अमरावती – नियोजित प्रश्नपत्रिका न देता ऐनवेळी विद्यार्थ्यांना दुसऱ्याच विषयाची प्रश्नपत्रिका देण्यात आल्याची घटना सोमवारी घडली. त्यामुळे बीएड परीक्षार्थींचा गोंधळ उडाला.
संत गाडगेबाबा अमरावती विद्यापीठाच्या विद्या शाखेची बीएड परीक्षा सध्या सुरू आहे. नियोजित वेळापत्रकानुसार ‘उदन्मुख भारतीय समाजातील शिक्षक’ या विषयाचा पेपर सकाळी ९ वाजता होणार होता. पश्चिम विदर्भातील सुमारे ३२ केंद्रांवर ही परीक्षा होणार होती. परंतु या विषयाची प्रश्नपत्रिका न देता गुरुवारी नियोजित ‘शैक्षणिक मानसशास्त्र’ या विषयाची प्रश्नपत्रिका विद्यार्थ्यांच्या हाती देण्यात आली. विद्यापीठाच्या सर्वच केंद्रांवर सारखीच प्रश्नपत्रिका पाठविण्यात आल्याची माहितीही आता समोर आली आहे. बुलडाणा जिल्ह्यातील मेहकर येथील में. ए. सो. कला व वाणिज्य महाविद्यालयावरही हाच प्रकर समोर आला. याविषयीची तक्रार केंद्रप्रमुखांकडे करण्यात आली. वितरण विभागाच्या चुकीने हे घडल्याचे सांगण्यात येत आहे.बीएड अभ्यासक्रमाचा पेपर तयार करताना किंवा छपाई करताना चूक झाल्याचे सांगण्यात येत आहे. याबाबत समितीकडून चौकशी केली जाणार आहे, असे प्र-कुलगुरू डॉ. जयकिरण तिडके यांनी स्पष्ट केले.

नवी दिल्ली, दि. २० – डॉ. बाबासाहेब आंबेडकर हे केवळ दलितांचे कैवारी नव्हते तर ते समस्त मानवजातीचे कैवारी होते असे सांगतानाच कृपया बाबासाहेबांना एका जातीमध्ये अडकवून ठेवू नका. डॉ. बाबासाहेब आंबेडकर होते म्हणून मी आज या ठिकाणी उभा आहे असे सांगत डॉ. आंबेडकरांविषयी पंतप्रधान नरेंद्र मोदी यांनी गौरवोदगार काढले. दिल्लीत डॉ. बाबासाहेब आंबेडकर आंतरराष्ट्रीय केंद्राचे उद्घाटन पंतप्रधान नरेंद्र मोदी यांच्या हस्ते करण्यात आले त्यावेळी पंतप्रधान बोलत होते.
डॉ. बाबासाहेब आंबेडकरांनी समस्त मानव जातीच्या कल्याणासाठी लढा दिला असून महिलांना योग्य न्याय मिळावा यासाठी कायदे केले, महिलांना मतदानांचा अधिकार बहाल केला, बाबासाहेबांनी कामगारांसाठी लढा दिला, कामगारांना १२ तासांऐवजी ८ तास काम करता यावे यासाठी कायद्यात तरतूद केली. महत्वाचा शिक्षणाचा मूलमंत्र बाबासाहेबांनी दिला, समाजातील शेवटच्या घटकापर्यंत शिक्षण मिळावे यासाठी प्रयत्न करणे गरजेचे असून ज्या दिवशी शेवटच्या घटकापर्यंत शिक्षण मिळेल तो दिवस ख-या अर्थाने बाबासाहेबांना आदरांजलीचा दिवस ठरेल असे पंतप्रधान नरेंद्र मोदी म्हणाले. डॉ. बाबासाहेब आंबेडकर हे केवळ दलितांचे कैवारी नव्हते त्यामुळे त्यांना एका जातीत अडकवू नका. निवडणुकांचे महत्व लक्षात घेवून बाबासाहेबांनी स्वतंत्र निवडणूक आयोग स्थापन करण्याची संकल्पना मांडली. तसेच स्वतंत्र वित्त आयोग स्थापन करण्याची संकल्पना मांडली असे मोदी म्हणाले.

सिवान – बिहारमधील सिवान जिल्ह्यात सोमवारी सकाळी झालेल्या अपघातात सहा विद्यार्थी ठार झाले तर दोन जण जखमी झाले.
कोचिंग क्लासला घेऊन जाणा-या विद्यार्थ्यांच्या रिक्षाला मिनीबसची धडक बसल्याने हा अपघात झाला. या अपघातात सहा विद्यार्थी जागीच ठार झाले तर जखमी झालेल्या दोन विद्यार्थ्यांना नजीकच्या स्थानिक रुग्णालयात उपचारासाठी दाखल करण्यात आले आहे.
या विद्यार्थ्यांना रुग्णालयात दाखल केले त्यावेळी तेथे कोणतेही डॉक्टर उपस्थित नव्हते असा आरोप स्थानिकांनी केला आहे. यामुळे संतापलेल्या स्थानिकांनी रुग्णालयाजवळील रुग्णवाहिका जाळल्या.तसेच रुग्णालयाबाहेर जोरदार निदर्शनेही केली. दरम्यान, घटनास्थळी वरिष्ठ अधिकारी पोहोचले असून परिस्थिती नियंत्रणात आणण्यात आली आहे.

कोलकाता – क्रिकेट सामन्यादरम्यान गंभीर जखमी झालेल्या ईस्ट बंगाल क्लब क्रिकेटच्या अंकित केसरी या क्रिकेटपटूचे सोमवारी निधन झाले.
तीन दिवसांपूर्वीच भवानीपूर क्लबच्या संघाविरुद्ध खेळत असताना क्षेत्ररक्षणादरम्यान झेल घेण्याच्या नादात अंकितची आपला सहकारी खेळाडू सौरव मंडलशी जोरदार टक्कर झाली. यामध्ये अंकित गंभीर जखमी झाला.अंकितवर गेल्या तीन दिवसांपासून कोलकाताच्या रुग्णालयात उपचार सुरु होते. सोमवारी अंकितला हृद्यविकाराचा झटका आला आणि त्यातच त्याचा मृत्यू झाला.
२० वर्षीय अंकितने आपल्या क्रिकेट कारकिर्दीत ४७ सामने खेळले आहेत. त्याने आतापर्यंत बंगाल अंडर १९, ईस्ट झोन अंडर १९ आणि बंगाल अंडर २३ या संघाचे त्याने प्रतिनिधित्व केले.काही महिन्यांपूर्वीच सिडनीच्या क्रिकेट मैदानावर बाऊंसर डोक्यावर आदळल्या ऑस्ट्रेलियाचा क्रिकेटपटू फिल ह्यूजचे निधन झाले होते. २७ नोव्हेंबर रोजी ह्यूजचे निधन झाले होते.

मुंबई – अवकाळी पाऊस, गारपिट आणि दुष्काळाच्या तडाख्यात यंदा राज्यातील बळीराजा होरपळत आहे. नापिकी आणि डोक्यावरचे कर्ज यामुळे शेतक-यांच्या आत्महत्येचे सत्र सुरुच आहे.
यावर्षी जानेवारी ते मार्च या तीन महिन्यात तब्बल ६०१ शेतक-यांनी आत्महत्या केल्या. हे प्रमाण पाहता प्रत्येक दिवसाला सात शेतकरी आत्महत्या करतात असल्याचे राज्य सरकारने जाहीर केलेल्या आकडेवारीतून समोर आले आहे.
२०१४ मध्ये शेतक-यांच्या आत्महत्येचे प्रमाण एक हजार ९८१ होते. यावर्षी केवळ तीन महिन्यात शेतक-यांच्या आत्महत्येचे प्रमाण ३० टक्क्यांवर पोहोचले आहे. आधीच दुष्काळ आणि त्यानंतर झालेला अवकाळी पाऊस यामुळे शेतक-यांच्या अडचणीत अधिकच भर पडली.
मुख्यमंत्री देवेंद्र फडणवीस यांच्या विदर्भातील शेतक-यांच्या आत्महत्येचे प्रमाण सर्वाधिक आहे. जानेवारी ते मार्च दरम्यान विदर्भातील ३१९ शेतक-यांनी आत्महत्येचा मार्ग स्वीकाल. तर त्यापाठोपाठ क्रमांक लागतो तो मराठवाड्याचा. गेल्या तीन महिन्यात मराठवाड्यातील २१५ शेतक-यांना स्वत;हून आपले जीवन संपवले.

अहमदाबाद : हजार रुपयांच्या नोटांचा पाऊस आणि त्यासोबत चक्क महिला खासदाराचा डान्स. हा प्रकार आहे, दस्तुरखुद्द पंतप्रधान नरेंद्र मोदी यांच्या गुजरात राज्यातला. या वेळी केवळ ३० सेकंदांमध्ये ३ कोटी रुपये उधळले गेले. टीव्हीवर संपूर्ण देशातील जनतेने नोटांचा पाऊस आणि त्यानंतर साचलेला नोटांचा ढीग पाहिला. गुजरातमध्ये वेरावळ इथल्या एका भागवतकथा कार्यक्रमात हा प्रकार सुरू होता.
पैशांचा असा पाऊस यापूर्वी कधी पाहिल्याचे आठवतेय का, नाही ना? पण ते येथे सत्यात उतरले होते. गुजरातमध्ये पैसे उधळले जाताहेत व या नोटांच्या पावसात बेभान होऊन नाचत आहेत, चक्क भाजपाच्या खासदारबाई. शेकडो लोकांसमोर थिरकणाऱ्या या पूनमबेन गुजरातमधल्या जामनगरच्या खासदार आहेत. अहीर समाजाच्या कार्यक्रमाला जणू रंगरसिया ज्वर चढला. चाळिशीतल्या खा. पूनमबेन बेधुंद नाचत होत्या. त्यांच्या तालावर एका बुजुर्ग स्थानिक नेत्यानेही ठुमका धरला व शेकडो लोकांनी नोटा उधळल्या. लोकही एवढे बेधुंद होऊन नाचत होते की काही तर एकमेकांच्या खांद्यावर बसून नोटांचा वर्षाव करीत होते.
देणगीदाखल पैसे उधळले
सौराष्ट्रची ही शंभर वर्षांची परंपरा (लोक दायरो) आहे. देणगीत मिळालेल्या पैशांचा विनियोग सामाजिक कार्यासाठी केला जातो. या कार्यक्रमात मी यापूर्वीही सहभागी होत आले आहे. या पैशाचा उपयोग मुलींसाठी वसतिगृह आणि गोशाळा बांधण्यासाठी केला जाईल. भाजपची खासदार म्हणून नव्हे, तर समाजकन्या म्हणून मी यात सहभागी झाले. भाविकांवर देणगीदाखल नोटांची ही उधळण करण्यात आली, अशी सारवासारव खा. पूनमबेन यांनी केली.

रोम, दि. 19 – भूमध्य सागरात लिबियाच्या हद्दीत बोट बुडाली असून या दुर्घटनेत बोटीतील सुमारे 700 प्रवाशांचा मृत्यू झाल्याची भीती वर्तवली जात आहे. या घटनेनंतर इटली व अन्य देशांचे पथक बचावकार्यासाठी घटनास्थळी दाखल झाले आहेत.
भूमध्य सागरात इटलीच्या दक्षिणेकडील लम्पेदुसा बेटाजवळ लिबियाच्या हद्दीत प्रवाशांनी खचाखच भरलेली एक बोट शनिवारी रात्री बुडाली. या जहाजातील फक्त 28 प्रवाशांची सुटका करण्यात यश आले. तर सुमारे 700 प्रवाशांचा मृत्यू झाल्याची भीती संयुक्त राष्ट्राच्या एका अधिका-याने वर्तवली आहे. मृतांचा नेमका स्पष्ट झाल्यास हा दशकातील सर्वात मोठा अपघात ठरु शकतो असे जाणकारांनी सांगितले. या अपघाताविषयी इटलीच्या नौदलाने कोणतीही प्रतिक्रिया दिलेली नाही. गेल्या आठवड्यातही भूमध्य सागरात लिबियातून येणारी बोट बुडून 400 जणांचा मृत्यू झाला होता.

नवी दिल्ली, दि. 19 – मोदी सरकार देशाचा पाया असलेल्या शेतक-यांना कमकूवत करत असून लोकसभा निवडणुकीत उद्योजकांकडून घेतलेले कर्ज फेडण्यासाठी भूसंपादन विधेयक आणले जात आहे असा घणाघात काँग्रेस उपाध्यक्ष राहुल गांधी यांनी केला आहे. मोदींच्या धोरणामुळे शेतकरी व कामगार वर्ग घाबरला आहे असेही त्यांनी म्हटले आहे.
रविवारी दिल्लीतील रामलीला मैदानात काँग्रेसतर्फे किसान रॅलीचे आयोजन करण्यात आले होते. यामध्ये काँग्रेस उपाध्यक्ष राहुल गांधी, अध्यक्ष सोनिया गांधी व मनमोहन सिंग आदी नेत्यांनी संबोधित केले. सुमारे दोन महिने आत्मचिंतन करुन राहुल गांधी आज काय बोलणार याकडे सर्वांचेच लक्ष लागले होते. राहुल गांधी आक्रमक शैलीत विरोधकांवर निशाणा साधला. देशाच्या विकासासाठी मेक इन इंडिया व उद्योग क्षेत्राच्या विस्ताराची आवश्यकता आहेच पण त्यासोबत शेतकरीही तितकाच आवश्यक आहे. हरित क्रांतीच्या माध्यमातून शेतक-यांनी देशाच्या विकासाचा पाया रचला होता. मात्र मोदी हा पाया  कमकुवत करत आहे असा आरोप राहुल गांधी यांनी केला.
केंद्र सरकार फक्त श्रीमंत व उद्योजकांसाठीच काम करत असल्याचे शेतक-यांना वाटत असून त्यांची जमीन कधीही हिसकावून घेतली जाईल अशी भीती त्यांच्या मनात निर्माण झाली आहे असे त्यांनी सांगितले. मोदी शेतक-यांना त्यांची जमीन उद्योजकांना विकण्यासाठी भाग पाडत आहे. लोकसभा निवडणुकीत उद्योजकांकडून घेतलेले कर्ज फेडण्यासाठीच मोदी शेतक-यांची जमीन उद्योजकांना देत आहे. यासाठीच भूसंपादन विधेयक आणले गेले असे त्यांनी सांगितले. यूपीए सरकारचे भूसंपादन विधेयक शेतकरी हिताचे होते असेही त्यांनी निदर्शनास आणून दिले. तर मोदी सरकारने खोटी आश्वासनं देऊन सत्ता मिळवली असून गेल्या 11 महिन्यांत सरकारने नेमके काय केले असा सवाल सोनिया गांधी यांनी उपस्थित केला.

भंडारा – जिल्ह्यातील आंधळगांव पोलीस ठाण्याअंतर्गत येणार्‍या कांद्री परिसरातील एका गावातील संपन्न व सुशिक्षित कुटुंबातील ३७ वर्षीय विवाहित व दोन मुलांच्या आईने एका अल्पवयीन प्रियकरासोबत वेगळा संसार थाटल्याची खळबळजनक घटना समोर आली आहे. आतापर्यंत पुरुषांनी अल्पवयीन मुलींना फूस लावून पळवून नेल्याच्या नित्य – नव्या घटना समोर येत असतात. परंतु हे प्रकरण थोडेसे वेगळे आहे. यामध्ये विवाहित महिलेने १७ वर्षीय अल्पवयीन मुलाला आपल्या प्रेमजाळात ओढून त्याला आपल्यासोबत पळवून नेले आहे. या प्रकरणात प्रियकर अल्पवयीन असल्याने विवाहितेली तुरुंगाची हवा खावी लागली आहे.
या विवाहितेने या अल्पवयीन मुलाला मागील एक वर्षापासून आपल्या प्रेमपाशात गुंतवून ठेवले आहे. आता आपल्या या छोट्या प्रियकराबरोबर स्वतंत्र राहण्याच्या उद्देशाने आरोपी महिलेने त्याला पळवून नेऊन घरोबा थाटला. मात्र मुलगा अल्पवयीन असल्याने त्याच्या घरच्यांच्या तक्रारीवरुन तिच्याविरोधात गुन्हा दाखल करुन तिला अटक करण्यात आली आहे. विशेष म्हणजे महिलेचा पती सरकारी नोकरदार आहे. घरी सर्व सुखसुविधा असताना, स्वत: महिलाही सुशिक्षित आहे आणि तिला नऊ वर्षा मुलगा व सहा वर्षाची मुलगी अशी दोन अपत्ये असताना तिने हे पाऊल उचलले आहे. पती नोकरीला गेल्यानंतर घरी एकटीच असणार्‍या या महिलेने शेजारी राहणार्‍या एका १७ वर्षीय मुलाला आपल्या प्रेमजालात ओढले. मागील एक वर्षापासून त्यांच्यात प्रेमसंबंध सुरू आहेत. आता लपून- छपून भेटण्याऐवजी आपण आपला वेगळा संसार थाटू, असे ठरवून त्यांनी घरातून पळून जाण्याची योजना आखली. महिलेने या मुलाला त्याच्या मावशीकडे रामटेकजवळील नगरधन येथे जाण्यास सांगितले. व ठरल्याप्रमाणे ती दुसर्‍या दिवशी रामटेकला पोहोचली. दूरध्वनी करून तिने मुलाला बोलावून घेतले व ते सरळ मौदा येथे गेले. तेथे त्यांनी एक भाडयाने खोली घेऊन आपला संसार थाटला. पत्नी बेपत्ता झाल्याची तक्रार पतीने आंधळगांव पोलीस ठाण्यात दाखल केली तर तिकडे मुलाच्या मावशीने आपला भाचा बेपत्ता असल्याची तक्रार रामटेक पोलिसात नोंदवली. रामटेक व आंधळगांव पोलिसांनी मोबाईल क्रमांकाच्या आधारे त्यांची लोकेशन प्राप्त केली असता तो मोबाईल क्रमांक मौदा येथे असल्याचे समजले. लगेच पोलीसांनी मौदा गाठून त्या महिलेसह अल्पवयीन मुलाला ताब्यात घेतले असता हे प्रकरण उघडकीस आले. या प्रकरणी पोलिसांनी कलम ३६३ व ३४२ भादंविसं कलम ४/१२ व बाल लैंगिक अत्याचार विरोधी कायद्यानुसार महिलेला अटक करण्यात आली आहे. अल्पवयीन मुलाला त्याच्या कुटूंबियांच्या स्वाधीन करण्यात आले.