पाटणा-‘गरीबांवर उपचार करण्यास डॉक्टरांनी टाळाटाळ केली किंवा हलगर्जीपणा केला तर त्या डॉक्टरांचे हात तोडून टाकेन,’ अशी धमकी बिहारचे मुख्यमंत्री जितनराम मांझी यांनी दिली आहे. खुद्द मुख्यमंत्र्यांनीच असे वक्तव्य केल्यामुळे राज्याच्या वैद्यकीय क्षेत्रात खळबळ उडाली आहे.
बिहारमधील पूर्व चंपारण जिल्ह्यातील पाकरी दयाल येथे एका रुग्णालयाच्या उद्घाटनप्रसंगी ते बोलत होते. ‘लोकांनी बोगस डॉक्टरांकडे जाण्याचे टाळावे, त्याऐवजी सरकारी रुग्णालयात जावे, असे सांगून ते म्हणाले, ‘सरकारी रुग्णालयात डॉक्टर उपस्थित नसल्यास, औषधांची सोय नसल्यास किंवा आरोग्य तपासणीची सुविधा नसल्यास थेट जिल्हा न्यायदंडाधिकाऱ्यांकडे तक्रार करा. तिथे तुमच्या तक्रारीचे निवारण न झाल्यास मला पोस्टाने कळवा. मी तत्काळ कारवाई करीन. गरीबांच्या जिवाशी खेळणाऱ्या कुठल्याही डॉक्टरला सोडणार नाही.’
यावेळी त्यांनी आपल्या कठोर स्वभावाचीही आठवण उपस्थितांना करून दिली. ‘मी पाटणा येथील औषध घोटाळ्याचा शोध लावला, त्यावेळी अनेक अधिकाऱ्यांना घरी बसवलं. तसंच पीएमसीएच घोटाळ्याबाबतही कडक पावलं उचलली होती,’ असं त्यांनी सांगितलं.

न्यूयॉर्क- व्हिडिओ शेअरीमध्ये अव्वल स्थानी असलेल्या युट्यूबला फेसबुककडून येणा-या काळात धोका निर्माण झाल्याचे एका संशोधनातून पुढे आले आहे. गेल्या काही महिन्यांपासून फेसबुकवर व्हिडिओ शेअरीग करण्याचे प्रमाण वाढले आहे. त्यामुळे काही काळातच फेसबुक युट्यूबला मागे टाकण्याची शक्यता निर्माण झाली आहे.
गेल्या वर्षभरात एक लाख ८० हजार पोस्ट आणि २० हजारहून अधिक फेसबुक पेजेसचा अभ्यास केल्यानंतर हा निकर्ष काढण्यात आला आहे.
इंटरनेट युझर्स व्हिडिओ थेट फेसबुकवर अपलोड करत आहेत. याचाच अर्थ असा होतो की युझर्स युट्यूबपेक्षा व्हिडिओ शेअर करण्यासाठी फेसबुकला प्राधान्य देत आहेत.
युट्यूबसाठी ही धोक्याची घंटा आहे. यामुळे युट्यूबवरील व्हिडिओ शेअरिंगचा काही टक्का फेसबुककडे वळू शकतो. सप्टेंबर महिन्यात एक बिलियन व्हिडिओ अपलोड झाल्याचे फेसबुकने म्हटले आहे.

मुंबई – महाराष्ट्र विधानसभा निवडणुकांचे निकाल जाहीर व्हायला काही तासांचा अवधी उरला आहे. अनेक अंगांनी वैशिष्टयपूर्ण ठरलेल्या या निवडणुकीच्या निकालाकडे महाराष्ट्रासह संपूर्ण देशाचे लक्ष लागले आहे.
दोन दशकानंतर महाराष्ट्रातील प्रमुख राजकीय पक्षांनी स्वबळावर निवडणूक लढवल्याने राज्यात कोणाची किती ताकत आहे ते स्पष्ट होणार आहे. उमेदवारी अर्ज भरण्याचे शेवटचे ४८ तास उरले असताना, युती-आघाडी तुटली आणि वर्षानूवर्षाचे मित्र स्पर्धक म्हणून परस्परांसमोर उभे ठाकले.
प्रचाराच्या रणधुमाळीत आरोप-प्रत्यारोपामध्ये विकासाचे मुद्दे बाजूला सरल्याचे दिसले. पंतप्रधान नरेंद्र मोदींच्या महाराष्ट्रात वीसहून जास्त सभा झाल्या. यापूर्वीचे पंतप्रधान एका राज्याच्या निवडणुकीत कधीही इतके सक्रीय झाले नव्हते.
पंचरंगी लढत असलेल्या महाराष्ट्रात मतदार कुठल्या एकापक्षाच्या हाती सत्तेच्या चाव्या सोपवणार की, पुन्हा युती-आघाडी करण्याचा कौल देणार ते उद्या स्पष्ट होईल.
महाराष्ट्र आणि हरयाणा विधानसभा निवडणुकीच्या मतदानाची मतमोजणी रविवार १९ ऑक्टोबरला होणार आहे. १५ ऑक्टोबर रोजी महाराष्ट्रातील २८८ मतदारसंघ आणि हरयाणातील ९० मतदारसंघात पार पडलेल्या मतदानाची मोजणी प्रक्रिया रविवारी सकाळी आठ वाजल्यापासून सुरु होईल.
विधानसभा निवडणुकीसाठी महाराष्टात ६३.१३ टक्के मतदान झाले तर हरयाणात ७६.५४ टक्के इतके विक्रमी मतदान झाले. महाराष्ट्रातील २८८ केंद्रांवर ही मतमोजणी पार पडणार आहे. दुपारी तीन वाजेपर्यंत निकालाचे चित्र स्पष्ट होईल. राज्यातील विधानसभा निवडणुकीच्या मतदानासोबत १५ ऑक्टोबरला बीड लोकसभा पोटनिवडणुकीसाठीही मतदान झाले होते. त्याचाही निकाल रविवारीच स्पष्ट होणार आहे.
दोन दशकानंतर राज्यात प्रथमच सर्वच पक्षांनी स्वबळावर निवडणूक लढवली. भाजपने या निवडणुकीत २८० उमेदवार तर बसपा २६०, सीपीआय ३४, सीपीएम १९, काँग्रेस २८७, राष्ट्रवादी २७८, शिवसेना २८२ आणि मनसेने २१९ उमेदवार रिंगणात उतरवले होते. २८८ जागांसाठी सुमारे चार हजार ११९ उमेदवारांनी निवडणूक लढवली होती.
हरयाणातीलही ९० जागांसाठी झालेल्या निवडणुकीचे निकाल रविवारी जाहीर होणार आहेत. रविवारी दुपारी अथवा संध्याकाळपर्यंत हरयाणतील निकालाचे चित्र स्पष्ट होईल. ९० केंद्रांवर ही मतमोजणी होणार आहे. या निवडणुकीत हरयाणातील एक हजार ३५१ उमेदवार रिंगणात होते. भाजप आणि काँग्रेस या दोन्ही पक्षांनी सर्व विधानसभा मतदारसंघातून आपले उमेदवार रिंगणात उतरवले होते तर आयएनएलडीने ८८ उमेदवार, बसपाचे ८७, एचजेसी ६५, सीपीएम १७, सीपीआय १४, २९७ नोंदणीकृत पक्षाचे उमेदवार तर ६०३ अपक्ष उमेदवारांनी निवडणूक लढवली.
२००९ मधील हरयाणा विधानसभा निवडणुकीत काँग्रेसने ४० जागांवर विजय मिळवला होता. तर आयएनएलडीने ३१, भाजप ४, एचजेसीने सहा, एसएडी आणि बसपाने प्रत्येकी एक तर सात अपक्ष उमेदवारांनी विजय मिळवला होता.

यवतमाळ : बहुजन समाज पार्टीच्या तीन नगरसेवकांनी काँग्रेस, पिरीपा मित्र पक्षाचे उमेदवार राहुल ठाकरे यांना आपला पाठींबा दिला. नगरसेवक पंकज मेश्राम, विद्यमान शिक्षण सभापती ज्योती आडे, नगरसेवक हरिश पिल्लारे या तिननगरसेवकांसह भाजपा नगरसेविका मिना मसराम यांचे पती राहुल मसराम यांचा समावेश आहे. बसपा नगरसेवकांनी विनाअट पाठींबा दिल्याने राहुल ठाकरेंची बाजू भक्कम झाली आहे.बसपाचे संगटन वाढविण्यासाठी आम्ही जीवाभावाने काम केले. मात्र पक्षश्रेष्ठी व स्थानिक नेतृत्त्वाने कधीही सन्मान केला नाही. परिणामी पक्षाच्या कार्यपद्धतीला कंटाळून हा निर्णय घेतल्याचे त्यांनी प्रसिद्धी पत्रकात म्हटले आहे. काँग्रेसचा विचार डॉ. बाबासाहेब आंबेडकर यांनी लिहिलेल्या संविधानाचा सन्मान करणारा व धर्मनिरपेक्ष विचारांना बळ देणारा असल्याचे त्यांनी म्हटले आहे. बसपाच्या तीन नगरसेवकांसह भाजपा नगरसेविकांच्या पतीच्या पाठींब्यामुळे राहुल ठाकरे यांची बाजू भक्कम झाली आहे.

उत्पादन शुल्कच्या १०७ धाडी, ५७ आरोपींना अटक
यवतमाळ  – निवडणुकीच्या अनुषंगाने अवैध मद्य विक्रीवर प्रतिबंध घालण्यासाठी राज्य उत्पादन शुल्क विभागाने आरंभलेले धाडसत्र सुरुच असून गेल्या दोन दिवसात दोन वेगवेगळ्या धाडीत देशी दारुचे ५९ बॉक्स म्हणजे २८३२ बॉटल्स जप्त करण्यात आले आहे. आचारसंहिता लागल्यानंतर या विभागाने धडक मोहिम राबविले असून त्याअंतर्गत आतापर्यंत १०७ धाडी घालून ५७ आरोपींना अटक केली, तर ६ लाख २३ हजाराचा मुद्देमाल जप्त करण्यात आला आहे.
काल प्राप्त झालेल्या गुप्त माहितीवरून या विभागाच्या पथकाने सापळा रचुन डोंगरखडा ते राळेगाव रोडवर मजरा गावाच्या शिवारात भरधाव वेगाने जात असलेल्या वाहनाचा ५ किलोमीटर अंतरापर्यंत पाठलाग करून ८ देशी दारुचे बॉक्स आरोपींकडून जप्त केले. मोटर सायकलसह आरोपी नंदकिशोर जयस्वाल, पवन दडमल यांना अटक केली. आज अशाच प्रकारच्या गुप्त माहितीवरून राळेगाव पोलीस स्टेशनअंतर्गत असलेल्या कोपरी या गावाच्या हद्दीत एका घरी धाड टाकून देशी दारुचे ५१ बॉक्स जप्त केले. तसेच आरोपी गजानन मारोती पराते व गजानन किसनाजी कुचनकार यांना अटक करण्यात आली. या दारूची किंमत ७६ हजार इतकी आहे. नजीकच्या काळात जिल्ह्यात केलेली जप्तीचीही सर्वात मोठी कारवाई आहे.
प्रथम दर्शनी सदर दारू साठा निवडणुकीच्या अनुषंगाने मतदारांना वाटप करण्यासाठी पुरविण्यात येणार होता असे आढळून आले आहे. निवडणूकीस अवघे तीन दिवस शिल्लक असल्याने ठिकठिकाणी उत्पादन शुल्क विभागाने पथके नेमले असून अवैध मद्य विक्रीवर करडी नजर ठेवली जात आहे. निवडणूक काळात आचारसंहिता लागल्यानंतर आतापर्यंत १२०७ लिटर देशी दारु, २८ लिटर विदेशी दारु, ४५ लिटर बियर, ५५० लिटर हातभट्टी, १२,५२७ लिटर मोहाफुल सडवा जप्त करण्यात आला आहे. तसेच १ मारोती ओमनी, १ मारोती ८०० व १  मोटरसायकलचा समावेश आहे. जिल्ह्यात ठिकठिकाणी १०७ धाडी घालून ५७ आरोपींना अटक केली तर ६ लाख २३ हजाराचा मुद्देमाल जप्त करण्यात आला आहे. ही कार्यवाही अधीक्षक पराग नवलकर यांच्या मार्गदर्शनात निरिक्षक ए.बी. झाडे, ए.एम झुमडे, सुबोधकुमार केडीया, दुय्यम निरिक्षक उमेश शिरभाते, ए.पी. चिटमटवार, सहाय्यक दुय्यम निरिक्षक आर.एम.राठोड तसेच कर्मचारी एस.जी.घाटे, एम.पी.शेडे, ए.पठाण, एम.जी.रामटेके, संदीप मनवर, प्रविण मसराम, साठे, बळीराम मेश्राम, डी.बी.पेंदोर आदी सहभागी झाले होते.

मुंबई – पंतप्रधान नरेंद्र मोदी यांनी अमेरिकेच्या दौऱ्यात न्यू यॉर्कच्या मॅडिसन स्क्वेअर गार्डन येथे केलेल्या भाषणाचा भाजप निवडणूक प्रचारासाठी वापर करत असल्याची तक्रार कॉंग्रेसतर्फे निवडणूक आयोगाकडे करण्यात आली आहे. पंतप्रधानांच्या शासकीय दौऱ्यातील भाषणाचा निवडणूक प्रचारासाठी वापर करत असल्याबद्दल आक्षेप घेत ही तक्रार करण्यात आली असल्याची माहिती कॉंग्रेसमधील सूत्रांनी दिली. प्रदेश कॉंग्रेसने राज्य तसंच केंद्रीय निवडणूक आयोगाकडे ही तक्रार दाखल केली आहे.
पंतप्रधान नरेंद्र मोदी यांनी न्यू यॉर्कच्या मॅडिसन स्क्वेअरवर केलेलं भाषण सध्या विविध न्यूज चॅनेल्सवर दाखविण्यात येत आहे. भाजपतर्फे अशा प्रकारची जाहिरात देण्यात आलेली आहे. लोकसभेत विविध नेत्यांनी केलेली भाषणं निवडणूक काळात प्रचारादरम्यान दाखविण्यावर बंदी असताना शासकीय दौऱ्यातील पंतप्रधानांच्या भाषण दाखविण्यावर कॉंग्रेसने आक्षेप घेतला आहे.

यवतमाळ – यवतमाळ विधानसभा मतदार संघातून शेतकरी कामगार विकास आघाडी तर्फे आपली उमेदवारी कायम ठेवणाºया डॉ. रविंद्र देशमुख यांच्या प्रचाराचा झंझावात शहरी व ग्रामीण भागात जोर धरत आहे.
३० वर्षाच्या कामगार चळवळीचा अनुभव, विविध संघटनांचा पाठींबा, व्यापक जनसंपर्क ह्या डॉ. रविंद्र देशमुख यांच्या जमेच्या बाजु आहेत. या शिवाय सहकार क्षेत्रामधील त्यांचा २० वर्षाचा अनुभव व सहकार क्षेत्रातील त्यांच्या संपर्कात असलेली मंडळी त्यांना मोठ्या प्रमाणात सहकार्य करण्याच्या मानसिकतेत आहे. त्यामुळे एक प्रमुख दावेदार म्हणून डॉ. रविंद्र देशमुखांचे नाव पुढे येत आहे. यवतमाळ विधानसभा मतदार संघात बाहेरच्या मतदार संघातील प्रमुख उमेदवार तसेच वारंवार हार पत्करुन पुन्हा नशिब अजमाविणारे उमेदवार प्रमुख पक्षांनी उभे केल्याने मतदारांमध्ये मोठ्या प्रमाणात क्षोभ निर्माण झाला आहे. त्यामुळे या सुप्त असलेल्या नाराजीला तोंड फुटत आहे. या दृष्टीने चळवळीचा भक्कम वारसा लाभलेले डॉ. रविंद्र देशमुख यांना मदत करणार आहे.

यवतमाळ  – विधानसभा सार्वत्रिक निवडणुकीच्या अनुषंगाने मतदार अथवा सामान्य नागरीकांना आपल्या तक्रारी तथा सुचना नोंदविता याव्या म्हणून जिल्हाधिकारी कार्यालयात निवडणूक नियंत्रण कक्ष स्थापन करण्यात आला आहे.
निवडणुकीदरम्यान मतदारांना प्रलोभने दिली जाण्याची शक्यता आहे. मतदानाचा दिवस जवळ आल्यानंतर मतदारांना पैसे, भेटवस्तू अशा प्रकारची आमिषे दाखविली जातील. असा प्रकार उघडकीस आल्यास किंवा प्रत्यक्ष पाहण्यात आल्यास नागरीकांना ०७२३२-२३९७००, २५५०७७, २४०७२० या टोल फ्री क्रमांकावर कळविण्याचे आवाहन करण्यात आले आहे. यासोबतच निवडणूकीच्या कालावधीत अवैध दारू विक्री, संशयीत वस्तू किंवा शस्त्रास्त्रे इत्यादीबाबी आढळल्यासही वरील क्रमांकावर कळविण्याचे आवाहन जिल्हाधिकारी तथा जिल्हा निवडणूक अधिकारी यांनी केले आहे.

विजय खडसेंच्या प्रचारार्थ मोघेंचे मार्गदर्शन
उमरखेड – येथील काँगे्रसचे उमेदवार विजय खडसे यांच्या प्रचारार्थ राज्याचे माजी मंत्री शिवाजीराव मोघे यांची सभा निंगनूर येथे पार पडली. सभेला मतदारसंघातील उपस्थित ४५ गावातील आदिवासी बांधवांशी मोघे यांनी संवाद साधला.
काँग्रेसने आदिवासी बांधवांना मुख्य प्रवाहात आणण्याचे काम केले. आदिवासींना शिक्षणाच्या प्रवाहात आणले, असे यावेळी बोलताना मोघे म्हणाले. काही जातीयवादी पक्ष आरक्षणाच्या माध्यमातून आदिवासी व इतर समाजात फूट पाडण्याचा प्रयत्न करीत असल्याचा आरोपही त्यांनी यावेळी केला. उमरखेड मतदारसंघात लोकसभा निवडणुकीत जनतेने काँग्रेसला बळ दिले, तीच ताकद विधानसभा निवडणुकीत पक्षाचे अधिकृत उमेदवार विजय खडसे यांच्या पाठीशी राहून द्यावी, असे आवाहनही यावेळी मोघे यांनी केले. या बैठकीला खरबी, दराटी, परोटी, गाडीबोरी, जेवणी, अमडापूर, चिखली(वन), जवराळा, येरडी, भवानी, एकंबा आदी ४५ गावातील आदिवासी बांधव मोठ्या संख्येने उपस्थित होते.