यवतमाळ – यश ही सहज मिळणारी बाब नसून त्यासाठी कठोर परीश्रम, चिकाटी, इच्छाशक्ती, आत्म्‍विश्वास आदी गोष्टींची गरज असण्यासोबतच चौफेर वाचनही अत्यंत महत्वाचे आहे.‍ स्पर्धा परीक्षेच्या तंत्रात बरेच बदल झाले असून घोकमपट्टीऐवजी विश्लेषणावर भर दिला जात आहे. त्यामुळे स्पर्धा परीक्षेचा थेट संबंध अवांतर वाचनाशी आहे, असे प्रतिपादन निवासी उपजिल्हाधीकारी राजेश खवले यांनी केले.
येथील यवतमाळ करिअर ॲकेडमीच्या वतीने अयोजित मनोविकास ग्रंथोत्सवाच्या उद्घाटनानिमित्य्‍ आयोजित ‘स्पर्धा परीक्षेत अवांतर वाचनाचे महत्व्‍’ याविषयावर प्रमुख वक्ते म्हणून ते बोलत होते. स्थानिक स्नेहनगर मधील वायसीएच्या सभागृहात झालेल्या या कार्यक्रमात राजेश खवले यांनी स्पर्धा परीक्षेत वाचन किती महत्वाचे आहे, हा विषय उदारहणांसह सोपा करून सांगितला. स्पर्धा परीक्षेसाठी आवश्यक असणारे सन, वार, महिने, ‍विविध आकडेवारी लक्षात ठेवण्यासाठी ब्राह्मी पद्धतीचा उपयोग कसा होतो, याबाबतही खवले यांनी विद्यार्थ्यांना मार्गदर्शन केले. वाचनाच्या मर्यादा असेल तर, यशाने तुमच्यापर्यंत का यावे, असा परखड प्रश्‍न करून विद्यार्थ्यांनी वाचनाला मर्यादा घालू नये, असे आवाहनही त्यांनी केले.‍ सिलॅबसच्या बाहेरचे वाचनही आता स्पर्धा परीक्षेत उपयोगी पडते. आयुष्यात ग्रंथरूपी बारूद भरली नाही तर आयुष्याला काहीच अर्थ उरत नाही. वयानुरूप वाचनाची आवड,‍ निवड बदलू शकते परंतु, वाचाल तरच वाचाल, हे वेळीच लक्षात घेतले पाहिजे असे ते म्हणाले.
व्यक्तीमत्व विकासासंदर्भात मनोविकास प्रकाशनचा हातखंडा आहे. मेंदूला चालना आणी माणसाला ‍दिशा देणारी पुस्तके मनोविकास सातत्याने वाचकांना उपलब्ध करून देते. ही पुस्तके स्पर्धा परीक्षेसोबतच दररोजच्या आयुष्यातही अत्यंत मोलाची आहे, हा अनुभव आपण घेतला असल्याचेही राजेश खवले यांनी यावेळी सांगितले. यवतमाळात प्रथमच एक महिना म्हणजे 17 मे पर्यंत चालणारा मनोविकास ग्रंथोत्सव आयोजित करण्यात आल्याने यवतमाळकर ख-या अर्थाने वाचन समृद्ध होतील, असा आशावादही त्यांनी यावेळी व्यक्त केला. याप्रसंगी यवतमाळ करिअर ॲकेडमीचे संचालक संभाजी राणे, रमेश पखाले यांनी राजेश खवले यांचे रोपटे व ग्रंथभेट देऊन स्वागत केले. प्रास्ताविक नितीन पखाले यांनी केले. कार्यक्रमाला शहरातील असंख्य विद्यार्थी, पालक व वाचकांनी गर्दी केली होती.

पुणे- टेनिस सुंदरी सानिया मिर्झाच्या घरी पाळणा हलणार आहे. तिचा पती शोएब मलिकनेच ही बातमी दिली आहे. ट्विटरवर शोएबने एका प्रश्नाच्या उत्तरात त्याच्या फॅनला लवकरच तुम्ही काका बनणार असे ट्विट केल्याने याबाबतच्या बातम्यांना उधाण आले आहे. इंटरनेटवर तर या बातमीबाबत चर्चा आणि चर्चित चर्वण सुरू झाले आहे.
सानिया मिर्झाने शोएबशी लग्न केल्यानंतर ती पाकिस्तानची सून झाली मात्र तिने भारतीयत्व सोडले नाही. लग्नानंतर आजपर्यंत झालेल्या सर्वच राष्ट्रीय आणि आंतरराष्ट्रीय सामन्यांमध्ये सानियाने भारताचेच प्रतिनिधीत्व केले आहे आणि करत आहे. टेनिस सुंदरी म्हणून तिची ख्याती आहे. आता सानिया आई होणार म्हटल्यावर ‘नेटकर मामांचे आणि काकांचे’ त्यावरुन हास्य-विनोद सुरू झाले आहेत.

नवी दिल्ली – रिझर्व्ह बँक ऑफ इंडियाचे गर्व्हनर रघुराम राजन यांना त्यांच्या खाजगी ई-मेल आयडीवर धमकीचा ईमेल मिळाला आहे.
या महिन्याच्या सुरुवातीला राजन यांच्या ई-मेल आयडीवर धमकीचा ई-मेल मिळाला. मुंबई पोलिसांच्या सूत्रांकडून मिळालेल्या माहितीनुसार isis583847@gmail.com. या ई-मेल आयडीवरुन हा मेल पाठवण्यात आला आहे.
‘मला तुम्हाला जीवे मारण्यासाठी पैसे देण्यात आले आहे. जर तुम्ही मला त्याहूनही अधिक रक्कम द्याल तर याबाबत आपण निर्णय घेऊ शकतो असे या मेलमध्ये म्हटले आहे.
दरम्यान, एका इंग्रजी वृत्तपत्राने दिलेल्या माहितीनुसार मुंबई पोलिसांनीही या वृत्ताला दुजोरा दिला आहे. हो हे खरे आहे. राजन यांना धमकीचा ई-मेल आल्याची तक्रार आमच्याकडे आली आहे. मेलमध्ये इसिसचे नावही आहे त्यामुळे या प्रकरणाचा गांभीर्याने तपास केला जात आहे. हे प्रकरण सायबर विभागाडे सोपवण्यात आले असल्याचे पोलिसांनी सांगितले.
सायबर गुन्हे तपास विभाग या प्रकरणाचा तपास करत असून सायबर विभागाने अमेरिकास्थित गुगलकडून मदत मागितली आहे.

यवतमाळ, दि. १३  – येथील जिल्हाधिकारी कार्यालयातील महसूल विभागात कार्यरत आपल्या अधिनस्त महिला लिपीका सोबत रंगरलीया करणाºया नायब तहसीलदाराला बेदम चोप दिला. आज सोमवारी सायकांळी ४.३० वाजताच्या सुमारास ही घटना घडली. या घटनेने जिल्हाधिकारी कार्यालय परिसरात खळबळ उडाली होती.
जिल्हाधिकारी कार्यालयातील मंडळ अधिकाºयास नुकतीच नायब तहसीलदार म्हणून पदोन्नती मिळाली आहे. सदर नायब तहसीलदार महसूल विभागात कार्यरत आहे. त्याच कार्यालयातील महिला लिपीकासोबत तो रंगरलीया करीत होता. म्हणतात ना ‘हवा आली की झाडाचे पान हालते’ या उक्तीप्रमाणे नायब तहसीलदार व महिला लिपीकांच्या कारणाम्याची चर्चा परिसरात रंगू लागली. याबाबतची कुणकुणही महिला लिपीकाच्या पतीला लागली. त्यामुळे संतप्त झालेल्या पतीराजाने जिल्हाधिकारी कार्यालयातील पोहचून कानोसा घेतला. त्यावेळी नायब तहसीलदार व महिला लिपीक एकमेकांच्या खर्चीला खुर्ली लावून बसले होते. त्यामुळे संताप अनावर झाल्याने लिपीकाच्या पतीने नायब तहसीलदाराला बेदम चोप दिला. कार्यालयातील सर्व कर्मचाºयासमक्ष हा प्रकार झाला. त्यामुळे परिसरात चांगलीच खळबळ उडाली असून या प्रकरणाची जोरदार चर्चा सुरू होती.

रायपूर – छत्तीसगडच्या दंतेवाडा जिल्ह्यात नक्षलवाद्यांनी घडवलेल्या भूसुरुंग स्फोटात चार सुरक्षारक्षक शहीद झाले असून आठ जण जखमी आहेत. गेल्या ७२ तासांत चौथ्या नक्षलवादी हल्ल्यानं राज्य हादरलं आहे.
दंडेवाडा जिल्हा मुख्यालयापासून २५ किमी अंतरावर चोलनार इथं सुरक्षारक्षक गस्त घालत होते, तेव्हाच नक्षलींनी भीषण भूसुरुंग स्फोट घडवला. या स्फोटाची तीव्रता इतकी प्रचंड होती की त्यात भू-सुरुंगरोधक वाहनाचाही चक्काचूर झाला. या स्फोटात चार जवान जागीच मृत्युमुखी पडले, तर आठ जखमींना जिल्हा हॉस्पिटलमध्ये दाखल करण्यात आलं आहे. त्यांच्यापैकी दोघांची प्रकृती गंभीर असल्याचं समजतं. दंतेवाडाचे पोलीस अधिक्षक तातडीनं घटनास्थळी पोहोचले असून मदत आणि बचावकार्य वेगानं सुरू आहे.
या भू-सुरुंग स्फोटाआधी, आजच कंकेर जिल्ह्यात नक्षलवाद्यांनी बीएसएफ पथकाला लक्ष्य केलं. त्यात एक जवान शहीद झाला. कालही कंकेर जिल्ह्यात खाणकाम करणारी १७ वाहनं त्यांनी पेटवून दिली होती. त्यात सुदैवानं कुणाचाही मृत्यू झाला नव्हता. परंतु, शनिवारी छत्तीसगडच्या सुकमा जिल्ह्यातील पोलमपल्ली जंगलात पोलिस आणि नक्षलवाद्यांच्या झालेल्या चकमकीत सात जवान शहीद झाले होते.

कोल्हापूर : महाराष्ट्राच्या सहकारी साखर कारखानदारीत स्वच्छ आणि पारदर्शी कारभाराची नवी वाट तयार करणारे कागलच्या शाहू साखर कारखान्याचे संस्थापक व लोकनेते राजे विक्रमसिंह जयसिंगराव घाटगे (वय ६७ रा. नागाळा पार्क कोल्हापूर) यांचे सोमवारी पहाटे साडेसहाच्या सुमारास ह्रदयविकाराच्या तीव्र धक्क्याने आकस्मिक निधन झाले. त्यांच्या निधनाने साखर कारखानदारीतील ‘दीपस्तंभ,’ उमदा नेता व दिलदार राजा हरपल्याची भावना व्यक्त झाली. या लाडक्या नेत्याच्या अशा अचानक निधनाने त्यांच्यावर प्रेम करणाऱ्या हजारो जनतेला अश्रू अनावर झाले. बऱ्याच लोकांचा सुरुवातीला या बातमीवर विश्र्वासच बसला नाही. येथील कसबा बावडयातील कागलवाडी परिसरातील राजघराण्याच्या स्मशानभूमीत त्यांच्यावर सायंकाळी अंत्यंसंस्कार करण्यात आले. त्यावेळी अलोट गर्दी उसळली होती. घाटगे यांच्या मागे पत्नी श्रीमती सुहासिनीदेवी, मुलगा व शाहू दूध संघाचे व्यवस्थापक संचालक समरजितसिंह, कन्या तेजस्विनी भोसले, बहिण बडोद्याच्या हर्षलाराजे गायकवाड, अमरावतीच्या रंजनाराजे देशमुख व जतच्या ज्योत्स्नाराजे डफळे, भाऊ व येथील प्रसिध्द बांधकाम व्यावसायिक प्रविणसिंह असा मोठा परिवार आहे. घाटगे हे राज्य साखर संघाचे अध्यक्ष होते. सहकारातील जाणते नेतृत्व म्हणून महाराष्ट्र त्यांच्याकडे पाहत होता. कागल विधानसभा मतदार संघातून ते १९७८ व १९८० अशा दोन वेळा आमदार झाले. पुढे १९९८ ला त्यांनी कोल्हापूर लोकसभा मतदार संघातून शिवसेनेतर्फे निवडणूक लढवली परंतू त्यात त्यांचा पराभव झाल्यावर त्यांनी राजकारणापेक्षा साखर कारखानदारीत अधिक लक्ष केंद्रित केले. त्यांची ओळखही राजकारण्यांपेक्षा सहकाराच्या माध्यमातून रचनात्मक काम करणारा नेता अशीच अधिक ठळक झाली होती. गोरगरिब शेतकऱ्यांचे हित करायचे असेल तर सहकारी साखर कारखानदारीच टिकली पाहिजे असा त्यांचा आग्रह राहिला. व स्वत:चा शाहू साखर कारखाना तितक्याच उत्तमपध्दतीने त्यांनी चालवून दाखविला. आज महाराष्ट्रातच नव्हे तर देशात उत्तम चालविलेला कारखाना कोणता म्हणून विचारणा झाल्यावर पहिले नांव पुढे येते ते अर्थातच ‘शाहू’चे. हे सगळे श्रेय घाटगे यांच्या नेतृत्वाचे. माजी खासदार सदाशिवराव मंडलिक यांच्याशी कागलच्या राजकारणात त्यांचा सुमारे पंचवीस वर्षे टोकाचा संघर्ष झाला. मंडलिक यांचे निधन नऊ मार्चला झाले. त्यावेळी ‘आता आमचा नंबर कधी..’ असे मिश्किलपणे म्हणणारे विक्रमसिंह यांचेही निधन लगेच महिन्याभरात व्हावे हा देखील एक दैवदुर्विलासच. घाटगे यांना मधुमेहाचा त्रास होता. कांही वर्षापूर्वी त्यांची अ‍ॅन्ज्युोप्लास्टीही झाली होती. प्रकृतीबाबत ते दक्ष होते. रोज सायंकाळी कृषी महाविद्यालयाच्या आवारात फिरायला जात. मांसाहारही पूर्ण बंद केला होता. दोन-तीन दिवसांत धाप लागल्यासारखे वाटू लागल्याने आज सोमवारी त्यांनी डॉ. दिलीप कुलकर्णी यांची वेळ घेतली होती. काल दिवसभरची दिनचर्याही नेहमीचीच राहिली. दुपारी घरीच कार्यकर्त्यांशी बोलले. सायंकाळी फिरून आले. पहाटे सहाच्या सुमारास अस्वस्थ वाटू लागल्याचे त्यांनी पत्नीस सांगितले. म्हणून तातडीने त्यांनी मुलगा समरजित यांना बोलवले. दोघांनी धरून जिन्यावरून खाली आणतानाच ते कोसळले व तिथेच त्यांची प्राणज्योत मालवली. लगेच त्यांना राजारामपुरीतील खासगी रुग्णालयात हलविण्यात आले. डॉक्टरांनी तपासणी करून घाटगे यांचे निधन झाल्याचे जाहीर केले.

गुवाहटी – आसाममध्ये एका गावात बॉम्बचा स्फोट झाल्याने एक जण ठार झाला आहे. तर दोन जण जखमी झाले आहेत. हा स्फोट आज सकाळी साडे सहा वाजता झाला.
आसामच्या उदलगुरी जिल्ह्यातील बोरजहार या गावात हा स्फोट झाला त्यात रामचंद्र बर्मन या व्यक्तीचा मृत्यू झाला आहे.बर्मनचा भंगाराचा व्यावसाय आहे. ज्या ठिकाणी हा स्फोट झाला आहे, तेथे काही धातू अढळून आले आहेत. ते सर्व धातू बर्मनने शनिवारी गोळा केले होते. तो बॉम्ब असल्याचे त्याला माहीत नव्हते. त्यामुळे त्याने बॉम्बवर हातोडा मारला आणि मोठा स्फोट झाला. यात बर्मनचा जागावरच मृत्यू झाला. तीन जखमींमध्ये एका महिलेचा समावेश आहे.

नागपूर – जुगाराच्या पैशांवरून झालेल्या भांडणात गुन्हेगारी पार्श्वभूमी असलेल्या तीन भावांचा वस्तीतील मुलांनीच चाकू, तलवारीने भोसकून खून केला. ही घटना गुरुवारी रात्री साडेनऊच्या सुमारास बिडी पेठ भागात घडली. एकनाथ उगले, केशव उगले संजय उगले अशी मृतांची नावे आहेत.
एकनाथ हा अफजल अली नावाच्या गुंडासोबत भागीदारीमध्ये काम करत होता. त्याच्याविरुद्ध ‘मकोका’अंतर्गत गुन्हेही दाखल आहेत, तर केशव आणि संजय हे अण्णा राऊत नावाच्या गुंडासाठी बिडी पेठ वस्तीमध्ये जुगार अड्डे चालवायचे. या तिन्ही भावांची या वस्तीत मोठ्या प्रमाणावर दहशत होती. सामान्य नागरिक त्यांच्या जाचाला कंटाळले होते.
गुरुवारी हे तिघेही भाऊ वस्तीतील एका मित्राच्या मुंडण कार्यक्रमासाठी नागपूर-भंडारा मार्गावरील वागोळा या ठिकाणी गेले होते. त्या ठिकाणी कार्यक्रम सुरू असताना तिघाही भावांनी जुगाराचा डाव रचला. त्या वेळी पैशांवरून त्यांचा काही युवकांशी वाद झाला. या वादामुळे वस्तीतील युवक कार्यक्रम सोडून नागपुरात परतले.रात्री तिघेही भाऊ घराकडे येताना दिसताच एका चौकातील पान ठेल्यावर चाकू, तलवारींसह उभ्या असलेल्या युवकांनी त्यांच्यावर हल्ला चढवला. यात एकनाथ आणि केशव हे जागीच ठार झाले, तर संजयने पळून जाण्याचा प्रयत्न केला, मात्र युवकांनी त्यालाही संपविले. दरम्यान, सर्व आरोपी फरार आहेत.
गुंड संपवण्याचे सत्रच
गेल्याकाही वर्षात नागपुरात कुख्यात गुंडांची हत्या करण्याचे सत्रच सुरू झाले आहे. अक्कू यादव, पिंटू शर्के या गुंडांचा भर कोर्टात खून करण्यात आला होता. मार्च २०१३ रोजी कुख्यात गुंड इक्बाल याला विद्यापीठाच्या इमारतीसमोर महिलांनी दगडाने ठेचून हत्या केली होती. तो झोपडपट्टीतील महिलांची छेड काढायचा.

रायपूर – छत्तीसगडच्या सुकमा जिल्ह्यातील पीडीमील-पोलामपाली भागात विशेष पोलिस पथक आणि माओवाद्यांमध्ये झालेल्या चकमकीत सात पोलिस शहीद झाले असून, दहा जण जखमी झाले आहेत.
डोरनापाल आणि चिंतागुफा परिसरात एसटीएफ पोलिस पथक आणि माओवाद्यांमध्ये चकमक झाली. यापूर्वी या भागात माओवाद्यांनी सुरक्षा पथकातील जवानांवर घात लावून केलेल्या हल्ल्यामध्ये अनेक जवान शहीद झाले आहेत. जखमी जवानांना जगदालपूर येथील रुग्णालयात दाखल करण्यात आले आहे. त्यांना हवाईमार्गे जगदालपूरला आणण्य़ात आले. एसटीएफच्या मदतीसाठी घटनास्थळी केंद्रीय राखीव पोलिस दलाच्या दोन तुकडया पाठवण्यात आल्या आहेत.शहीद झालेल्या पोलिस जवानांची ओळख पटली असून, कमांडर शंकर राव, रोहित सोधी, मनोज बाघेल, मोहन व्ही.के., राजकुमार मारकाम, किरण देशमुख आणि राजमान टेकाम अशी या जवानांची नावे आहेत.