नैरोबी- केनियातील गॅरिसा विद्यापीठातील कॅम्पस परिसरात गुरुवारी दहशतवादी हल्ला झाला. या हल्ल्यात एकूण १४७ जण ठार झाले. तर ८० हून अधिक गंभीर जखमी झाले आहेत. अल-शबाब या दहशतवादी संघटनेच्या चार दहशतवाद्यांनी विद्यापीठ परिसरात प्रवेश करत अंधाधुंद गोळीबार केला.
केनिया सरकारने दिलेल्या माहितीनुसार, लष्कराचे जवान आणि अतिरेकी यांच्यात तब्बल १६ तास धुमश्चक्री चालू होती. संरक्षण दलाची मोहीम आता संपली आहे. चारही दहशतवाद्यांना ठार करण्यात आले आहे. तसेच गॅरिसा शहरात आणि जवळपासच्या परिसरात संचारबंदी लावण्यात आली आहे. दरम्यान, संयुक्त राष्ट्राचे सरचिटणीस बान की मून यांनी या घटनेचा तीव्र निषेध व्यक्त केला आहे. अमेरिकेनेही केनियाला पूर्ण सहकार्याचे आश्वासन दिले आहे. अल शबाबचा नायनाट करण्यासाठी आपण कटिबद्ध आहोत, असे अमेरिकेने स्पष्ट केले आहे. तर भारताचे पंतप्रधान नरेंद्र मोदी यांनीही या दहशतवादी हल्ल्याचा तीव्र शब्दात निषेध केला आहे.केनियामध्ये १९९८ मध्ये अमेरिकी दूतावासावर झालेल्या बॉम्बस्फोटानंतरचा हा देशातील दुसरा सर्वात मोठा हल्ला आहे.

सातारा- पुणे- सातारा रोडवर शिरवळ एम. आय. डी. सी. मधील एका केमिकल कंपनीला गुरुवारी मध्यरात्री भीषण आग लागली.आग विझविण्यासाठी अग्निशमन दलाच्या १० गाड्या शर्थीचे प्रयत्न करीत असून अद्यापही आगीवर नियंत्रण मिळविण्यात आलेले नाही.या दुर्घटनेत कोणतीही जीवितहानी झालेली नाही. मात्र या आगीत लाखो रुपयांचे नुकसान झाल्याचा प्राथमिक अंदाज आहे. आगीचे नेमके कारण अद्याप समजू शकले नाही. कंपनीमधील केमिकलचा पिंप फुटल्याने ही आग लागली असल्याचा अंदाज वर्तवण्यात येत आहे.

ठाणे / जळगाव- ठाणे आणि जळगाव अशा दोन वेगवेगळ्या घटनांमध्ये धावत्या रेल्वेतून फेकल्यामुळे दोन तरुण गंभीर जखमी झाले आहेत.
ठाण्यातील कोपरी पूल ते ठाणे रेल्वे स्थानक दरम्यान धावत्या लोकलमधून गौरव पुंजवानी या तरुणाला फेकून देण्याचा प्रकार उघडकीस आला आहे.
गौरवने पाकीट चोरीला विरोध केला. त्यामुळे चोरट्यांनी त्याला धावत्या गाडीतून धक्का मारत बाहेर फेकून दिले. जखमी गौरवला स्थानिकांनी जवळच्या रूग्णालयात दाखल केले आहे.
तर दुसरीकडे, सहप्रवासी तरुणांनी १८ वर्षीय विद्यार्थ्याला धावत्या गांधीधाम-पुरी एक्स्प्रेसमधून बाहेर फेकल्याचा प्रकार जळगावमध्ये घडला आहे. ही घटना गुरुवारी पाळधीजवळ धरणगाव- चावलखेडा स्थानकादरम्यान घडली. भूषण संजय भदाणे (१८) असे जखमी विद्यार्थ्यांचे नाव आहे. या घटनेत त्याला गंभीर इजा झाली असून, त्याला उपचारासाठी जळगावमधील खासगी रुग्णालयात दाखल केले आहे.

मुंबई- मुंबई पोलीस दलात कार्यरत असलेल्या २००७ ते २०१४ या सात वर्षाच्या कालावधीत २५९ पोलिसांनी आत्महत्या केल्याची माहिती मुख्यमंत्री देवेंद्र फडणवीस यांनी विधानसभेचे आमदार नितेश राणे यांनी उपस्थित केलेल्या तारांकित प्रश्नाच्या लेखी उत्तरात दिली.
ज्या पोलिसांनी आत्महत्या केलेल्या आहेत, या आत्महत्या या पोलिसांनी विविध कार्यक्रम सण, उत्सव आदी कारणांमुळे आणि सतत वेळी-अवेळी बंदोबस्ताचे काम दिल्यामुळे झाल्या आहेत, असे म्हणता येणार नाही. सदर आत्महत्या होण्यामागे कौटुंबिक तसेच वेगवेगळी वैयक्तिक कारणे असल्याचा दावा मुख्यमंत्र्यांनी आपल्या लेखी उत्तरात केला आहे.
आमदार नितेश राणे यांनी मुंबईतील पोलिसांना २४ तास काम करावे लागत आहे. यामुळे पोलिसांमध्ये दिवसेंदिवस मोठय़ा प्रमाणात तणावाचे वातावरण निर्माण झाल्यामुळे तसेच कामाचा ताण वाढत असल्याने मागील वर्षात १४७हून अधिक पोलिसांचा मृत्यू झाला.
हा प्रकार खरा आहे काय, असा सवाल विचारला होता. तसेच कायम बंदोबस्त, अपुरी झोप, वरिष्ठांकडून दिली जाणारी जाचक वागणूक या असह्य ताणामुळे २००७ ते २०१४ या कालावधीमध्ये २४७ कर्मचाऱ्यांनी आत्महत्या केल्याचे जानेवारी २०१५ मध्ये गृहविभागाच्या आकडेवारीवरून स्पष्ट झाले आहे काय, असाही सवाल आमदार राणे यांनी उपस्थित केला होता.
आमदार राणे यांच्या तारांकित प्रश्नावर मुख्यमंत्र्यांनी ज्या १४७ पोलिसांचे विविध आजारांनी निधन झाले आहे, त्यांचे निधन कामाच्या तणावामुळे झाल्याच्या नोंदी अभिलेखावर उपलब्ध नसल्याचा स्पष्ट दावा आपल्या उत्तरात केला. तर पोलिसांचे आरोग्य उत्तम राहावे, तसेच कामाचा ताण कमी करण्यासाठी महाराष्ट्र पोलीस कुटुंब आरोग्य योजना राबविण्यात येत असून बीएमआय चाचणी करून त्यांना प्रोत्साहन भत्ता देण्यात येतो. तर पोलीस दलात कर्मचाऱ्यांच्या अडीअडचणी, तक्रारींचे निवारण करण्यासाठी कर्मचारी वृंद परिषदेचे आयोजन करण्यात येते. तसेच आज्ञांकित कक्ष व दरबारामध्ये त्यांच्या तक्रारी व अडीअडचणी सोडविण्यासाठी आवश्यक त्या उपाययोजना केल्या जातात, असेही मुख्यमंत्र्यांनी आपल्या लेखी उत्तरात सांगितले आहे. पोलीस, पोलीस अधिकारी यांच्यासाठी तणावमुक्त व निरोगी राहण्यासाठी आरोग्यविषयक तपासणी शिबिर कार्यशाळा, योगा, आरोग्यविषयक जागरूकता शिबिरांचे आयोजनही करण्यात येते.

यवतमाळ, दि. २ – वडगाव जंगल वनपरीक्षेत्रातील सागवान वृक्षांवर कुºहाड चालली असून बेवारस पाच घनमीटर माल जप्त करण्यात आला. यामध्ये वनपरीक्षेत्र अधिकाºयाचा हात असल्याचे बोलले जात आहे.
यवतमाळ वनवृत्तातील राखीव वनातून सागवान वृक्षांची कत्तल राजरोसपणे सुरू आहे. यवतमाळ, जोडमोहा, हिवरी वनपरीक्षेत्राला सागवान ठेकेदारांनी आपला अड्डाच बनविला आहे. जोडमोहामधिल गणेशवाडी व टपालहेटी येथील धाडीत डिएफओच्या हाती परीपक्व सागवानचे तीन तर अपरिपक्व सागवानचा एक ट्रक हाती लागला होता. मात्र अधिकारीच ठेकेदार निघाल्याने हा विषयच दडपण्यात आला. सागवान तस्करांच्या विरोधात डिएफओ प्रमोदचंद लाकरा यांनी मोहिम गेल्या काही दिवसापासून उघडली असून, यामध्ये वनपरीक्षेत्र अधिकाºयांचे पितळ उघडे पडत आहे. आज गुरूवारी सकाळी वडगाव धानोरा वनपरीक्षेत्रातील राखीव वनात बेवारस सागवान डिएफओला मिळून आले. शेतकºयाच्या शेतातील हे सागवान असल्याचे सांगितले जात असून, त्यावर हॅमर नसल्याने विनापरवान्याचा हा माल असल्याची शंका व्यक्त करण्यात आली आहे. सदोबासावळी येथे पकडण्यात आलेला जलतनचा माल देखील संशयाच्या भोवºयात असून, सागवान तस्करांच्या नावाखाली वनपरीक्षेत्र अधिकारी व वनरक्षकच वृक्षांची कत्तल करीत असल्याचे बोलल्या जात आहे. डिएफओच्या मोहिमेमूळे अधिकाºयांचे धाबे दणाणले असून, या प्रकरणाची सध्या चौकशी सुरू आहे. यामध्ये अधिकारी अडकण्याची शक्यता आहे.