मुंबई : राज्याच्या आरोग्य क्षेत्रातील आपत्कालीन वैद्यकीय सेवा हा उपक्रम नाविन्यपूर्ण असून जनतेच्या सेवेसाठी विनाशुल्क असणारा लोकाभिमुख व क्रांतीकारी उपक्रम आहे, असे मुख्यमंत्री पृथ्वीराज चव्हाण यांनी सांगितले.
आरोग्य विभागातर्फे आज पासून आपत्कालीन वैद्यकीय सेवांतर्गत 937 अत्याधुनिक रुग्णवाहिका राज्यभरात सुरु करण्यात आल्या असून या रुग्णवाहिकांना मुख्यमंत्री श्री.चव्हाण, केंद्रीय राज्यमंत्री मिलिंद देवरा, आरोग्य मंत्री सुरेश शेट्टी, राज्यमंत्री फौजिया खान यांच्या हस्ते शनिवारी हिरवा झेंडा दाखवून या योजनेचा शुभारंभ करण्यात आला. येथील मरीन लाईन्स येथे हा दिमाखदार सोहळा संपन्न झाला. यावेळी मुख्यमंत्री म्हणाले, आपत्कालीन वैद्यकीय सेवाही भारतातील पहिली अत्याधुनिक आरोग्य सेवा असून या उपक्रमातील रुग्णवाहिका जागतिक दर्जाच्या आहेत. या सेवेत प्रशिक्षित डॉक्टर, ॲटोमॅटीक व्हेहिकल लोकेशन टेक्नॉलॉजी (इव्हीएलटी) उपकरणांचा समावेश आहे. राजीव गांधी जीवनदायी आरोग्य योजना, जीवन अमृत योजनांच्या पाठोपाठ राज्यातील जनतेला आरोग्य क्षेत्रातील अजून एका अभिनव योजनेची आम्ही भेट देत आहोत. आपत्कालीन परिस्थितीत 108 क्रमांक फिरविल्यास 20 ते 30 मिनिटात सुसज्ज रुग्णवाहिका उपलब्ध होऊन रुग्णांचा जीव वाचविण्यास मदत होणार आहे, असेही श्री.चव्हाण यांनी यावेळी सांगितले. आरोग्य मंत्री म्हणाले, राज्य शासनाने सामान्यांच्या सेवेसाठी अजून एक अभूतपूर्व योजना अंमलात आणली आहे. गंभीर आजारात आणि आपत्कालीन परिस्थितीत तात्काळ वैद्यकीय सेवेची उपलब्धता या योजनेमुळे होणार आहे. आपत्कालीन परिस्थितीत शहरी भागात केवळ 20 मिनिटात तर ग्रामीण भागात 30 मिनिटांपर्यंत ही सेवा रुग्णांपर्यंत पोहोचणार आहे, या सेवेसाठी पुणे येथे मध्यवर्ती कॉल सेंटर कार्यरत असून त्याद्वारे रुग्णवाहिकांना संदेश देण्यात येतो, असेही आरोग्यमंत्र्यांनी यावेळी सांगितले.
मरीन लाईन्स येथे झालेल्या भव्य सोहळ्यात मुख्यमंत्र्यांच्या उपस्थितीत सुमारे 100 पेक्षा अधिक रुग्णवाहिकांना हिरवा झेंडा दाखवून या रुग्णवाहिका राज्यभरात पाठविण्यात आल्या. ढोल-ताशे, तुतारीच्या निनादात या योजनेचा शुभारंभ करण्यात आला. मुख्यमंत्री श्री.चव्हाण, आरोग्यमंत्री श्री.शेट्टी, आरोग्य राज्यमंत्री श्रीमती फौजिया खान यांनी यावेळी रुग्णवाहिकांची पाहणी केली.  कार्यक्रमास खासदार प्रिया दत्त, मुख्य सचिव जे.एस.सहारिया, माजी मुख्य सचिव जयंत कुमार बाँठीया, आरोग्य विभागाच्या प्रधान सचिव श्रीमती सुजाता सौनिक, सचिव श्रीमती मीना लोचन, ग्रामीण आरोग्य अभियानाचे प्रकल्प संचालक डॉ.गोविंद राज आदींसह मान्यवर उपस्थित होते.

नवी दिल्ली- दया अर्जावर निर्णय घेण्यास विलंब झाल्याने फाशीची शिक्षा जन्मठेपेत रुपांतर करा-या सर्वोच्च न्यायालयाच्या निर्णयावर केंद्र सरकारने पूनर्विचार याचिका दाखल केली आहे. दयेच्या अर्जावर निर्णय घेण्यास विलंब झाल्याने फाशीची शिक्षा रद्द करून त्याचे रुपांतर जन्मठेपेत करण्याच्या सर्वोच्च न्यायालयाचा निकाल अवैध असल्याचे केंद्राने म्हटले आहे. सर्वोच्च न्यायालयाने १५ कैद्यांची फाशीची शिक्षा जन्मठेपेत रुपांतर केली. या कैद्यांमध्ये माजी पंतप्रधान राजीव गांधी यांच्या मारेक-यांचाही समावेश होता.या महत्त्वाच्या विषयावर घटनात्मक पीठाने निर्णय द्यायला हवा. सर्वोच्च न्यायालयाच्या पीठाने दिलेला निकाल अवैध आणि दस्ताऐवजातील त्रूटींमुळे हा निकाल दिला गेला आहे. घटनेच्या कलम २१ नुसार (जगण्याचा हक्क) आरोपींच्या बाजूने निकाल दिला गेला आहे. मात्र, घटनेच्या कलम १४५ मधील तरतुदी लक्षात घेऊन पाच न्यायाधीशांच्या पीठाने याबाबत सुनावणी करणे गरजेचे आहे.

मुंबई – आंतरराष्ट्रीय ख्यातीच्या प्रसिध्द चित्रकार प्रफुल्ला डहाणूकर यांचे शनिवारी सकाळी मुंबईच्या जसलोक रुग्णालयात निधन झाले. त्या ८० वर्षांच्या होत्या.
गेल्या काही दिवसांपासून डहाणूकर आजारी होत्या. अखेर आज उपचारादरम्यान त्यांची प्राणज्योत मालवली. गोव्यात जन्मलेल्या डहाणूकर यांची संपूर्ण कारर्कीद मुंबईत घडली.मुंबईच्या जे.जे.स्कूल ऑफ आर्टमधुन १९५५ साली त्यांनी चित्रकलेची पदवी घेतली. त्या बॅचच्या त्या सुवर्णपदक विजेत्या पदवीधर होत्या. १९६१ साली फ्रान्स सरकारने त्यांना फाईन आर्टच्या पुढील शिक्षणासाठी शिष्यवुत्ती देऊन गौरवले होते.चित्रकलेतील कौशल्यासाठी प्रफुल्ला डाहणूकर यांना राष्ट्रीय-आंतरराष्ट्रीय पातळीवरील अनेक पुरस्कार मिळाले होते. जे.जे. आर्ट स्कूलमधून पदवीघेऊन बाहेर पडल्यानंतर काही दिवसातच प्रफुल्ला डहाणूकर यांना बॉम्बे आर्ट सोसायटीच्या वार्षिक चित्रप्रदर्शनात रौप्यपदक मिळाले. भारतासह संपूर्ण जगात वेगवेगळया चित्रप्रदर्शनांमध्ये त्यांच्या चित्रांची दखल घेतली गेली.

भंडारा – महाशिवरात्रीच्या पूर्वरात्री दरोडेखोरांनी जिल्ह्यातील तुमसर येथील सराफा व्यापारी संजय सोनी-राजपूत यांच्या घरी धाडसी दरोडा टाकला. तिघांची निर्घृण हत्या करून सुमारे पाच कोटी रुपयांचा ऐवज लुटला. यातील सात जणांना पोलिसांनी ताब्यात घेतले आहे. त्यांच्याकडून काही मुद्देमाल जप्त करण्यात आल्याची माहिती पोलिस अधीक्षक कैलास कणसे यांनी शुक्रवारी दिली. यातील पाच जण तुमसरातील माता वॉर्डमधील असल्याचे स्पष्ट झाले आहे. दरम्यान, संजय यांना विहीरगावनजीक गाडीतच संपविल्याची कबुली दरोडेखोरांनी दिली आहे.
पोलिस अधीक्षक कैलास कणसे यांनी पत्रपरिषद घेऊन घटनेचा उलगडा केला. संजय सोनी हे सोन्या-चांदीचे ठोक व्यापारी होते. व्यवसाय मोठा असल्याने त्यांना नेहमीच चंद्रपूर, उमरेड, गोंदिया, बालाघाट, नागपूर, शिवणी, वर्धा, बडनेरा, अमरावती अशा विविध भागात जावे लागत होते. त्यासाठी गाडीवर ड्रायव्हर त्यांनी ठेवला होता. तो सुटीवर असल्यास शहरातील ओळखीच्या चालकाला रोजंदारीवर ठेवले जात होते. यात दरोडेखोरांपैकी एक असलेल्या चालकाला दोनवेळा संजय यांच्यासोबत जाण्याचा योग आला. त्यांच्या बोलण्यातून या चालकाला व्यवसायाची कल्पना आली. नागपूर येथील काही मित्रांना त्याने याविषयीची माहिती दिली. दरोड्याची योजना आखली. त्यानुसार नेहमीच्या चालकाच्या सुटीवर जाण्याची वाट पाहणे सुरू होते. २५ फेब्रुवारीला संजय यांनी त्याला गोंदिया, आमगावला दुसऱ्या दिवशी जाण्याविषयीची कल्पना दिली. त्याने लगेच होकार दिला. सहकाऱ्यांना याविषयीची माहितीही दिली. ठरल्यानुसार तो संजय यांच्यासोबत गेला. गोंदियाहून निघताना सहकाऱ्यांना फोन करून तिरोडा तालुक्यातील तुमसर रोडवरील बिरसी फाट्याजवळ राहा, असे सांगितले. त्यानुसार ते बिरसी फाट्यावर आले. सोबत नॉयलॉनची दोरी आणि इतर साहित्य खरेदी केले. गाडी बिरसी फाट्यासमोरून तुमसरकडे वळताच त्यांनी दुचाकीने पाठलाग केला. विहिरगावनजीक शेतशिवारात लघुशंकेसाठी चालकाने गाडी थांबविली. मागून आलेल्या सहकाऱ्यांनी दोरीने संजय यांचा गळा आवळून हत्या केली.
संजय सोनी यांना वाटेतच संपविले
मृतदेह गाडीतच ठेवून तुमसरला आले. त्यांच्याकडे असलेली दुचाकी उपजिल्हा रुग्णालयासमोर ठेवली. गाडीचा आवाज ऐकताच संजय यांच्या पत्नी पुनम व मुलगा दुमिल बाहेर आले. मुलाने गेट उघडली. गाडी पार्क झाली. दरम्यान, दुमिलचे तोंड दाबून संजयला चक्कर येत असल्याने पाणी आणण्यास पूनम यांना सांगितले. हीच संधी साधत सातही जण घरात शिरले. पूनम यांना संशय आल्याने त्यांनी दागिने घेऊन जा, पण आम्हाला सोडून जा अशी विनवणी केली. मात्र गाडी चालकाने पूनम आपल्याला ओळखत असल्याचे सांगितले. नंतर दोघांचाही गळा आवळून खून करण्यात आला. गाडीत असलेला संजयचा मृतदेह काढून वरच्या खोलीत नेऊन ठेवण्यात आला. तिथून रोख व मुद्देमाल घेऊन मिटेवानीमार्गे हिंगणा शेतशिवारात रात्री ३ वाजतादरम्यान गेले. मुद्देमालाची वाटणी करून निघून गेले. या घटनेने तुमसरात खळबळ उडाली. पोलिसांनी तपासासाठी दहा पथके तयार केले. विविध ठिकाणी पाठविण्यात आले. दरम्यान, गाडीचा चालक फरार असल्याचे लक्षात आले. चौकशीनंतर त्याला ताब्यात घेण्यात आले.