यवतमाळ – बोरगाव घाटात विवाहितेवर सामूहिक अत्याचाराच्या घटनेला दोन दिवस होत नाही तोच शहरालगतच्या पारवा-भारी येथे तीन युवकांनी  एका युवतीवर सामूहीक अत्याचार केल्याची घटना आज उघडकीस आली.
मूळ अमरावती जिल्ह्यातील धारणी येथील २१ वर्षीय युवती  तीन महिन्यापासून  मावस भावाच्या गावी पारवा येथे नोकरीच्या शोधात आली होती. यवतमाळात नोकरी मिळाल्याने काही दिवसापासून ती शहरातील जामनकर नगरमध्ये किरायाने खोली करून राहत आहे. यावेळी तिची ओळख एका मयुर नामक युवकासोबत झाली. ओळखीचे रुपांतर प्रेमात झाल्याने ते लग्नही करणार होते.  मात्र त्या युवकाने विषारी औषध  घेतल्याने त्याला खासगी रुग्णालयात उपचारासाठी दाखल केले. त्याच्याच भेटीसाठी ती युवती रुग्णालयात गेली होती. यावेळी पारवा येथीलच विक्की व आकाश नावाच्या युवकांनी तिला दुचाकीवर बसवून नेले. रात्री १० वाजताच्या सुमारास पारवा येथील जिल्हा परिषद शाळेत तिच्यावर जबरीने अत्याचार केला. त्यानंतर पुन्हा भारी येथे शेतात नेऊन  त्या दोघांनी व फिरोज नामक युवकाने अत्याचार केला. रात्री  १२.३० वाजताच्या सुमारास तिला जामनकरनगरात आणून सोडले. या प्रकाराने भयभित झालेल्याने पीडितेने आज दुपारी वडगाव रोड ठाणे गाठून आपबीती सांगून तक्रार दिली. यावेळी जिल्हा शासकीय वैद्यकीय महाविद्यालयात पीडित युवतीची वैद्यकीय तपासणी केली.  याप्रकरणी वडगाव रोड पोलिसांनी आरोपीविरुद्घ भादंवि कलम ३७६ (ग) अंतर्गत गुन्हा दाखल केला.

नागपूर : अखिल भारतीय ब्राम्हण महासंघ, युवा आघाडी यांच्या संयुक्त विद्यमाने १ मे महाराष्ट्र दिनानिमित्त लक्ष्मीनगर, सिस्फा गॅलरी यथे ‘फोटोग्राफी’ स्पर्धा व छायाचित्र प्रदर्शनाचे आयोजन करण्यात आल्याची माहिती अ. भा. ब्राम्हण महासंघाचे शिवानी दाणी यांनी आज पत्रपरिषदेत दिली.
छायाचित्र स्पर्धा ही सर्वांसाठी खुली असून विदर्भातील अभयारण्य, धार्मिक स्थळ तसेच विदर्भाचे सांस्कृतिक व भौगोलिक दर्शन घडविणार्‍या छायाचित्रांचा यात समावेश राहील. स्पर्धेत भाग घेण्यासाठी प्रवेश शुल्क १00 रुपये आकारण्यात आले आहे. विजेत्या स्पर्धकांना प्रथम पारितोषिक ५000 रुपये, द्वितीय पारितोषिक ३000 रुपये, तृतीय पारितोषिक २000 हजार रुपये देण्यात येईल. छायाचित्र प्रदर्शन सकाळी ९ ते रात्री ९ पर्यंत प्रेक्षकांकरिता सुरू राहील. छायाचित्र पाठविण्यासाठी शिवानी दाणी-९८६0१३३८६0, मयुरेश जोशी- ८९७४७३७९९१ या भ्रमणध्वनी क्रमांकाशी संपर्क साधण्याचे आवाहन शिवाणी यांनी केले.