नवी दिल्ली- भूसंपादन विधेयकाला झालेल्या तीव्र विरोधामुळे आता भू-संपादन विधेयकात शेतक-यांच्या हितासाठी काही बदल करणे आवश्यक असल्यास ते करण्यास आम्ही तयार आहोत, असे पंतप्रधान नरेंद्र मोदी यांनी लोकसभेत सांगितले. राष्ट्रपती प्रणव मुखर्जी यांच्या अभिभाषणानंतर लोकसभेत उत्तर देताना पंतप्रधान मोदी यांनी नरमाईची भूमिका घेतली. मात्र भूसंपादन विधेयक, मनरेगा, काळा पैसा, जनधन योजना अशा अनेक मुद्यांवर मोदींनी विरोधकांना डिवचण्याचा प्रयत्न केला.
सुरुवातीला काही बदल करणे आवश्यक असल्यास ते बदल करु, असे म्हणणा-या मोदींनी काही क्षणातच सरकारने प्रस्तावित केलेले भूसंपादन विधेयक देशातील शेतक-यांच्या हिताचेच असल्याचे त्यांनी यावेळी सांगितले. मात्र त्यात काही बदल करायचे असल्यास विरोधी पक्षांनी चर्चा करावी. आम्ही खांद्याला खांदा लावून तुमच्यासोबत चालायला तयार आहोत. मात्र कारणाशिवाय आणि राजकीय स्वार्थासाठी भूसंपादन विधेयकाला विरोध करु नका, असे मोदी म्हणाले.
त्याचबरोबर काँग्रेसचे भू-संपादन विधेयक शेतक-यांच्या फायद्याचे असते तर लोकांनी त्यांना निवडून दिले असते, अशी मुक्ताफळेही मोदींनी उधळली. तसेच हे सरकार गरिबांसाठी काम करणार असल्याचे आश्वासन दिले. मनरेगा हा काँग्रेसचा ६० वर्षांतला जिवंत पुरावा आहे. हा पुरावा मी मिटवणार नाही. मनरेगा हे काँग्रेसच्या अपयशाचे स्मारक आहे. त्यामुळे आम्ही ती योजना बंद करणार नाही. काळ्या पैशाच्या बाबतीत जी-२० च्या व्यासपीठावर हा विषय घेण्यात आला आहे. तीन वर्ष सरकारने काळ्या पैशासाठी एसआयटी स्थापन केली नव्हती, आम्ही ते काम पहिल्याच मंत्रिमंडळाच्या बैठकीत केले. योजना कुणी आणली, तिचे नाव काय आहे, हा मुद्दा नाही, तर समस्या आहे हे सगळ्यांना मान्य आहे ना, मग समस्या कशी सोडवायची हा मुद्दा आहे. देश स्वच्छ आणि भ्रष्टाचारमुक्त करण्यासाठी सर्वांनी एकत्र येऊ. जनतेच्या समस्या, शेतक-यांचे प्रश्न सर्वजण मिळून सोडवू. काळा पैसा परत आणण्यासाठी ज्यांच्यावर दबाव टाकायचा आहे, त्यांच्यावर सर्वांनी मिळून दबाव टाकू, असे आवाहन मोदी यांनी केले.

यवतमाळ . दि. २७ – घरी एकटी असल्याचे पाहुन मुलीवर अतीप्रसंग करण्याचा प्रयत्न करणाºया आरोपीला तीन वर्ष सश्रम कारावास व दंडाची शिक्षा ठोठावली. अतिरीक्त सत्र न्यायाधिश ए.सी. चाफले यांच्या न्यायालयाने आज शुक्रवारी या खटल्याचा निकाल दिला.
रमेश तिमाजी ठाकरे (४५) रा. पहुर पुनर्वसन ता. बाभूळगाव असे शिक्षा ठोठावलेल्या आरोपीचे नाव आहे. गावातीलच १३ वर्षीय बालिकेला राहत्या घरी एकटी टिव्ही पाहत असताना रमेश घरात घुसला. त्यानंतर अतिप्रसंग करण्याचा प्रयत्न केला. यावेळी बालिकेने सुटका केली. याप्रकरणी बाभूळगाव पोलिसांनी आरोपी रमेशविरूद्घ गुन्हा दाखल केला. तपास अधिकारी जमादार रमेश मगर यांनी आरोपीला अटक करून प्रकरण न्यायप्रविष्ठ केले. हा खटा न्या. ए.सी. चाफले यांच्या न्यायालयात चालला. सरकारी पक्षाच्या वतीने सात साक्षी तपासण्यात आल्या. रमेशला बाल लैंगिक अत्याचार प्रतिबंधक कायद्यान्वये तीन वर्ष सश्रम कारावास, ५०० रुपये दंड आणि भांदवि ३५४, ४४८, ४५२ या कलमान्वयेही शिक्षा ठोठावयात आली आहे. या खटल्यात अतिरीक्त सरकारी वकील अ‍ॅड. निलीमा जयवंत यांनी युक्तीवाद केला.

सिडनी- दक्षिण आफ्रिकेने वेस्ट इंडिजचा २५७ धावांनी दणदणीत पराभव केला. वेस्ट इंडिजच्या संपूर्ण संघाला आफ्रिकेने अवघ्या ३३ षटक आणि एका चेंडूत १५१ धावांमध्ये गुंडाळले.
डीविलियर्सच्या नाबाद १६२ धावांच्या खेळीच्या जोरावर प्रथम फलंदाजी करणा-या दक्षिण आफ्रिकेने वेस्ट इंडिजला विजयासाठी ४०९ धावांचे लक्ष्य ठेवले होते.
या आव्हानाचा पाठलाग करताना वेस्ट इंडिजचा संपूर्ण संघ १५१ धावांवर गारद झाला. ख्रिस गेल अवघ्या ३ धावांवर बाद झाला. जो होल्डरने सर्वाधिक ५६ धावा केल्या. स्मीथ ३१, सॅम्यूअल्स ००, कार्टर १०, रामदीन २२, सॅमी ०५ धावा केल्या. तर सिमन्स आणि रसेल शून्यावर बाद झाले. बेन अवघी एक धाव काढून तंबूत परतला. जे टेलर १५ धावांवर नाबाद राहिला. तत्पूर्वी, झंझावती फलंदाजीसाठी प्रसिध्द असलेला दक्षिण आफ्रिकेचा कर्णधार ए. बी. डीविलियर्स याने अवघ्या ६६ चेंडूंमध्ये १६२ धावांची तुफान खेळी साकारली. तर आमला, प्लेसी, रोसॉ यांच्या अर्धशतकी खेळीमुळे दक्षिण आफ्रिकेने वेस्ट इंडीजविरुद्ध ५० षटकांत ५ बाद ४०८ धावांचा डोंगर उभा केला. आमला (६५), डू प्लेसी (६२) तर रॉसॉने केवळ ३९ चेंडूंमध्ये ६१ धावा केल्या.

औरंगाबाद – ज्येष्ठ पत्रकार रमेश राऊत यांचे आज पहाटे स्वाइन फ्लूमुळे निधन झाले आहे. ते 52 वर्षांचे होते. सात दिवसांपासून आजारी असलेल्या राऊत यांना गुरुवारी स्वाइन फ्लू झाल्याचे निदर्शनास आले. त्यानंतर त्यांना घाटी हॉस्पिटलमध्ये दाखल करण्यात आले होते. शुक्रवारी पाहाटे पाच वाजताच्या दरम्यान त्यांची प्राणज्योत मालवली. त्यांच्या पश्च्यात पत्नी माधूरी आणि मुलगी रेणू आहे.
रमेश राऊत यांनी गेली दोन दशके औरंगाबादमधील अनेक दैनिकांमध्ये पत्रकार ते संपादक पदापर्यंत जबाबदारी सांभाळली होती. साप्ताहिक चित्रलेखाचे ते अनेक वर्षे मराठवाडा प्रतिनिधी होते. या काळात त्यांनी केलेले सामाजिक आणि राजकीय लेखन गाजले होते. मुंबईत दैनिक सामानामध्येही त्यांनी काम केले.
सामनामध्ये काम केल्यामुळे ठाकरे कुटुंबियांशी त्यांची ओळख होती. शिवसेना पक्षप्रमुख उद्धव ठाकरे, महाराष्ट्र नवनिर्माण सेनेचे अध्यक्ष राज ठाकरे औरंगाबाद दौर्‍यावर आल्यानंतर राऊत यांची आस्थेवाईक चौकशी करत असायचे. मराठवाडा साहित्य परिषदेच्या कार्यकारणीवरही ते होेते. त्याचबरोबर साक्षात प्रकाशन संस्थेचे ते संचालक होते.
राऊत यांना प्रथम डॉ. हेडगेवार हॉस्पिटलमध्ये दाखल करण्यात आले होते. गुरुवारी त्यांना स्वाइन फ्लू झाल्याचे निदर्शनास आले. त्यामुळे त्यांना घाटी हॉस्पिटलमध्ये हलविण्यात आले होते. त्यांची पत्नी माधूरी यांच्यावरही घाटीमध्ये उपचार सुरु आहेत.

हडपसर : सहा महिन्यांपूर्वीच ती आईच्या मायेला पारखी झाली, त्यातच वडीलांचेही छत्र हरपले. मात्र शिक्षणाचा ध्यास घेत श्रद्धाने वडिलांना अग्नी देऊन बारावीचा पेपर लिहिला. शिक्षणावरील या श्रद्धेने तिने विद्यार्थीमित्रांपुढे नवा आदर्श ठेवला आहे.
श्रद्धा मनोज कदम (१९, रा. ढेरे बंगला, गोपाळपट्टी, मांजरी बु.) असे या विद्यार्थिनीचे नाव आहे. सहा महिन्यांपूर्वीच तिच्या आईचे निधन झाले होते. त्यानंतर बारावीचा दुसरा पेपर दिला आणि लगेचच वडिलांच्या निधनाची बातमी तिला ऐकावी लागली. बुधवारी रात्री ८.१५ च्या सुमारास वडिलांचे निधन झाले. गुरुवार सकाळी साडे नऊ वाजता श्रद्धाने वडिलांना मांजरी गावातील स्मशानभूमीमध्ये अग्नी दिला व ११ वाजता परीक्षा केंद्रावर हजर झाली.
दरम्यान, श्रद्धाला पेपर देण्यास धीर मिळावा म्हणून तिच्या चुलत बहिणीला गुरुवारी परीक्षा हॉलच्या बाहेर बसविण्या आले होते, असे साधना विद्यालयाचे प्राचार्या के. डी. रत्नपारखी यांनी सांगितले. श्रद्धा कदम या विद्यार्थिनीवर झालेला भावनिक आघात पाहता तिने परीक्षेला दाखविलेली उपस्थिती सर्वच विद्यार्थ्यांना आदर्श ठरली. आज दिवसभर हडपसरमध्ये तिच्या उपस्थितीचा विषय चर्चेचा ठरला.