सिडनी – ऑस्ट्रेलियात जिथे एका बाजूला प्रधानमंत्री नरेंद्र मोदी यांचे स्वागत जोरदार झाल्याचे पाहायला मिळाले पण दुसरीकडे मोदींच्या विरोधात निदर्शने देखिल सुरू असलेली पाहायला मिळाले. शीख समुदायातील काही कार्यकर्त्यांनी आपल्या मागण्यांसाठी निदर्शने केली.
आपला विरोध दर्शवण्यासाठी शीखांनी आपल्या हातात फलक पकडले होते. या फलकावर आपल्या मागण्या लिहिल्या होत्या. गुजरातमधील शीखांच्या शेतजमीनी परत करण्यात याव्यात, अशी मागणी करण्यात आली. केंद्र सरकारने सुप्रीम कोर्टात शीखांनी केलेल्या याचिकेला विरोध करू नये, अशी मागणीही त्यांनी यावेळी केली. गुजरातमधील काही शीखांच्या जमिनी राज्य सरकारने घेतल्या आहेत. लोकसभा निवडणुकीच्या प्रचारावेळी जेव्हा नरेंद्र मोदी पंजाबला गेले होते तेव्हा देखील हा मुद्दा चर्चेत आला होता.
१९८४मध्ये शीख विरोधी दंगलीतील दोषींना कठोर शिक्षा देण्याची तसेच अमृतसरला पवित्र नगर असा दर्जा देण्यात आला आहे. ऑस्ट्रेलियातील शीख समाजाचे प्रवक्ते गुरप्रीत सिंह यांनी शीखांना (अल्पसंख्याक समाजाला) संपूर्ण सुरक्षा देण्याची मागणी केली आहे. तसेच पंजाबमध्ये वाढलेल्या अमलीपदार्थांच्या बाजाराला देखील वेसण घालण्यात यावी आणि त्या मागे हात असलेल्या नेत्यांनाही शिक्षा देण्यात यावी अशी मागणी देखील त्यांनी यावेळी केली. ऑस्ट्रेलियातील पोलिसांनी निदर्शने करणाऱ्यांना अरीनापासून दूर ठेवण्यात आले होते.