यवतमाळ  – बाभुळगाव वनपरिक्षेत्रातील आसोला शिवारात  बिबट्याचा मृतदेह आढळल्याने खळबळ उडाली आहे. बुधवारी दुपारी हा प्रकार उजेडात आला असून अळ््यांनी वाघाचे शरीर पोखरल्याचे समोर आले आहे. या बिबट्याच्या अंगावर कुठल्याही जखमा नसून विष प्रयोग केल्याचे बोलल्या जात आहे.
यवतमाळ वनविभागातील बाभुळगाव वनपरिक्षेत्रातील आसोला जंगलात दुर्गंधी सुटल्याने नागरिकांनी तेथे जाऊन पाहणी केली असता तेथे कुजलेला बिबट्याचा मृतदेह दिसला. या बाबतची माहिती मिळताच उपवनसंरक्षक प्रेमचंद लाकरा, सहा. उपवनसंरक्षक वाभळे, उपवनसंरक्षक दहिवले, अविनाश घनमोडे, गवई, यवतमाळ वनपरिक्षेत्र अधिकारी नंदकिशोर जगताप, मानद वनजीव रक्षक शाम जोशी यांनी घटनास्थळ गाठून पाहणी केली. यावेळी मृतक बिबट्याचे वय दहा वर्षापेक्षा जास्त असून तो म्हातारा झाला होता. त्याच्या अंगावर कुठल्याही जखमा नसुन कातडी व नख साबुत होते. त्यामुळे विषप्रयोग करुन बिबट्याला मारल्याची चर्चा वन्यप्रेमीमध्ये सुरु आहे. नेर येथील पशुवैद्यकीय अधिकरी डॉ. खोडवे यांना पाचारण करुन घटनास्थळावरच शवविच्छेदन करण्यात आले. बिबट्याच्या मृत्यूचे गुढ  शवविच्छेदन अहवालानंतरच उलगडणार आहे.

» सर्वसमावेशक विकासाचे आश्वासन
» १०० दिवसात महागाई कमी करणार
» पाच वर्षात ७५ हजार मेगावॅट वीज निर्मिती करणार
» महिला आरक्षण विधेयक मंजूर करण्याच आश्वासन
» आरोग्य सेवा कायदेशी अधिकाराच्या कक्षेत आणणार
» वीस वर्ष भाडयाच्या घरात राहिल्यानंतर मालकी हक्क देण्याच आश्वासन
» १० हजार लोकांशी चर्चा करुन तयार केला जाहीरनामा
नवी दिल्ली (वृत्तसंस्था ) – सर्वसमावेशक विकासाचे वचन देत काँग्रेसने २०१४ लोकसभा निवडणूकीसाठी बुधवारी निवडणूक जाहीरनामा प्रसिध्द केला. काँग्रेस अध्यक्ष सोनिया गांधी, पंतप्रधान मनमोहन सिंग आणि काँग्रेस उपाध्यक्ष राहुल गांधी यांच्या उपस्थितीत पक्ष कार्यालयात हा जाहीरनामा प्रसिध्द करण्यात आला. २००९ च्या निवडणूक जाहीरनाम्यातील ९० टक्के आश्वसाने पूर्ण केल्याचे राहुल गांधी यांनी सांगितले.
मागच्या पाच महिन्यात समाजाच्या विविध स्तरातील लोकांशी चर्चा करुन हा जाहीरनामा तयार केल्याचे राहुल यांनी सांगितले. जाहिरनामा तयार करताना पहिल्यांदाच आम्ही लोकांकडे जाण्याचा निर्णय घेतला. जाहीरनामा तयार करताना नेत्यांबरोबरच नव्हे तर शक्य असलेल्या प्रत्येक घटकांबरोबर चर्चा केली. व्यावसायिक आणि गरिबांकडे दुर्लक्ष करुन आपण विकास साध्य करु शकत नाही असे राहुल म्हणाले. विरोधकांपेक्षा आम्ही जास्त विकास करुन दाखवला आहे. आज आपण गुजरात मॉडेलबद्द ऐकतो पण ते एकच मॉडेल आहे. समानतेने सर्वांचा विकास करण्याचे मॉडेल काँग्रेसकडे आहे असे पंतप्रधान मनमोहन सिंग यांनी यावेळी सांगितले. काँग्रेसच्या जाहीरनाम्यामध्ये रोजगार निर्मितीबरोबर विकासाची दूरदृष्टी असल्याचे मनमोहन यांनी सांगितले.यंदाच्या निवडणुकीत चांगली धोरणे आणि प्रशासन कोण देतो हे महत्वाचे ठरणार आहे. या जाहीरनाम्यात आम्ही आरोग्याबरोबर घराचा अधिकार देण्याचेही आश्नवासन दिले आहे. ज्येष्ठांना निवृत्ती वेतनाचाही अधिकार देणार आहोत. चांगल्या धोरणांबरोबरच नागरिकांचे सवैधानिक अधिकारही महत्वाचा असल्याचे सोनियांनी सांगितले.

जीनिव्हा (वृत्तसंस्था ) – हवेतील प्रदूषणामुळे २०१२मध्ये जगभर ७० लाख नागरिकांचा मृत्यू झाल्याची माहिती संयुक्त राष्ट्र संघटनेच्या आरोग्य विभागाने(डब्लूएचओ) दिली आहे. स्वयंपाकाच्या धुरापासून स्वयंपूर्ण धुरापर्यंतच्या विविध प्रकारच्या घटकांमुळे हवेतील वाढत्या प्रदूषणाबाबत या अहवालात धोक्याचा इशारा देण्यात आला आहे.
घरांमधील आणि बाहेरील अशा दोन्ही प्रकारचे हवा प्रदूषण हा सध्याचा मोठा धोका आहे. मुख्य म्हणजे विकसित आणि विकसनशील देशांना तो सारख्याच प्रमाणात सतावत आहे, असे जागतिक आरोग्य संघटनेच्या सार्वजनिक व पर्यावरण आरोग्याच्या प्रमुख मारिया नीरा यांनी म्हटले आहे. जगात प्रत्येकी आठपैकी एकाच्या मृत्यूचे कारण हवेतील प्रदूषण आहे. फुप्फुसाचा कॅन्सर, श्वसनाचे विकार, ह्रदयविकार अशा विविध आजारांचा त्यात समावेश असल्याचेही त्यांनी स्पष्ट केले. आग्नेय आशियाला या प्रदूषणाचा सर्वाधिक फटका बसत आहे. त्यात भारत, इंडोनेशिया, चीन, दक्षिण कोरिया, जपान, फिलिपिन्स आदी देशांचा समावेश आहे. या देशांमध्ये एकूण ५० लाख ९० हजार जणांचा मृत्यू झाला आहे. ४० लाख ३० हजार मृत्यू घरगुती प्रदुषणामुळे झाले आहेत. त्यात कोळसा, सरपण आदींपासून निघणाऱ्या धुराच्या त्रासामुळे झालेले मृत्यू आहेत. बाहेरच्या वातावरणातील प्रदूषणामुळे ३० लाख ७० हजार जणांचा जीव गेला. कोळशाचा धूर; तसेच डिझेल इंजिनच्या धुराचा त्रास त्यासाठी कारणीभूत आहे. घरगुती आणि बाहेरच्या प्रदूषणामुळे गेलेले बळीही मोठ्या संख्येने आहेत. ही आकडेवारी धक्कादायक आणि काळजी करण्यासारखी असल्याचेही नीरा यांनी म्हटले आहे.आपण ज्या हवेत श्वास घेतो, ती शुद्ध राखण्यावर सर्वांनीच भर द्यायला हवा. हवेतील प्रदुषणामुळे होणारे मृत्यू खूप वाढल्याने ही काळजी घेण्याची गरज अधोरेखित झाली आहे.- मारिया नीरा, प्रमुख, सार्वजनिक व पर्यावरण आरोग्य विभाग, जागतिक आरोग्य संघटना

नवी दिल्ली –  उत्तर प्रदेशातील मुजफ्फरनगर दंगलीसाठी राज्य शासन आणि स्थानिक प्रशासनच जबाबदार असल्याचे सुप्रीम कोर्टाने सांगितले आहे. तसे असले तरी दंगलीप्रकरणी राज्य सरकारकडून करण्यात आलेला तपास पुरेसा आहे. तसेच सीबीआय तपासाची आणि एसआयटी चौकशी करण्याचीही आवश्यकता नसल्याचे सुप्रीम कोर्टाने स्पष्ट केले आहे. राज्य सरकारकडून करण्यात आलेला तपास पुरेसा आहे, असेही स्पष्ट झाले आहे.
दंगलीला सुरुवात झाली त्या काळात राज्य सरकारकडून कडक पावले उचलण्यात आली नाहीत. त्यामुळेच दंगल आणखी पसरली, असे कोर्टाने स्पष्ट म्हटले आहे. दंगलीतील पीडितांना सुरक्षा देण्यात आली पाहिजे, असे आदेशही कोर्टाकडून देण्यात आले आहेत. जनतेच्या प्रचंड विरोधामुळे आम्ही पहिल्या काही घटनांमध्ये आरोपींना अटक करू शकलो नाही, असे राज्य सरकारकडून सांगण्यात आले होते. मात्र हा तर्क कोर्टाने सरळ अमान्य करत राज्य सरकार ती परिस्थिती हाताळण्यास असक्षम ठरल्याचे स्पष्ट म्हटले आहे. मुजफ्फरनगर येथे २०१३ मध्ये उसळलेल्या दंगलीत ५० जणांचा मृत्यू झाला होता. या प्रकरणी उत्तर प्रदेश राज्य सरकार विरोधात एक याचिका दाखल करण्यात आली होती. तसेच या दंगलींची सीबीआय चौकशी करण्यात यावी, अशी मागणीही यावेळी करण्यात आली होती.