पर्थ – अननुभवी संयुक्त अरब अमिरातीला (यूएई) हरवत भारताने विश्वचषकातील सलग तिसरा विजय नोंदवला. अर्ध्या दिवसात संपलेल्या लढतीत महेंद्रसिंग धोनी आणि सहका-यांनी वर्चस्व राखले.
मात्र प्रतिस्पर्ध्यानी निराशा केल्याने लढत एकतर्फी झाली. गतविजेत्यांनी ९ विकेट आणि १८७ चेंडू (३१.१ षटके) इतक्या मोठय़ा फरकाने जिंकताना ‘ब’ गटातील अव्वल स्थान आणखी भक्कम केले. तसेच बाद फेरीसाठीची दावेदारी अधिक मजबूत केली.
पर्थच्या (वाका) खेळपट्टीवर वेगवान गोलंदाज वर्चस्व राखतील, असे वाटले. मात्र फिरकीपटूंना अधिक यश मिळाले. भुवनेश्वर कुमार (१ विकेट) आणि उमेश यादव (२ विकेट) या मध्यमगती दुकलीच्या प्रभावी मा-यानंतर अनुभवी ऑफस्पिनर आर. अश्विनने (१०-१-२५-४) अप्रतिम मारा करत विश्वचषकच नव्हे तर वनडे कारकीर्दीतील सर्वोत्कृष्ट वैयक्तिक कामगिरीची नोंद केली.
त्याला डावखु-या रवींद्र जडेजाची (२३-२) चांगली साथ लाभली. भारताच्या गोलंदाजी अचूक आणि टिच्चून मारा केलाच. मात्र यूएईच्या फलंदाजांनी निराशा केली. त्यांचे आघाडीचे फलंदाज चुकीचे फटके मारून बाद झाले. निम्मा संघ ४४ धावांत परतल्यानंतर यूएईचे धावांचे ‘शतक’ पूर्ण होण्याबाबत साशंकता होती.
मात्र शायमन अन्वरने (३५) तळातील असांका गुरुगेसह (नाबाद १०) शेवटच्या विकेटसाठी ३१ धावांची भागीदारी करताना संघाला शतकी मजल गाठून दिली. अन्वरची खेळी यूएईतर्फे सर्वाधिक वैयक्तिक खेळी ठरली. तसेच त्याने गुरुगेसह केलेली भागीदारी डावातील सर्वोच्च ठरली.
गोलंदाजांनी विजय नक्की केल्याने १०३ धावांचे आव्हान म्हणजे केवळ सोपस्कार होते. डावखुरा सलामीवीर शिखर धवनच्या (१४) बदल्यात १८.५ षटकात भारताने विजयी लक्ष्य पार केले. अन्य सलामीवीर रोहित शर्मा (५५ चेंडूंत नाबाद ५७ धावा) आणि ‘वनडाउन’ विराट कोहलीने (४१ चेंडूंत नाबाद ३३ धावा) दुस-या विकेटसाठी नाबाद ७५ धावांची भागीदारी करताना २० षटकांच्या आतच विजय साकारला.
रोहितने यंदाच्या विश्वचषकातील पहिले आणि वनडेतील २४वे अर्धशतक झळकावताना १० चौकार आणि एक षटकार लगावला. कोहलीने ५ चौकार मारले. फलंदाजांनी निराशा केली तरी यूएईच्या गोलंदाजांनी भारताची एक विकेट घेतली. तसेच एकही अवांतर धाव दिली नाही.
सलग तिस-या विजयामुळे भारताने १२ गुणांसह ‘ब’ गटातील अव्वल स्थान अधिक मजबूत केले. भारताच्या आणखी तीन लढती (वेस्ट इंडिज, झिम्बाब्वे आणि आर्यलड) शिल्लक आहे. गटवार साखळीतील चौथ्या लढतीत शुक्रवारी (६ मार्च) पर्थवरच भारत विंडिजशी झुंजेल.
धावफलक
यूएई – अमजद अली झे. धोनी गो. भुवनेश्वर ४, आंद्री बेरेंगर झे. धोनी गो. उमेश ४, कृष्णचंद्रन झे. रैना गो. अश्विन ४, खुर्रम खान झे. रैना गो. अश्विन १४, स्वप्नील पाटील झे. धवन गो. अश्विन ७, शायमन अन्वर त्रि. गो. उमेश ३५, रोहन मुस्तफा पायचीत गो. मोहित २, अमजद जावेद झे. रैना गो. जडेजा २, मोहम्मद नाविद त्रि. गो. अश्विन ६, मोहम्मद तौकीर त्रि. गो. जडेजा १, मंजुला गुरुगे नाबाद १०, अवांतर – १३ धावा (लेगबाईज ४, वाईड ९), एकूण – ३१.३ षटकांत सर्वबाद १०२
बादक्रम : १-७ (बेरेंगर), २-१३ (अमजाद), ३-२८ (कृष्णचंद्रन), ४-४१ (स्वप्नील पाटील), ५-४४ (खुर्रम), ६-५२ (मुस्तफा), ७-६१ (जावेद), ८-६८ (नवीद), ९-७१ (तौकीर), १०-१०२ (अन्वर)
गोलंदाजी : भुवनेश्वर कुमार ५-०-१९-१, उमेश यादव ६.३-२-१५-२, रविचंद्रन अश्विन १०-१-२५-४, मोहित शर्मा ५-१-१६-१, रवींद्र जडेजा ५-०-२३-२
भारत – रोहित शर्मा नाबाद ५७, शिखर धवन झे. मुस्तफा गो. नाविद १४, विराट कोहली नाबाद ३३, अवांतर – ०. एकूण – १८.५ षटकांत १ बाद १०४.
बादक्रम : १-२९ (धवन).
गोलंदाजी – मोहम्मद नाविद ५-०-३५-१, मंजुला गुरुगे ६-१-१९-०, अमजद जावेद २-०-१२-०, कृष्णचंद्रन ३-०-१७-०, मोहम्मद तौकीर २.५-०-२१-०
निकाल : भारत ९ विकेटनी विजयी.

यवतमाळ, दि. २८ – वादळी वाºयासह गारपीटीने जिल्ह्याला आज दुपारी चांगलेच झोडपून काढले.बिटरगाव येथे वीज कोसळल्याने एक ठार झाला असून, दोन जण जखमी झाले. महागाव तालुक्यातील वनोली येथील युवकाच्या अंगावर भिंत कोसळली. दिग्रसमध्ये घरांची पडझड झाल्याने मोठे नुकसान झाले. यवतमाळातही वादळी वारा व गारपीटीमुळे भाजी विक्रेत्यांचे नुकसान झाले. रब्बी पिकांना व फळबागांना गारपीटीचा व वादळी वाºयाचा सर्वाधिक फटका बसला असून, पुन्हा एकदा शेतकरी संकटात सापडला आहे.
शहरात दुपारी ३ वाजताच्या सुामारास वादळी वाºयासह गारपीट झाली. यामध्ये दत्त चौकालगत असलेल्या भाजी व फ्रु ट विक्रेत्यांची पळापळ झाली. दुकानाचे शेड उडाल्याने हजारो रुपयांचे नुकसान झाले. तहसील चौक, नेताजी चौक, बसस्थानक चौकासह अन्य मार्गावरील झाडे कोसळल्याने वाहतूक विस्कळीत झाली होती. वादळी वारा व गारपीटीमुळे विद्यूत तारा तुटल्याने वीज पुरवठा खंडीत झाला. तहसील चौकानजीक असलेल्या कारागृहावरील टिनपत्रे उडाली. उमरखेड तालुक्यातील बिटरगाव येथील शेतकरी पांडूरंग चिकने (४५) आपल्या दोन मुलासह शेतातून परतत असताना, अचानक आलेल्या वादळी वाºयामुळे व विजेच्या कडकडाटीमुळे त्यांनी झाडाचा आडोशा घेतला. यावेळी रतननगरनजीक पांडूंरंग चिकने यांच्या अंगावर वीज पडल्याने त्यांचा जागीच मृत्यू झाला. तर विशाल व मनोज ही दोन मुले जखमी झाली आहे. महागाव तालुक्यातील वनोली येथील पवन प्रकाश चव्हाण (१६) या युवकावर शेतातील कोठ्याची भिंत पडल्याने तो जखमी झाला आहे. दिग्रस येथील होलटेक पुरा, शनिमंदिर चौकातील राजा तिलावार यांचे घरावरील टिनाची कैची पुर्ण पणे उडून एका उंच झाडावर अडकली. देवनगर परिसरातील नारायणराव चिरडे यांचे घरावरील टिनपत्रे उडाल्याने त्यावरील फाड्या (दगड) घरात पडले. रमेश ठाकुर यांचा लाकूड फाटा व वर अंथरलेल्या टिनाचे संपूर्ण घर खाली कोसळले. तालुक्यातील विठोली, कांदळी, तुपटाकळी, लाख (रा) परिसरातील गहु, संत्रा पिकाचे नुकसान झाले. वादळी वारा व गारपीटीमुळे गहु, हरबºयासोबतच फळबागांचेही नुकसान झाले आहे.

नवी दिल्ली – सर्वसामान्यांना ‘अच्छे दिन..’ चे स्वप्न दाखवत सत्तेवर आलेल्या नरेंद्र मोदी सरकारने महागाईचे दिन दाखवणारा अर्थसंकल्प सादर केला आहे.केंद्रीय अर्थमंत्री अरुण जेटली यांनी सरकारचा पहिला पूर्ण अर्थसंकल्प सादर करताना उद्योगजगताला पुढल्या चार वर्षांसाठी कॉर्पोरेट टॅक्समध्ये दिलासा दिला आहे. त्यामुळे अच्छे दिन श्रीमंतांचे का ? असा प्रश्न या अर्थसंकल्पावर उपस्थित झाला आहे.जेटलींनी वयैक्तिक करदात्यासाठींची आयकर (इनकम टॅक्स) कररचना कायम ठेवली असली तरी, त्याचा करदात्याला फायदा होण्याची शक्यता कमी आहे. कारण दुस-या बाजूला जेटलींनी सेवाकर १२.३६ टक्क्यांवरुन १४ टक्क्यांपर्यंत वाढवला आहे.त्यामुळे हॉटेल, मोबाईल, घर, गाडी या सर्वच वस्तू महागणार आहेत. ग्राहकाला वस्तू खरेदी करताना सेवा कर द्यावा लागतो. कॉर्पोरेट टॅक्स पुढल्या चार वर्षांसाठी ३० टक्क्यांवरुन २५ टक्के केला आहे. त्यामुळे मोदींच्या अच्छे दिनांसाठी आणखी वर्षभर वाट पहावी लागणार आहे.
या अर्थसंकल्पात ही ठळक वैशिष्ट्ये
कर सेवा
आर्थिक विकास कार्यात जीएसटीची भूमिका परिवर्तनवादी असते
पुढील चार वर्षांसाठी कॉर्पोरेट टॅक्स २५ टक्के
करमुक्त उत्पन्नाची मर्यादा कायम राहणार
एक कोटीहून अधिक उत्पन्नावर दोन टक्के अधिभार
कृषि क्षेत्र
ग्रामीण विकास पायाभूत विकास बँकेसाठी २५ कोटी रुपयांचे अनुदान
सूक्ष्म सिंचन प्रकल्पासाठी ३०० कोटींचा निधी
शेतक-यांना कर्जासाठी ८.५ लाख कोटी रुपयांचा निधी
पायाभूत सुविधा क्षेत्र
पायाभूत सुविधा क्षेत्रासाठी ७० हजार कोटी रुपायांची तरतूद
सिंचन आणि रेल्वे, रस्ते प्रकल्पासाठी टॅक्स फ्री बॉण्ड
पायाभूत सुविधांचे पुनरुज्जीवन आणि विकासाठी पीपीपी मॉडेलचा आधार
रिसर्च अँड डेव्हलपमेंट फंडासाठी १५० कोटी रुपये
प्रत्येकी चार हजार मेगावॅट क्षमतेचे चार अल्ट्रा मेगा पॉवर प्रकल्प सुरु करणार
शिक्षण
जम्मू-काश्मीर, पंजाब, तामिळनाडू, हिमाचल प्रदेश, बिहार आणि आसाममध्ये एम्स स्थापणार
कर्नाटक, धनबाद येथील आयआयटींचा दर्जा वाढवणार
अमृतसरमध्ये उद्यानविद्येच्या अभ्यासक्रमासाठी पीजी इन्स्टिट्यूट
महाराष्ट्र, राजस्थान आणि छत्तीसगडमध्ये फार्मा सेंटर
अरुणाचल प्रदेशमध्ये आणखी एक फिल्म इन्स्टिट्यूट
संरक्षण
संरक्षण क्षेत्रासाठी दोन लाख, ४६ हजार ७२७ कोटींची तरतूद
संरक्षण साधनांच्या उत्पादनासाठी मेक इन इंडियावर अधिक लक्ष केंद्रित करणार
कल्याणकारी योजना
स्वच्छ भारत अभियानांतर्गत ५० हजार प्रसाधने बांधण्यात आली.
जीएसटी एक एप्रिल २०१६मध्ये लागू करणार
२०२० पर्यंत देशातील प्रत्येक नागरिकाला घर मिळणार
देशातील ८० हजार माध्यमिक शाळांमध्ये सुधारणा आणणार
अटल पेन्शन योजना सुरु होणार.यात ५० टक्के प्रिमियम सरकार भरणार
वरिष्ठ नागरिकांसाठी अनेक नव्या योजना
मनरेगासाठी अतिरिक्त पाच हजार कोटी रुपयांची तरतूद
लघु उद्योगांसाठी मुद्रा बँकेची स्थापना
पारंपारिक उर्जा
इलेक्ट्रिक कारच्या उत्पादनासाठी ७५ कोटी रुपयांचा निधी
२०२२पर्यंत पारंपारिक उर्जेचे लक्ष्य – सौर उर्जा – १०० हजार मेगावट, पवनउर्जा – ६० हजारमेगावॅट, जैवइंधन – १० हजारमेगावॅट, आणि लघु जलविद्युत – पाच हजारमेगावॅट
पर्यटन
देशातील जुना गोवा, हम्पी, एलिफंटा लेणी, राजस्थानातील जंगले, लेह पॅलेस, वाराणसी, जालियनवाला बाग, हैदराबादमधील कुतुब शाही मकबरा यांचा पर्यटनस्थळांचा दर्जा
१५० देशांतील पर्यटकांना व्हिसा ऑन अरायव्हलची सुविधा

नवी दिल्ली – मोदी सरकारचा पहिला अर्थसंकल्प केवळ उद्योगपतींच्या फायद्याचा आहे. पहिल्या अर्थसंकल्पात अर्थमंत्री अरुण जेटली हे जमा-खर्च आणि समानतेचे गणित सोडवण्यात अपयशी ठरले आहेत, अशी जोरदार टीका माजी अर्थमंत्री पी. चिदंबरम यांनी केली.
या अर्थसंकल्पात केवळ उद्योगपतींना फायदा देण्यात आला आहे. तर ३.५ कोटी प्राप्तिकरदात्यांना थोडक्यात दिलासा देण्याचा प्रयत्न केला. मात्र सेवा कराचा बोजा वाढल्याने त्यात ते पिचणार आहेत, असेही चिदंबरम म्हणाले. सरकारने वित्तीय तूट कपात करण्याचे लक्ष ठेवले आहे. ही तूट ३.९ वरून ३.६ टक्के आणण्यात येणार आहे. याचाच अर्थ सरकारला ३७,५०० कोटी रुपयांचे कर्ज काढावे लागणार आहे, असे त्यांनी सांगितले.

नवी दिल्ली – नऊ महिन्यांपूर्वी सत्तेत आलेल्या मोदी सरकारने रेल्वे अर्थसंकल्पापाठोपाठ सर्वसाधारण अर्थसंकल्पात केवळ आकडय़ांची आतषबाजी आणि घोषणाबाजी केली.
अर्थमंत्री अरुण जेटली यांनी २०१५-१६ या वर्षाचा ४,६६,७११ कोटी रुपयांचा अर्थसंकल्प संसदेत मांडला. या अर्थसंकल्पात सेवा कर १४ टक्के केल्याने सर्वसामान्यांचे कंबरडे मोडणार आहे.
रालोआ सरकारचा पहिला पूर्ण अर्थसंकल्प अरुण जेटली यांनी मांडताना उद्योगांना झुकते माप दिले. तर प्राप्तिकर सवलत ‘जैसे थे’ ठेवल्याने लाखो करदात्यांच्या पदरात निराशा पडली आहे. या अर्थसंकल्पात कॉर्पोरेट करात येते चार वर्षे ५ टक्के कर सवलत दिली असून संपत्ती कर रद्द करून त्याऐवजी अतिश्रीमंतांवर दोन टक्के अधिभार लावला आहे.
सेवा कर महागल्याने सिगारेट, कुरियर, हवाई प्रवास, मद्य, हॉटेलिंग, केबल, डीटीएच सेवा, ब्युटीपार्लर आदींसाठी सर्वसामान्यांना अधिक पैसे मोजावे लागतील. वैयक्तिक करदात्यांच्या प्राप्तिकराचे दर कायम ठेवण्यात आले आहेत.

नाशिक – नाशिक मनपा जवळ सुयोजित हाईटसमधील एका बांधकाम व्यावसायिकाच्या कार्यालयाबाहेर बॉम्ब ठेवणा-याला अटक करण्यात आली आहे. बॉम्ब ठेवणारा आरोपी १२वीचा विद्यार्थी आहे. नाशिक पोलिसांनी बांधकाम व्यावसायिकाच्या कार्यालयातील सीसीटीव्ही फूटेज तपासून बॉम्ब ठेवणा-याला अटक केली आहे. बॉम्ब ठेवणा-या तरुणाची चौकशी सुरू असून लवकरच संपूर्ण घटनेवर प्रकाश पडेल, अशी माहिती नाशिक पोलिसांनी दिली.
अटक करण्यात आलेला तरुण बॉम्ब ठेवण्यासाठी येताना चेह-यावर रुमाल बांधून स्कूटरवरुन आला होता. स्कूटर मनपाजवळ बांधकाम व्यावसायिकाच्या कार्यालयाबाहेर उभी करुन तरुण एक खोका घेऊन कार्यालयात गेला. चेह-यावरील रुमाल न काढता त्याने कुरिअर घेऊन आल्याचे सांगितले. बांधकाम व्यावसायिकाकडे काम करणा-या शिपायाने तरुणाला खोका कार्यालयाच्या दरवाज्याजवळील टेबलावर ठेवून जाण्यास सांगितले. बाहेर पडल्यावर तरुणाने थोड्यावेळाने बांधकाम व्यावसायिकाच्या कार्यालयात फोन करुन बॉम्ब ठेवल्याचे सांगितले. फोन आल्यानंतर लगेच बांधकाम व्यावसायिकाच्या कर्मचा-यांनी तरुणाने आणलेला खोका कार्यालयाच्या इमारतीबाहेर नेऊन ठेवला आणि पोलिसांना बोलावले. पोलिसांनी बॉम्ब शोक पथकाच्या सहकार्याने खोक्यातील बॉम्ब निकामी केला होता.

कळंब दि. २७ – कौटुंबिक कलहातून वाद निर्माण झाल्याने रागाच्या भरात पतीने स्वत:च्या अंगावर रॉकेल ओतून पेटवून घेतले. यामध्ये सदर इसमाचा मृत्यू झाला तर वाचविण्यासाठी गेलेली त्याची पत्नीही गंभीरपने भाजली असून मृत्यूशी झुंज देत आहे. तालुक्यातील बोरी महाल येथे गुरुवारी रात्री ८ वाजता ही घटना घडली असून गावात खळबळ उडाली आहे.
गणेश सिताराम मेश्राम (३८) असे मृतकाचे तर सुनंदा गणेश मेश्राम (३०) रा. बोरी महाल असे जखमी पती-पत्नीची नावे आहेत. गणेश हा पत्नीसोबत सतत क्षुल्लक कारणावरून वाद करून भांडण करीत होता. अशातच शुक्रवारी २६ फेबु्रवारी रोजी रात्री ८ वाजता पती-पत्नीचे कडाक्याचे भांडण झाले. यावेळी रागाच्या भरात गणेशने स्वत:च्या अंगावर रॉकेल ओतून पेटवून घेतले. यावेळी त्याला वाचविण्यासाठी गेलीली त्याची पत्नी सुनंदा ही गंभीरपणे भाजली. हा प्रकार लक्षात येताच नातेवाईक व गावकºयांनी मेश्राम दाम्पत्यांना यवतमाळ येथील शासकीय रुग्णालयात दाखल केले. मात्र ९० टक्के जळाल्याने गणेशचा रात्री उपचारा दरम्यान मृत्यू झाला. तर ६० टक्के भाजलेली सुनंदा ही मृत्यूशी झुंज देत आहे. या घटनेने गावात खळबळ उडाली आहे. त्याच्या मागे दोन मुले व बराच मोठा आप्त परिवार आहे. या प्रकरणी पोलिसांनी गुन्हा दाखल केला असून तपास सुरू आहे.

उमरखेड , दि. २७ – महाराष्टÑ वीज ग्राहक संघटनेच्या वतीने वीज दरवाडी विरोधात संतप्त वीज ग्राहकांनी स्थानिक गांधी चौकात वीज बिलांची होळी केली.
राज्यातील ३०० युनिटच्या आतील सर्व सामान्य घरगुती व व्यावसायीक विद्युत ग्राहकावर २०१४ मध्ये सबसिडी रद्द केली. त्यावर २० टक्केदरवाढीचा बोजा लादण्यात आला. आता पुन्हा १२ टक्के दरवाढ होण्याची शक्यता आहे. त्याच प्रमाणे यंत्रमाग धारक व उद्योजक या सर्व वित्त ग्राहकांचे वीज दर शेजारच्या राज्याच्या तुलनेत दिड ते दुप्पट झाले आहे. सदर दरवाढ सर्व सामान्य व्यक्तीला परवडणारी नाही. त्यामुळे शासनाने किमान दोन वर्षापासाठी वीजदर स्थिर ठेवावे. शेजारील राज्याप्रमाणे दर ठेवावे अशी मागणी मुख्यमंत्री, उर्जामंत्र ी महाराष्टÑ राज्य यांचंकडे संघटनेने केली आहे. यावेळी संघटनेचे अध्यक्ष साजीद जागीरदार, सचिव राजू जयस्वाल, ओम सारड, इनायतुला जनाब, नंदकिशोर अग्रवाल, मझर टेलर, प्रमोद रुडे, इसराज, प्रेम बाहेती, राठोड याच्यासह वीज ग्राहक उपस्थित होते.

इस्लामाबाद – पाकिस्तानच्या वायव्य भागात शुक्रवारी सकाळी ५.४ रिश्टर स्केलचा भूकंपाचा तीव्र धक्का बसला. भूकंपाचा धक्का बसल्याने पाच जण जखमी झाले आहे.
अमेरिकेच्या भूगर्भीय सर्वेक्षणानुसार, इस्लामाबादमधील खैबर पख्तुनवाला प्रांतातील हझारसा भागापासून १०० किलोमीटर अंतरावर या भूकंपाचे केंद्रबिंदू होते.
‘आतापर्यंत हाती आलेल्या अहवालानुसार पाच नागरिक यात जखमी झाले आहेत. मात्र जखमींमध्ये कोणाचीही प्रकृती चिंताजनक नाही,असे पोलीस अधिका-यांनी सांगितले.
इस्लामाबाद तसेच पाकिस्तानव्याप्त काश्मीरमधील काही भागांमध्येही या भूकंपाचे हादरे जाणवले.

श्रीनगर – आंतरराष्ट्रीय सीमेवर आठवडाभर शांतता पाळल्यानंतर पाकिस्तानी रेंजर्सनी गुरुवारी रात्री पुन्हा एकदा शस्त्रसंधीचे उल्लंघन केले.
रात्री साडेनऊच्या सुमारास जम्मूमधील आर.एस.पूरा सेक्टरमधील सीमा सुरक्षा दलाच्या चौकीवर गोळीबार केला. पाकिस्तानी रेंजर्सनी गोळीबारासाठी छोटया शस्त्रास्त्रांचा वापर करत नावपिंड चौकीवर गोळीबार केला. पाकिस्तानच्या हद्दीत असलेल्या थाटी भागातून हा गोळीबार झाला. सौम्य स्वरुपाचा हा गोळीबार असल्याने बीएसएफने या गोळीबाराला प्रत्युत्तर दिले नाही.
घुसखोरीला मदत करण्यासाठी हा गोळीबार झाला असण्याची शक्यता असून, बीएसएफने आंतरराष्ट्रीय सीमेवर सर्तकतेचा इशारा दिला आहे.