दारव्हा-नेर २८ किमीचा थेट वीज मार्ग, पालकमंत्री संजय राठोड यांच्या प्रयत्नांना यश

यवतमाळ – नेर शहरातील वीजेच्या समस्येचा प्रश्न लवकरच निकाली निघणार असून नेर शहराला उच्च दाबाचा वीज पुरवठा करण्यासाठी तब्बल २२० केव्हीच्या नवीन वीज उपकेंद्राच्या प्रस्तावास राज्य मंत्रीमंडळाने मंगळवारी मान्यता दिली. गेल्या अनेक वर्षांपासून नेरवासीयांना ३३ केव्हीच्या उपकेंद्राद्वारे वीज पुरवठा सुरू आहे. मात्र या वीजकेंद्रावर अतिरिक्त भार येत असल्याने शहराचा वीज पुरवठा वारंवार खंडीत होतो. पालकमंत्री संजय राठोड हे आमदार असल्यापासून नेर येथील २२० केव्हीच्या उपकेंद्रासाठी पाठपुरावा करीत होते. आघाडीचे सरकार असताना त्यांनी यासंदर्भात विधानसभेत तारांकित प्रश्न उपस्थित करून कपात सूचनाही मांडली होती.

युती सरकारमध्ये महसूल राज्यमंत्रीपदी वर्णी लागल्यानंतर ना. संजय राठोड यांनी नेर येथील नवीन वीज उपकेंद्राचा प्रस्ताव मंजूर होण्यासाठी शासनस्तरावर सातत्याने पाठपुरावा केला. १० फेब्रुवारी रोजी झालेल्या मंत्रीमंडळाच्या बैठकीत हा मुद्दा मांडून २२० केव्हीच्या या नवीन वीज उपकेंद्रास मान्यता मिळविली. लवकरच तांत्रिक प्रक्रिया पूर्ण करून वीज उपकेंद्राच्या प्रत्यक्ष कामास प्रारंभ होणार असल्याचे पालकमंत्री संजय राठोड यांनी सांगितले.

३३ केव्ही आणि २८ किमीच्या नेर-दारव्हा थेट वीज मार्गास मंजुरी

नेर शहराला सध्या ३३ केव्हीच्या उपकेंद्राद्वारे वीज पुरवठा करण्यात येत आहे. मात्र शहरात वीजेची मागणी लक्षणीय वाढल्याने या केंद्रावर दाब येत आहे. नेर येथे २२० केव्हीच्या नवीन वीजउपकेंद्रास मान्यता मिळाली असतानाच दारव्हा येथून नेरपर्यंत थेट वीज पुरवठा करण्यासाठी नवीन वीजमार्ग टाकण्याचा मार्गही मोकळा झाला आहे. ४ कोटी ३३ लाख रूपये खर्चून दारव्हा ते नेर हा थेट २८ किलोमीटरचा, ३३ केव्हीचा नवीन वीज मार्ग टाकण्यात येणार आहे. सध्या अस्तित्वात असलेला मार्ग हा दारव्हा व्हाया लाडखेड असा फिरून येत असल्याने नेर येथे वीज पोहचेपर्यंत ती अनेक ठिकाणी वितरित होते. त्यामुळे दारव्हा येथून थेट नेर शहराला अखंडित वीज पुरवठा झाल्या विद्युत पुरवठा वारंवार खंडित होण्यासंदर्भात असलेल्या तक्रारी यापुढे राहणार नाहीत. तत्काळ प्रभावाने येत्या महिन्याभरात दारव्हा-नेर या विशेष वीजवाहक मार्गाचे काम सुरू करण्याचे प्रयत्न असल्याचे पालकमंत्री संजय राठोड यांनी सांगितले.