*सहा लोकसभा निवडणूकांचा समावेश * महत्वाचे दूरध्वनी व उपयुक्त माहिती
यवतमाळ – यवतमाळ-वाशिम लोकसभा निवडणूकीच्या अनुषंगाने गेल्या सहा लोकसभा निवडणूकांच्या विधानसभा मतदारसंघनिहाय आकडेवारींचा समावेश असलेली पूर्वपीठिका जिल्हा माहिती कार्यालयाच्यावतीने काढण्यात आली आहे. या पुस्तिकेचे विमोचन जिल्हाधिकारी अश्विन मुद्गल यांच्याहस्ते नुकतेच झाले. यावेळी जिल्हाधिकाऱ्यांसह परिविक्षाधीन आयएएस अधिकारी राधाविनोद शर्मा, निवासी उपजिल्हाधिकारी राजेंद्र देशमुख, उपजिल्हा निवडणूक अधिकारी नरेंद्र फुलझेले, उपविभागीय अधिकारी तथा सहाय्यक निवडणूक निर्णय अधिकारी भागवत डोईफोडे,
जिल्हा माहिती अधिकारी मंगेश वरकड, तहसिलदार राजेंद्र अडपावार आदी उपस्थित होते.सदर पूर्वपीठिकेत सन 1991 पासून झालेल्या सहा लोकसभा निवडणूकींची विधानसभा मतदारसंघनिहाय आकडेवारी देण्यात आलेली आहे. त्यात मतदारसंघनिहाय उमेदवारांना मिळालेल्या मतदानाचा समावेश आहे. यासह होणाऱ्या लोकसभा निवडणूकीच्या अनुषंगानेही उपयुक्त अशी माहिती आहे. विशेष म्हणजे पुर्वी स्वतंत्र असलेल्या यवतमाळ व वाशिम या लोकसभा मतदारसंघाची स्वतंत्र माहिती देण्यात आली आहे. सद्या असलेली मतदारांची संख्या, निवडणूकीदरम्यान राजकीय पक्षांनी काय करावे, काय करू नये याबाबत उपयुक्त मार्गदर्शिका, निवडणूक निर्णय अधिकारी, पोलिस अधिकारी, निवडणूक आयोग नवी दिल्ली, मुख्य निवडणूक अधिकारी मुंबई, मिडीया सेंटर आदींचे महत्वपूर्ण दुरध्वनी क्रमांकही पूर्वपीठिकेत देण्यात आले आहे. सदर पूर्वपीठिका मागील लोकसभा निवडणूकांची पार्श्वभूमी जाणून घेण्यासाठी माध्यमांचे प्रतिनिधी, निवडणूक विश्लेषक, निवडणूकीसंर्भात माहिती जाणून घेऊ इच्छिणाऱ्या अभ्यासकांसाठी अतिशय उपयुक्त ठरणारी आहे.

औरंगाबाद – गानसम्राज्ञी लता मंगेशकर यांच्यावर सर्वजण प्रेम करतात. त्यांनी भारतीय जनता पक्षाचे पंतप्रधानपदाचे उमेदवार नरेंद्र मोदी यांचे अँम्बेसेडर बनू नये, अशी अपेक्षा आम आदमी पार्टीच्या नेत्या मेधा पाटकर यांनी येथे व्यक्त केली. गुजरातचा विकास झाला, हे फसवे चित्र आहे. दंगलीसह अन्य वास्तव वेगळेच आहे, ते त्यांनी पाहावे. लतादिदिविषयी असलेल्या प्रेमापोटीच ही अपेक्षा करत असल्याचेही पाटकरांनी नमूद केले. दरम्यान, शिवसेनेचे खासदार चंद्रकांत खैरे; तसेच काँग्रेस नेते राजेंद्र दर्डा यांच्या शेतजमिनी झालर क्षेत्र आरक्षणातून कशा वगळल्या गेल्या, असा सवालही त्यांनी केला.
सन्मित्र कॉलनी येथे आम आदमी पार्टीच्या मध्यवर्ती प्रचार कार्यालयाचे उद्घाटन शनिवारी मेधा पाटकर यांच्या हस्ते झाले. त्यानंतर त्या पत्रकारांशी बोलत होत्या. औरंगाबाद लोकसभा मतदारसंघातील उमेदवार सुभाष लोमटे, जालन्याचे उमेदवार दिलीप म्हस्के, अण्णासाहेब खंदारे, मनिषा चौधरी, अजमल खान आदी उपस्थित होते. गारपिटीमुळे शेतपिकाचे मोठे नुकसान झाले आहे. शेतकरी अडचणी सापडला असून, आत्महत्या होत आहेत. त्यांच्यात मोठा आक्रोश असतानाच प्रस्थापित राजकीय पक्षाचे नेते जाहीर सभावर कोट्यवधी रुपये खर्च करत आहेत. संवेदनाशून्य राजकारण होत आहे, अशी टीका पाटकर यांनी केली. भाजपचे नेते नरेंद्र मोदी यांनी गेल्या १७ वर्षांत अदानी यांना कोट्यवधी रुपये मिळवून देण्यासाठी मदत केली आहे, असा आरोपही त्यांनी केला. गानसम्राज्ञी लता मंगेशकर यांनी भाजप नेते नरेंद्र मोदी यांचे अँम्बेसेडर बनू नये, अशी अपेक्षाही पाटकरांनी व्यक्त केली. साखर कारखाने विक्रीत मोठ्या प्रमाणात घोटाळे झाले, परंतु हे प्रकरण विरोधकांनी लावून धरले नाही, असा आरोपही केला. चुनवा नही चुनौती है, असा नारा त्यांनी देत कार्यकर्त्यांनी सोशल नेटवर्किंगचा प्रभावी वापर करणाऱ्या बरोबरच जनतेच्या गाठीभेटीवरच अधिक भर द्यावा, आंदोलनाचे राजकारण करावे, असे आवाहन केले. या सभेत आपने ४४६२ रुपयांचा निधी गोळा करण्यात आला.

मुंबई- मानखुर्द येथील दोन गतिमंद विद्यार्थिनींवर शाळेतील शिपायानेच लैंगिक अत्याचार केल्याची घटना पुढे आली आहे. याप्रकरणी ट्रॉम्बे पोलिसांनी शिपायाला अटक केली असून त्याच्याविरोधात गुन्हा दाखल करण्यात आला आहे. या गतिमंद विद्यार्थिनींच्या समुपदेशनादरम्यान हा प्रकार उजेडात आल्याची माहिती वरिष्ठ पोलिस निरीक्षक विजय कदम यांनी दिली.
गतिमंद विद्यार्थिनींवर शिपायाकडून बलात्कार
राजेश दत्तात्रय तरे (३८) असे अटक आरोपीचे नाव असून, तो ट्रॉम्बे येथील परमेश्वर मंदिराजवळील केणी निवास येथील रहिवासी आहे. तो तेथीलच एका गतिमंद मुलांच्या शाळेत शिपाई म्हणून कामाला आहे. गतिमंद विद्यार्थ्यांची शाळा व वसतिगृह ट्रॉम्बे परिसरातच आहे. १६ व १८ वयोगटांतील दोन गतिमंद मुलींवर त्याने बलात्कार केल्याचे पुढे आले आहे. या प्रकरणी आणखी काही मुलींसोबतही त्याने असा प्रकार केला आहे का, यादृष्टीने तपास सुरू असल्याचे कदम यांनी सांगितले. आरोपी तरे याने एका विद्यार्थिनीवर चार महिन्यांपूर्वी शाळेतील शौचालयात बलात्कार केला होता. तर दुस-या मुलीशीही त्याने शौचालयातच अश्लील चाळे करून अनैसर्गिक कृत्य केल्याचे तक्रारीत नमूद करण्यात आले आहे.
‘टाटा इन्स्टिटय़ूट ऑफ सोशल सायन्स’च्या ‘चुनौती’ या प्रकल्पांतर्गत गतिमंद मुलींचे समुपदेशन करण्यात आले. त्यात विनिता खेडकर व जिलेल लॉरेन्स या दोन समुपदेशकांना या प्रकाराची माहिती मिळाल्यानंतर बलात्काराच्या दोन्ही घटना उजेडात आल्या. त्यानंतर या दोन्ही समुपदेशकांनी याबाबत शाळेच्या प्रभारी माधुरी रामेकर यांना सांगितले. त्यांनी शुक्रवारी रात्री ट्रॉम्बे पोलिस ठाण्यात तक्रार दाखल केली. त्यानुसार पोलिसांनी शिपाई तरे याला अटक केली.

नवी दिल्ली- पाकिस्तानच्या फरार आरोपीसह इंडियन मुजाहिदीनच्या चार संशयित दहशतवाद्यांना दिल्ली पोलिसांच्या विशेष पथकाने राजस्थानमधून अटक केली आहे. त्यातील एकाची ओळख पटली असून त्याचे नाव वकास असल्याचे विशेष पोलिस पथकाचे आयुक्त एस. एम. श्रीवास्तव यांनी सांगितले.
पाकिस्तानचा फरार आरोपी वकास याचा मुंबईतील झवेरी बाजारमधील १२ जुलै २०११ मध्ये झालेल्या बाँबस्फोटासह अनेक बाँबस्फोट प्रकरणात हात आहे. राजस्थानच्या जोधपूर भागात ते पोलिसांना सापडले. त्यांच्याकडून मोठ्या प्रमाणावर स्फोटके जप्त करण्यात आली आहेत. आगामी लोकसभा निवडणूक काळात मोठ्या प्रमाणावर हाहाकार माजवण्याचा त्यांचा कट पोलिसांनी उधळून लावला आहे.वकास हा पाकिस्तानी दहशतवादी सप्टेंबर २०१० मध्ये असदुल्ला अख्तर उर्फ हद्दी याच्यासह भारतामध्ये पहिल्यांदा आला होता. हद्दीला इंडियन मुजाहिदीनचा प्रमुख यासीन भटकळ याच्यासह अटक केली होती. वकास हा स्फोट घडवून आणण्यात तरबेज आहे. जामा मशीद (सप्टेंबर २०१०), वाराणसी (डिसेंबर २०१०), मुंबई (जुलै २०११), पुणे (ऑगस्ट २०१२) व हैदराबाद (फेब्रुवारी २०१३) येथे झालेले बाँबस्फोट वकास यानेच घडवून आणल्याचा दाट संशय आहे.