यवतमाळ – युवा सेनेचे अध्यक्ष आदित्य ठाकरे २ एप्रिल रोजी महायुतीच्या उमेदवार भावना गवळी यांच्या प्रचारार्थ यवतमाळ  जिल्ह्यात येणार आहे. सकाळी ९ वाजता अवधुत क्रिडा मैदानातून मोटर सायकल रॅली काढण्यात येणार आहे. तर नेर येथेही दुपारी १ वाजता मोटर सायकल रॅलीचे आयोजन केले आहे.

या रॅलीत महायुतीच्या उमेदवार भावना गवळी, शिवसेनेचे आ. संजय राठोड, शिवसेना जिल्हा प्रमुख श्रीकांत मुनगीनवार, माजी मंत्री राजाभाऊ ठाकरे, माजी आ. मदन येरावार, भाजपचे जिल्हाध्यक्ष राजेंद्र डांगे,मनोज इंगोले, बाबासाहेब गाडे पाटील, राजू पडगीलवार, रिपाईचे जिल्हाध्यक्ष मोहन भोयर,  सुखदेव जाधव, गोविंद मेश्राम, भाजपचे अमर दिनकर, अमोल ढोणे, अजय बिहाडे, जयदीप सानप, प्रवीण प्रजापती, अजय राऊत, शिवसेनेचे प्रवीण पांडे, श्रीधर मोहोड, राजेंद्र गायकवाड, हरिहर लिंगनवार, गजानन डोमाळे, किशोर इंगळे आदी पदाधिकारी सहभागी होणार आहेत. येथील अवधुत क्रिडा मैदानातून सुरु होणारी मोटर सायकल रॅली दत्त चौक, वीर वामनराव चौक, दाते चौक, सत्य साईज्योत मंगल कार्यालय, आर्णी रोड, बस स्थानक चौक, लाठीवाला पेट्रोल पंप, लोकमाता चौक, एलआयसी चौक, पोस्ट आॅफिस चौकी, स्टेट बँक चौकी, अप्सरा टॉकीज, इंदिरा मार्केट, शिवाजी चौक आदी मार्गाने जावून अवधुत क्रीडा मैदानावर पोहचेल. या ठिकाणी आदित्य ठाकरे युवा सेनेच्या कार्यकर्त्यांना मार्गदर्शन करतील. या मोटर सायकल रॅलीत राळेगाव, कळंब, बाभूळगाव, यवतमाळ या तालुक्यातील युवा सेना, विद्यार्थी सेनेच्या कार्यकर्त्यांनी आपआपल्या वाहनांसह सहभागी व्हावे, असे आवाहन युवा सेनेचे जिल्हा युवा अधिकारी गजानन बेजंकीवार, निखील पाटील जैत, पराग पिंगळे, अभिषेक पांडे, राजू दुधे,निखील वाघ यांनी केले आहे.

लखीमपुर (आसाम)- भाजपचे नेते केवळ मोठ्या गप्पा मारतात आणि द्वेषाचे राजकारण करतात, असा हल्लाबोल काँग्रेस अध्यक्ष सोनिया गांधी यांनी केला. लखीमपूर येथे काँग्रेस उमेदवाराच्या प्रचारसभेत त्या रविवारी बोलत होत्या.

सध्या भाजपचे नेते देशभरात फिरून विकासाच्या मोठ्या गप्पा मारत आहेत. मात्र भाजपशासित राज्यांमध्ये कोणता विकास झाला, असा प्रश्न उपस्थित करत भाजपच्या बोलण्यात आणि करण्यामध्ये खूप मोठा फरक आहे, असे टीकास्त्र त्यांनी सोडले. २००९मध्ये प्रसिद्ध केलेल्या जाहीरनाम्यातील बहुतेक सर्व आश्वासने यूपीए सरकारने पूर्ण केली आहेत. आगामी लोकसभा निवडणुकीसाठी प्रसिद्ध केलेल्या जाहीरनाम्यातील सर्व आश्वासने पूर्ण करण्याचा पक्षाचा प्रयत्न राहील, त्यासाठी जनतेने सहकार्य करावे, असे आवाहन त्यांनी केले. देशातील प्रत्येकाचा विकास करण्यावर काँग्रेसचा भर आहे.आम्ही कोणतीच खोटी आश्वासने देत नाहीत आणि दिलेली आश्वासने पूर्ण करतो, असे सांगत त्यांनी केंद्र सरकारच्या कार्याचा गौरव केला. देशाच्या ऐक्याला बाधा पोहोचवत भाजप देशाला कमकुवत करत असल्याचा आरोप त्यांनी केला. भाजपकडून दिल्या जाणा-या खोट्या आश्वासनांना भुलून न जाता आपल्या सद्सद्विवेक बुद्धीचा वापर करून आणि योग्य निर्णय घेऊन काँग्रेसच्या उमेदवारांना पाठिंबा द्यावा, असे आवाहन त्यांनी केले.काँग्रेसच्या नेत्यांनी देशासाठी नेहमीच बलिदान दिले आणि त्याग केला आहे. तर दुसरीकडे भाजप समजांमध्ये तेढ निर्माण करून फुटीरतावादी वृत्तींना खतपाणी घालत आहे, असा आरोप त्यांनी केला. काँग्रेसने देशाची गंगा-जमुना संस्कृती घट्ट केली तर, भाजपने नेहमीच जातीय राजकारण करुन देशाला कमकुवत केल्याचा आरोप सोनियांनी केला. प्रत्येक हातात शक्ती, प्रत्येक हाताची प्रगती यावर आमचा विश्वास असल्याचे सोनियांनी यावेळी सांगितले. आसाम आणि अन्य भागातील काँग्रेस कार्यकर्त्यांनी स्वातंत्र्यापूर्वी आणि स्वातंत्र्यानंतरही देशासाठी प्राणांचे बलिदान दिल्याचे सोनियांनी सांगितले. देश घडवण्यावर आमचा विश्वास आहे. भाजप आणि अन्य विरोधी पक्ष त्यावेळी कुठे होते? स्वातंत्र्यापूर्वी आणि स्वातंत्र्य मिळाल्यानंतरही त्यांचे काय योगदान आहे? देश, समाजामध्ये तेढ निर्माण करण्याचेच काम त्यांनी केले असा आरोप सोनिया यांनी केला. विरोधकांच्या खोट्या प्रचाराला, आश्वासनांना बळी न पडता काँग्रेस उमेदवाराच्या पाठिशी उभे रहाण्याचे सोनियांनी उपस्थितांना आवाहन केले.

मुंबई- गुढीपाडव्याच्या शुभमुहूर्तावर निफ्टी आणि मुंबई शेअर बाजाराच्या निर्देशांकाने नवा विक्रम केला. सोमवारी सकाळी बाजाराला सुरुवात होताच उर्जा, तेल, गॅस, वाहन आणि बँकींग क्षेत्रातील शेअर्सच्या विक्रमी खरेदीने निर्देशांक २२,४६४.८६ या नव्या सर्वोच्च पदावर विराजमान झाला. राष्ट्रीय शेअर बाजाराच्या निफ्टीतही ३२.९५ अंकानी वाढ झाल्याने निफ्टीनेही ६, ७२६.८५ असा उच्चांक गाठला.

‘बाझेल ३’ च्या अंमलबजावणीला मुदतवाढ मिळाल्याने बँकिंग क्षेत्रात झालेल्या मोठ्या खरेदीने मागच्या आठवड्यातच सेन्सेक्सच्या तेजीला बळ मिळाले. शुक्रवारी सेन्सेक्स १२५.९० अंकांच्या वाढीसह २२,३३९.९७ वर बंद झाला होता. तर राष्ट्रीय शेअर बाजाराच्या निफ्टीतही ५४.१५ अंकांची वाढ झाली आणि तो ६.६९५.९० वर बंद झाला. परदेशी गुंतवणूकदारांकडून मोठ्या प्रमाणात गुंतवणूक केली जात आहे. सेबीच्या आकडेवारीनुसार ‘एफआयआय’ने १२ मार्चपासून बाजारात १८,०७३ कोटींची गुंतवणूक केली आहे. विक्रमाकडे आठवडाभर मागे वळून न पाहणा-या भांडवली बाजाराच्या सोमवारच्या प्रवासाची सुरुवात चांगली झाली आहे. या आर्थिक वर्षाचा शेवटचा दिवस आणि मंगळवार एक एप्रिल रोजी रिझव्‍‌र्ह बँकेचे पतधोरण जाहीर होणार आहे, त्यामुळे उत्सुकता आणखी शिगेला पोहचली आहे.

नवी दिल्ली- खलिस्तानी दहशतवादी देविंदरपाल सिंग भुल्लर याला ठोठावण्यात आलेली फाशीची शिक्षा कमी करून ती जन्मठेपेवर आणण्याची केंद्र सरकारची शिफारस सर्वोच्च न्यायालयास मान्य केली. त्यानुसार भुल्लरची फाशी रद्द झाली असून ही शिक्षा जन्मठेपेत परावर्तीत करण्यात आली आहे.

नवी दिल्ली येथे सप्टेंबर १९९३ मध्ये घडवून आणलेल्या बॉम्बस्फोटप्रकरणी भुल्लर याला फाशीची शिक्षा ठोठावण्यात आली होती. या बॉम्बस्फोटात नऊ जण ठार आणि २५ जण जखमी झाले होते. या बॉम्बस्फोटांप्रकरणी भुल्लर याला फाशीची शिक्षा सुनावण्यात आली होती. त्यावर भुल्लरने दया अर्ज दाखल केला होता. मात्र त्याच्या दया याचिकेवर निर्णय घेण्यास आठ वर्षांचा विलंब झाल्याने या प्रकरणात शिक्षा परावर्तित होऊ शकते, असे महाधिवक्ता जी ई वहाणवटी यांनी सरन्यायाधीश सदासिवम यांच्या खंडपीठास सांगितले. त्यावर सोमवारी झालेल्या सुनावणीदरम्यान सर्वोच्च न्यायालयाने भुल्लरची फाशी रद्द करून त्याला जन्मठेप सुनावली. सर्वोच्च न्यायालयाच्या सरन्यायाधीश पी सदासिवम, न्यायमूर्ती आर एम लोढा, न्यायमूर्ती एच एल दत्तु आणि न्यायमूर्ती एस जे मुखोपाध्याय यांच्या खंडपीठाने हा निर्णय सुनावला. दिल्लीतील युवक काँग्रेसच्या कार्यालयात १९९३साली भुल्लर याने बॉम्बस्फोट घडवून आणला होता. त्यात नऊजण ठार झाले होते. याप्रकरणी भुल्लर याला फाशीची शिक्षा ठोठावण्यात आली होती. मात्र, अनेक वर्षे हा दयाअर्ज राष्ट्रपतींच्या संमतीविना सरकारकडे पडून होता.

नवी दिल्ली – लोकसभेच्या नऊ टप्प्यांमध्ये होणा-या निवडणुकांना हिंसाचाराचे गालबोट लागू नये, निवडणूका शांततेत पार पाडाव्यात यासाठी केंद्रीय गृहमंत्रालयाने सुरक्षेची जोरदार तयारी केली आहे.
संपूर्ण देशात दीड महिना चालणा-या मतदान प्रक्रियेसाठी निमलष्करी दलाचे दोन लाख शस्त्रसज्ज जवान, हजारो गाडया आणि डझनभर हॅलिकॉप्टर तैनात केली आहेत. सात एप्रिलपासून मतदान प्रक्रियेला सुरुवात होणार आहे. देशातील एकूण ५४३ लोकसभा मतदारसंघात ८१.४ कोटी लोक मतदानाचा हक्क बजावणार आहेत.
हिंसाचाराची शक्यता असलेली माओवाद प्रभावित राज्ये, जम्मू-काश्मीर आणि ईशान्य भारतातील काही राज्यांमध्ये सुरक्षा बंदोबस्तावर अधिक लक्ष केंद्रीत करण्यात आले आहे. संवेदनशील मतदान केंद्रांवर निमलष्करी दलाच्या जवानांसह सीआरपीएफ, बीएसएफ, आयटीबीपी, एसएसबी आणि आसाम रायफल्सच्या जवानांचाही बंदोबस्त असणार आहे.
निवडणूक काळात निमलष्करी दलाच्या जवानांच्या प्रवासासाठी गृहमंत्रालय शंभरहून अधिक ट्रेनचा वापर करणार आहे. गृहमंत्रालयाने रेल्वेला तशी ट्रेन उपलब्ध करुन देण्याची विनंती केली आहे. निवडणूकीचे वेळापत्रक आणि सुरक्षेच्या गरजेनुसार या जवानांची तैनाती केली जाईल. लांब पल्ल्याच्या प्रवासासाठी ट्रेनचा वापर केला जाईल जवळचा प्रवास रस्ते मार्गाने केला जाईल. त्याशिवाय हजारो खासगी गाडयाही भाडयावर घेण्यात येणार आहेत.

नवी दिल्ली – निवडणूक आयोगाच्या अहवालानुसार मागच्या लोकसभा निवडणुकीमध्ये भाजप आणि काँग्रेसमध्ये ४७ जागांवर अटीतटीची लढत झाली होती.
फार थोडया फरकाने या जागांवरुन काँग्रेस आणि भाजपचे उमदेवार विजयी झाले होते. थोडा जास्त जोर लावला असता तर, चित्र वेगळे दिसले असते अशी त्यावेळची दोन्ही पक्षांची भावना होती.
त्यामुळे या ४७ जागांवर यावेळी दोन्ही पक्षांनी नवीन उमेदवारांना प्राधान्य दिले आहे. यंदाच्या लोकसभा निवडणुकीत या जागांवरील निकाल काँग्रेस आणि भाजप दोघांसाठी महत्वपूर्ण ठरणार आहे. २००९ मध्ये भाजप आणि काँग्रेसने लढवलेल्या ३४ जागा अशा होत्या जिथे उमेदवार तीन टक्क्याहून कमी मताधिक्क्याने निवडून आले होते.
यंदा दोन्ही पक्षांनी ४७ पैकी तेरा जागांवर उमेदवार कायम ठेवले आहेत. आतापर्यंत जाहीर झालेल्या उमेदवारीनुसार रांची, गुलबर्गा, इंदूर, गुरदासपूर आणि सुंदरगडमध्ये उमेदवार कायम ठेवण्यात आले आहेत. २००९ मध्ये अटीतटीची लढत झालेल्या ४७ जागांपैकी २८ काँग्रेसने तर, १९ भाजपने जिंकल्या होत्या.

यवतमाळ – शिवसैनिकांनी गाव, विभागाच्या सेनापतीची जबाबदारी घेऊन लोक सभेचा किल्ला लढवून महायुतीच्या उमेदवार भावना गवळी यांना विजयी करण्यासाठी प्रयत्न करा असे आवाहन आ. संजय राठोड यांनी केले.
मातोश्री विमलबाई चिरडे मंगल कार्यालय दिग्रस आयोजीत कार्यकर्ता मेळाव्यात ते बोलत होते. सभेच्या अध्यक्षस्थानी भाजप जिल्हाध्यक्ष राजु डांगे, नामदेव खोब्रागडे, सुधाकर तायडे, परमानंद अग्रवाल, अजय बिहाडे, बाळासाहेब मुनगिनवार, मोहन भोयर, जितेंद्र महाराज, राजेंद्र पडगिलवार, महादेव सुपारे यांच्यासह अन्य पदाधिकारी उपस्थित होते. पुढे बोलताना ते म्हणाले की, ६० वर्षात काँग्रेसने रोटी, कपडा और मकान चा प्रश्न कायम ठेवला. महिला अत्याचारांच्या घटनेत वाढ झाली आहे. शेतकरी-शेतमजुर आत्महत्या करीत असल्याचा आरोप त्यांनी केला. यावेळी महायुतीच्या उमेदवार भावना गवळी बोलतांना म्हणाल्या की, मिडीयाच्या माध्यमातून जनता जागृत झाली असून काँग्रेसचे पितळ उघडे पडत असल्याने काँग्रेस नेते नैराश्याच्या गर्तेत सापडल्याचेही त्या म्हणाल्या. तर भाजप जिल्हाध्यक्ष राजेंद्र डांगे म्हणाले की, देशात खरी लोक शाही आणण्यासाठी काँग्रेस आघाडी सरकारला उलथविण्याचा संकल्प करा. नरेंद्र मोंदीना पंतप्रधान करायचे असेल तर २७२ खासदारांच्या आकड्या पर्यंत पोहचण्यासाठी आवर्जुन मतदान करा असे आवाहनही त्यांनी केले.

यवतमाळ – शहरातील तलाव फैल परिसरातील एका खोलीत असलेला गुटखा साठा आज सायंकाळी जप्त केला. उपविभागीय पोलीस अधिकाºयांच्या पथकाने ही कार्यवाही केली असून एकास अटक केली.
बंट्टी उर्फ अतुल सुभाष डगवार (२८) रा. तलाव फैल असे आरोपीचे नाव असून त्याचे सरोज टॉकीज जवळ साईराम सुगंध सेंटर आहे. दररोज अवैधपने गुटखा, जर्दा तम्बाखुची विक्री करतो. तलाव फैलमधील नेवारे या महिलेच्या घरी त्याने खोली भाड्याने करुन तेथे गुटखा साठवून ठेवत होता. या बाबतची गुप्त माहिती उपविभागीय पोलीस अधिकारी राहुल मदने यांच्या पथकाला मिळाली होती. त्यावरुन पथकाने आज शनिवारी सायंकाळी धाड टाकुन खोलीची झडती घेतली. यामध्ये गुटखा, जर्दा तंम्बाखु पुड्या निदर्शनास आल्या. यावेळी पोलिसांनी गुटखा साठा जप्त करुन आरोपीस अटक केली. यावेळी अन्न व औषध प्रशासन विभागाचे अन्न सुरक्षा अधिकारी विश्वजीत शिंदे, प्रफुल येवले यांना पाचारण करुन गुटखा स्वाधिन केला. ही कारवाई उपविभागीय पोलीस अधिकारी राहुल मदने यांच्या मार्गदर्शनाखाली जमादार राहुल मनवर, तुषार नेवारे, इकबाल शेख, वसीम शेख, प्रमोद मडावी, विजय जाधव, संजय कांबळे, अन्सार बेग यांनी केली.

इंटरनेट ही जगातील सर्वात मोठी गरज बनली आहे. जगाच्या कानाकोप-यांतील कोणतीही माहिती तुम्हाला इंटरनेटवरून तत्काळ मिळू शकते. याच इंटरनेटवर माहितीबरोबरच जगातील छायाचित्रांचा खजिना असतो. असंख्य नागरिक इंटरनेटवरून छायाचित्रे डाउनलोड करीत असतात. याच नेटवर अवैध छायाचित्रांचे प्रमाण मोठे आहे. ही छायाचित्रे ओळखणारी यंत्रणा संशोधकांनी शोधून काढली आहे.
नेदरलॅँडच्या व्टेन्ट विद्यापीठातील संशोधकांनी इंटरनेट वापरणा-या व्यक्तींच्या खासगीपणाला धक्का न लावता ही पद्धत विकसित केली आहे. या यंत्रणेचा वापर करून तुमचे नेटवर्क ‘स्वच्छ’ ठेवण्यास मदत मिळते. बालकांचे अश्लील चित्रीकरणासह अन्य बाबी शोधून काढण्यासाठी पोलिसांना या यंत्रणेचा लाभ घेता येऊ शकतो. इंटरनेटवरील तुमचा डेटाबेस गुन्हेगारांच्या हाती लागल्यास त्याचा गैरवापर होऊ शकतो. इंटरनेटवरील हॅकर्सचा माग काढणे ही तुम्हाला कठीण बनू शकते. पोलिसांच्या डेटाबेसमध्ये या नवीन यंत्रणेचा वापर केल्यास त्यांना अवैध छायाचित्रांचा धोका राहणार नाही, असे संशोधक अँड्रस पीटर यांनी सांगितले.