यवतमाळ, दि. ४ – जिल्ह्यात रेती घाटावर जेसीबीने अवैधपने रेतीचे उत्खन्न सुरू आहे. जिल्हाधिकाºयांनी आज सोमवारी ४ एप्रिल रोजी कळंब तालुक्यातील हिवरा(दरणे) नजीकच्या रेती घाटावर धाड मारली. यावेळी जेसीबीसह १२ ट्रक जप्त केले.
जिल्ह्यातील नदीसह रेती घाटावरून अवैधपने रेती तस्करी सुरू आहे. अनेक माफीयांनी लिलावातील घाटाला हात न लावता इतरत्र घाटातून रेतीचे ओव्हरलोड उत्खनन चालविले आहे. यापूर्वी जिल्हाधिकारी राहुल रंजन महिवाल यांनी बाभूळगाव तालुक्यातील रेती घाटावर कारवाई केली होती. तसेच आज सोमवारी महिवाल यांना कळंब तालुक्यातील हिवरा (दरणे) या गावा जवळील नदीपात्रातून अवैधपणे रेतीचे उत्खनन होत असल्याची माहिती मिळाली होती. त्यावरून त्यांनी पोलिसांचा ताफा घेत घटनास्थळ गाठले असता, तब्बल १२ ट्रक व दोन जेसीबी जप्त केले. सदर रेती माफीयांवर फौजदारी कारवाई केली जाणार असून, मोठा दंडही वसूल केला जाणार असल्याचे जिल्हाधिकाºयांनी सांगितले. रेती तस्करीवर नियंत्रण ठेवण्यासाठी जिल्हा खनिकर्म विभाग कार्यान्वित करण्यात आले आहे. मात्र मोबाईल एसएमएस प्रणीलीचा वापरच केला जात नसून, अवैध उत्खननानेही कळस गाठला आहे. बोटावर मोजण्याइतक्याच कारवाया जिल्हा खनिकर्म अधिकाºयांनी केल्या आहे. फौजदारीऐवजी दंड वसूल करून माफीयांना सोडण्यात येत आहे. रेती चोरीच्या असंख्य तक्रारीमुळे जिल्हाधिकाºयांनी तस्करांच्या मुसक्या आवळण्यासाठी धाडसत्र सुरू केले असून, आठवड्यात दोन मोठ्या कारवाया झाल्याने तस्करांचे धाबे दणाणले आहे.

पुणे – जुन्नर तालुक्यातील डिंगोरे गावात रविवारी रात्री साडेदहाच्या सुमारास बिबट्याने केलेल्या हल्ल्यात आणखी एका बालकाचा मृत्यू झाल्याने संतप्त ग्रामस्थांनी झोपी गेलेल्या प्रशासनाचे लक्ष वेधून घेण्याकरीता सोमवारी सकाळी नगर-कल्याण महामार्गावर ‘रास्ता रोको’ आंदोलन केले. यावेळी मोठ्या प्रमाणात नागरिक आंदोलनात सहभागी झाले होते.
वन विभागाच्या नाकर्तेपणामुळे या भागात गेल्या महिना-दोन महिन्याच्या कालावधीत बिबट्याने हल्ला केल्याच्या सहा घटना घडल्या आहेत. याकडे वन विभागाचे अधिकारी सोईस्कररित्या कानाडोळा करत असल्याने प्रशासनाचे लक्ष वेधून घेण्याकरीता सोमवारी सकाळी जुन्नर तालुक्यातील ओतूर, डिंगोरे, खामुंडी गावच्या ग्रामस्थांनी नगर-कल्याण रास्ता रोखून धरला. यामुळे सोमवारी नगर-मुंबई प्रवास करणाऱ्या चाकरमान्यांना वाहतूक कोंडीचा सामना करावा लागला. ग्रामस्थांचे रास्ता रोको आंदोलन माघारी घेण्याकरीता ओतूर पोलिसांनी मध्यस्थी केली. मात्र, ग्रामस्थांनी वन विभागाच्या अधिकाऱ्यांना अगोदर बोलवा, मगं काय ते बघू अशी भूमिका घेतल्याने पोलिसांची चांगलीच गोची झाली. अखेर वन विभागाच्या अधिकाऱ्यांनी चर्चेचे आमंत्रण दिल्यानंतरच ग्रामस्थांनी रास्ता रोको आंदोलन मागे घेतले. जुन्नर तालुक्यातील डिंगोरे गावात बिबट्याच्या हल्ल्यात एका बालकाचा मृत्यू झाला आहे. जुन्नर तालुक्यात गेल्या पंधरा दिवसामधील ही तिसरी घटना आहे. त्यात २ बालकांचा मृत्यू झाला. या घटनांमुळे जुन्नर परिसरात भीतीचे वातावरण निर्माण झाले आहे. साई संतोष मंडलिक असे मृत्युमुखी पडलेल्या अडीच वर्षीय बालकाचे नाव आहे. रविवारी सायंकाळी मंडलिक कुटुंब अंगणात बसले होते. अचानक आलेल्या बिबट्याने सर्वांसमोर साईला ओढून नेले. सगळ्यांनी आरडाओरड केली. मात्र बिबट्याने बालकाला सोडले नाही, असे नातेवाईकांनी सांगितले. मागील महिन्यात जुन्नर तालुक्यातील खामुंडी गावात बिबट्याने केलेल्या हल्ल्यात पाच वर्षीय बालकाचा मृत्यू झाला तर तीन वर्षीय बालिका गंभीर जखमी झाली होती.

कोहिमा – नागालॅंडच्या मॉन जिल्ह्यामध्ये दहशतवाद्यांनी घात लावून केलेल्या हल्ल्यामध्ये आसाम रायफल्सचे आठ जवान शहीद झाले असून, सह जवान जखमी झाले आहेत. निमलष्करी दलाचे चार जवान बेपत्ता असल्याची माहिती आहे.
रविवारी दुपारी अडीचच्या सुमारास आसाम रायफल्सचे १८ जवांन चांगलांगसू गावात पाणी आणण्यासाठी ट्रकमधून चालले असताना आधीपासूनच दबा धरुन बसलेल्या दहशतवाद्यांनी जवानांवर हल्ला केला.
जवानांच्या ट्रकवर त्यांनी अंदाधुंद गोळीबार सुरु केला. तीन जवानांचा जागीच मृत्यू झाला. आसाम रायफल्सच्या जवानांनीही या गोळीबाराला प्रत्युत्तर दिले. या गोळीबारात दहशतवादीही ठार झाले आहेत मात्र त्यांचा आकडा समजू शकलेला नाही. या हल्ल्याची माहिती मिळताच घटनास्थळी अतिरिक्त कुमक पाठवण्यात आली आहे.
एनएससीएन (के) या दहशतवादी गटाने हा हल्ला केल्याचा संशय आहे. एनएससीएन(के) ने मागच्या महिन्यात केंद्राबरोबर पंधरावर्षापासून असलेला शस्त्रसंधी करार मोडून सुरक्षापथकांना लक्ष्य केले.
दोन एप्रिलला या संघटनेच्या दहशतवाद्यांनी अरुणाचलप्रदेशच्या तिराप जिल्ह्यात लष्कराच्या ताफ्यावर सापळा रचून हल्ला केला होता. यात तीन जवान शहीद झाले होते तर, तीन जवान जखमी झाले होते. मागच्या शनिवारी कामलेंगचिंग गावात झालेल्या चकमकीत लष्कराने एनएससीएन-के च्या चार दहशतवाद्यांना कंठस्नान घातले होते

मोहाली- आयपीएलच्या आठव्या हंगामात मुंबई इंडियन्सने किंग्ज इलेव्हन पंजाबवर २३ धावांनी दणदणीत विजय मिळवला. मुंबईने विजयासाठी ठेवलेल्या १७२ धावांच्या आव्हानाचा पाठलाग करताना किंग्ज इलेव्हन पंजाबने २० षटकांत सात बाद १४९ धावा केल्या.
किंग्ज इलेव्हन पंजाबची सुरुवात खराब झाली. सलामीवीर विरेंद्र सेहवाग झटपट बाद झाला. त्यानंतर फलंदाजीला आलेला ग्लेन मॅक्सवेलही मोठी खेळी करण्यात अपयशी ठरला. त्याला जगदीश सुचितने बाद केले. मुरली विजयने डेव्हिड मिलरसोबत मिळून ४८ धावांची भागीदारी रचली. मात्र विजय ३९ धावा करून बाद झाला. त्याला हरभजन सिंगने बाद केले. त्यानंतर मिलर (४३) बाद झाला. तर जॉर्ज बेली (२१) आणि अक्षर पटेल धावबाद होऊन तंबूत परतले.
मुंबईकडून लसिथ मलिंगाने दोन तर हरभजन आणि जगदीश सुचितने प्रत्येकी एक गडी बाद केला.
तत्पूर्वी, नाणेफेक जिंकून फलंदाजीला आलेल्या मुंबई इंडियन्सने सलामीवीर लेंडल सिमेन्स आणि पार्थिव पटेल यांच्या अर्धशतकांच्या जोरावर मुंबईने २० षटकांत तीन बाद १७२ धावा केल्या.
मुंबईच्या सलामीवीरांनी सुरुवात दमदार केली. पटेल आणि सिमेन्स यांनी १११ धावांची सलामी दिली. करणवीर सिंगच्या चेंडूवर फटका मारण्याच्या प्रयत्नात पार्थिव बाद झाला. त्याने ३६ चेंडूत पाच चौकार आणि तीन षटकारांच्या मदतीने ५९ धावा केल्या.
त्यानंतर फलंदाजीला आलेल्या कर्णधार रोहित शर्माने सिमेंन्ससोबत मिळून ४३ धावांची भागीदारी केली. रोहितला मिशेल जॉन्सनने तंबूचा रस्ता दाखवला. त्याने २६ धावा केल्या. त्या पाठोपाठ सिमेन्स बाद झाला. सिमेन्सने ५६ चेंडूत ७१ धावांची खेळी केल्याने मुंबईला १७२ धावांपर्यंत पोहचण्यात मोलाची भूमिका बजावली.त्यानंतर फलंदाजीला आलेले केरॉन पोलार्ड (७) आणि अंबाती रायडू (४) हे नाबाद राहिले. किंग्ज इलेव्हन पंजाबकडून अनुरीत सिंग, मिशेल जॉन्सन, करणवीर सिंग यांनी प्रत्येकी एक गडी बाद केला.

यवतमाळ , दि. ३ – सध्या आयपिएल क्रिकेटची धुम सुरू असून क्रिकेट सट्टाही तेजीत आहे. घाटंजी येथे क्रिकेट स्पर्धेत अनेकांनी सट्टा लावल्याची टिप मिळताच घाटंजी येथील सट्ट्यावर धाड टाकुन दोन आरोपींना अटक केली. स्थानिक गुन्हे शाखेच्या पथकांने शनिवारी रात्री घाटंजी येथील दुर्गा माता वार्डात ही कारवाई केली.
अजय नानाजी अक्कलवार (३८) , जाफर खान ईमान खान पठाण (३३) सर्व रा. दुर्गा माता वार्ड घाटंजी अशी आरोपींची नावे आहे. शुक्रवारी रात्री सरनाईज हैद्राबाद विरूद्घ चन्नई सुपर किंग यांचा दरम्यान क्रिकेट सामना सुरू होता. या सामन्यावर सट्टा सुरू असल्याची टिप स्थानिक गुन्हे शाखेच्या पथकाला मिळाली होती. त्यावरून पथकाने दुर्गा माता वार्ड घाटंजी येथील अक्कलवार यांच्या घरी वरच्या मजल्यावर धाड टाकली. यावेळी अजय अक्कलवार, जाफर खान या दोघांना ताब्यात घेतले. त्याच्याकडून एलसीडी, सेटअप बॉक्स, १० मोबाईल, रिमोट, अन्य साहित्य व नगदी ३ हजार ७०० रुपये असा एकुण ६१ हजार ७०० रुपयाचा मुद्देमाल जप्त केला. तसेच हार-जीत जुगार लिहीलेल्या चिठ्याही जप्त केल्या. या प्रकरणी घाटंजी पोलिसांनी आरोपीविरूद्घ ४,५ मुंबई जुगार कायदया अंतर्गत गुन्हा दाखल केला असून तपास सुरू आहे. ही कारवाई अपर पोलीस अधिक्षक जे.बी. डाखोरे यांच्या आदेशाने स्थानिक गुन्हे शाखेचे पोलीस निरीक्षक यांच्या मार्गदर्शनाखाली पोलीस उपनिरीक्षक सुगत पुंडगे, सहाय्यक फौजदार भिमराव सिरसाट, डोंगरे, पोलीस शिपायी नितीन सलाम, भोजराज करपते, चालक सतीश गजभिये यांनी केली.

नागपूर – येत्या १ ऑगस्ट २०१५ ला एलबीटी हटविणार तसेच एलबीटी आंदोलनादरम्यान ज्या व्यापाऱ्यांवर नोव्हेंबर २०१४ पर्यंत दाखल झालेले गुन्हे परत घेण्यात येईल, अशी ग्वाही मुख्यमंत्री देवेंद्र फडणवीस यांनी दिली. ते नागपुरात नाग विदर्भ चेंबर्स ऑफ कॉमर्सतर्फे आयोजित सत्कार समारंभात बोलत होते.
फ्रान्स आणि जर्मनीच्या दौऱ्यात तेथील उद्योजकांना महाराष्ट्रात गुंतवणूक करण्याचे आवाहन केले असल्याचंही फडणवीसांनी सांगितले. त्यांनी याबाबत उत्सुकता दाखवली असून नागपुरात गुंतवणूक करणार असल्याचेही मुख्यमंत्र्यांनी सांगितले. विदर्भात कृषी आधारित उद्योग सुरू करण्यात येणार असून शेतकऱ्यांच्या कृषीमालावर उत्पादन करणाऱ्या कंपनीने रशियाच्या कंपनीबरोबर सामंजस्य करारावर स्वाक्षरी केल्या आहेत. नागपूर जी. एस. टीचे केंद्र बनेल. विविध प्रकारच्या कंपन्या विदर्भात येणार आहेत. ५ लाख शेतकऱ्यांकडून सरळ माल विकत घेतली. शेतकऱ्यांची ही संख्या २५ लाखांपर्यंत वाढेल अशी माहितीही मुख्यमंत्र्यांनी दिली.

काठमांडू – नेपाळमधील भूकंप काही थांबता थांबेना, आठवड्यापूर्वी ७.९ रिश्टर तीव्रतेच्या भूकंपाने नेपाळ उद्धवस्त झाले आहे. त्यात आज पुन्हा नेपाळला भूकंपाने धक्के दिले आहेत.
येथील सिंधुपालचौक जिल्ह्यात आज पहाटे ३.२९ च्या सुमारास भूकंपाने धक्का दिला आहे. या भूकंपाची ४.५ रिश्टर तीव्रतेची नोंद झाली आहे. त्याचबरोबर पहाटे ५.५७ वाजता गोरखा आणि धाडिग जिल्ह्याला भूकंपाने ५ रिश्टर तीव्रतेचे धक्के दिले आहेत. या भूकंपाचा केंद्रबिंदू धाडिग जिल्ह्यात होता.भूकंपाचे धक्के थांबत नसल्याने नेपाळमधील नागरिक प्रचंड दहशतीखाली आहेत. मात्र, अधिक चिंता करू नये, असे हवामान खात्याने आवाहन केले आहे.

नवी दिल्ली – १९९३ मधील मुंबई बॉम्बस्फोटानंतर अंडरवर्ल्ड डॉन दाऊद इब्राहिमला शरण यायचे होते असा खळबळजनक खुलासा सीबीआयचे माजी महानिरीक्षक नीरज कुमार यांनी केला आहे.
जून १९९४ मध्ये माझे दाऊदशी तीनवेळा बोलणे झाले. त्याच्या बोलण्यावरुन त्याला शरण यायचे हे जाणवत होते. मात्र जर भारतात परतलो तर त्याच्याविरोधातील गँगस्टर त्याला मारुन टाकतील अशी भिती दाऊदला होती. त्याची सुरक्षा ही सीबीआयची जबाबदारी असेल असेही मी त्याला सांगितले होते. मात्र सीबीआयच्या वरिष्ठ अधिका-यांनी आपल्याला रोखले. त्यामुळे दाऊदशी पुढे बोलणे होऊ शकले नाही असे कुमार यांनी एका वृत्तपत्राला दिलेल्या माहितीत सांगितले.दाऊदचा निकटवर्तीय मनीष लालाने नीरज कुमार आणि दाऊदचे बोलणे करवून दिले होते. मनीषने मला सांगितले होते की दाऊद स्वत:ला निर्दोष सिद्ध करण्यासाठी शरण येत बोता असे नीरज कुमार म्हणाले. चार वर्षांनंतर छोटा राजनच्या गँगने मनीष लालाची गोळ्या घालून हत्या केली नीरज कुमार आपल्या पोलीस सेवेतील ३७ वर्षाच्या कारकिर्दीतल टॉप १० तपास प्रकरणांबाबतचे पुस्तक सध्या लिहीत आहेत. दाऊदसोबत झालेल्या संभाषणाचा उल्लेखही या पुस्तकात करण्यात आला आहे. लवकरच हे पुस्तक प्रदर्शित होणार आहे.मुंबईवर १९९३ मध्ये झालेल्या बॉम्बस्फोटाचा तपास नीरज कुमार करत होते. या बॉम्बस्फोटात २५७ जण ठार झाले तर ७०० हून अधिक जण जखमी झाले होते.

पोस्टल मैदानावर महाराष्ट्र दिनाचा वर्धापनदिन
यवतमाळ, दि. 1 : यवतमाळ जिल्हा मोठ्या प्रमाणावर कापुस पिकविणारा जिल्हा आहे. या जिल्ह्यात कापसावर आधारीत प्रक्रीया करणारे मोठे उद्योग निर्माण होणे आवश्यक असतांना एकही उद्योग गेल्या काही वर्षात उभा राहिलेला नाही. राज्य शासनाने विदर्भातील शेतकऱ्यांना दिलासा देण्यासाठी येथे प्रक्रीया उद्योग उभारण्याचा निर्णय घेतला आहे. त्यानुसार विदर्भात येत्या काही दिवसांमध्ये चार टेक्सटाईल पार्क उभे राहात असून त्यात यवतमाळचाही समावेश असल्याचे पालकमंत्री संजय राठोड यांनी सांगितले.
महाराष्ट्र राज्य स्थापनेच्या 55 व्या वर्धापनदिनाचा मुख्य सोहळा येथील पोस्टल मैदानावर आयोजित करण्यात आला होता. त्याप्रसंगी शुभेच्छा देतांना ते बोलत होते. कार्यक्रमास यवतमाळचे नगराध्यक्ष सुभाष राय, जिल्हाधिकारी राहुल रंजन महिवाल, मुख्य कार्यकारी अधिकारी डॅा.मल्लिनाथ कलशेट्टी, अप्पर पोलिस अधिक्षक जे.बी.डाखोरे यांच्यासह अधिकारी, माजी सैनिक, नागरीक मोठ्या संख्येने उपस्थित होते.
सुरूवातीस पालकमंत्र्यांनी महाराष्ट्र राज्याच्या निर्मितीसाठी आपल्या प्राणांची आहुती देणाऱ्या हुतात्म्यांना अभिवादन केले. जिल्हृयाचा पालकमंत्री म्हणून काम करतांना जिल्ह्याचा सर्वांगीण विकास हेच आपले ध्येय आहे. गेल्या पाच महिन्यात प्रशासन अधिक लोकाभिमूख करण्यासाठी शासनाने विविध उपक्रम हाती घेतले. नागरिकांची कामे जलदगतीने व ठराविक कालावधीत व्हावी यासाठी सेवा हक्क कायदा लागू केला. त्याचा लाभ सर्वांनी घ्यावा, असे आवाहन पालकमंत्र्यांनी केले.
महाराष्ट्र टंचाईमुक्त करण्यासाठी शासनाने महत्वाकांक्षी जलयुक्त शिवार अभियान सुरू केले. या अभियानांतर्गत जिल्ह्यासाठी 396 कोटी रूपयांचा आराखडा तयार करण्यात आला. 12 हजार 716 जलसंधारणाची कामे यातून होणार आहे. पहिल्या टप्प्यात जिल्ह्यात 503 गावांची निवड करण्यात आली असून टप्प्या टप्प्याने टंचाई परिस्थिती असलेली सर्वच गावे या अभियानाने जोडली जाणार आहे. भविष्यात जिल्ह्यातील एकही गाव टंचाईसदृश राहणार नाही.
महसूल राज्यमंत्री म्हणून काम करताना जिल्ह्यासाठी काही नवीन केले पाहिजे, अशी माझी भूमिका आहे. जिल्ह्यात तालुकास्तरावरील प्रशासकीय इमारती, तलाठी कार्यालय, तालुक्याच्या ठिकाणी पोलिस पाटील भवन, दर्जा नसलेल्या गावांना महसूली दर्जा, शेतकऱ्यांच्या जमीनींचे तुकडी बंदी आदी विषय प्राधान्याने मी हातात घेतले आहे. लवकरच याचे चांगले परिणाम दृष्टीस पडणार आहे.
रोजगार हमी योजना व धडक सिंचन योजनेतून विहीरींची कामे करत असताना खचलेल्या आणि बुजलेल्या विहीरींनाही दुरूस्तीचा लाभ मिळाला पाहिजे, असा आग्रह मी धरला होता. शासनाने काही दिवसांपूर्वी त्यासंदर्भातला आदेश काढला. शेतकऱ्यांना केवळ विहीरी देऊन उपयोग नाही. विहिरीवर सिंचनासाठी पंप आणि त्याला कनेक्शन नसेल तर उपयोग होणार नाही. प्रत्येकाला वीज कनेक्शन देता यावे म्हणून शासनाने विशेष बाब म्हणून 57 कोटी रूपयाचा निधी जिल्ह्याला नुकताच मंजूर केला. जुन्या प्रलंबित 9 हजार शेतकऱ्यांना वीज कनेक्शन देण्याची कार्यवाही जिल्ह्यात वेगाने सुरू आहे. यानंतर मागेल त्याला कनेक्शन, अशी आमची भूमिका यापुढे राहणार आहे.
धामणगाव देव आपल्या जिल्ह्याचे तीर्थक्षेत्र आहे. पोहरादेवी बंजारा समाजाची काशी आहे. धार्मिकदृष्ट्या अतिशय महत्वाच्या या स्थळांचा विकास झाला पाहिजे, या भूमिकेतूनच पाठपुरावा केल्याने शासनाने दोन्ही स्थळांसाठी पहिल्या टप्प्यात प्रत्येकी 6 कोटींची तरतूद केली आहे. या स्थळांच्या विकासामुळे जिल्ह्याच्या पर्यटनाला चालना मिळणार आहे.
गावगाड्यातील नागरीकांच्या अजूनही अनेक समस्या आहे. त्या समजून घेणे आवश्यक आहे. त्यासाठीच या महिन्यापासून समाधान शिबिराच्या माध्यमातून तालुकास्तरावर जनता दरबार घेण्याचा निर्णय मी घेतला आहे. या दरबारात येणाऱ्या प्रत्येकाची दखल घेतली जाईल. त्यांच्या समस्या आपुलकीने समजून त्या सोडविण्याचा प्रयत्न करणार असल्याचे पालकमंत्री म्हणाले.
जिल्ह्यातील शेतकऱ्यांच्या आत्महत्या आमच्यापुढील फार मोठे आव्हान आहे. नापिकी आणि कर्जबाजारीपणा असला तरी निराश होऊ नका. शासन शेतकऱ्यांच्या पूर्ण पाठीशी आहे. तुमच्या काही समस्या असतील तर जिल्हाधिकाऱ्यांना किंवा थेट मला भेटा. धीर खचू देऊ नका, कुटूंबाला उघड्यावर पाडू नका, अशी कळकळीची विनंती जिल्ह्यातील तमाम शेतकरी बांधवांना याप्रसंगी त्यांनी केली.
उद्योगांसाठी अकृषक परवानगी सुधारणा विधेयक नुकत्याच झालेल्या अर्थसंकल्पीय अधिवेशात मांडण्यात आले. या विधेयकामुळे पूर्वी ज्या कामसाठी मोठा कालावधी लागायचा ते काम केवळ 15 दिवस ते एक महिन्यात पूर्ण होणार आहे. यामुळे राज्यात उद्योगांना चालना मिळणार असल्याचे पालकमंत्री संजय राठोड यांनी याप्रसंगी सांगितले. ध्वजारोहणानंतर पोलिस दलाच्यावतीने पालकमंत्र्यांना मानवंदना देण्यात आली. यावेळी उत्कृष्ट काम करणाऱ्या वेगवेगळ्या क्षेत्रातील मान्यवरांचा पालकमंत्र्यांच्याहस्ते गौरव करण्यात आला.