लखीमपुर – संपूर्ण देशात भाजप फक्त मोठमोठया घोषणा करत आहे. भाजपने नेहमीच व्देषाचे राजकरण केले आहे. भाजपचे सरकार केंद्रात सत्तेवर असताना त्यांनी काय केले ? बोलणे आणि काम करणे यात भरपूर फरक आहे अशा शब्दात संपुआ प्रमुख आणि काँग्रेस अध्यक्ष सोनिया गांधी यांनी भाजपवर टीका केली. त्या लखीमपूर येथील निवडणूक प्रचारसभेमध्ये बोलत होत्या.
काँग्रेसने देशाची गंगा-जमुना संस्कृती घट्ट केली तर, भाजपने नेहमीच जातीय राजकरण करुन देशाला कमकुवत केल्याचा आरोप सोनियांनी केला. २००९ च्या निवडणूक जाहीरनाम्यातील बहुतांश आश्वासने आम्ही पूर्ण केली. आता २०१४ च्या निवडणूक जाहीरनाम्यात दिलेली आश्वासनेही आम्ही पूर्ण करु, पण त्यासाठी आम्हाला तुमच्या पाठिंब्याची आवश्यकता आहे असे सोनिया म्हणाल्या.
आम्ही खोटी आश्वासने देत नाही. जी आश्वासने देतो ती पूर्ण करतो. प्रत्येक हातात शक्ती, प्रत्येक हाताची प्रगती यावर आमचा विश्वास असल्याचे सोनियांनी सांगितले. आसाम आणि अन्य भागातील काँग्रेस कार्यकर्त्यांनी स्वातंत्र्यापूर्वी आणि स्वातंत्र्यानंतरही देशासाठी प्राणांचे बलिदान दिल्याचे सोनियांनी सांगितले.
देश घडवण्यावर आमचा विश्वास आहे. भाजप आणि अन्य विरोधी पक्ष त्यावेळी कुठे होते ? स्वातंत्र्यापूर्वी आणि स्वातंत्र्य मिळाल्यानंतरही याचे काय योगदान आहे ? देश, समाजामध्ये तेढ निर्माण करण्याचेच काम त्यांनी केले असा आरोप सोनियांनी केला. विरोधकांच्या खोटया प्रचाराला, आश्वासनांना बळी न पडता काँग्रेस उमेदवाराच्या पाठिशी उभे रहाण्याचे सोनियांनी उपस्थितांना आवाहन केले.

‘
मुंबई – महाराष्ट्र राज्य मार्ग परिवहन महामंडळातर्फे (एसटी) प्रवाशांसाठी विविध योजना राबवल्या जातात. मात्र एसटीची ‘आवडेल तेथे कोठेही प्रवास’ या योजनेंतर्गतचा प्रवास १ एप्रिलपासून महागणार आहे. या योजनेतील चार व सात दिवसांच्या पासच्या किमतीत २५ ते ४० रुपयांनी वाढ होणार आहे.
एसटीच्या ताफ्यात सुमारे १७ हजार बस आहेत. प्रवाशांना प्रवास अधिक सुखकर व्हावा यासाठी महामंडळाकडून विविध योजना राबवल्या जातात. प्रवाशांना आकर्षित करण्यासाठी एसटीने ‘आवडेल तेथे कोठेही प्रवास’ ही योजना सुरू केली. प्रवाशांचाही या योजनेला चांगला प्रतिसाद मिळत आहे.
या योजनेंतर्गत चार व सात दिवसांचा पास दिला जातो. पासमुळे प्रवाशांच्या संख्येत वाढ झाली.
मात्र वाढत्या महागाईमुळे एसटीने या पासची किंमत वाढवण्याचा निर्णय घेतल्याचे एका वरिष्ठ अधिका-याने सांगितले. इंधनाबरोबरच गाडय़ांच्या सुटय़ा भागांचे भावही वाढल्याने एसटीला आर्थिक नुकसानीला सामोरे जावे लागत आहे. त्यामुळे तिकीटदरातील वाढीपाठोपाठ सवलतीच्या पासमध्येही दरवाढ करण्यास एसटीला भाग पडत आहे, असे एसटीच्या अधिका-याने सांगितले. मात्र ‘आवडेल तेथे कोठेही प्रवास’ या योजनेंतर्गत १ एप्रिल पूर्वी पास काढला असल्यास त्या संबंधित प्रवाशांकडून पूर्वीचेच दर आकारले जाणार आहेत.

मुंबई – एक्स्प्रेस पकडण्याच्या गोंधळात पाय निसटून सात वर्षांची चिमुरडी प्लॅटफॉर्ममधील गॅपमध्ये पडते आणि एकच गोंधळ उडतो. शनिवारी सकाळी मध्य रेल्वेवरील दादरच्या प्लॅटफॉर्म क्रमांक चारवर थरारक प्रसंग निर्माण होतो. आपली बहीण प्लॅटफॉर्मच्या गॅपमध्ये पडल्याचे समजताच भाऊ जिवाच्या आकांताने तिला सुरक्षितपणे वाचवण्यासाठी उडी मारतो. अखेरीस दोघेही अंगावर एकही ओरखडा उमटता बचावतात.
उत्तर प्रदेशमधून आलेले भारद्वाज कुटुंबीय शनिवारी मुंबईहून पुण्याच्या दिशेने निघाले होते. त्यात संजीव भारद्वाज आणि त्यांच्या दोन बहिणी, भावाचा समावेश होता. सकाळी सात वाजून एक मिनिटांनी दादर येथून सुटणारी इंटरसिटी पकडण्यासाठी त्यांची लगबग सुरू झाली होती. ही गाडी पकडण्याच्या गोंधळात सुनीताचा (७) पाय सरकून ती गॅपमध्ये अडकली. हे पाहताच तिची बहीण अनिता (१६) आणि दुसरा भाऊ शंकर यांनी मदतीसाठी टाहो पुकारला. संजीवने खाली उतरून तिला आडवे पडत घट्ट धरून ठेवले. त्यांचा आवाज ऐकून एका प्रवाशाने तात्काळ आपत्कालीन मदतीसाठी असणारी साखळी खेचली. त्याचवेळी रेल्वे सुरक्षा बलाच्या मिस्त्री नावाच्या कॉन्स्टेबलनेही गार्डला त्याची माहिती दिली. तोपर्यंत इंटरसिटी सुमारे २० मीटर पुढे गेली होती. पण सुनीता आणि तिच्या मदतीसाठी धावलेला संजीव हे दोघेही सुरक्षित होते.