यवतमाळ, दि. २७ – यवतमाळ जिल्हा श्रमिक पत्रकार संघटनेच्या जिल्हाध्यक्षपदी दै. हिंदुस्थानचे आवृत्ती प्रमुख नागेश गोरख यांची तर सचिवपदी दै. सकाळचे उपसंपादक नीलेश फाळके यांची अविरोध निवड झाली.
जिल्हाध्यक्ष नितिन पखाले, सचिव राजकुमार भितकर यांचा कार्यकाळ संपली. त्यामुळे आज २७ मार्च रोजी अध्यक्ष व सचिवपदाच्या निवडीसाठी पत्रकार भवनमध्ये सभेचे आयोजन केले होते.यावेळी गोरख व फाळके यांची अविरोध निवड करण्यात आली. यावेळी निवडणूक निर्णय अधिकारी म्हणून जेष्ठ पत्रकार गणेश बयास तर सहा. निवडणूक निर्णय अधिकारी म्हणून अनिरुद्घ पांडे, रघुविरसिंह चौहाण यांनी काम पाहीले. यावेळी मावळते अध्यक्ष नितिन पखाले यांच्यासह सर्व पत्रकार उपस्थित होते.

नाशिक, दि. २७ – तिकीट मागितले म्हणून प्रवाशांनी टीसीवर हल्ला केल्याची धक्कादायक घटना शालीमार एक्स्प्रेसमध्ये घडली आहे. या घटनेत गंभीर जखमी झालेले तिकीट निरीक्षक चुनीलाल गुप्ता यांना उपचारांसाठी तातडीने इगतपुरीतील रुग्णालयात दाखल करण्यात आले आहे.
भूसावळ येथे ड्युटीवर असलेले गुप्ता बुधवारी रात्री तिकीट तपासण्यासाठी हावडा ते लोकमान्य टिळक टर्मिनस शालीमार एक्सप्रेसच्या डब्यात चढले. नाशिकरोडहून रात्री साडेबाराच्या सुमारास गाडी सुटल्यानंतर त्यांनी दरवाज्यात उभ्या असलेल्या दोन व्यक्तींना दार लावून घेण्यास सांगत तिकीट दाखवण्यास सांगितले. मात्र त्या प्रवाशांनी त्यांना उडवाउडवीची उत्तरे दिली आणि तिकीट दाखवण्यास नकार दिला. त्यानंतर गुप्तांनी त्यांना जनरल बोगीत जाण्यास सांगितले असता त्या प्रवाशांना राग आणि एकाने गुप्तांच्या चेहे-यावर वस्त-याने वार केले. त्यामुळे गुप्ता जबर जखमी झाले आणि जबर गोंधळ उडाला. गाडी देवळाली स्टेशनजवळ पोहोचताचे ते दोघे आरोपी उडी मारून फरार झाले. इतर प्रवाशांनी गुप्तांना तातडीने रुग्णालयात दाखल केले. याप्रकरणी पोलिसांनी दोन अज्ञात व्यक्तींविरोधात गुन्हा दाखल केला असून पुढील तपास सुरू आहे.

नाशिक – महाराष्ट्र सरकारनं गोकायदा वंशहत्या बंदीचा लागू केल्यानंतर या कायद्यांतर्गत नाशिक जिल्ह्यात पहिला गुन्हा दाखल करण्यात आला आहे. मालेगावच्या आझाद नगर पोलीस ठाण्यात तिघांविरोधात या गुन्ह्याची नोंद झाली असून दोन गायींच्या हत्येचा आरोप त्यांच्यावर आहे. आरोपींच्या दुकानातून १५० किलो मांसही जप्त करण्यात आलं आहे.

मालेगावातील एका दुकानात गायीच्या मांसाची बेकायदा विक्री सुरू असल्याची तक्रार बुधवारी संध्याकाळी आझाद नगर पोलीस ठाण्याचे सहाय्यक पोलीस निरीक्षक शिवाजी बंटेवाड यांच्याकडे आली. ही माहिती मिळताच पोलिसांचे पथक संबंधित दुकानावर पोहोचले. पोलीस आल्याचे समजताच दुकानवाले पळून गेले. स्थानिकांच्या चौकशीनंतर पोलिसांनी तिघांविरोधात गुन्हा दाखल केला असून त्यांचा शोध सुरू आहे.
गोवंश हत्या बंदी कायद्यानुसार गाय, बैल, वळू यांची हत्या करण्यावर बंदी आहे. गोवंशाची हत्या हा अजामीनपात्र गुन्हा असून त्यासाठी पाच वर्षांचा तुरुंगवास आणि १० हजारांच्या दंडाची तरतूद आहे.

हानोय – मध्य व्हिएतनामच्या औद्योगिक परिसरात लोखंडी गजाचे बांधकाम कोसळून झालेल्या दुर्घटनेत चौदा मजूर ठार झाले असून, ३० मजूर जखमी झाले आहेत.
हा तिन्ह प्रांतातील वंग अंग आर्थिक क्षेत्रात बुधवारी रात्री ही दुर्घटना घडली. काही मजल्यांचे हे लोखंडी गजाचे बांधकाम होते. दुर्घटनास्थळी बचाव मोहिम सुरु असून, व्हिएतनामचे सैन्य पथक आणि पोलिस या बचाव मोहिमेत सहभागी झाले आहेत.
अजूनही काही मजूर ढिगा-याखाली अडकले असण्याची शक्यता आहे. बांधकाम स्थळी हजारो कामगार काम करत आहेत.

सिडनी- विश्वचषकातील अत्यंत महत्त्वाच्या उपांत्य सामन्यात ऑस्ट्रेलियन गोलंदाजांच्या भेदक मा-यासमोर भारताच्या फलंदाजांनी नांगी टाकल्याने भारताचा दारुण पराभव झाला. यासोबतच भारताचे विश्वचषकातील आव्हान संपुष्टात आले.
विश्वचषकातील पहिल्या सामन्यापासून भारताने विजयी मालिका कायम ठेवली होती. मात्र उपांत्यफेरीच्या सामन्यात ही मालिका अखेर खंडित झाली. बलाढ्य ऑस्ट्रेलियाने भारताला नमवत सातव्यांदा अंतिम फेरी गाठली.
ऑस्ट्रेलियाने विजयासाठी दिलेल्या ३२९ धावांचे मोठे आव्हान गाठताना भारताला ४६.५ षटकात केवळ २३३ धावा करता आल्या. भारतीय फलंदाजांची पडझड सुरु असताना एका बाजूने मैदानात किल्ला लढवत महेंद्रसिंग धोनीने भारताच्या विजयाच्या आशा थोड्या पल्लवित केल्या होत्या. मात्र तो बाद झाला आणि विजयाच्या आशाही संपुष्टात आल्या. धोनीने ६५ चेंडूत ६५ धावा केल्या.
यापूर्वीच्या सात सामन्यांमध्ये उत्तम कामगिरी करणारे भारताचे फलंदाज आणि गोलंदाज ऑस्ट्रेलिया संघापुढे निष्प्रभ ठरले. सात सामन्यांमध्ये ७० बळी घेणा-या भारतीय गोलंदाजाची कामगिरी ऑस्ट्रेलियाविरुद्ध मात्र चांगली झाली नाही. वेगवान मारा कऱणा-या मोहम्मद शामीला या सामन्यात एकही गडी बाद करता आला नाही. उमेश यादवने चार गडी बाद केल्याने ऑस्ट्रेलियाला ३२८ धावांवर रोखण्यात भारताला यश मिळाले होते.
नाणेफेक जिंकून ऑस्ट्रेलियाने प्रथम फलंदाजी करणाचा निर्णय घेतला. ऑस्ट्रेलियाचा सलामीवीर डेव्ही़ड वॉर्नरला (१२) बाद करुन भारताला पहिले यश झटपट मिळाले. सलामीवीर डेव्हीड वॉर्नर (१२) धावांवर बाद झाला. उमेश यादवने त्याला कोहलीकरवी झेलबाद केले. मात्र स्मिथ आणि फिंचने दुस-या विकेटसाठी ऑस्ट्रेलियाकडून सर्वाधिक १८२ धावांची भागीदारी केली.
शानदार शतक साकारुन ऑस्ट्रेलियाच्या डावाला आकार देणारा स्टीवन स्मिथ (१०५) धावांवर बाद झाला. स्मिथने ९३ चेंडूत (१०५) धावा केल्या. स्मिथच्या शतकी खेळीत अकरा चौकार आणि दोन षटकारांचा समावेश होता. उमेश यादवने स्मिथला रोहित शर्माकरवी झेलबाद केले.
स्मिथ बाद झाल्यानंतर फलंदाजीला आलेल्या मॅक्सवेल आणि फिंचने तिस-या विकेटसाठी झटपट ३५ धावांची भागीदारी केली. मॅक्सवेल धोकादायक ठरणार असे वाटत असतानाच अश्विनने त्याला (२३) धावांवर रहाणेकरवी झेलबाद केले. त्यानंतर खेळपट्टीवर जम बसवलेल्या फिंचला (८१) धावांवर उमेश यादवने शिखर धवनकरवी झेलबाद झाला.
स्टीवन स्मिथ बाद झाल्यानंतर ऑस्ट्रेलियाचे चार फलंदाज झटपट बाद झाल्याने ऑस्ट्रेलियाचा डाव अडचणीत सापडला होता. मॅक्सवेल आणि अॅरॉन फिंच पाठोपाठ ऑस्ट्रेलियन कर्णधार मायकल क्लार्कही (१०) धावांवर बाद झाला. त्याला मोहितने रोहित शर्माकरवी झेलबाद केले. मात्र फॉकनर (२१) आणि वॉटसनने (२८) फटकेबाजी करत धावगती कायम ठेवली. याच्या जोरावर ऑस्ट्रेलियाने भारताला विजयासाठी ३२९ धावांचे अवघड लक्ष्य दिले होते.
ऑस्ट्रेलियाने दिलेल्या ३२९ धावांच्या अवघड लक्ष्याचा पाठलाग करताना शिखर धवन आणि रोहित शर्मा या सलामीवीरांनी भारताला चांगली सुरुवात करुन दिली होती. मात्र हेझलवूडच्या गोलंदाजीवर शिखर धवन ४५ धावांवर बाद झाला. पाठोपाठ विराट कोहली अवघी एक धाव काढून तंबूत परतला. जॉन्सनच्या उसळत्या चेंडूवर हूक मारण्याचा मोह कोहलीला आवरता आला नाही. तर हेझलवूडच्या गोलंदाजीवर मोठा फटका खेळण्याच्या नादात शिखर धवनने (४५) मॅक्सवेलकडे झेल दिला.
अजिंक्य रहाणेने कर्णधार महेंद्रसिंग धोनीच्या साथीने डाव पुढे नेण्याचा प्रयत्न केला. पण अजिंक्य रहाणे ४४ धावा करुन तंबूत परतला. त्याने पाचव्या विकेटसाठी कर्णधार धोनीसह ७० धावांची भागीदारी केली. त्यानंतर आलेला रविंद्र जाडेजाही अवघ्या १६ धावा करुन धावबाद झाला.
त्यानंतर सुरेश रैना (७) फॉकनरच्या चेंडूवर हॅडिनकडे झेल देत बाद झाला. भारतीय फलंदाजांची पडझड सुरु असताना एका बाजूने मैदानात भक्कम पाय रोवून उभा असलेला कर्णधार महेंद्रसिंह धोनी (६५) धावबाद झाला आणि ऑस्ट्रेलियाने विजयाचा अर्धा गड जिंकला.
आर अश्विन पाच धावांवर त्रिफळाचीत बाद झाला. तर मोहित शर्मा आणि उमेश यादव भोपळा न फोडताच माघारी परतल्याने भारताचा डाव ४६.५ षटकात २३३ धावांमध्ये आटोपला.
संक्षिप्त धावफलक
ऑस्ट्रेलिया- सात बाद ३२८
भारत- ४६.५ षटक सर्वबाद २३३
सामनावीर- स्टीव्हन स्मिथ (ऑस्ट्रेलिया)

यवमाळ दि. २६ – स्त्री जातीचे अर्भक मृतावस्थेत आढळल्याची घटना आज दारव्हा मार्गावरील शासकीय गोदामाजवळ सकाळी उघटकीस आली. अनैतिक संबधातून घडलेला हा प्रकार असल्याचे बोलल्या जात आहे.
शहरातील रेल्वे स्टेशन लगत असलेल्या शासकीय गोदामाजवळ मोकळी जागा आहे. या ठिकाणचा शौचालयासाठी वापर केला जातो. आज सकाळी ११ वाजताच्या सुमारास तेथून जात असताना, त्याला एका हिरव्या पनीत काहीतरी बांधून असल्याचे दिसून आले. त्याने जवळ जाऊन पाहल्यानंतर त्याला पनीत स्त्री जातीचे अर्भक आढळले. याची चर्चा सर्वत्र पसरातच बघ्यांची गर्दी झाली. शहारात तीन पोलीस स्टेशन असल्यामुळे पुन्हा हद्दीचा वाद झाला. शिवसनेचे पराग पिंगळे यांनी पोलिसांना माहिती दिल्यावर ग्रामीण पोलीस स्टेशनचे जमादार घटनास्थळी आले. हिरवी पन्नी शासकीय रुग्णालयाची असल्यामुळे बाळाने कै. वसंतराव नाईक शासकीय वैद्यकीय महाविद्यालयात जन्म दिला असावा, असा तर्क काहीनी लावला. सोबतच पिवळी बॅग असल्यामुळे बॅगमध्ये बाळाला आणल्याचा अंदाज पोलिसांनी बांधला आहे. स्त्री चा तिरस्कार आजही होत असून, तिची निर्घूनपणे हत्या करण्यात येत असल्याने संताप व्यक्त होत आहे. याबाबत वडगावरोड पोलीस स्टश्ोनला तक्रार देण्यात आली आहे. अनैतिक संबधातून बाळ जन्मलेले असावे व पाप लपविण्यासाठी हे कृत्य करण्यात आल्याचे बोलल्या जात आहे.