यवतमाळ, दि. १२ – येथील डेहनकर ले-आऊटमध्ये घरफोडी करणाºया दोन महिलांना डिवायएसपीच्या पथकाने आज गुरूवारी अटक केली. त्यांच्या कडून ६५ हजारांचा मुद्देमाल जप्त करण्यात आला आहे. गीता अर्जून भोसले (३०) रा. परसोडी, हल्ली मुक्काम कळंब, अनिता माउली भोसले (२०) रा. वर्धा व दोन अल्पवयीन मुले असे अटकेतील चोरट्यांची नावे आहे.
ब्रिजलाल छोटेलाल यादव रा. डेहणकर ले-आऊट यांच्या घराचे दरवाजाचे कुलूपकोंडा तोडून चोरट्यांनी सोन्याचे दागिने व रोख असा ६४ हजार ९०० रुपयांचा मुद्देमाल चोरून नेला होता. याप्रकरणी वडगावरोड पोलीस स्टेशनला तक्रार नोंद झाल्यानंतर पोलीस चोरट्यांचा शोध घेत होती. दरम्यान आज सकाळी चोरीतील कोºया नोटा दोन महिलांकडे असल्याची माहिती डीवायएसपीच्या पथकाला मिळाली. त्यांनी चौकशी केली असता, रोख रक्कम व चोरीतील मुद्देमाल महिलांकडे मिळाला. पथकाने दोन महिलांसह दोन अल्पवयीन मुलांना ताब्यात घेऊन त्यांना वडगावरोड पोलिसांच्या स्वाधिन केले आहे. या महिलांनी वर्धा येथून अ‍ॅक्टीव्हा दुचाकी वाहनाची चोरी केल्याची कबूली सुद्घा पथकापुढे दिली असून, दुचाकी वर्धेत असल्याचे सांगितले. याबाबत वर्धा पोलीस स्टेशनला माहिती देण्यात आली आहे. हि कारवाई डिवायएसपी राहुल मदने, संतोष मडावी, प्रमोद मडावी, इकबाल शेख, रूतूराज मेढवे, विजय जाधव आदींनी केली.

यवतमाळ, दि. १२ – घरासमोर उभी असलेले दुचाकी वाहन व अन्य साहित्य चोरून नेणाºया चोरट्यास दोन वर्ष सश्रम कारावासाची शिक्षा मुख्यन्यादंडाधिकारी आरती देशपांडे यांनी सुनावली.
अमित राजेंद्र केणे (२२) रा. यशोदा नगर बनोडा अमरावती असे आरोपीचे नाव आहे. शहरातील उत्कवर्ष सोसायटी राऊत नगरमधील रहिवासी निरू अरुण जाधव या महिलेच्या घरासमोरून दुचाकी, आतमधून मोबाईल व एक हजार ५०० रुपये नगदी असा एकुण ४० हजार रुपयाचा मुद्देमाल ३१ मे २०१४ रोजी रात्री चोरी गेला होता. या प्रकरणी जाधव यांनी यवतमाळ शहर पोलीस ठाण्यात तक्रार दिली होती. त्यावरून पोलिसांनी अज्ञात आरोपीविरूद्घ भादंवि कलम ४५७, ३८० अंतर्गत गुन्हा दाखल केला होता. अशातच अमरावती येथील फेजरपुरा पोलीस ठाण्यात कार्यरत पोलीस उपनिरीक्षक सुखानंद इंगळे यांनी संशयास्पदरित्या फिरत असतांना अमित केणे याला ताब्यात घेतले. त्यानंतर त्याची कसुन चौकशी केली असता जाधव यांच्याकडे चोरी केल्याची कबुली दिली. त्यावरून अमरावती फैजरपुरा पोलिसांनी यवतमाळ शहर पोलिसांना पाचारण करून आरोपी व दुचाकी ताब्यात दिली. शहरचे जमादार अनिल डेरे यांनी या प्रकरणाचा तपास पुर्ण करून प्रकरण न्यायप्रविष्ठ केले. मुख्य न्यायदंडाधिकारी आरती देशपांडे यांच्या न्यायालयात या प्रकरणाची सुनावणी पार पडली. यामध्ये एकुण ९ साक्षदार तपासले. त्यामध्ये आरोप सिद्घ झाल्याने भादवि कलम ४५७ अंतर्गत दोन वर्ष सश्रम करावास व ५०० रुपये दंड ठोठावला. तर भादंवि कलम ३८० अंतर्गत १ वर्ष सश्रम कारावास आणि ५०० रुपये दंडाची शिक्षा सुनावली. सरकारी पक्षाच्या वतीने सहाय्यक सरकारी अभियोक्ता एस.आर. मोरे यांनी काम पाहिले.

मुंबई, दि. १२ – अश्लीलता आणि बिभत्सतेच्या कारणावरून अल्पावधीतच लोकप्रीय व वादग्रस्त ठरलेल्या ‘एआयबी नॉक आऊट’ या वादग्रस्त कार्यक्रमाविरोधात मुंबई उच्च न्यायालयाने गुरूवारी कडक कारवाईचे आदेश दिले. अभिनेत्री दीपिका पदुकोण, चित्रपट निर्माता करण जोहर यांच्यासह अन्य १२ जणांविरुध्द गुन्हा दाखल करण्याचे आदेश न्यायालयाने दिले आहेत. आभा सिंह यांनी दाखल केलेल्या याचिकेसंदर्भातील सुनावणीच्यावेळी न्यायालयाने हे आदेश दिले आहेत.
या कार्यक्रमात अतिशय अश्लिल आणि कमरेखालचे विनोद असून महाराष्ट्रातल्या सुसंस्कृत घरात हा कार्यक्रम पाहिलाच जाऊ शकत नाही, असे सांगत राष्ट्रवादीचे आमदार जितेंद्र आव्हाड यांनी ‘एआयबी नॉकआऊट’ कार्यक्रमावर बंदी आणण्याची मागणी केली होती. त्यानंतर राष्ट्रवादीने आक्रमक भूमिका घेत हा कार्यक्रम उधळून लावण्याची धमकीही दिली होती. दरम्यान, अभिनेता आमीर खानने या कार्यक्रमावर उघडपणे आपली नाराजी व्यक्त केली होती.

पुणे – जमिन अधिग्रहण पूर्नवसन कायदा २०१३ मधील सुधारणांवरुन ज्येष्ठ समाजसेवक अण्णा हजारे यांनी केंद्रातल्या नरेंद्र मोदी सरकार विरोधात दंड थोपटले आहेत.
या कायद्यातील सुधारणांविरोधात अण्णा हजारे २४ फेब्रुवारीला दिल्लीत जंतर-मंतरवर होणा-या एका आंदोलनात सहभागी होणार आहेत. मागच्या काही दिवसांपासून सातत्याने पंतप्रधान नरेंद्र मोदी यांच्या कारभारावर टिका करणारे अण्णा हजारे प्रथमच मोदी सरकार विरोधातील आंदोलनात सहभागी होत आहेत.
त्यामुळे पुढच्या काही दिवसांमध्ये मोदी विरुध्द अण्णा असा सामना रंगण्याची चिन्हे आहेत. केंद्रातल्या तत्कालिन काँग्रेस प्रणीत संपुआ सरकारने २०१३ मध्ये शेतक-यांच्या हिताला सर्वोच्च प्राधान्य देऊन जमिन अधिग्रहण पूर्नवसन कायदा मंजूर केला होता.
मात्र आताचे मोदी सरकार शेतक-यांऐवजी उद्योगपतींच्या हिताला पहिले प्राधान्य देऊन या कायद्यात उद्योगांना अनुकूल ठरणारे बदल करत आहे. त्यामुळे अनेक स्वयंसेवी संस्थांचा या सुधारणांना विरोध आहे. येत्या २४ फेब्रुवारीला नवी दिल्लीमध्ये अनेक स्वयंसेवी संस्थांनी एकत्र येऊन हे आंदोलन आयोजित केले असून, यामध्ये समाजसेविक मेधा पाटकरही सहभागी होऊ शकतात.