मुंबई – ताडदेव येथील शासकीय मालकीच्‍या भूखंडावरील झोपडपट्टीचा पुर्नविकास करताना पोलिस घरांसाठी या जागेवर आरक्षण असल्‍यामुळे या जागी पोलिसांसाठी ६२ सदनिका उपलब्‍ध करून देण्‍यात येतील, अशी ग्‍वाही गृहनिर्माण मंत्री प्रकाश महेता यांनी विधानसभेत दिली.
मुंबईतील ताडदेव येथील भूखंड क्र. ७२५ या शासकीय भूखंडावरील झोपडपट्टीचा पुर्नविकास करताना या जागी पोलिस वसाहतीचे आरक्षण असल्‍यामुळे त्‍या जागेवर पोलिसांसाठी घरे उपलब्‍ध करून देण्‍यात येणार आहे काय, असा तारांकित प्रश्‍न आमदार अॅड. आशिष शेलार यांनी विधानसभेत विचारला होता. त्‍यावर गृहनिर्माण मंत्री प्रकाश महेता यांनी दिलेल्‍या लेखी उत्‍तरात सांगितले की, विकास नियंत्रण नियमावली १९९१ (१०) नुसार आरक्षणाच्‍या २५ टक्‍के क्षेत्र पोलिस हौसिंगसाठी उपलब्‍ध होत असून त्‍यामध्‍ये पोलिसांसाठी स्‍वतंत्र इमारत बांधण्‍यात येणार आहे. या इमारतीमध्‍ये ४१.८८ चौ.मी. ची ६२ घरे उपलब्‍ध करून देण्‍यात येणार आहेत. हे बांधकाम पोलिस विभागाला मोफत करून देण्‍याचे विकास नियंत्रण नियमावलीमध्‍ये प्रस्‍तावित असून याबाबतचे आराखडे पोलिसांच्‍या गृहनिर्माण विभागाने मंजूर करण्‍याची प्रक्रिया सुरू असल्‍याचेही त्‍यांनी सांगितले.

मुंबई- अर्थसंकल्पीय अधिवेशनाचा पहिला दिवस शोकप्रस्तावाने पार पडल्यानंतर दुस-या दिवशी वादळी अधिवेशनाला सुरुवात होणार असे संकेत विरोधकांनी आधीच दिले होते. त्याप्रमाणे मंगळवारी विधिमंडळात गारपीट, अवकाळी पाऊस आणि शेतक-यांच्या मदतनिधीबाबत विरोधकांनी सरकारला धारेवर धरले. घोषणांनी विधानभवन दणाणून सोडले. यावेळी प्रचंड गदारोळ झाला. परिणामी विधानसभेचे कामकाज १५ मिनिटांसाठी तहकूब करावे लागले.
विधानसभेत विरोधकांनी मागणी लावून धरल्याने अखेरीस सभापतींनी प्रश्नोत्तराचा तास पूर्ण झाल्यानंतर या विषयावर चर्चा करण्यासाठी सविस्तर वेळ देण्यात येईल, असे निर्देश दिले. परंतु, विरोधकांनी त्यांना जुमानले नाही.
मुळात आजच्या कामकाजपत्रिकेत सत्ताधारी पक्षातर्फे उपरोक्त विषयावरील प्रस्ताव देण्यात आला होता. मात्र, विरोधी पक्षनेते राधाकृष्ण विखे पाटील यांनी सभागृह सुरु होताच सर्व विषय बाजूला ठेवून स्थगन प्रस्तावाद्वारे शेतक-यांवर होणा-या अन्यायाबाबत चर्चा करण्याची मागणी सभागृहात केली. त्यावर काँग्रेस, राष्ट्रवादी काँग्रेससह सर्वच सहकारी पक्षांनी ही मागणी लावून धरली.
मात्र, सत्ताधारी पक्षातील राज पुरोहित यांनी सरकार चर्चेला तयार आहे. सभागृहाचे कामकाज नियमावलीप्रमाणे होऊ द्या, विषय आल्यानंतर याबाबत आपण सविस्तर चर्चा करु, असे सांगितले. त्यावर, जितेंद्र आव्हाड, नितेश राणे, वर्षा गायकवाड, राधाकृष्ण विखे पाटील, दिलीप वळसे पाटील आदींनी प्रस्ताव मांडणे हा विरोधी पक्षनेत्याचा अधिकार आहे. हा विषय अत्यंत महत्त्वाचा आणि राज्याच्या दृष्टीने तातडीचा विषय आहे. त्यामुळे कामकाज बाजूला सारून या मुद्दयावर चर्चा करण्यात यावी, या आग्रही मागणीसाठी विरोधक सभापतींसमोरील मोकळ्या जागेत जमा झाले.
विरोधकांनी नही चलेगी.. नही चलेगी, दादागिरी नही चलेगी, शेतक-यांवर अन्याय करणा-या सरकारचा धिक्कार असो, अशा घोषणाबाजी करायला सुरुवात केली.
त्यावर उत्तर देताना मुख्यमंत्री देवेंद्र फडणवीस म्हणाले की, आघाडी सरकारच्या १५ वर्षाच्या कामकाजामुळे राज्यातील शेतक-यांची ही दयनीय अवस्था झाली आहे. सत्तारुढ सरकारने शेतक-यांवर होणा-या अन्यायाबाबत प्रस्ताव मांडला आहे. त्यामुळे सरकारची याबाबत चर्चा करण्याची पूर्ण तयारी आहे. विरोधक ही चर्चा करण्यास धास्तावत आहे. कारण यामुळे सत्य बाहेर पडणार आहे, असेही मुख्यमंत्री म्हणाले.
यामुळे काही काळ सभागृहात गोंधळाचे वातावरण पाहायला मिळाले. त्यानंतर मात्र, सभापतींनी सभागृहाचे कामकाज १५ मिनिटांसाठी तहकूब केले.
राज्यभरात अवकाळी पाऊस आणि गारपीठीने थैमान घातले आहे. आधीच दुष्काळाच्या छाया त्यातच अवकाळी पावसामुळे शेतक-यांचे मोठे नुकसान झाले आहे. आतापर्यंत राज्यात १००० हून अधिक शेतक-यांनी आत्महत्या केल्या आहेत. या कारणास्तव प्रश्नोत्तराच्या तासापेक्षा संकटात असलेल्या शेतक-यांच्या समस्येवर चर्चा करणे यापेक्षा सभागृहात आणखी महत्त्वाचे दुसरे कोणतेच कामकाज असू शकत नाही, असे राधाकृष्ण विखे पाटील यांनी सभागृहात सांगितले आणि निषेध व्यक्त करत अखेरीस विरोधकांनी सभात्याग केला.
विधान परिषदेतही अवकाळी पाऊस, गारपीठीवर चर्चा करण्याची सरकारने तयारी दर्शवली. मात्र, अध्यक्षांनी नकार दिल्यामुळे काँग्रेस आणि राष्ट्रवादी काँग्रेस या दोन्ही पक्षाच्या सदस्यांनी तीव्र निषेध व्यक्त करत सभात्याग केला. यानंतर, अध्यक्षांनी विधान परिषदेचे कामकाज दिवसभरासाठी तहकूब केल्याचे जाहीर केले

यवतमाळ, दि. १० – वर्धा जिल्ह्यातील इसमाचा खून करून प्रेत वर्धानदीपात्रात फेकण्यात आल्याची घटना आज उघडकीस आली. हरिदास नारायण भोयर (४८) रा.अंदोरी जि.वर्धा, असे मृताचे नाव आहे.
कळंब तालुक्यातील चिंचोली गावाला लागून वर्धा नदी आहे. आज सकाळ दरम्यान एका इसमाचा मृतदेह नदीपात्रात आढळून आला. या घटनेची माहिती गावात पसरताच खळबळ उडाली. प्रभारी ठाणेदार सूर्यकांत राऊत यांना घटनेची माहिती मिळताच पोलीस पथकासह घटनास्थळ गाठले. त्यानंतर मृतकाची ओळख पटली. मृतकाच्या डोक्यावर, कानावर व मानेवर शस्त्राने वार केल्याच्या खुना आहेत. अज्ञात आरोपीने शस्त्राने वार करून प्रेत नदीपात्रात फेकल्याचा कयास पोलिसांनी बांधला आहे. दुपारी उपविभागीय पोलीस अधिकारी राहुल मदने यांनी घटनास्थळाला भेट देवून पाहणी केली. याप्रकरणी पोलिसांनी अज्ञात आरोपीविरुद्ध खुनाचा गुन्हा नोंद केला असून, आरोपीचा शोध सुरू आहे.

यवतमाळ,दि. १० – विद्यार्थ्यांसाठी शालेय पोषन आहार शिजविणाºया कामगारांना मानधन देण्यात न दिल्यामुळे राज्य शालेय पोषण आहार कामगार संघटनेच्या नेतृत्वात स्वयंपाकी व मदतनिसांनी आज मंगळकवारी १० मार्च रोजी जिल्हा परिषदेवर लाठी मोर्चा काढून लक्ष वेधले.
पोषण आहार शिजविणारे स्वयंपाकी, मदतनिसांना दरमहा तुटपुंजे एक हजार रुपये मानधन मिळत आहे. कामगारांचे मानधन पंचायत समितीस्तरावरून अद्यापही वितरीत करण्यात आले नाही. त्यामुळे दिवाळी, दसरा यासारखे सण साजरे करता आले नाही. पैसे असून देखील मानधन मिळत नसल्यामुळे शिक्षणाधिकारी व अधीक्षकांवर कारवाई करण्याची मागणी शिक्षण सभापती नरेंद्र ठाकरे यांच्याकडे शिष्टमंडळाने केली. दोन वर्षापूर्वी खाते काढण्यात आले. मात्र मानधन मुख्याध्यापकांच्या खात्यात जमा केल्या जाते. यापुढे कामगारांच्या खात्यातच मानधन जमा करण्यात यावे, मानधन वाटपात होणारी दिरंगाई टाळण्यात यावी, कामगारांना रजा मंजूर करण्यात यावी, शिक्षक कामगारांना अतिरिक्त काम करायला लावतात. हा प्रकार थांबविण्याची मागणी यावेळी करण्यात आली. लाठी मोर्चात पी.पी. घाडगे, विजय ठाकरे, दिवाकर नागपूरे, संजय भालेराव, ज्योती रत्नपारखी, संगीता बागडे, शमा शेख, शमीम शहा, नसीम शहा, संगीता खंडाळकर, विशाखा ठोंबरे, शशिकला मस्के, शारदा तोटेवाड, सया पोलारकर, सुशिला मेडके, सागर जाधव, चेतना चव्हाण, लता कांबळे, मिरा कामळे, जयवंती डेहणकर यांच्यासह महिला मोठ्या संख्येने सहभागी झाल्या होत्या.

सातारा – उर्से टोलनाका येथे एका एका स्विफ्ट कारवर, तसेच इस्लामपूर आणि सातार्‍याजवळच्या कारखान्यांवर छापा घालून महसूल गुप्तचर संचलनालय आणि पुणे कस्टम विभाग यांनी सोमवारी अमली पदार्थांच्या तस्करीचे मोठे रॅकेट उघडकीस आणले. या कारवाईत 500 किलोपेक्षा जास्त मेफेड्रोन जप्त करण्यात आले आहेत. आंतरराष्ट्रीय बाजारात त्याची किंमत कोट्यवधी रुपये असल्याचा अंदाज व्यक्त करण्यात येत आहे. या प्रकरणी आतापर्यंत एकूण 11 संशयित आरोपींना चौकशीसाठी ताब्यात घेण्यात आले आहे.
तळेगावजवळ ‘एक्स्प्रेस वे’वरील उर्से टोलनाक्यावर इस्लामपूरहून मुंबईला एका स्विफ्ट कारमधून नेण्यात येत असलेले 50 किलो ‘मेफेड्रोन’ड्रग्ज जप्त केले आहेत. पिंपरी-चिंचवड पोलिसांच्या अमली पदार्थविरोधी पथकाने ही कारवाई केली आहे. याप्रकरणी एमडी ड्रग्जसह इतर अति उत्तेजक ड्रग्जची तस्करी करणार्‍या ओंकार इंडस्ट्रीजच्या नासिर सांगलीसह 5 जण ताब्यात घेतलं आहे. कारमधून 3 कोटी रुपये किमतीचे 50 किलो मेफेड्रोन जप्त करण्यात आले. त्यानंतर जिथे ड्रग बनवण्यात आले, त्या कंपनीवर छापा टाकून तब्बल साडेतीनशे किलो ड्रग जप्त करण्यात आले. रात्री उशिरापर्यंत मुंबई इथे त्यांच्यावर गुन्हा दाखल करण्याचे काम सुरू होते.
सातार्‍याच्या खंडाळा तालुक्यातील कान्हेरी गावातून तब्बल 112 किलो मेफी ड्रोम हा अमलीपदार्थांचा साठा जप्त केला आहे. या अमलीपदार्थाची आंतरराष्ट्रीय बाजारात किंमत 22 कोटी असून याप्रकरणी 2 संशयित आरोपींना पोलिसांनी अटक केली आहे. ही राज्यातील मोठी कारवाई असून एवढ्या मोठ्या प्रमाणत एका छोट्याशा खेडेगावात हा साठा लपवण्यात आला होता. ही गोपनीय माहिती मिळाल्यानंतर पोलिसांनी मोठ्या शिताफीनं संशयित आरोपींना अटक केली आहे. हा साठा 5 मोठ्या पिशव्यांमध्ये लपवण्यात आल्या होता. ही माहिती मिळाल्यानंतर मोठ्या शिताफीने सातारा लोकल क्राईम ब्रांचने छापा टाकून हा साठा जप्त केला आहे. त्याचबरोबर 2 संशयितांनादेखील ताब्यात घेण्यात आले आहे. ताब्यात घेण्यात आलेल्या संशयित आरोपी पैकी 1 आरोपी हा मुंबई येथे पोलिस असल्याची माहिती समोर आली आहे मात्र सातारा पोलिसांनी या बाबत कमालीची गुप्तता पाळली आहे .हे ड्रग्ज कुणी आणले, कुठे घेऊन जात होते, याबाबत पोलीस तपास करत आहेत. शिवाय ताब्यात घेतलेल्या आरोपींची चौकशी सुरू आहे.

मुंबई – कोल्हापूर जिल्ह्यातील वजनदार राजकीय नेते आणि माजी खासदार सदाशिवराव दादोबा मंडलिक यांचे सोमवारी मध्यरात्री निधन झाले. मुंबईच्या बॉम्ब हॉस्पिटलमध्ये त्यांनी अखेरचा श्वास घेतला. मृत्यूसमयी ते (८०) वर्षांचे होते.
मागच्या काही महिन्यांपासून मूत्रपिंडाच्या विकाराने त्रस्त असलेल्या सदाशिवरावांवर कोल्हापूरमध्ये उपचार सुरु होते. सोमवारी त्यांची प्रकृती अधिकच खालावल्यानंतर त्यांना मुंबईच्या बॉम्बे हॉस्पिटलमध्ये हलवण्यात आले. त्यांच्यावर अतिदक्षता विभागात उपचार सुरु होते. रात्री त्यांनी उपचारांना प्रतिसाद देणे बंद केले अखेर एकच्या सुमारास त्यांची प्राणज्योत मालवली.
सात ऑक्टोंबर १९३४ रोजी कोल्हापूर जिल्ह्यात कागल तालुक्यात मुरगड गावी त्यांचा जन्म झाला होता. कॉंग्रेस पक्षातून राजकीय कारकिर्द सुरु करणारे सदाशिवराव मंडलिक यांनी लोकसभेमध्ये तीनवेळा खासदार म्हणून कोल्हापूरचे प्रतिनिधीत्व केले. कागल विधानसभा मतदारसंघातून चारवेळा ते आमदार म्हणून विधानसभेवर निवडून गेले होते.
जनसामान्यांच्या प्रश्नांना वाचा फोडणार, काम करणारा, वेळेला धावून येणारा नेता अशी सदाशिवराव मंडलिकांची जिल्ह्यामध्ये ओळख होती. त्यामुळेच कोल्हापूरच्या जनतेने प्रत्येक निवडणुकीत त्यांच्यावर विश्वास दाखवला. काँग्रेसमधून राजकीय कारकिर्द सुरु करणारे सदाशिवराव मंडलिक नंतर शरद पवारांसोबत राष्ट्रवादी काँग्रेसमध्ये गेले.
२००९ मध्ये शरद पवारांशी मतभेद झाल्यानंतर त्यांनी बंडखोरी करुन अपक्ष म्हणून लोकसभेची निवडणूक लढवली. दांडगा जनसंपर्क आणि आपल्या विकासकामांच्या जोरावर त्यांनी ही निवडणूक जिंकली. सदाशिवरावांवर मुरगड या त्यांच्या मूळगावी अंत्यसंस्कार करण्यात येणार आहेत. सदाशिवराव मंडलिक यांचे पुत्र संजय मंडलिक सध्या शिवसेनेत आहेत.