मुंबई – आदर्श घोटाळ्यामुळे गोत्यात आलेले काँग्रेसचे खासदार अशोक चव्हाण यांना बुधवारी मुंबई हायकोर्टाने जोरदार दणका दिला आहे. चव्हाण यांचे नाव आदर्श घोटाळ्यातील आरोपींमधून वगळण्यास हायकोर्टाने नकार दिल्याने चव्हाण यांना घोटाळा महागात पडण्याची चिन्हे आहेत.

आदर्श घोटाळ्यातील आरोपींमधून अशोक चव्हाण यांचे नाव वगळावे अशी याचिका सीबीआयने मुंबई हायकोर्टात दाखल केली होती. तत्कालीन राज्यपालांनी चव्हाण यांची चौकशी करण्यास नकार दिल्याने आरोपपत्रातून चव्हाणांचे नाव वगळावे अशी सीबीआयची भूमिका होती. या याचिकेवर बुधवारी सुनावणी झाली असता हायकोर्टाने आरोपपत्रातून चव्हाण यांचे नाव वगळण्यात नकार दिला. मुंबईतील कुलाबा येथे कारगिल युद्धातील शहीदांच्या पत्नीसाठी आदर्श ही इमारत बांधण्यात आली होती. मात्र या इमारतीतील बहुसंख्य फ्लॅट हे अधिकारी व राजकीय नेत्यांनी लाटल्याचे उघड झाले होते. अशोक चव्हाण मुख्यमंत्री असताना हा घोटाळा झाला व त्यामुळेच चव्हाण यांना मुख्यमंत्रीपदाचा राजीनामा द्यावा लागला होता. चव्हाण यंदाच्या लोकसभा निवडणुकीत नांदेडमधून लोकसभेवर निवडून गेले आहेत.

बरवाला (हिसार) –  हरियाणाच्या हिसार जिल्हयातील बरवाला नगर येथील वादग्रस्त बाबा रामपालविरोधात पोलिसांनी बुधवारी देशद्रोहाचा गुन्हा दाखल केला आहे.

पंजाब आणि हरियाणा उच्च न्यायालयाने सोमवारी रामपाल यांच्याविरुद्ध अजामीनपात्र अटक वॉरंट जारी करीत शुक्रवारपर्यंत त्यांना न्यायालयासमक्ष हजर करण्याचे आदेश दिले होते़ मंगळवारी पोलीस रामपाल यांना अटक करण्यासाठी आश्रमात पोहोचले़ मात्र रामपाल समर्थकांनी त्यांना रोखले़ यामुळे तणाव वाढला. पोलीस आणि समर्थकांमध्ये झालेल्या संघर्षात आत्तापर्यंत ७ जणांचा मृत्यू झाला असून यामध्ये ६ महिला व एका मुलाचा समावेश आहे. शेकडो जण जखमी झाले असून २७० संशयित लोकांना पोलिसांनी ताब्यात घेतले आहे. पोलिसांनी केलेल्या दाव्यानूसार, बाबा रामपाल यांच्या आश्रमात ५ ते ७ हजार समर्थक अजूनही आहेत. आश्रमामधून हजारो जणांना पोलिसांना काढण्यात यश आले असून यामध्ये सर्वाधिक महिलांचा समावेश आहे. दरम्यान, पोलिसांनी केलेल्या कारवाईत चार महिलांचा मृत्यू झाला असल्याचा आरोप सतलोक आश्रमामधून करण्यात आला आहे तर हा दावा पूर्णत: बिनबुडाचा असल्याचे स्पष्टीकरण पोलिसांनी दिले आहे.

अलिबाग – नरेंद्र मोदींचं प्रॉडक्ट काय आहे ते माहित नाही परंतु मार्केटिंग मात्र जोरात आहे, अशी खोचक टीका शरद पवार यांनी केली आहे. राष्ट्रवादीच्या कार्यकर्त्यांच्या चिंतन शिबिरात बोलताना पवारांनी राज्यातल्या स्थितीवर भाष्य केले असले तरी जाता जाता नरेंद्र मोदींच्या मार्केटिंग करण्याच्या शैलीवर टीका केली आहे. विधानसभा निवडणुकीत राष्ट्रवादीला अवघ्या ४१ जागा मिळाल्याचा संदर्भ देताना पवार म्हणाले की विकासकामं केली की त्याचं फळ मिळतं यावरचा विश्वास उडाला आहे. असे असले तरी विकासकामांवर आपला भर राहील अशी पुष्टीही त्यांनी जोडली.

भारतीय जनता पार्टीचे सरकार फार काळ टिकणार नाही आणि निवडणुका मुदतपूर्व होतील असे भाष्य करून खळबळ उडवणा-या पवारांनी आपले वक्तव्य आज बोलताना मागे घेतले नसले तरी आपल्याला पाडापाडीमध्ये रस नाही असेही सांगून त्यांनी राजकीय विश्लेषकांना बुचकळ्यात टाकले आहे. सरकार पाडण्यात आपल्याला रसनसला तरी सरकार अयोग्य वाटत असेल तर आपण प्राणपणाने विरोध करू नी वेळ पडली तर रस्त्यावर उतरू असे ते म्हणाले.

चिंतन शिबिरात राष्ट्रवादीचे नेते जयंत पाटील यांनी भाजपाला पाठिंबा देणे ही चूक होती असे मत सांगून या मुद्यावर पक्षामध्ये एकमत नसल्याचे सूचित केले आहे. मात्र, सगळ्यांनी चर्चा करून विचार विनिमय करूनच हा निर्णय घेतला होता असे सांगून यावर पडदा टाकला आहे.

यश न मिळालेल्या २४१ मतदारसंघामध्ये पक्षाला  कसे वाढवायचे हा मुख्य प्रश्न असल्याचे पवार म्हणाले, तसेच पक्षामध्ये सुसंवाद वाढला पाहिजे अशी अपेक्षाही त्यांनी व्यक्त केली.

यवतमाळ – नांदेड येथील  तिरंगा परिवार प्रतिष्ठानव्दारा आयोजित कला वैभव व कला गौरव पुरस्कार २०१४ हा कार्यक्रम जागतिक कला दिन २५ आॅक्टोंबर रोजी असतो. परंतु काही कारणास्तव यावर्षी हा कार्यक्रम १५ नोव्हेंबर रोजी नांदेड शहरातील महात्मा फुले सांस्कृतिक सभागृह येथे पंडीत श्रीशाम गुंजकर यांच्या अध्यक्षतेखाली पार पडला. यावेळी जिल्ह्यातील परिचित पोलिस कलावंत पोलिस हवालदार शेखर वांढरे वारली चित्रकार आणि टाकावू वस्तुपासून शोभावंत वस्तु बनविण्यात करीता त्यांना तिरंगा कला गौरव पुरस्कार, मानपत्र, स्मृती चिन्ह देवून सन्मानित करण्यात आले. कलाकारांची कला नेहमी जगासमोर येते परंतू कलाकार हा मागेच राहतो म्हणून दरवर्षी विविध क्षेत्रातील कलाकारांना पुरस्कार देवून सन्मानित करण्यात येत आहे. कलाकारांना तिरंगा परिवार नांदेड हे कला वैभव व कला गौरव पुरस्कार देतात. यावेळी कार्यक्रमाचे संचालन मिर्झा फयाज बेग यांनी केले. कार्यक्रमाला सतपाल सिंग, प्रा.विजय पेंडकर (बेग), अनिल कुळकर्णी, अड.मो.शाहीद, विनोद लघवे, सौ.रेणुका कडतन, महेंद्र सिंग गौर, डॉ.मुकुंद मुळे, श्रीनिवास भुयेवार, संजय वर्मा, साहेबराव गायकवाड आदींची उपस्थिती होती.

कळंब – येथील पेट्रोलपंपावरून पेट्रोलभरून निघालेल्या ओमनी गाडीने अचानक पेट घेतला. त्यामुळे पेट्रोलपंपावरील वाहन धारकांमध्ये तारांबळ उडाली होती. यावेळी प्रसंगावधान ठेऊन चालकासह एकाने बाहेर उडी टाकली. आज दुपारी ४ .३०वाजता ही घटना घडली. यावेळी तीन्ही पेट्रोललंप बंद करून आग विझविल्याने मोठा अनर्थ टळला.

कळंब-यवतमाळ रोडवर प्रशांत डेहणकर, प्रफुल भांगे, चव्हाण या तीन व्यक्तीचे पेट्रोल पंप आहे. त्यापैकी डेहणकर याच्या पेट्रोल पंपवर आज दुपारी ४.३० वाजता चालक भिमराव रामदास उरवते (२६)रा. पाथ्रड याने आपल्या ओमनीमध्ये (एम.एच.०४/बि.एच. ८६६१) पेट्रोल भरले. त्यानंतर गाडी चालु करून पेट्रोलपंपाच्या गेट जवळ येताच सदर वाहनाने अचानकपणे पेट घेतला. यावेळी प्रसांगवधान राखून चालक भगवान व त्याचे वडील रामदास उरवते (५२) यांनी उडी टाकुन आपला जीव वाचविला. ते पाथ्रड येथून यवतमाळ येथे कामानिमित्य जात होते.  यावेळी तेथील वाहन धारकांसह कर्मचाºयांची तारांबळ उडाल्याने सैरावैरा पळू लागले. यावेळी परिसरातील तीन्ही पेट्रोलपंप बंद केले. या घटनेची माहीती मिळताच ग्रामपंचायतने टॅकरने पाठवून आग विझविण्याचे काम सुरू केले. या वाहनामध्ये खाली सिलिंडर आढळला असून शॉट सर्कीटने आग लागल्याची चर्चा आहे. याप्रसंगी पोलीस उपनिरीक्षक वंजारी, विनोद वानखडे यांनी घटनास्थळ गाठून वाहतुक नियंत्रणात आणली. अर्ध्या तासाने ही आग आटोक्यात आली असून लाखो रुपयाचे नुकसान झाले. या घटनेने नागपूर-यवतमाळ मार्गावरील  वाहतुक खोळंबली होती. यावेळी तीन्ही पेट्रोलपंप त्वरीत बंद केल्याने कुठलीही जीवीत हाणी झाली नसून मोठा अनर्थ टळला.