कल्याण,(महाराष्ट्र न्यूज नेटवर्क,सतिष राठोड)
कल्याण डोंबिवली महानगर पालिकेच्या कर विभागाने ज्या बिल्डरांनी पाणीपट्टी भरलेली नाही अशा बिल्डरांच्या विरुध्द कार्यवाही सुरु केली आहे.मनपा ने बिल्डरांना नोटिस दिली असुन त्या नोटिसमध्ये लिहीले आहे की, पाणीपट्टी नाही भरली तर बांधकाम सुरु असलेल्या ठिकाणी पाणीचे सप्लाय बंद करण्यात येईल व बांधकामाची परवानगी घेण्यासाठी अर्धा कर भरावे लागेल.मनपाने या जाहीर केलेल्या यादीत नामवंत बिल्डरही आहेत.
कर वसुल करण्यासाठी मनपा ने अभय योजना सुरु केली असुन,त्यात ९८ करोड रुपयांची वसुली केली आहे.पण या योजनेत बिल्डरांचा फारसा योगदान मिळाले नाही.मनपाच्या या निर्णयामुळे बिल्डरांमध्ये गोंधळाचे वातावरण पसरले आहे.मनपाने नोटिस दिलेल्या कल्याणचे नामवंत बिल्डररांची यादी…..
– निर्मल लाइफ स्टाइल – सचिन देशमुख, सुरेश वाधवा.
– माइल्टोन – शयरीकांत शितोळे, जोहर झोझवाला, अंजना चव्हाण, पुंडलिक मिरकुटे.
– राईसी डेव्हलपर्स – मनोज कुमार पुनामिया, लता पुनामिया, संदिप कुमार सिंग, शंकर म्हात्रे, अशोक शिंदे, मोहम्मद यूसुफ असे अनेक नामवंत बिल्डरांचे नाव समाविष्ट आहेत.
मनपाने सांगितले की,या बिल्डरांनी लवकरात लवकर बाकी असलेली रकम भरावे,नाही तर मनपा कडून कार्यवाही करण्यात येईल.

नवी दिल्ली – ‘सबका साथ, सबका विकास’चा नारा देत सत्तेवर आलेल्या पंतप्रधान नरेंद्र मोदी यांनी विकासाच्या प्रक्रियेत देशातील जनतेला साथीला घेण्यासाठी पुढचं पाऊल टाकलं आहे. यापुढं सरकारमधील भ्रष्टाचार व अन्य प्रशासकीय कामांविषयीच्या लोकांच्या तक्रारी थेट मोदींपर्यंत पोहोचणार आहेत. त्या तक्रारी पोहोचविण्याची सोय असलेले नवे वेबपोर्टल उद्या खुद्द मोदी यांच्याच हस्ते कार्यान्वित होणार आहे.
प्रो-अॅक्टिव्ह गव्हर्नन्स अँड टाइमली इम्प्लिमेंटेशन अर्थात ‘प्रगती’ असं या वेबपोर्टलचं नाव असेल. मनमोहन सिंग यांच्या काळात ‘पीएमओ सीपीग्राम्स’ नावानं लोकांच्या तक्रारीसाठी पोर्टल चालविले जात असे. मात्र, त्यात स्पष्टता नसल्यानं त्या माध्यमातून तक्रारी करणं कटकटीचं काम होतं. मोदी सरकारनं हे पोर्टल बदलून त्याऐवजी जास्त सोपं व सुटसुटीत पोर्टल आणलं आहे. ‘प्रगती’मध्ये भ्रष्टाचाराच्या तक्रारींवर विशेष लक्ष केंद्रीत करण्यात आलं आहे. पोर्टलमधील भ्रष्टाचाराच्या कॉलममध्ये आणखी नऊ प्रकारच्या भ्रष्टाचारांना स्थान देण्यात आलं आहे. टेलिकॉम, रेल्वे, वित्तविभाग, ऊर्जा, पेट्रोलियम, अवजड उद्योग, नगरविकास, परिवहन, ग्राम विकासासह अन्य काही विभागाविषयी तक्रारी करण्याची सुविधाही यात आहे.
विभाग आणि भ्रष्टाचाराच्या वर्गवारीमुळं जनतेला आपल्या तक्रारी नेमकेपणानं सरकारपर्यंत पोहोचविण्याची संधी मिळणार आहे. सरकारच्या एखाद्या विभागात नेमका कोणता व कसा भ्रष्टाचार होतोय याची तक्रार दाखल करता येणार आहे. अन्याय, अत्याचाराच्या तक्रारींची अल्पसंख्याक, एससी/एसटी, मागासवर्ग, महिला, बालक, अपंग अशी वर्गवारी करण्यात आली आहे. पोलिसांशी संबंधित स्तंभात भ्रष्टाचार, अत्याचार व निष्क्रियता असं वर्गवारी करण्यात आली आहे. जनतेकडून आलेल्या तक्रारींवर केंद्रीय तसेच मुख्य सचिवांना विशिष्ट वेळेत स्पष्टीकरण द्यावं लागणार आहे. सरकारकडून सोडविण्यात आलेल्या तक्रारींचा आढावा पंतप्रधान नरेंद्र मोदी प्रत्येक महिन्याच्या बुधवारी घेणार असल्याचं समजतं.

नवी दिल्ली – फेसबुक, टि्वटर या सोशल नेटवर्कींग साईटसवरील आक्षेपार्ह मजकूराबद्दल तात्काळ अटकेचा अधिकार देणारे माहिती तंत्रज्ञान कायद्यातील (आयटी) कलम ६६ (अ) सर्वोच्च न्यायालयाने मंगळवारी रद्द केले. त्यामुळे यापुढे इंटरनेटवरील आक्षेपार्ह मजकूराबद्दल तात्काळ अटक करता येणार नाही.
सर्वोच्च न्यायालयाचा हा निकाल येणा-या काळात परिणामकारक ठरणार असून, यामुळे भारतात इंटरनेट वापरकर्त्यांना अधिक स्वातंत्र्य, मोकळीक मिळणार आहे. ६६ (अ) कायद्याची व्यवस्थित अंमलबजावणी करु हा केंद्र सरकारचा युक्तीवाद पटणारा नसल्याचे सांगत सर्वोच्च न्यायालयाने आयटी कायद्यातील हे कलम रद्द केले. अनेक राज्यांमध्ये आयटी कायद्यामधील या कलमाचा पोलिसांकडून गैरवापर झाल्याने विविध स्वयंसेवी संस्था, नागरी हक्क संघटनांनी या कलमाविरोधात सर्वोच्च न्यायालयात याचिका दाखल केल्या होत्या.कलम ६६ (अ) स्वांतत्र्य आणि अभिव्यक्ती स्वांतत्र्य या लोकशाही अधिकारांच्या मूळावर आघात करणारे आहे असे न्यायालयाने म्हटले आहे. न्यायालयाने त्याचवेळी एखाद्या मजकूरामुळे सामाजित शांतता बिघडणार असेल किंवा, दुस-या देशांबरोबरच्या संबंधांवर परिणाम होणार असेल तर, असा मजकूर ब्लॉग करण्याचा सरकारचा अधिकार अबाधित ठेवला आहे.

नागपूर : डॉ. बाबासाहेब आंबेडकर हे एक महान इतिहासकार सुद्धा होते. त्यांनी केवळ इतिहासाचे लेखनच केले नाही, तर इतिहासाचे संशोधन करीत असताना त्यांनी अनेक नवीन सिद्धांतही मांडले आणि ते विकसित केले आहेत. त्यांच्या सिद्धांताला इतिहासाच्या क्षेत्रात आज जगभरात मान्यता मिळाली असून इतिहासाचा अभ्यास करीत असताना या सिद्धांतांचा विचार करावा लागत आहे, असे प्रतिपादन इतिहासकार व हरियाणा कुरुक्षेत्र विद्यापीठातील इतिहास विभागाचे प्रो. डॉ. एस.के. चहल यांनी शुक्रवारी येथे केले.
राष्ट्रसंत तुकडोजी महाराज नागपूर विद्यापीठातील डॉ. बाबासाहेब आंबेडकर अध्यासनातर्फे दीक्षांत सभागृहात आयोजित दोन दिवसीय डॉ. बाबासाहेब आंबेडकर स्मृती व्याख्यानमालेचा शुक्रवारी सायंकाळी समारोप करण्यात आला. ‘इतिहासकार डॉ. बाबासाहेब आंबेडकर’ या विषयावर डॉ. चहल मार्गदर्शन करीत होते. अध्यक्षस्थानी प्र-कुलगुरू डॉ. मुरलीधर चांदेकर होते. व्यासपीठावर डॉ. आंबेडकर अध्यासनाचे प्रमुख डॉ. प्रदीप आगलावे होते.
डॉ. चहल म्हणाले, भारताचा इतिहास लिहिला गेला तेव्हा त्यात दलित व महिलांना कुठलेच स्थान मिळाले नाही. डॉ. बाबासाहेब आंबेडकरांनी भारताच्या प्राचिन इतिहासावर बरेच संशोधन केले. केवळ संशोधनच केले नाही, तर इतिहासाचे लेखन करताना नवीन सिद्धांत विकसित केले. त्यांच्या इतिहास लेखणीचा नायक हा सर्वसामान्य व्यक्ती होता. दलित होते. शोषित होते. महिला होत्या. ‘शुद्र पूर्वी कोण होते’, ‘रिडल्स आॅफ हिंदुईझम’, ‘द अनटचेबल’ यासारख्या अनेक ऐतिहासिक संशोधनपर ग्रंथाद्वारे त्यांनी प्राचिन भारतातील जाती व्यवस्थेवर प्रकाश टाकला. क्रांती अणि प्रतिक्रांतीसारखा ग्रंथ लिहून त्यांनी इतिहासातील नवे सिद्धांत निर्माण केले. भारताच्या फाळणीवर प्रकाश टाकणारा थॉट्स आॅन पाकिस्तानसारखा ऐतिहासिक ग्रंथ त्यांनी लिहिला. अर्थशास्त्र, समाजशास्त्र, मानववंशशास्त्रासह भारतीय राजकारण, संविधानाची निर्मिती यासोबतच भारताच्या इतिहास संशोधनातही डॉ. बाबासाहेब आंबेडकरांचे योगदान अमूल्य आहे, असेही त्यांनी स्पष्ट केले. डॉ. मुरलीधर चांदेकर यांनीही मार्गदर्शन केले. डॉ. प्रदीप आगलावे यांनी प्रास्ताविक केले. डॉ. रमेश शंभरकर यांनी संचालन केले.

यवतमाळ : अपघातात दुचाकीस्वार ठार झाल्याची घटना शेलू फाट्यानजीक घडली. शेख शम्मी शेख रा. यवतमाळ असे मृतकाचे नाव आहे. ते दुचाकीने आर्णीने येथे जात असताना, अज्ञात वाहनाने त्यांना धडक दिली. यामध्ये गंभीर जखमी झालेल्या शेख यांना शासकीय रुग्णालयात भरती करण्यात आले. उपचारादरम्यान इसमाचा मृत्यू झाला असून, याबाबत परवीन बानो शेख यांनी पोलीस स्टेशनला तक्रार दिली असून, याप्रकरणी पोलिसांनी गुन्हा नोंद करून तपास सुरू केला आहे.

ठाणे – आपली मुलगी सुंदर दिसावी, असं प्रत्येक आईला वाटत असतं. मात्र काही नराधमांच्या धमक्यांमुळे ठाण्यातील मातेवर आपल्याच मुलीचं मुंडन करण्याची वेळ आली आहे. ठाण्यातील कळवा परिसरात ही धक्कादायक घटना घडली आहे.
कळवा इथे राहणार्‍या 13 वर्षीय अल्पवयीन मुलीवर सहा महिन्यापूर्वी म्हणजेच 30 जुलै 2014ला सामूहिक बलात्कार झाला होता. मोहम्मद लियाकत अली उर्फ बाबू आणि त्याच्या 16 वर्षांच्या साथीदारानं पीडित मुलीवर बलात्कार केला. याप्रकरणी बाबूला अटकही झाली होती. मात्र सध्या तो जामिनावर बाहेर आला आहे आणि जामिनावर बाहेर येताच त्याने पीडित मुलीला पुन्हा त्रास द्यायला सुरुवात केली. त्याची हिम्मत इतकी वाढली की तो मुलीच्या घरी जाऊन तिची छेड काढायचा आणि आता तर त्याने गुन्हा मागे घे नाहीतर पुन्हा बलात्कार करू अशी धमकीच दिली.
ही काही पहिली धमकी नाही. आरोपी बाबू तुरुंगात होता. तेव्हासुद्धा त्याच्या कुटुंबीयांनी आपल्यावर पाचवेळा हल्ले केले, असा आरोप पीडितेच्या कुटुंबीयांनी केला आहे. या सर्व प्रकाराची या कुटुंबाने पोलिसांत तक्रारही केली. पण, पोलिसांनी फक्त अदखलपात्र गुन्ह्याची नोंद केली. सततची धमकी, हल्ले, मुलीला होणारा त्रास आणि पोलिसांची कुचराई यामुळे धास्तावलेल्या या आईने अखेर आपल्या मुलीचं मुंडन करून तिला विद्रूप केलं. यामुळे तरी तिची छळातून सुटका होईल, असं या आईचं म्हणणं आहे.
दरम्यान, या धक्कादायक प्रकार समोर येऊनही कळवा पोलिसांनी आधी फक्त अदखलपात्र गुन्हा दाखल केला होता. पीडित मुलीच्या कुटुंबीयांनी पोलीस सहआयुक्तांकडे दाद मागितल्यानंतर, मुलीच्या जबानीनुसार कळवा पोलिसांनी गुन्हे दाखल केले. ठाणे सहपोलीस आयुक्त व्ही .व्ही लक्ष्मीनारायण यांनी सबंधित आरोपींचे जामीन रद्द करण्याचे आदेश दिले आहेत. पण अजून आरोपीला अटक झालेली नाही आणि कळव्यातल्या झोपडपट्टीत राहणारं हे कुटुंब अजूनही भीतीच्या छायेखाली आहे. अल्पवयीन मुलीवर बलात्कार करणार्‍या गुन्हेगारांना राजकीय आश्रय असल्याचा आरोप पीडित कुटुंबाने केला आहे.

नागपुर – जिल्ह्यातील वडदजवळच्या मंगरुळ तलावावर पिकनिकसाठी गेलेल्या सात तरुणांचा तलावात बुडून मृत्यू झाला आहे. सेल्फी काढण्यासाठी तलावाच्या मध्यभागी स्वत:हून होडी घेऊन गेले आणि फोटो काढण्याच्या नादात होडी कलंडली. या दुर्घटनेत 10 पैकी 7जणांचा दुदैर्वी अंत झाला असून सुदैवाने तिघेजणं बचावले आहेत.
नागपूरच्या आशीर्वाद नगर भागात राहणार्‍या 10 कॉलेज तरुणांचा ग्रुप मंगरुळ तलावावर काल संध्याकाळी पिकनिकसाठी गेला होता. किनार्‍यावर लावलेली होडी हे तरुण स्वतःहून पाण्यात घेऊन गेले आणि त्यांचं हेच धाडस सात जणांच्या जीवावर बेतलं. तलावाच्या मध्यभागी गेल्यावर सेल्फी काढण्याच्या नादात, होडीत उभे राहिल्याने होडी एका बाजुला कलंडली. आणि यात सात जणांचा तलावात बुडून दुदैर्वी मृत्यू झाला. तर, तिघेजण या दुर्घटनेत बचावले आहेतय
तलावात बुडून मृत्यू झालेले सातही तरुण नागपूरच्या आशीर्वाद नगर भागात राहाणारे आहेत. हर्षल आदमने, चेतन आदमने, गोवर्धन थोटे, राहुल वाळोदे, राम शिवरकर, मकसूद शेख आणि अब्दुल सरफराज अशी या मृत मुलांची नावं आहेत.

बंगळूरु – धडाडीचे आयएएस अधिकारी डी.के.रवीकुमार यांच्या मृत्यू प्रकरणाचा तपास कर्नाटक सरकारने सीबीआयकडे सोपवला आहे. डी.के.रवीकुमार यांचे कुटुंबिय आणि राज्यातल्या विरोधी पक्षांकडून रवीकुमार यांच्या मृत्यू प्रकरणाचा तपास सीबीआयकडे देण्याची मागणी करण्यात येत होती.
मागच्या आठवडयात बंगळूरुतील रहात्या घरी डी.के.रवीकुमार यांचा मृतदेह गळफास घेतलेल्या अवस्थेत आढळला होता. काँग्रेस अध्यक्ष सोनिया गांधी यांनी रवीकुमार यांच्या पत्नीला पत्र लिहून निष्पक्ष तपासाचे आश्वासन दिले होते. कर्नाटकमध्ये काँग्रेसची सत्ता आहे. सोनिया गांधी यांनी मुख्यमंत्री सिध्दरमय्या यांच्याशी चर्चा करुन सीबीआयकडे तपास सोपवण्याचा सल्ला दिला होता.
प्रथमदर्शनी डी.के.रवी यांचा मृत्यू आत्महत्या असल्याचे तपास अधिका-यांचे मत आहे. मात्र रवी यांनी वाळू आणि जमीन माफियांवर कारवाई केली होती. त्यामुळे त्यांच्या मृत्यूमागे घातपात असल्याचा अनेकांना संशय आहे.
रवी यांनी मृत्यूपूर्वी सहकारी आयएएस महिलेला काही फोन केल्याचे समोर आले आहे. कर्नाटक उच्च न्यायालयाने राज्य सरकारला रवी यांच्या मृत्यू प्रकरणाचा प्राथमिक अहवाल सार्वजनिक करण्यास मनाई केली आहे. भ्रष्टाचार खपवून न घेणारा अधिकारी अशी रवी यांची ओळख होती.

नवी दिल्ली, दि. २३ – देशाच्या स्वातंत्र्यासाठी हसत हसत प्राणांची आहुती देणारे शहीद भगतसिंग, सुखदेव व राजगुरू यांना पंतप्रधान नरेंद्र मोदींनी श्रद्धांजली वाहिली. ‘देशासाठी प्राणांचे बलिदान देणा-या भगतसिंग, सुखदेव, राजगुरूंना माझे शत प्रणाम. या तिन्ही देशभक्तांना मी श्रद्धांजली वाहतो’, असे ट्विट त्यांनी केले आहे. दरम्यान आज ते पंजाबच्या दौ-यावरही जाणार असून भगत सिंग, सुखदेव व राजगुरू यांच्यावर ज्या हुसैनीवाला गावात अंत्यसंस्कार करण्यात आले त्या गावाला मोदी भेट देणार आहेत. तसेच सुवर्ण मंदिर व जालियानवाला बाग येथेही पंतप्रधान जाणार असून त्या पार्श्वभूमीवर कडेकोट सुरक्षा बंदोबस्त तैनात करण्यात आला आहे.
अण्णा हजारेंनीही वाहिली भगतसिंगना श्रद्धांजली
ज्येष्ठ समाजसेवक अण्णा हजारेंनीही आज भगतसिंग, सुखदेव व राजगुरूंना श्रद्धांजली वाहिली, यावेळी त्यांचे डोळे पाणावले होते. खटरकला गावात जाऊन अण्णा भगत सिंग यांना श्रद्धांजली अर्पण करत असताना त्यांच्या भावना अनावर झाल्या आणि त्यांच्या डोळ्यात अश्रू तरळले.
दरम्यान यावेळी अण्णांनी केंद्र सरकारवर कडाडून टीका केली. सरकारने लोकांना दिलेले वचन पाळले नाही. निवडणुकीपूर्वी त्यांनी जनतेला काळा पैसा परत आणण्याचे आश्वासन दिले होते, मात्र सरकार सत्तेवर येऊन दहा महिने उलटून गेले तरी एक पैसाही परत आला नसल्याचे सांगत सरकारने जनतेचा विश्वासघात केल्याची टीका अण्णांनी केली.