंद आहे. त्यांना एक लाख पाच हजार होन ठरवून दिले असेही पत्रात नमूद आहे. याशिवाय विशाळगडाच्या संदर्भातील पत्रात (१६ मार्च १६७१) हवालदार दुधाजी आहीरराऊ यांच्या नावाची नोंद असून १४ एप्रिल १६७१ रोजीचे हे पत्र विशाळगडावरील कदिम तैनातीचे आहे. २६ सप्टेंबर १६७७ रोजीच्या पत्रात त्रिंबकजी काकास कर्नाटकातील वलदाऊर मामले चंदी हे गाव वतन दिल्याचे म्हटले आहे.’ पत्रकार परिषदेला पुराभिलेखागाराचे अभिलेखापाल गणेश खोडके, मराठा महासंघाचे जिल्हाध्यक्ष वसंतराव मुळीक, प्रा. देविका पाटील, अमित अडसुळे आदी उपस्थित होते.
१६६९ सालातील एक प‌त्र मिळाले असून त्यात मिरासदार, कारकूनांची नावे आहेत. या पत्रात दोघा तृतीयपंथ्यांनी शिवाजी महाराजांकडे अर्ज केला होता. त्यानुसार त्यांना उदरनिर्वाह करण्याची परवानगी देण्यात आली होती.- इंद्रजित सावंत, इतिहास संशोधक

नवी दिल्ली – आपला पती समलैंगिक असल्याचे समजल्यानंतर दिल्लीतील पहारगंज येथील एम्सच्या ३० वर्षीय डॉक्टरने आत्महत्या केली. आत्महत्येपूर्वी या डॉक्टरने फेसबुकवर तसेच चिठ्ठीमध्ये आत्महत्येचे कारण लिहून ठेवले होते.
प्रिया वेदी असे या आत्महत्या केलेल्या डॉक्टरचे नाव आहे. ती अॅनेस्थेशिया विभागाची रेसिडेंट डॉक्टर होती. रविवारी आपल्या पतीशी भांडण झाल्यानतर रात्री साडेबाराच्या सुमारास ती हॉटेलमध्ये आली. त्यानंतर सकाळी हॉटेलमधील कर्मचा-यांना तिचा मृतहेद खोलीत आढळला.
‘पाच वर्षांपूर्वी मी डॉ. कमल वेदी यांच्यासोबत विवाह केला. माझा पती समलैंगिक असल्याने आमचे वैवाहिक जीवन चांगले नव्हते. गेल्या पाच वर्षांपासून पती आणि त्यांचे कुटुंबीय माझा मानसिक छळ करत होते’. असे तिने आपल्या पोस्टवर म्हटले आहे. याप्रकरणी मृत डॉक्टरचा पती कमल वेदी याला पोलिसांनी अटक केली असून याबाबतचा पुढील तपास सुरु आहे.

नागपूर – कैद्यांकडे मोबाईल फोन अढळून आल्याने चर्चेत आलेल्या नागपूर मध्यवर्ती कारगृहाला आज सकाळी ७.३० वाजात मुख्यमंत्री देवेंद्र फडणवीस यांनी अचानक भेट दिली. या भेटीमुळे कारागृहातील अधिकाऱ्यांची एकच धावपळ उडाली.
सकाळी ७.३० सुमारास मुख्यमंत्र्यांनी दिलेल्या अचानक भेटीमुळे कारागृह प्रशासनाची चांगलीच भंबेरी उडाली. ३१ मार्चला नागपूर मधून पाच कैदी पळून गेले होते. त्यानंतर जेलमध्ये कैद्यांकडून शंभरपेक्षा अधिक मोबाईल, तसेच पेन ड्राईव्हही जप्त करण्यात आले. त्यामुळे नागपूर कारगृहातील भ्रष्ट काराभारच चव्हाट्यावर आला.
मुख्यमंत्र्यांनी आज सकाळी साडेसातच्या सुमारास नागपूर कारागृहाला भेट दिली. सुमारे ४० मिनिटांच्या भेटीनंतर मुख्ममंत्र्यांनी जेलच्या सुरक्षे व्यवस्थेतेबाबत अजून सुधारणा करण्याची आवश्यक्ता असल्याचे म्हटले. तसेच कारागृह प्रशासनाच्या संपूर्ण कार्यशैलीतही बदल आवश्यक असल्याचे मत त्यांनी व्यक्त केले आहे.
मुख्यमंत्र्यांच्या या भेटीची माध्यमांसह कोणालाही थांगपत्ता नसल्याने प्रशासनाबरोबर कर्मचाऱ्यांचीही भंबेरी उडाली. नागपूर कारागृह प्रकरणानंतर आतापर्यंत एकूण ११ तुरुंग प्रशासनातील अधिकारी आणि कर्मचाऱ्यांवर निलंबनाची कारवाई करण्यात आलेली आहे.