पुणे – घरासमोर खेळत असलेल्या लहान मुलांना हाकलून लावल्याचा राग आल्याने मुलांच्या आईचे व बोलणारी महिला या दोघींमध्ये झालेल्या जोरदार मारहाणीत एका महिलेचा मृत्यू झाला. ही घटना शनिवारी रात्री खडक पोलीस ठाण्याच्या परिसरात कासेवाडी, भवानी पेठ येथे घडली. खडक पोलिसांनी याप्रकरणी महिलेला अटक केली आहे. रविवारी न्यायालयाने तिला ८ तारखेपर्यंत पोलीस कोठडी सुनावली आहे.
सुनीता नितीन वायदंडे (वय २४, रा. कासेवाडी, भवानी पेठ) असे आरोपी महिलेचे नाव आहे. तर आस्मा लुकमान शेख (वय ४०, रा. लक्ष्मी माता मंदिराजवळ, कासेवाडी, भवानी पेठ) असे मृत महिलेचे नाव आहे. याप्रकरणी आस्मा यांचा भाऊ जितेंद्र छोटुलाल परदेशी (वय ३८, रा. लक्ष्मी माता मंदिर, भवानी पेठ) यांनी फिर्याद दिली आहे.
आरोपी सुनीता आणि आस्मा या दोघी एकमेकींच्या शेजारी राहात होत्या. आस्मा यांना हार्ट आणि शुगरचा त्रास असल्याने त्या औषध घेऊन घरी आराम करत होत्या. त्यावेळी शनिवारी सायंकाळी सातच्या सुमारास आरोपी सुनीता यांची दोन लहान मुले आस्मा यांच्या घरासमोर गोंधळ घालत असल्यामुळे आस्मा यांनी त्यांना हाकलून लावले. ही बाब मुलांनी त्यांची आई व गुन्ह्यातील आरोपी सुनीता हिला सांगितली. आरोपी सुनीता हिला या प्रकाराचा राग आल्याने तिने आस्माला शिवीगाळ केली. यावेळी आस्मा आणि सुनीता या दोघींमध्ये भांडण झाले व दोघींनी एकमेकींचे केस धरून मारहाण सुरू केली. सुनिताने आस्माच्या छाती, पोट व पाठीत मारहाण केल्याने ती बेशुद्ध पडली. तिला प्रथम खासगी व नंतर ससून रुग्णालयात दाखल केले असता डॉकटरांनी तिला मृत घोषित केले.

बीड – बीड जिल्ह्यातील परळी तालुक्यातील मोहा परिसरात शेतकर्‍यांनी मोठ्या प्रमाणावर अवैध पध्दतीने अफूचे पीक घेतले होते. याप्रकरणी अंबाजोगाई येथील न्यायालयाने पंचवीस आरोपींना दहा वर्ष कैद आणि प्रत्येकी एक लाख रुपये दंडाची शिक्षा ठोठावली आहे.
बीड जिल्ह्यात २०१२ मध्ये पोलिसांनी छापा टाकून शेकडो एकरवर घेतल्या जाणाऱ्या अवैध अफू शेतीचा पर्दाफाश केला होता. याप्रकरणी परळी तालुक्यातील मोहा परिसरातील कान्हापूर, वंजारवाडी, घोरपडदरा तांडा येथील ३८ आरोपी शेतकरी व नांदेड येथील चार व्यापार्‍यांविरोधात पोलिसांनी न्यायालयात दोषारोपपत्र दाखल केले होते.
आंबाजोगाई येथील जिल्हा सत्र न्यायालय क्रमांक तीन मध्ये या प्रकरणाची सुनावणी होऊन न्यायाधीश नवनाथ कोल्हे यांनी त्यापैकी २५ आरोपी शेतकर्‍यांना दहा वर्ष कारावास आणि प्रत्येकी एक लाख रुपये दंड अशी शिक्षा सुनावली आहे. सरकारी पक्षाच्यावतीने के. व्ही. गिरवलकर यांनी तर आरोपींच्या बाजूने अण्णासाहेब लोमटे, डी. व्ही. गाढे, डी. डी. लांब आणि हनुमंत राऊत यांनी काम पहिले.

श्रीनगर – जम्मू-काश्मीरमधील शोपियन जिल्ह्यातील एका गावात सोमवारी दहशतवाद्यांनी केलेल्या गोळीबारात तीन पोलीस ठार झाले.
शोपियन जिल्ह्यातील आशिपोरा गावात गुन्ह्याबाबतच्या तपासासाठी गेलेल्या पोलिसांवर दहशतवाद्यांनी हल्ला केला. यामध्ये एक हेड कॉन्स्टेबल आणि दोन कॉन्स्टेबल यांचा मृत्यू झाल्याची माहिती पोलीस अधिका-यांनी सांगितले.
या हल्ल्यात ठार झालेले तीनही पोलीस वर्दीविना होते आणि गावात ते एका गुन्ह्याच्या तपासासाठी गेले होते. यावेळी दहशतवाद्यांनी त्यांच्यावर गोळीबार केला. तासाभरात पोलिसांवर केलेला हा दुसरा दहशतवादी हल्ला आहे. यापूर्वी सकाळी बारामुल्ला जिल्ह्यातील पट्टाण भागात एका पोलीस अधिका-यावर हल्ला करण्यात आला. उपनिरीक्षक गुलाम मुस्तफा हे या हल्ल्यात जखमी झाले.

नवी दिल्ली – या वर्षातील सर्वात लहान चंद्रग्रहण आज पूर्व भारतीयांनी अनुभवले. अवघ्या ४ मिनीटे ४३ सेकंदाचे हे चंद्रग्रहण होते. ५ वाजून २७ मिनीटांच्या दरम्यान पूर्व आणि उत्तर-पूर्व भागात हे चंद्रग्रहण दिसून आले. दरम्यान जपान, न्यूझीलंड आणि परदेशातील अनेक शहरांमध्ये हे चंद्रग्रहण दिसून आले.
शनिवारचे चंद्रग्रहण हे गेल्या ५०० वर्षातील सर्वात कमी कालावधीचे असल्याचे वैज्ञानिकांनी सांगितले. याआधी १५२९ मध्ये झालेले चंद्रग्रहण १ मिनीटे ४२ सेकेंदाचे होते. २१ व्या शतकातील कमी कालावधीच्या या चंद्रग्रहणाला ३ वाजून ४५ मिनीटांनी सुरुवात झाली. तर ७ वाजून १४ मिनीटांनी हे चंद्रग्रहण संपले. झाली. मात्र खऱ्या अर्थाने चंद्रग्रहण हे ५ वाजून २७ मिनीटांनी सुरु होऊन ५ वाजून ३२ मिनीटांनी संपले. चंद्र हा पृथ्वीच्या सावलीचा किनारी भाग ओलांडून गेला. त्यामुळे हे चंद्रग्रहण कमी कालावधीचे म्हणण्यात आले. अरुणाचल प्रदेशातील तेझू आणि रोईंगमध्ये नागरिकांना चार मिनीटे आणि ४३ सेकंदाच्या चंद्रग्रहणाचे साक्षीदार होता आले. यानंतर २८ सप्टेंबर २०१५ मध्ये पूर्ण चंद्रग्रहण होणार आहे. मात्र भारतीयांना हे चंद्रग्रहण पाहता येणार नाही. परदेशातील नागरिकांना याचे साक्षीदार होता येणार आहे.

ठाणे – रक्षाबंधन आणि भाऊबिजेला ज्या बहिणीचे संरक्षण करायची हमी भावाने घ्यायची असते, त्याच भावाने सख्या बहिणीला पट्टयाने मारहाण करुन अत्याचार केल्याची घटना शुक्रवारी संध्याकाळी उघडकीस आल्याने सूचक नाका परिसर सुन्न झाला आहे.
कोळसेवाडी पोलिसांनी मात्र तात्काळ त्या वासनांध भावाला बेड्या ठोकून गजाआड केले आहे.
कल्याण-शिळ मार्गावर सूचक नाका परिसरात १५ वर्षीय मुलगी आपल्या माता-पिता आणि १७ वर्षीय भावासह राहते. दोन महिन्यांपूर्वी याच भावाने आपल्या लहान बहिणीवर कमरपट्टयाने बेदम मारहाण करुन लैंगिक अत्याचार केला. या प्रकाराची वाच्यता केल्यास ठार मारण्याची धमकी दिली. याच प्रकाराची पुनरावृत्ती१ एप्रिल रोजी संध्याकाळी पाचच्या सुमारास झाली. घरात कुणीही नसल्याची संधी साधून नाराधमाने बहिणीला कमरपट्टयाने बेदम मारहाण करुन लैंगिक अत्याचार केला.
भावाने दिलेल्या धमक्यांना घाबरुन मुलीने दोन दिवस आपल्यावर होत असलेल्या अत्याचाराची वाच्यता केली नाही. मात्र असे प्रकार वारंवार घडत राहतील म्हणून तिने याबाबत आपल्या आईला सांगितले. त्यानंतर पीडित मुलीने शुक्रवारी संध्याकाळी पोलीस ठाण्यात जाऊन तक्रार दाखल केली. पोलिसांनी नाराधमास तात्काळ पकडून गजाआड केले. ही घटना उघडकीस आल्यानंतर सूचक नाका परिसरात संतापाचे वातावरण पसरले होते.

कल्याण – येथील रेल्वेच्या केबल गोदामाला भीषण आग लागली आहे. आगीत लाखो रुपयांच्या केबलचे प्रचंड नुकसान झाले आहे.आगीचे कारण अद्याप स्पष्ट झालेले नाही. घटनास्थळी अग्निशमन दलाच्या ४ गाड्या दाखल झाल्या असून शर्थीने आग विझविण्याचे काम सुरू आहे.

नवी दिल्ली – भारताचा ऑलराऊंडर क्रिकेटपटू सुरेश रैना अखेर शुक्रवारी विवाहबंधनात अडकला. नवी दिल्लीतील द लीला पॅलेस या हॉटेलमध्ये कुटुंबिय, जवळचे मित्र-मैत्रिणी आणि काही संघ सहका-यांच्या उपस्थितीत सुरैश रैना आणि प्रियंका चौधरी यांचा विवाहसोहळा पार पडला.
प्रियंका ही रैनाची लहानणपणाची मैत्रीण. प्रियंका ही तेजपाल चौधरी यांची कन्या आहे. प्रियंका सध्या अमस्टॅडममध्ये बँकिंग क्षेत्रात कार्यरत आहे. या दोघांच्या घरचे संबंधही जवळकीचे होते. रैनाच्या विवाहसोहळ्यास भारतीय संघातील अनेक क्रिकेटपटूंनी हजेरी लावली. पंतप्रधान नरेंद्र मोदींनी आपल्या शुभेच्छा रैनाला दिल्या होत्या.
आयसीसीचे अध्यक्ष श्रीनिवासन, कर्णधार एम.एस.धोनी आणि त्याची पत्नी, विराट कोहली, विरेंद्र सेहवाग या सोहळ्यास उपस्थित होते. तसेच चेन्नई सुपर किंग्ज संघातील त्याचा सहकारी ड्वायेन ब्राव्हो, प्रशिक्षक स्टीफन फ्लेमिंग यांनीही या सोहळ्याला हजेरी लावली होती.

नागपूर – दिघोरीमध्ये राहणाऱ्या पत्नी-पत्नीने गळफास लावून आत्महत्या केल्याची घटना घडली आहे. नौशाद पंढरीनाथ डोनाडकर (वय-२८) आणि त्याच्या पत्नी रोहिणी नौशाद डोनाडकर (वय-२०) असे या दाम्पत्याचे नाव आहे.
नौशाद आणि रोहिणी डोनाडकर हे पती-पत्नी दिघोरी येथील सुफी प्लाझा येथे राहत होते. २००९ मध्ये दोघांचे लग्न झाले होते. त्यांना अडीच वर्षांची एक मुलगीही आहे. मात्र गुरुवारी रात्री या पती-पत्नीने घरीच पंख्याला दुपट्ट्याच्या साहाय्याने गळफास लावून आत्महत्या केल्याने एकच खळबळ उडाली. यावेळी त्यांची अडीच वर्षाची मुलगी नातलगांच्या घरी असल्याची माहिती पोलिसांनी दिली.पती-पत्नीच्या आत्महत्येचे कारण अजूनपर्यंत स्पष्ट झालेले नाही. हुडकेश्वर पोलीस याप्रकरणी अधिक तपास करीत आहे.

मलकापूर, दि. ३ – बुलढाणा येथील मलकापूर येथे भरधाव वेगात असलेल्या फॉर्ड आयकॉन गाडीचे नियंत्रण सुटल्याने गाडी रस्त्यालगच्या सलुनमध्ये घुसली. या विचित्र अपघातात तिघा जणांचा मृत्यू झाला असून मृतांमध्ये दोघा सख्ख्या भावंडांचा समावेश आहे. या अपघातात आणखी दोघे जण जखमी झाले असून त्यांची प्रकृती गंभीर आहे.
जामनेर येथे राहणारे दत्तात्रय घोंगडे, त्यांचा भाऊ श्रीकृष्ण घोंगडे व अन्य तिघे जण खासगी कामानिमित्त शुक्रवारी सकाळी जामनेरहून अकोला येथे निघाले होते. दत्तात्रय घोंगडे हे स्वतः गाडी चालवत होते. राष्ट्रीय महामार्गावर मलकापूरजवळ दत्तात्रय घोंगडे यांचे गाडीवरील नियंत्रण सुटले व गाडी रस्त्यालगतच्या सलुनच्या दुकानात घुसली. दुकान बंद असल्याने तेथील कोणीही जखमी झाला नाही. पण गाडीचे चालवणारे दत्तात्रय घोंगडे, श्रीकृष्ण घोंगडे व भागवत गीते या तिघांचा घटनास्थळीच मृत्यू झाला. तर आणखी दोघे जण गंभीर जखमी झाले.
दरम्यान, शुक्रवारी पहाटे तीनच्या सुमारास यवतमाळमधील जामवाडी तलाव येथे लक्झरी बस झाडावर आदळल्याने बसमधील दोघा जणांचा मृत्यू झाला. तर पाच ते सहा प्रवासी जखमी झाले आहेत. मृत्यू झालेले दोघे जण डिग्रसमधील रहिवाशी असून अद्याप त्यांची नावे समजू शकलेली नाही.

दिग्रस, दि. ३ – विहीरीवर पाणी भरण्यासाठी गेलेल्या युवतीचा विहीरीत पडून मृत्यू झाल्याची घटना रामगाव (डोर्ली) येथे ३ एप्रिल रोजी सकाळी ८.१५ वाजता घडली.
किरण शंकर आडे (१८) असे मृतक युवतीचे नाव आहे. घराजवळील ग्रामपंचायतच्या विहिरीवर पाणी भरण्यासाठी गेली होती. अशातच पाय घसरून विहिरीत पडल्याने तीचा मृत्यू झाला. मृतक युवतीचे आई-वडिल हे मजुरीचे कामाकरिता मुंबई येथे गेलेले आहे. या घटनेची माहिती मिळताच पोलिसांनी घटनास्थळ गाठून पंचनामा करून मृतदेह बाहेर काढला. सदर मृतदेह उत्तरीय तपासणीसाठी ग्रामीण रुग्णालयात पाठविले. याप्रकरणी आजोबा उत्तम आडे यांनी दिलेल्या तक्रारीवरून पोलिसांनी अकस्मात मृत्यूची नोंद केली आहे. या घटनेने गावात हळहळ व्यक्त होत आहे.