यवतमाळ – भरधाव वेगात असलेला आॅटो उलटल्याने सात जण जखमी झाल्याची घटना आज मंगळवारी दुपारी २ वाजता हातगाव येथे घडली.
स्वप्नील भगत, गजानन रिंगणे, विलास वाघमारे, प्रविण वाघमारे, भूषण तितरे, शुभम नगराळे, आशिष नगराळे अशी जखमींची नावे आहे. लोणी घाटाना येथून एम.एच. २९ / टि ८०९३ क्रमांकाच्या आॅटोने ते अकोला बाजारकडे जात होते. अशातच हातगाव या गावाजवळ भरधाव वेगात असलेला सदर आॅटो उलटला. यामध्ये सातही जण जखमी झाले असून त्याच्यावर वसंतराव नाईक वैद्यकीय महाविद्यालय व रुग्णालयात उपचार सुरु आहे. शहर पोलिसांनी या प्रकरणी चालकाविरूद्घ गुन्हा दाखल केला.

वृत्तसंस्था, मुंबई – पन्नास पैशांचे नाणे अजूनही अधिकृतरीत्या चलनात आहे. मात्र, दैनंदिन व्यवहारांमध्ये लोक पन्नास पैशांची नाणी स्वीकारण्यास नकार देत असल्याचेच चित्र आहे. त्यामुळे लवकरच हे नाणे काळाच्या पडद्याआड जाण्याची शक्यता निर्माण झाली आहे.
मुंबईत दुकानदार, लाँड्रीचालक, रिक्षाचालक; तसेच किराणा दुकानांमध्ये पन्नास पैशांचे नाणे स्वीकारण्यास नकार दिला जात आहे. पन्नास पैशांची नाणी चलनात असून, ती स्वीकारण्यास नकार देणे बेकायदेशीर आहे. मात्र, दिवसेंदिवस वाढत्या महागाईमुळे ही नाणी बिनमोलाची ठरत आहेत. यापूर्वी २०११मध्ये रिझर्व्ह बँकेने २५ पैशांचे नाणे चलनातून काढून टाकले होते.
वांद्र्याच्या पाली मार्केटमधील रद्दीवाला पन्नास पैशांची एक किलो नाणी तीस रुपयांना विकत घेतो. ‘बाजारात पन्नास पैशांचे नाणे घेण्याचे लोकांनी थांबविले आहे,’ असे सांगून एका धान्य दुकानदारानेही हे नाणे घेण्यास नकार दिला. ‘बेस्ट’मधील कंडक्टरना कायद्यामुळे पन्नास पैशांची नाणी नाकारता येत नाहीत. मात्र, त्याच वेळी प्रवासी ही नाणी घेण्यास नकार देत असल्याचे आढळते, असे एका कंडक्टरने नाव न छापण्याच्या अटीवर सांगितले. ‘सर्व व्यवसायिक बँकांमध्ये ही नाणी स्वीकारली जातात. रिझर्व्ह बँकेच्या कार्यालयांमध्येही ही नाणी स्वीकारली जात आहेत. पन्नास पैशांच्या नाण्यांना कोणीही नाकारू शकत नाही,’ असे रिझर्व्ह बँकेच्या अधिकाऱ्याने सांगितले.
पन्नास पैशांचा इतिहास
पन्नास पैशांच्या नाण्याचा इतिहास पाच शतके मागे मोगल सम्राट अकबराच्या काळापर्यंत जातो, असे जुन्या नाण्याची खरेदी विक्री करणारे माल्कम तोड्यावाला यांनी सांगितले. ‘पन्नास पैशांच्या नाण्याचे वजन त्या काळी एक रुपयाच्या नाण्याच्या अर्धे असायचे. चांदीच्या रुपयाचे वजन ११ ग्रॅम असे. कालांतराने कमी मूल्याची नाणी पाडणे खर्चिक बनत गेले,’ असेही तोड्यावाला यांनी सांगितले.

नवी दिल्ली – छत्तीसगडच्या सुकमा जिल्हयातील जंगलामध्ये केंद्रीय राखीव पोलिस दलाच्या (सीआरपीएफ) गस्तीपथकावर मंगळवारी माओवाद्यांनी हल्ला केला. या हल्ल्यात वीस जवान शहीद झाले आहेत.
मंगळवारी सकाळी साडेदहाच्या सुमारास जेराम नुल्लाह भागात माओवाद्यांच्या एका मोठया गटाने घात लावून पोलिस आणि सीआरपीएफच्या पन्नास जणांच्या संयुक्त तुकडीवर हल्ला केला. हा भाग टोंगापाल पोलिस स्थानकाच्या हद्दीत येतो.सीआरपीएफचे पंधरा आणि राज्य पोलिसांचे पाच जवान या हल्ल्यात शहीद झाल्याचे अतिरिक्त पोलिस महासंचालक मुकेश गुप्ता यांनी सांगितले. एप्रिल २०१० मध्ये याच भागात माओवाद्यांनी पोलिसांवर घात लावून हल्ला केला होता. या हल्ल्यात ७६ पोलिस शहीद झाले होते.सीआरपीएफचे तीस आणि राज्य पोलिसांचे चौदा असे ४४ जणांचे पथक गस्तीवर होते. माओवाद्यांनी आधी सुरुंग स्फोट केला त्यानंतर जवानांच्या दिशेने बेछूट गोळीबार सुरु केला. छत्तीसग़ड पोलिसांनी दिलेल्या माहितीनुसार अजूनही या भागामध्ये माओवादी आणि सुरक्षापथकांमध्ये जोरदार चकमक सुरु आहे.तेथे लढणा-या जवानांच्या मदतीसाठी जगदालपूर आणि रायपूरमधुन येथून दोन हॅलिकॉप्टरमधुन अतिरिक्त कुमक पाठवण्यात आली आहे. छत्तीसगडच्या काँग्रेस नेत्यांवर ज्या जिराम घाटीमध्ये हल्ला झाला होता त्या ठिकाणापासून काही अंतरावर ही चकमक सुरु आहे.

लखनौ – भाजपचा ‘चाय पे चर्चा’ कार्यक्रम वादाच्या भोव-यात सापडला आहे. निवडणूक आयोगाने नरेंद्र मोदी यांच्या चाय पे चर्चा कार्यक्रमावर आक्षेप घेतला आहे. नमो टी स्टॉलवर मतदारांना मोफत चहा देणे हे एकप्रकारे लाच देण्यासारखे असून यामुळे मतदार प्रभावित होतात असे निवडणूक आयोगाने म्हटले आहे.
उत्तरप्रदेशातील लखीमपूरमध्ये ‘चाय पे चर्चा’ कार्यक्रमातून आदर्श अचारसंहितेचा भंग झाल्याने आयोगाने कार्यक्रमाच्या आयोजकांवर कारवाई केली आहे. या कार्यक्रमात नरेंद्र मोदी यांचे भाषण एलईडी स्क्रीनवरुन मतदारांना दाखवले जाते. यावेळी उपस्थितांना मोफत चहा वाटला जातो.निवडणूक आयोगाने जिल्ह्याच्या निवडणूक अधिका-यांना कारवाई करण्याचे आदेश दिले आहेत. या कार्यक्रमासाठी स्थानिक प्रशासनाकडून परवानगी न घेतल्याबद्दलही गुन्हा नोंदवण्यात आला आहे. निवडणूकीच्या काळात कुठल्याही वस्तूचे मोफत वाटप हा निवडणूक अचारसंहितेचा भंग ठरेल असे निवडणूक आयोगाने आधीच स्पष्ट केले आहे.

बालासिनोर – भाजप नेते नरेंद्र मोदी यांच्या गुजरातमध्ये जाऊन काँग्रेस उपाध्यक्ष राहुल गांधी यांनी मंगळवारी त्यांच्या तथाकथित विकासाचा आणि ढोंगीपणाचा बुरखा जनतेसमोर फाडला. नाझी हुकूमशहा अ‍ॅडॉल्फ हिटलरच्या राजवटीसारखी राजवट गुजरातमध्ये मोदींकडून चालवली जात असून भ्रष्टाचाराविरोधात लढण्याच्या बाता मारणा-या मोदी यांच्याच मंत्रिमंडळात अनेक भ्रष्टाचारी मंत्र्यांना पाठिशी घातले जात असल्याच्या वस्तुस्थितीकडे राहुल गांधी यांनी लक्ष वेधले. मोदी यांनी यापूर्वी केलेल्या भाषणांमधील मुद्यांचा राहुल गांधी यांनी त्यांच्या भाषणात जोरदार समाचार घेतला.
गुजरातमध्ये कोणत्या प्रकारची चौकीदारी(पहारा) सुरू आहे, असा सवाल त्यांनी जनतेला केला. शेतक-यांची लाखो एकर जमीन त्यांच्यापासून हिरावून घेऊन ती उद्योगपतींच्या घशात घातली जाते. या विरोधात जेव्हा शेतकरी आवाज उठवतात, तेव्हा त्यांच्या आक्रोशाकडे दुर्लक्ष केले जाते, असे राहुल गांधी म्हणाले. शेतक-यांच्या जमिनी हिसकावून घेणा-या रखवालदाराची गरज नाही तर जनतेला त्यांचे हक्क हवे आहेत असा टोला त्यांनी लगावला.गुजरातमधील विकास हा फक्त मोजक्या लोकांपर्य़ंतच मर्य़ादित राहिलेला आहे. मात्र हा विकास गरीब जनतेपर्य़ंत पोहोचलेलाच नाही. काँग्रेसने माहितीचा अधिकार, जनलोकपाल विधेयक मंजूर केले आहेत. मात्र या विधेयकांना भाजपकडून विरोध केला जात असल्याचा आरोप राहुल गांधींनी केला. गुजरातच्या विकासाचे श्रेय कोणा एका व्यक्तीला जात नाही तर ते तेथील जनतेला जाते, असेही त्यांनी सांगितले.

मराठी संगीत क्षेत्रातील एक प्रसिद्ध नाव म्हणजे संगीतकार कौशल इनामदार. कौशल इनामदार हे सिनेमांना संगीत देताना सतत नवीन प्रयोग करत असतात आणि त्यामुळेच त्यांचं वेगळेपण चर्चेत राहतं. वेगवेगळ्या सिनेमांना, अल्बम्सना उत्कृष्ट संगीत दिल्यानंतर कौशल इनामदार हे पुन्हा एकदा रसिकांना संगीतमय करण्यास येत आहेत. रितेश देशमुख आणि उत्तुंग ठाकूर यांची निर्मिती असलेल्या आणि सिनेमटोग्राफर महेश लिमये यांनी दिग्दर्शित केलेल्या ‘यलो’ या सिनेमाला संगीतकार कौशल इनामदार यांनी संगीत दिले आहे.
‘अधांतरी’, ‘आग’, ‘इट्स ब्रेकिंग न्यूज’, ‘कृष्णा काठची मीरा’, ‘नॉट ओन्ली मिसेस राऊत’, ‘बालगंधर्व’, ‘रास्ता रोको’, ‘हंगामा’, ‘अजिंठा’ आणि ‘संशयकल्लोळ’ या गाजलेल्या सिनेमांना दिलेल्या वेगळ्या संगीतामुळे तसेच मराठी अभिमान गीताच्या अफाट यशामुळे संगीतकार कौशल इनामदार सतत चर्चेत राहिले आहेत. त्यांच्या ‘बालगंधर्व’ आणि ‘अजिंठा’ या सिनेमासाठी त्यांना अनेक पुरस्कार सुद्धा मिळाले आहेत. आता पुन्हा एकदा ते ‘यलो’ च्या निमित्ताने आपल्या सुंदर चालींची जादू प्रेक्षकांवर टाकणार आहेत. या सिनेमाला पार्श्वसंगीत सुद्धा त्यांनीच दिले आहे.
याबद्दल सांगताना कौशल इनामदार यांनी सांगीतले की, “या सिनेमातील दोन गाणी आणि पार्श्वसंगीत सुद्धा मीच केलंय. ‘यलो’च्या निमित्ताने मी रॉक म्युझिक प्रकारावर पहिल्यांदाच काम केलंय. आधीच्या कुठल्याच सिनेमांमध्ये मी हा जॉनर वापरलेला नाहीये तरी सुद्धा महेशने माझ्यावर विश्वास ठेवला. हा जॉनर माझ्यासाठी पूर्णपणे नवीन असल्याकारणाने मी दुसरं कोणतही काम या दरम्यान हाती घेतलं नाही. ‘यलो’साठी रॉक म्युझिक करायचं होतं म्हणून मी तब्बल सहा महिने फक्त रॉक म्युझिक ऎकलं. याआधी मी रॉक फार ऎकलेलं नव्हतं. महत्वाची गोष्ट म्हणजे दोन्ही गाण्यांसाठी ‘की-बोर्ड, इलेक्ट्रॉनिक गिटार, ड्रम आणि बेस’ फक्त ही चार वाद्य वापरण्यात आली आहे. सिनेमाचा बॅकग्राऊंड स्कोर आणि सिनेमाची गाणी ही वेगवेगळी वाटता कामा नये याची आम्ही खूप काळजी घेतली. गुरू ठाकूर या गीतकाराबरोबर पुन्हा एकदा काम करायला मिळाले. अतिशय सुंदर शब्द गुरूने लिहिले असून दोन्ही गाणी अतिशय श्रवणीय झाली आहेत. माझ्यासाठी हा सिनेमा खूप वेगळा होता. वेगवेगळ्या सिनेमांवर काम करत असतांना आपल्याला खूप काही शिकायला मिळत असतं. पण ‘यलो’वर काम करत असताना मी माणूस म्हणून सुद्धा खूप बदललोय. हे खूप कमी सिनेमांच्याबाबतीत होतं. त्यामुळेही हा सिनेमा माझ्यासाठी अतिशय अतिशय वेगळा अनुभव होता”.

महाराष्ट्राचे पहिले मुख्यमंत्री, व्यासंगी नेते, अभ्यासू व्यक्तिमत्व, दूरदृष्टी असलेलं कार्यकुशल नेतृत्व अशा अनेक बिरुदावली लाभलेले व्यक्तिमत्व म्हणजे मा. यशवंतराव चव्हाण. वैयक्तिक आयुष्यासोबतच राजकीय आणि सामाजिक जीवनातही अतिशय आव्हानात्मक परिस्थितींवर यशस्वीपणे मात करणा-या यशवंतराव चव्हाण यांच्या जीवनप्रवासावर आधारित ‘यशवंतराव चव्हाण – बखर एका वादळाची’ हा जब्बार पटेल दिग्दर्शित चित्रपट येत्या १४ मार्चला प्रेक्षकांच्या भेटीस येत आहे. यशवंतराव चव्हाण प्रतिष्ठानची निर्मिती असलेल्या या चित्रपटाची प्रस्तुती महाराष्ट्र शासन आणि एस्सेल व्हिजनची आहे. या चित्रपटाचे लोकार्पण यशवंतरावांच्या जन्मभूमीत म्हणजे कराड येथील प्रीतीसंगमावर होणार असून यासाठी दिग्दर्शक जब्बार पटेल. यशवंतरावांची भूमिका साकारणारे अशोक लोखंडे आणि ओम भूतकर, वैशाली दाभाडे आदि कलाकार उपस्थित राहणार आहेत. या सोहळ्याप्रसंगी प्रसिद्ध संगीतकार गायक शंकर महादेवन आणि नंदेश उमप चित्रपटातील गाण्यांद्वारे यशवंतरावांना आदरांजली वाहतील.
यशवंतराव चव्हाण यांची कारकीर्द ही केवळ राजकारणापुरती मर्यादित नव्हती तर भारतीय स्वातंत्र्याची चळवळ, संयुक्त महाराष्ट्राचा लढा, सामाजिक, सांस्कृतिक कार्य, लोकाभिमुख निर्णय, दिल्लीमध्ये महाराष्ट्राची जपलेली अस्मिता अशा विविध टप्प्यांनी त्यांची कारकीर्द सजली होती. यशवंतरावांसारख्या उत्तुंग व्यक्तिमत्वावर चित्रपट बनवणे खूप मोठे आव्हान होते. लीलया पेललं आहे, दिग्दर्शक जब्बार पटेल यांनी तर यशवंतरावांची ही झंझावाती कारकीर्द पटकथेतून परिणामकारकरित्या मांडण्याचं काम ज्येष्ठ लेखक, पत्रकार अरूण साधू यांनी केलं आहे. पटकथेसोबतच चित्रपटातील गीतेही कथानकाचाच एक भाग म्हणून प्रेक्षकांसमोर येणार आहेत. महाराष्ट्राच्या निर्मितीकाळातील लोकसंगीत, साहित्य आणि समाजकारणातील उर्जितावस्था, लोककलांचे महत्त्व लक्षात घेऊन संगीताची मोलाची जबाबदारी आनंद मोडक यांनी या चित्रपटात सांभाळली आहे. चित्रपटात विविध बाजाची एकूण १६ गाणी असून ती ना.धों. महानोर, कुसुमाग्रज आणि विठाबाई चव्हाण यांनी लिहिली असून अनेक नामवंत गायकांनी ती स्वरबद्ध केली आहेत. महाराष्ट्राचा हा लाडका नेता आपल्या अभिनयातून साकार करण्याची किमया साधली आहे अशोक लोखंडे यांनी तर लुब्ना सलिम , ओम भुतकर, वैशाली दाभाडे, मीना नाईक, रेखा कामत, सुप्रिया विनोद, सतीश आळेकर, राहूल सोलापूरकर, बेंजामीन गिलानी यांच्या अन्य महत्त्वपूर्ण भूमिका आहेत. चित्रपटाचे छायांकन सय्यद लायक अली यांचे तर संकलन नितीन रोकडे यांचे आहे. लीला गांधी यांनी नृत्य दिग्दर्शन, कला व वेशभूषा शाम भूतकर आणि मोहन रत्नपारखी यांनी तर रंगभूषेची अतिशय महत्त्वाची जबाबदारी विक्रम गायकवाड यांनी सांभाळली आहे.यशवंतराव चव्हाण प्रतिष्ठानची निर्मिती असलेल्या ‘यशवंतराव चव्हाण – बखर एका वादळाची’ चित्रपटाची प्रस्तुती महाराष्ट्र शासनाची असून एस्सेल व्हिजनच्या सहयोगाने हा चित्रपट येत्या १४ मार्चला राज्यभरातील सुमारे २५० हून अधिक चित्रपटगृहांत प्रदर्शित होणार आहे.