यवतमाळ – शिवसैनिकांनी गाव, विभागाच्या सेनापतीची जबाबदारी घेऊन लोक सभेचा किल्ला लढवून महायुतीच्या उमेदवार भावना गवळी यांना विजयी करण्यासाठी प्रयत्न करा असे आवाहन आ. संजय राठोड यांनी केले.
मातोश्री विमलबाई चिरडे मंगल कार्यालय दिग्रस आयोजीत कार्यकर्ता मेळाव्यात ते बोलत होते. सभेच्या अध्यक्षस्थानी भाजप जिल्हाध्यक्ष राजु डांगे, नामदेव खोब्रागडे, सुधाकर तायडे, परमानंद अग्रवाल, अजय बिहाडे, बाळासाहेब मुनगिनवार, मोहन भोयर, जितेंद्र महाराज, राजेंद्र पडगिलवार, महादेव सुपारे यांच्यासह अन्य पदाधिकारी उपस्थित होते. पुढे बोलताना ते म्हणाले की, ६० वर्षात काँग्रेसने रोटी, कपडा और मकान चा प्रश्न कायम ठेवला. महिला अत्याचारांच्या घटनेत वाढ झाली आहे. शेतकरी-शेतमजुर आत्महत्या करीत असल्याचा आरोप त्यांनी केला. यावेळी महायुतीच्या उमेदवार भावना गवळी बोलतांना म्हणाल्या की, मिडीयाच्या माध्यमातून जनता जागृत झाली असून काँग्रेसचे पितळ उघडे पडत असल्याने काँग्रेस नेते नैराश्याच्या गर्तेत सापडल्याचेही त्या म्हणाल्या. तर भाजप जिल्हाध्यक्ष राजेंद्र डांगे म्हणाले की, देशात खरी लोक शाही आणण्यासाठी काँग्रेस आघाडी सरकारला उलथविण्याचा संकल्प करा. नरेंद्र मोंदीना पंतप्रधान करायचे असेल तर २७२ खासदारांच्या आकड्या पर्यंत पोहचण्यासाठी आवर्जुन मतदान करा असे आवाहनही त्यांनी केले.

यवतमाळ – शहरातील तलाव फैल परिसरातील एका खोलीत असलेला गुटखा साठा आज सायंकाळी जप्त केला. उपविभागीय पोलीस अधिकाºयांच्या पथकाने ही कार्यवाही केली असून एकास अटक केली.
बंट्टी उर्फ अतुल सुभाष डगवार (२८) रा. तलाव फैल असे आरोपीचे नाव असून त्याचे सरोज टॉकीज जवळ साईराम सुगंध सेंटर आहे. दररोज अवैधपने गुटखा, जर्दा तम्बाखुची विक्री करतो. तलाव फैलमधील नेवारे या महिलेच्या घरी त्याने खोली भाड्याने करुन तेथे गुटखा साठवून ठेवत होता. या बाबतची गुप्त माहिती उपविभागीय पोलीस अधिकारी राहुल मदने यांच्या पथकाला मिळाली होती. त्यावरुन पथकाने आज शनिवारी सायंकाळी धाड टाकुन खोलीची झडती घेतली. यामध्ये गुटखा, जर्दा तंम्बाखु पुड्या निदर्शनास आल्या. यावेळी पोलिसांनी गुटखा साठा जप्त करुन आरोपीस अटक केली. यावेळी अन्न व औषध प्रशासन विभागाचे अन्न सुरक्षा अधिकारी विश्वजीत शिंदे, प्रफुल येवले यांना पाचारण करुन गुटखा स्वाधिन केला. ही कारवाई उपविभागीय पोलीस अधिकारी राहुल मदने यांच्या मार्गदर्शनाखाली जमादार राहुल मनवर, तुषार नेवारे, इकबाल शेख, वसीम शेख, प्रमोद मडावी, विजय जाधव, संजय कांबळे, अन्सार बेग यांनी केली.

इंटरनेट ही जगातील सर्वात मोठी गरज बनली आहे. जगाच्या कानाकोप-यांतील कोणतीही माहिती तुम्हाला इंटरनेटवरून तत्काळ मिळू शकते. याच इंटरनेटवर माहितीबरोबरच जगातील छायाचित्रांचा खजिना असतो. असंख्य नागरिक इंटरनेटवरून छायाचित्रे डाउनलोड करीत असतात. याच नेटवर अवैध छायाचित्रांचे प्रमाण मोठे आहे. ही छायाचित्रे ओळखणारी यंत्रणा संशोधकांनी शोधून काढली आहे.
नेदरलॅँडच्या व्टेन्ट विद्यापीठातील संशोधकांनी इंटरनेट वापरणा-या व्यक्तींच्या खासगीपणाला धक्का न लावता ही पद्धत विकसित केली आहे. या यंत्रणेचा वापर करून तुमचे नेटवर्क ‘स्वच्छ’ ठेवण्यास मदत मिळते. बालकांचे अश्लील चित्रीकरणासह अन्य बाबी शोधून काढण्यासाठी पोलिसांना या यंत्रणेचा लाभ घेता येऊ शकतो. इंटरनेटवरील तुमचा डेटाबेस गुन्हेगारांच्या हाती लागल्यास त्याचा गैरवापर होऊ शकतो. इंटरनेटवरील हॅकर्सचा माग काढणे ही तुम्हाला कठीण बनू शकते. पोलिसांच्या डेटाबेसमध्ये या नवीन यंत्रणेचा वापर केल्यास त्यांना अवैध छायाचित्रांचा धोका राहणार नाही, असे संशोधक अँड्रस पीटर यांनी सांगितले.

श्रीनगर – जम्मू-काश्मीरच्या काथुआ जिल्ह्यात दहशतवाद्यांनी नागरिकांवर केलेल्या अंदाधुंद गोळीबाराची घटना ताजी असतानाच, शनिवारी सकाळी श्रीनगरमधील लष्करी तळाच्या बाहेर स्फोटके सापडली.
श्रीनगरच्या बीमीना भागात गस्तीवर असणा-या जवानांना लष्करी तळाच्या बाहेरील रस्त्यावर एक संशयास्पद बॅग आढळली. जवानांनी ही बॅग उघडली असता त्यात प्रेशर कुक होता.जवानांनी तात्काळ बॉम्ब निकामी पथकाला पाचारण केले. या कुकरमध्ये पाच किलो स्फोटके होती. बॉम्ब निकामी पथकाने ही सर्व स्फोटके नष्ट केली. जवानांच्या सर्तकतेमुळे मोठी हानी टळली. कथुआमध्ये शुक्रवारी झालेल्या दहशतवादी हल्ल्यानंतर सुरक्षापथकांनी सर्तकतेचा इशारा जारी केला आहे. महत्वाच्या लष्करी तळावरील सुरक्षा बंदोबस्त वाढवण्यात आला होता.

मिरपूर- यजमान बांगलादेशवर आठ विकेटनी विजय मिळवत माजी विजेता भारताने टी-२० वर्ल्डकपमधील उपांत्य फेरी जवळपास निश्चित केली. गटवार साखळीतील भारताचा हा सलग तिसरा विजय आहे. या विजयासह भारताने ब गटात सहा गुणांसह अव्वल स्थान कायम ठेवले आहे.
विराट कोहली आणि रोहित शर्माच्या शतकी भागीदारीच्या जोरावर भारताने शुक्रवारी बांगलादेशचे १३९ धावांचे आव्हान नऊ चेंडू राखून पार केले. बांगलादेशने विजयासाठी दिलेल्या १३९ धावांचा पाठलाग करताना भारताची सुरुवात खराब झाली. शिखर धवन केवळ एक धावा काढून बाद झाला. त्यानंतर रोहित आणि विराट यांनी दुस-या विकेटसाठी शतकी भागीदारी केली. शर्मा ५६ धावांवर बाद झाला. त्यानंतर विराट आणि महेंद्रसिंग ढोणीने विजयाची औपचारीकता पूर्ण केली. त्याआधी पहिल्या दोन टी-२० लढतींतील ‘सामनावीर’ ठरलेला भारताचा लेगस्पिनर अमित मिश्राने पुन्हा प्रभाव (तीन विकेट) पाडल्याने बांगलादेश सात बाद १३८ इतकीच मजल गाठू शकला. तीन बाद २१ या स्थितीतून यजमानांनी स्वत:ला सावरले असले तरी त्यांना अपेक्षित दीडशे धावांचाही पल्ला गाठता आला नाही. मिश्राने टाकलेल्या डावाच्या शेवटच्या षटकात त्याची हॅटट्रिकची संधी हुकली असली तरी ४-०-२६-३ असे त्याचे पृथ:करण होते. पुन्हा एकदा त्याने गुगली हे त्याचे प्रभावी अस्त्र वापरले.तत्पूर्वी, सलग तिस-या लढतीत भारताने नाणेफेक जिंकून प्रथम क्षेत्ररक्षण स्वीकारले. भारताने सलग तिस-या लढतीत संघात बदल केला नाही. बांगलादेशची सुरुवात चांगली झाली नाही. तमिम इक्बाल (६), शमशूर रहमान (०) यांना डावाच्या चौथ्या षटकात लागोपाठच्या चेंडूंवर ऑफस्पिनर रवीचंद्रन अश्विनने बाद केले. मात्र त्याचीही हॅटट्रिकची संधी हुकली. मात्र पुढच्याच षटकात भुवनेश्वरने धोकादायक शाकिब अल हसनला (१) त्रिफळाचित करत बांगलादेशची अवस्था बिकट केली. मात्र कर्णधार मुशफिकुर रहिम आणि फॉर्मात असलेला सलामीवीर अनामूल हक यांनी चौथ्या विकेटसाठी ४६ धावा करत बांगलादेशला सावरले. शामीने मुशफिकुरला (२४) बाद करत ही जोडी फोडली.पाठोपाठ अनामूलही ४३ चेंडूंत पाच चौकार आणि दोन षटकारांसह ४४ धावा फटकवत बाद झाला. मिश्राने त्याला त्रिफळाचीत केले. मात्र बांगलादेशला १३० पार नेण्याचे काम नासीर हुसेन (१६) आणि मोहम्मदुल्ला (२३ चेंडूंत नाबाद ३३) यांनी केले. सातव्या क्रमांकाचा फलंदाज मोहमदुल्लाच्या खेळीत पाच चौकार आणि एका षटकाराचा समावेश आहे.

कराची – पाकिस्तानातील सिंध प्रांतात तीन अज्ञात व्यक्तींना हनुमान मूर्ती तोडून नंतर मंदिर पेटवून दिल्याची संतापजनक घटना घडली आहे. या घटनेनंतर परिसरात तणाव निर्माण झाला असून मूर्तीची विटंबना करणाऱ्यांवर तत्काळ कारवाई करा, अशी मागणी करत जमाव रस्त्यावर उतरला आहे.
लतीफाबाद भागात असलेल्या या मंदिरात येत्या १४ एप्रिल रोजी वार्षिकोत्सवाचे आयोजन करण्यात आले होते. त्याआधीच ही घटना घडल्याने खळबळ उडाली आहे. मंदिराची देखभाल करणारा पुजारी दर्शन याने सांगितल्यानुसार, शुक्रवारी तीन व्यक्ती मंदिरात होणाऱ्या प्रार्थनेसाठी आले होते. पूजा-अर्चा झाल्यानंतर या तिघांनी हनुमानाच्या मूर्तीला लक्ष्य केले. मूर्तीची विटंबना करताना तेथील तेल ओतून या समाजकंटकांनी मंदिरात आग लावली. त्यामुळे एकच हलकल्लोळ माजला आणि त्याचाच फायदा घेऊन हल्लेखोर पसार झाले. या घटनेचे वृत्त परिसरात पसरताच संतप्त प्रतिक्रिया उमटल्या. या भागात हिंदू वस्ती मोठ्या प्रमाणात आहे. त्यांनी रस्त्यावर उतरून जोरदार निदर्शने केली. हा तणाव लक्षात घेऊन पोलीस महानिरीक्षक सनाउल्ला अब्बासी यांनी तडकाफडकी स्थानिक पोलीस उपअधिक्षक आणि पोलीस निरीक्षकांना निलंबित केले.