नागपूर, दि. ३१ – नागपूरच्या मध्यवर्ती कारागृहातून पाच आरोपी पळून गेले असून तीन आरोपींवर मोक्का कायद्याअंतर्गत गुन्हे दाखल आहे. मंगळवारी सकाळी ७.३०च्या सुमारास हे पाचही आरोपी गज कापून फरार झाल्याचे समोर येत आहे. बिशनसिंग धुमाळ, मोहम्मद साहिब सलमी खान, सत्येंद्र उर्फ राहुल गुप्ता, प्रेम उर्फ नेपाळी शालीग्राम आणि आकाश उर्फ गोलू ठाकूर अशी या आरोपींची नावे आहेत.या पाचही आरोपींवर १५ ते २० गंभीर गुन्ह्यांची नोंद असून तिघांवर तर मोक्का लावण्यात आला आहे. अतिशय कडेकोट बंदोबस्त असलेल्या कारागृहातून हे आरोपी फरार झाल्याने पोलिस प्रशासनावर दबाव निर्माण झाला आहे. दरम्यान याप्रकरणी जेलचे अधीक्षक वैभव कांबळे यांना निलंबित करण्यात आले आहे.

वी दिल्ली, दि. ३१ – बाबरी मशीद पाडल्याप्रकरणी सर्वोच्च न्यायालयाने भाजपाचे ज्येष्ठ नेते लालकृष्ण आडवाणी यांच्यासह २० जणांना मंगळवारी नोटीस पाठवली. तसेच न्यायालयाने या प्रकरणात क्लीन चीट देणा-या केंद्रीय अन्वेषण विभागालाही (सीबीआय) नोटीस पाठवत चार आठवड्यांत उत्तर देण्यास सांगितले आहे.
बाबरी मशीद पाडल्याप्रकरणी अलाहबाद उच्च न्यायालयाने २०१० साली लालकृष्ण आडवाणींसह मुरली मनोहर जोशी, राजनाथ सिंग, उमा भारती, साध्वी ऋतुंभरा, कल्याण सिंह आणि विहिंपचे काही नेत अशा २० जणांना आरोपातून मुक्त केले होते. मात्र न्यायालयाच्या या निर्णयाविरोधात फैजाबाद येथील रहिवासी हाजी मोहम्मद अहमद यांनी सर्वोच्च न्यायालयात याचिका दाखल केली होती. ‘सीबीआय आडवाणींसह भाजपच्या इतर नेत्यांना वाचवायचा प्रयत्न करत आहे’ असे त्या याचिकेत म्हटले होते. त्या याचिकेवर आज झालेल्या सुनावणीदरम्यान सर्वोच्च न्यायालयाने आडवाणींसह इतर २० नेते व सीबीआयला नोटीस पाठवून चार आठवड्यांत उत्तर देण्यास सांगितले आहे. बाबरी मशीद ज्यावेळी पाडण्यात आली त्यावेळी हाजी मोहम्मद यांचे घर उध्वस्त करण्यात आसले होते. त्यांनी न्यायालयात आपल्याला एक पीडित म्हणून बाजू मांडण्यासाठी परवानगी देण्यात यावी, अशी मागणी केली आहे.

यवतमाळ दि. 30 : खाद्य पदार्थाची शुध्दता तपासण्यासाठी अन्न व औषध प्रशासन विभागाच्यावतीने वर्षभर ठिकाणीकाणी धाडी टाकून पदार्थांच्या तपासण्या व नमुने घेतल्या जाते. गेल्या वर्षी वेगवेगळ्या ठिकाणी टाकण्यात आलेल्या धाडी व कार्यवाहीत विनापरवाना आणि कायद्याचे उल्लंघ करणाऱ्या अन्न विक्री संस्थांकडून 60 लाख 31 हजाराचा दंड वसूल करण्यात आला आहे.
खाद्य पदार्थांची शुध्दता अन्न व औषध प्रशासन विभागाच्या मानकाप्रमाणे असणे आवश्यक आहे. अनेकदा अधिक नफा मिळविण्याच्या उद्देशान पदार्थांमध्ये भेसळ करून नागरीकांच्या आरोग्याशी खेळण्याचा प्रकार अन्न निर्माते व विक्री संस्थांकडून होतो. यावर आळा घालण्यासाठी ठिकठिकाणी पदार्थांच्या तपासण्या केल्या जातात. भेसळ असल्याची शंका असल्यास नमुने घेऊन तपासणी साठी पाठविले जाते. बरेचदा भेसळीसंदर्भात नागरीकांच्याही तक्रारी असतांना अशा तक्रारीवरून अन्न व औषध प्रशासन विभागाच्यावतीने धाड घालून पदार्थांची शुध्दता तपासली जाते.
अनेकदा विक्री परवाना नसतांना विविध खाद्य पदार्थांचे दुकान लागवे जाते. या दुकानांवर नियमितपणे कार्यवाही करण्यात येते. ज्या दुकानांकडे परवाना नाही त्यांना दंड आकारला जातो. शिवाय त्यांना अभिलेखे संगणकीकृत करून अधिकृत परवाना घेण्याबाबत प्रवृत्त केले जाते. जिल्ह्यात अशा परवाना नसलेल्या आणि कायद्याचे उल्लंघन करीत असलेल्या संस्थांवर मोठ्या प्रमाणात कार्यवाही करण्यात आली आहे.
गेल्या वर्षात नोंदणी किंवा परवाना नसलेल्या आणि कायद्याचे उल्लंघ केल्याप्रकरणी जिल्ह्यात एकून 404 ठिकाणी तपासण्या करण्यात आल्या. तर 163 ठिकाणी अन्नांचे नमुने घेण्यात आले. विविध 35 ठिकाणी धाडी व जप्तीची मोहिम राबविण्यात आली. या सर्व कार्यवाहीत एकून 60 लाख 31 हजाराचा दंड वसूल करण्यात आला. विविध 34 प्रकरणात न्यायालयात खटले दाखल करण्यात आले असून यातील 5 प्रकरणांची न्यायालयस्तरावर अंतीम टप्प्यात आहे. जिल्ह्यात अन्न निर्मितीच्या 71 तर विक्रीच्या 11324 संस्था कार्यरत आहे. गेल्यावर्षी 6173 विक्री संस्थांची नोंदणी करून त्यांना परवाने देण्यात आले आहे. या संस्थांकडून नोंदणी शुल्कापोटी 56 लाखाचा महसूल शासनास प्राप्त झाला आहे.
औषध विक्रीचे 81 परवाने रद्द
गेल्यावर्षात जिल्ह्यात अन्न व औषध विभागाच्यावतीने 358 औषधी आस्थापनांच्या तपासण्या करण्यात आल्या. यापैकी कायद्यातील तरतुदींची पुर्तता न करणाऱ्या 81 आस्थापनांचे परवाने कायमस्वरूपी रद्द करण्यात आले आहे. तसेच 26 परवाने काही काळासाठी निलंबित करण्यात आले होते. ठिकठिकाणी 22 औषधांचे नमुने विश्लेषणासाठी घेण्यात आले होते. त्यापैकी 5 अप्रमाणित आढळून आल्याने त्यांच्यावर प्रशासकीय कार्यवाही व न्यायालयात खटले दाखल करण्यात आले आहे.

श्रीनगर, दि. ३० – गेल्या वर्षी आलेल्या महाकाय पुरातून सावरत असलेल्या जम्मू काश्मीरमध्ये गेल्या दोन दिवसांपासून सुरु असलेल्या मुसळधार पावसामुळे पुन्हा एकदा पुराचे संकट निर्माण झाले आहे. झेलम नदीने धोक्याची पातळी ओलांडली असून शहरातील अनेक भागांमध्ये नदीचे पाणी शिरले आहे.
गेल्या दोन दिवसांपासून जम्मू काश्मीरमध्ये मुसळधार पावसाने हजेरी लावली असून भूस्खलानाच्या घटनांनी महामार्गावरील वाहतूकही खोळंबली आहे. रविवारी दरड कोसळल्याने १८ घरांसह ४४ इमारतींचे नुकसान झाले. अद्याप या घटनांमध्ये कोणतीही जीवितहानी झालेली नाही. सोमवारी पहाटे सहाच्या सुमारास झेलम नदीने धोक्याची पातळी ओलांडली. दक्षिण काश्मीर व श्रीनगर येथे झेलम नदीने अनुक्रमे २२.४ फूट व १८.८ फूटांची पातळी गाठली आहे. नदीने २३ फूटांची पातळी ओलांडल्यास पुन्हा हाहाकार माजेल अशी भीती वर्तवली जात आहे. जम्मू काश्मीरमधील सतर्कतेचा इशारा देण्यात आला आहे. केंद्र सरकारने बचाव कार्यासाठी एनडीआरएफच्या ९५ जवानांना जम्मू काश्मीरमध्ये पाठवले आहे. पावसामुळे जम्मू काश्मीरमधील जनजीवन विस्कळीत झाले आहे. सोमवारी सकाळी बडगाम जिल्ह्यात चार घरांवर दरड कोसळल्याने दहा जणांचा मृत्यू झाला आहे. ढिगा-याखाली आणखी २० जण अडकले असावे अशी शक्यता वर्तवली जात आहे.
गेल्या वर्षी सप्टेंबरमध्येही जम्मू काश्मीरला पुराचा तडाखा बसला होता. त्यावेळी जम्मू काश्मीरचे हजारो कोटी रुपयांचे नुकसान झाले व शेकडो लोकांना जीवही गमवावा लागला होता.

नेर ,दि. ३० – तालुक्यातील सहा गावाला १३ लाखाचे तंटामुक्त गाव निवडीचा पुरस्कार उपविभागीय पोलीस अधिकारी कल्पना भराडे यांचे उपस्थितीत देण्यात आला.
या वेळी मंचावर ठाणेदार गणेश भावसार, तंटामुक्त समितीचे सदस्य गजानन काळे, किशोर वंजारी इत्यादीची उपस्थित होते. याच सोहळ््यात तंटामुक्त पुरस्कार गावाकºयांना वेळोवेळी मदत करून पुरस्कारापर्यंत नेऊन ठेवणे गोपनिय विभागाचे पोलिस शिपाई गणेश इसळ यांचाही सत्कार करण्यात आला. बाणगाव, बाळेगाव, पांढरी, पाथ्रड (गोळे), लोणी व कोलुरा या गावांना यावर्षी हा पुरस्कार देण्यात आला. तालुक्यात ७ वर्षात ३० गावांना तंटामुक्त पुरस्कार मिळाला असून, यात वाई (ई), सातेफळ, धनज, शहापूर, माणिकवाडा, ब्राम्हणवाडा (पुर्व), मांगलादेवी, उमरणे, दगडधानोरा, चिकनी (डोमगा), पिप्री(कलगा), मोझर, सावरगाव (काळे), अडगाव, व्याहळी, कारखेडा, शिरसगाव, घारेफळ, चिचगाव या गावाचा समावेश आहे. तालुक्यातील १८ गावांनी परिश्रम घेवून पुरस्कार प्रवाहात सहभागी होण्याची गरज असल्याचे मत गटविकास अधिकारी गौतम भगत यांनी व्यक्त केले. यावेळी तालुक्यातील पोलीस पाटील ग्रामसेवक, सरपंच, ग्रा.प. सदस्य, तंटामुक्त समितीचे सदस्य, अध्यक्ष इत्यादीची उपस्थिती होती. यावेळी गणेश इसळ, बाणगावचे सरपंच अनिल राठोड, राजेंद्र गोळे उपस्थित होते.