अमरावती – शहरातील नेहरू मैदानावरील गांधी शिल्प बाजार या हस्तकला प्रदर्शनातून रविवारी वनविभागाने ८७ वाघनखांसह मौल्यवान कस्तुरी जप्त केली. या प्रकरणी कर्नाटकातील जितुनाथ काकम आणि यारबी या दोघांना अटक करण्यात आली आहे.
नागपूर येथील दलित मुस्लीम मागासवर्गीय युथ फेडरेशनने नेहरू मैदानात १५ मार्चपासून गांधी ‌शिल्प बाजार हे हस्तकला प्रदर्शन भरविले आहे. येथे शंभरांवर स्टॉल्समधून रोझ वूड, सँडल वूड फिगर, कलमकरी पेंटिंग, खादी ड्रेसेस, सॉफ्ट टाॅइज, ग्लास पेंटिंग, वूड कटलरी असे विविध साहित्य विक्रीस ठेवले आहे. येथे वाघ नखे आणि कस्तुरीचीही चोरटी विक्री होत असल्याची माहिती वनविभागाला मिळाली. त्यानुसार रविवारी दुपारी वनसंरक्षक सोमराज यांच्या नेतृत्वातील पथकाने येथे छापा घातला आणि सहाव्या क्रमांकाच्या स्टॉलमधून ६० तर १४ क्रमांकाच्या स्टॉलमधून २७ वाघ नखे जप्त केली. वाघनखांसोबतच मौल्यवान कस्तुरीही जप्त करण्यात आल्याची माहिती वनाधिकाऱ्यांनी दिली. चौकशीसाठी सात जणांना ताब्यात घेण्यात आले होते. चौकशीनंतर दोघांना अटक करण्यात आली. जप्त वाघनखे खरी की खोटी, हे तपासण्यासाठी हैदराबाद येथील फॉरेन्सिक लॅबमध्ये पाठविण्यात येणार आहेत.

क्वाललांपूर – गेले १७ दिवस २३९ प्रवाशांसह बेपत्ता असलेले मलेशिया एअरलाइनचे विमान दक्षिण हिंदी महासागरात कोसळले असल्याचे मलेशियचे पंतप्रधान नजिब रझाक यांनी सोमवारी जाहीर केले. त्यांच्या या घोषणमुळे गेले १७ दिवस सुरू असलेली विमानाबद्दलची अनिश्चितता संपुष्टात आली आहे. दरम्यान, विमान कोसळल्याच्या अधिकृत घोषणेनंतर प्रवाशांच्या नातेवाईकांवर दु:खाचा डोंगर कोसळला. इतके दिवस आपले जीवलग परत येतील, अशी त्यांना असलेली आशा यामुळे मावळून गेली.
एमएच३७० हे दक्षिण हिंदी महासागरात कोसळले असल्याचे जाहीर करताना आम्हाला अत्यंत खेद होत असल्याचे त्यांनी विशेष पत्रपरिषदेत म्हटले आहे. ब्रिटिश सॅटेलाइट कंपनी इन्मरसॅटने दिलेल्या माहितीनुसार हे विमान हिंदी महासागराच्या दक्षिण टापूत दिसल्याचे नोंदवण्यात आले आहे. मलेशिया एअरलाइन्सचे बोइंग७७७- २०० हे विमान ८ मार्चला २३९ प्रवाशांसह बेपत्ता आले होते. यात पाच भारतीय प्रवशांसह एका भारतीय वंशाच्या कॅनेडियन नागरिकाचा समावेश आहे. ब्लॅक बॉक्स शोधासाठी अमेरिकन नौदलाने ‘टीपीएल२५’ ही यंत्रणा या भागात तैनात केली आहे. या यंत्रणेमुळे विमानाचा ब्लॅक बॉक्स शोधण्यास मदत होईल. २० हजार फूट खोलीपर्यंतचे अवशेष शोधण्यासाठी या यंत्रणेचा फायदा होऊ शकतो. मात्र, या भागात विमान कोसळल्याचे ठोस पुरावे मिळाले तरच या यंत्रणेचा फायदा होऊ शकेल.

वाराणसी- भाजपचे पंतप्रधानपदाचे उमेदवार नरेंद्र मोदी यांना आव्हान देण्यासाठी वाराणसीत दाखल झालेल्या अरविंद केजरीवाल यांना ठिकठिकाणी विरोधाला सामोरे जावे लागत आहे. आधी काशी येथे विश्वनाथ मंदिराबाहेर त्यांच्या गाडीवर अंडी फेकण्यात आली तर नंतर शाईफेकीलाही त्यांना सामोरे जावे लागले.
वाराणसी येथील भोजूबीर भागात भाजप कार्यकर्त्यांनी केजरीवाल यांना मोठा विरोध केला. केजरीवाल दिल्ली सोडून वाराणसीत पळून आले आता आम्ही वाराणसीतूनही त्यांना पिटाळून लावणार, असे सांगत कार्यकर्ते केजरीवालविरोधी घोषणा देत होते. टागोर टाउन कॉलनीतील एका कार्यकर्त्याच्या घरी केजरीवाल गेले असता तेथे आप आणि भाजप कार्यकर्त्यांमध्ये जोरदार घोषणायुद्ध रंगले. त्यानंतर विश्वेश्रगंज येथील काळ भैरव आणि विश्वनाथ मंदिरात दर्शनासाठी आलेल्या केजरीवाल यांनाही भाजप कार्यकर्त्यांच्या रोषाला सामोरे जावे लागले. घोषणा देणाऱ्या कार्यकर्त्यांना पोलिसांनी अडवण्याचा प्रयत्न केला असता पोलीस व भाजप कार्यकर्त्यांमध्ये काही वेळ चकमकही उडाली.’आप’मधून बाहेर पडून स्थापन झालेल्या आम आदमी सेनेनेही केजरीवाल यांच्या वाराणसी दौऱ्याचा विरोध केला असून प्रत्यक्ष सभेतही मोठा हंगामा होण्याची शक्यता व्यक्त करण्यात येत आहे.वाराणसीतील बेनियाबाग मैदानात केजरीवाल यांची सभा होत आहे. यावेळी ते वाराणसीतून लोकसभा निवडणूक लढण्याबाबत आपला निर्णय जाहीर करण्याची शक्यता आहे. मात्र, केजरीवाल वाराणसीत दाखल झाल्यापासून स्वागत आणि विरोध अशा दुहेरी चित्रामुळे पोलिसांची पुरती दमछाक झाली आहे. केजरीवाल यांच्या सभास्थानीही पोलीस बंदोबस्त वाढवण्यात आला आहे.