यवतमाळ – शुक्रवारपासून बेपत्ता असलेल्या दोन तरुणांचे मृतदेह आज येथील निळोणा धरणात आढळल्याने एकच खळबळ उडाली़ अश्वजीत हर्षवर्धन ठमके (२१), पंकज भिमराव राजगडकर (१८) रा. बांगर नगर अशी मृतकांची नावे आहेत़
शुक्रवारी ११ एप्रिल रोजी सकाळी ११ वाजता ते घरुन निघुन गेले होते. दरम्यान दुपारी ३ वाजून गेल्यानंतरही ते घरी न परतल्याने नातेवाईकांनी शहर पोलीस ठाणे गाठून दोनही युवक बेपत्ता असल्याची तक्रार दिली. दरम्यान आज शनिवारी सायंकाळी निळोणा धरणात दोन युवकांचे मृतदेह तरंगतांना आढळले़ या बाबतची माहिती वडगाव रोड व ग्रामीण पोलिसांना कळविण्यात आली. त्यावरुन वडगाव रोडचे ठाणेदार सुर्यकांत राऊत, ग्रामीणचे पोलीस उपनिरीक्षक अंकुश राठोड, सहा. पोलीस उपनिरीक्षक यु.एन. पाटील यांनी घटनास्थळ गाठले. पंचनामा करुन मृतदेह पाण्याबाहेर काढल्यानंतर ते अश्वजीत व पंकजचे असल्याचे उघड झाले. यावेळी उपविभागीय पोलीस अधिकारी राहुल मदने व शहरचे ठाणेदार अरुण आगे यांनी घटनास्थळी भेट देऊन पाहणी केली. पोलिसांनी या प्रकरणी अकस्मात मृत्यूची नोंद केली असून पुढील तपास सुरू आहे़

लखनऊ – काँग्रेसचे उपाध्यक्ष राहुल गांधी यांनी शनिवारी अमेठीमधून लोकसभा निवडणुकीसाठी उमेदवारी अर्ज दाखल केला. अर्ज दाखल करण्यापूर्वी त्यांनी गौरीगंज ते अमेठी जिल्हाधिकारी कार्यालयातपर्यंतच्या ४० कि.मी.च्या मार्गावर रोड शो केला.
उमेदवारी अर्ज दाखल करताना राहुल यांच्यासोबत त्यांच्या आई आणि काँग्रेस अध्यक्ष सोनिया गांधी, बहिण प्रियंका गांधी आणि त्यांचे पती रॉबर्ट वडेरा उपस्थित होते. राहुल यांनी यावेळी पत्रकारांच्या प्रश्नांना उत्तरे देताना, भाजपचे पंतप्रधानपदाचे उमेदवार नरेंद्र मोदी यांच्यावर कोणतीही वयैक्तीक स्वरुपाची टिका केली नसल्याचे सांगितले.
मी मोदी यांच्याबद्दल कोणतेही वयैक्तीक स्वरुपाचे वक्तव्य केलेले नाही. मोदींनी यापूर्वी आपल्या विवाहाची माहिती दिली नव्हती एवढेच मी म्हटले. प्रियंका गांधी यांनीही राहुल यांचे समर्थन केले. राहुल यांनी फक्त नरेंद्र मोदींच्या प्रतिज्ञापत्रातील तथ्य लोकांसमोर मांडले असे प्रियंका म्हणाल्या. २००४ आणि २००९ प्रमाणे याही वेळी निवडणूक पूर्व सर्वेक्षण चाचण्यांचे अंदाज पूर्णपणे चुकतील असा दावा राहुल यांनी केला. अमेठीमधून दोनवेळा खासदार राहिलेले राहुल गांधी येथून तिस-यांदा निवडणूक लढवत आहेत. यावेळी येथे तिरंगी सामना आहे. भाजपक़डून स्मृती इराणी आणि आम आदमी पक्षाकडून कुमार विश्वास रिंगणात आहेत.

बेल्लारी – निवडणूक अधिका-यांना शनिवारी पहाटे बेल्लारीमध्ये एका सावकाराच्या घरात बेहिशोबी नऊ कोटी रुपयांची रोकड सापडली.
परशुराम पुरिया असे या सावकाराचे नाव असून, गणेश कॉलनीमधील त्याच्या घरामध्ये त्याने मोठया प्रमाणावर रोख रक्कम ठेवल्याची निवडणूक अधिका-यांना खात्रीलायक माहिती मिळाली होती.
त्या आधारावर निवडणूक अधिका-यांनी पहाटे त्याच्या घरावर धाड टाकून शोध सुरु केला असता कपाट आणि पेटयांमध्ये नऊ कोटीची रोकड सापडली. या भागामध्ये चोर बाबुलाल म्हणून हा सावकार ओळखला जातो. गणेश कॉलनीमध्ये त्याची तीन घरे आहेत. निवडणूक अधिका-यांनी रीतसर सर्च वॉरंट मिळवून ही धाड टाकली.रोख रक्कमेबरोबर फिक्स डिपॉझिटच्या पावत्या, सोन्याची बिस्कीटे, वेगवेगळया जमीन व्यवहाराची कागदपत्रे आणि चेक सापडले. हा सावकार राजकीय नेत्यांना, राजकीय पक्षांना व्याजावर पैसे देत होता असे निवडणूक अधिका-यांनी सांगितले. कागदपत्रांमध्ये एका राजकीय पक्षाने पैसे परत केल्याचा चेकही सापडला.

मुंबई – काँग्रेस उपाध्यक्ष राहुल गांधी येत्या १४ आणि १५ एप्रिल रोजी महाराष्ट्राच्या दोन दिवसाच्या दौऱ्यावर येणार आहेत. राहुल सोमवारी १४ एप्रिल रोजी लातूर व शिर्डी येथे जाहीर सभांना संबोधित करतील. दुसऱ्या दिवशी, मंगळवारी १५ एप्रिल रोजी ते पुणे व हिंगोली येथे जाहीर सभांना मार्गदर्शन करणार आहेत. याप्रसंगी मुख्यमंत्री पृथ्वीराज चव्हाण, कॉंग्रेसचे राज्याचे प्रभारी मोहन प्रकाश, प्रदेशाध्यक्ष माणिकराव ठाकरे उपस्थित राहतील.

अमेरिका व ब्रिटिश विद्यापीठांचे संशोधन
वॉशिंग्टन – बराच वेळ फेसबुक वापरणाऱ्या महिलांना फेसबुकवरील इतर महिलांचे फोटो पाहून स्वतःमध्ये कमतरता आहे असे वाटायला लागते, असा धक्कादायक निष्कर्ष अमेरिका आणि ब्रिटनमधील विद्यापीठांनी केलेल्या एका संयुक्त संशोधनाद्वारे समोर आला आहे.
सिअॅटलमध्ये झालेल्या आंतरराष्ट्रीय परिषदेत हा शोधनिबंध प्रसिद्ध करण्यात आला. हे संशोधन इंग्लंडमधील स्ट्रेथक्लेड विद्यापीठ आणि अमेरिकेतील आयोवा आणि ओहायो विद्यापीठात करण्यात आले आहे. त्यासाठी कॉलेजात जाणाऱ्या ८८१ तरुणींचा फेसबुक वापर, त्यांच्या खाद्य आणि व्यायामाच्या सवयी यांचा अभ्यास करण्यात आला.
या संशोधनात सामील असलेल्या संशोधिका पिटी एकलर यांनी दिलेल्या माहितीनुसार, ‘फेसबुक बराच काळ वापरणाऱ्या महिला स्वतःच्या शरीरयष्टीची तुलना फेसबुकवरील इतर महिलांच्या फोटोंशी करतात. इतर फोटो अधिक सरस असल्याचे वाटून त्यांच्यामध्ये स्वतःबद्दल नकारात्मक भावना वाढीस लागते.’ ‘महिला जितका अधिक वेळ फेसबुक वापरतात, तितकी त्यांच्यामध्ये नकात्मक भावना बळावते. त्याचप्रमाणे ज्या महिलांना स्वतःचे वजन कमी करायचे आहे, त्या महिला फेसबुकवर इतर महिलांच्या वेशभूषा आणि देहबोलीकडे जास्त लक्ष देऊन पाहतात,’ असेही पेटी यांनी सांगितले. स्वतःच्या देहाविषयी नकारात्मकता निर्माण झाल्यास खाण्याविषयी अनास्था निर्माण होते आणि त्याचा परिणाम आरोग्यावर होतो. सोशल मीडियाचा अशा पद्धतीने वापर होत असल्यास ते अत्यंत धोकादायक आहे, असेही संशोधनात स्पष्ट करण्यात आले आहे.