यवतमाळ, दि. २९ – वडीलाच्या मृत्यूचा दोष पोलिसांवर देत शहर ठाण्यात घुसून पीएसआयवर हल्ला करणाºया अवैध व्यवसायिकासह दोनजणाविरुद्घ गुन्हा नोंदविण्यात आला आहे. प्रशांत शेटे व अन्य दोन रा. वाघापूर अशी गुन्हा नोंद करण्यात आलेल्या आरोपींची नावे आहे. शहर पोलिसांनी अवैध व्यवसायवर धाड टाकल्यानंतर कारवाई दरम्यान प्रशांत शेटे याच्या वडीलाचा मृत्यू झाला होता. वडीलाच्या मृत्यूला पोलिसांना दोषी ठरवीत शहर ठाण्यावर धडक देऊन पीएसआय संतोष मनवर (३१) यांना मारहाण केली. याबाबत शहर पोलिसांनी तिनजणाविरुद्घ गुन्हा नोंद करून तपास सुरू केला आहे.

यवतमाळ , दि. २९- करणी केल्याच्या कारणावरून इसमाचा खून करणाºया जवाहर नगर धुंदी येथील दोन आरोपींना जन्मठेपेची शिक्षा ठोठावली. पुसद येथील अतिरीक्त जिल्हा व सत्र न्यायाधिश अनिल सुब्रम्हण्यम् यांनी आज गुरूवारी हा निकाल दिला. कैलास श्रीराम चव्हाण, मधुकर कीसन राठोड अशी शिक्षा ठोठावलेल्या आरोपींची नावे आहे.
प्रकाश तुकाराम राठोड रा. जवाहर नगर धुंदी हा नागपूर येथील इंडियन आॅईल कंपनीत ड्रायव्हर या पदावर कार्यरत होता. सदर व्यक्तीवर कैलास चव्हाण याच्या आईला करणी केल्याचा आरोप केला होता. त्यामुळे राठोड व चव्हाण यांच्यात पंधरा वर्षापासून वाद सुरू होता. तसेच आरोपी मधुकर कीसन राठोड, लक्ष्मी किसन राठोड, शोभा मधुकर राठोड, सिमा रमेश राठोड, रमेश किसन राठोड, अतुल मधुकर राठोड यानी प्रकाशला जीवे मारण्याची धमकी दिली होती. ७ आॅगस्ट २०१० रोजी धुंदी गावात आत्माराम जाधव याच्या तीसºया दिवसाच्या कार्यक्रमासाठी सदर ट्रायव्हर आला होता. कार्यक्रम आटोपून तो भारत आडे, पुरासिंग आडे यांना घेऊन दुचाकीने पुसदकडे जात होता. अशातच आरोपी कैलास व मधुकर याने धुंदी गावाजवळ मोटर सायकल खाली पाडली. त्यानंतर दोन्ही आरोपींनी कुºहाडीने वार करून प्रकाशचा खुन केला. या प्रकरणी भारत नरसिंग आडे यांनी दिलेल्या तक्रारीवरून पुसद ग्रामीण पोलिसांनी सात आरोपीविरूद्घ भादंवि कलम ३०२, ३४१, १४७, १४८, १४९, ५०४ अंतर्गत गुन्हा दाखल केला. तपास अधिकारी पोलीस निरीक्षक आर.वाय. भद्रे यांनी आरोपींना अटक करून प्रकरण न्यायप्रविष्ठ केले. तसेच पोलीस उपनिरीक्षक पि.आर. सुळे यांनी फरार असलेल्या मधुकर, रमेश व अतुल या तीन आरोपींना अटक केली होती. पुसद येथील अतिरीक्त जिल्हा व सत्र न्यायाधिश अनिल सुब्रमण्यम् यांच्या न्यायालयात या प्रकरणाची सुनावणी पार पडली. यामध्ये सरकारी पक्षाच्या वतीने १५ साक्ष तपासण्यात आले. त्यामध्ये आरोप सिद्घ झाल्याने आरोपी कैलास व मधुकर यास जन्मठेप सुनावली. तसेच प्रत्येकी दहा हजार रुपये दंडही ठोठावला. तर उर्वरीत पाच आरोपींची निर्दोष मुक्तता केली. सरकारी पक्षाच्या वतीने अ‍ॅड. सुधाकर राठोड यांनी काम पाहीले.

गडचिरोली, दि. २९ – महाराष्ट्र – छत्तीसगडच्या सीमेवरील बीनाबोंडा गावात नक्षलवाद्यांची झुगारुन तब्बल २५ वर्षांनी प्रजासत्ताक दिनी ध्वजारोहण करण्यात आले. विशेष म्हणजे पोलिसांच्या या धाडसी पावलाला ग्रामस्थांनी साथ देत या ध्वजारोहण सोहळ्याला हजेरी लावली होती.
गडचिरोली जिल्ह्यातील बीनागोंडा हे गाव म्हणजे नक्षलवाद्यांचा बालेकिल्लाच. घनदाट जंगलात वसलेले हे गाव म्हणजे नो मेन्स लँड. नक्षलवाद्यांचा या गावात नेहमीच वावर असल्याने गावात नक्षलवाद्यांची दहशत असते. नक्षलवादी दहशतीच्या आधारे स्वातंत्र्य, प्रजासत्ताक हे सर्व खोटे असल्याचे स्थानिकांना सांगायचे. गेल्या २५ वर्षांत या गावात ध्वजारोहणाचा कार्यक्रम पार पडला नाही. मात्र पोलिस आणि नक्षलवादविरोधी पथकाने यंदा अत्यंत नियोजनपूर्वक या भागात ध्वजारोहणाचा कार्यक्रम राबवण्याची तयारी सुरु केली. ग्रामस्थांना विश्वासात घेण्यात आले. याचे फळ म्हणजे यंदाच्या प्रजासत्ताक दिनी बीनागोंडातील आश्रमशाळेत पार पडलेला ध्वजारोहण सोहळा. आश्रमशाळेतील विद्यार्थी, ग्रामस्थ आणि कडेकोट पोलिस बंदोबस्त अशा वातावरणात उत्साहात ध्वजारोहणाचा कार्यक्रम पार पडला.

मुंबई दि. २९ – कुठल्याही हॉस्पिटलमध्ये आपल्या पेशंटसाठी रक्त घ्यायची वेळ आल्यास अजिबात हलगर्जीपणा न करता खबरदारीनंच वागा. कारण, एचआयव्ही बाधित रक्त दिलं गेल्यानं गेल्या पाच वर्षांत राज्यातील तब्बल एक हजार रुग्णांना एचआयव्हीची लागण झाल्याची धक्कादायक माहिती समोर आली आहे. त्यामुळे रक्तपेढ्यांमधील रक्ताच्या दर्जाबाबत प्रश्नचिन्ह निर्माण झालंय.
रक्तातून एड्सच्या विषाणूंचं संक्रमण होऊ नये, यादृष्टीनं देशपातळीवर काटेकोर उपाययोजना करण्यात आल्या आहेत. रक्तपेढ्यांसाठी कडक कायदे करण्यात आलेत. अद्ययावत तंत्रज्ञानाच्या वापराद्वारे एचआयव्ही बाधित रक्त ओळखणं सोपं झालंय. असं असतानाही, गेल्या पाच वर्षांत देशातील ८,९८३ जणांना रक्तातून एचआयव्हीची लागण झाल्याचं उघडकीस आल्यानं वैद्यकीय क्षेत्राच्या भुवया उंचावल्यात आणि सामान्य पेशंटनाही धडकी भरलीय. खुद्द राष्ट्रीय एड्स नियंत्रण संघटनेनंच, माहिती अधिकारांतर्गत हा आकडा जाहीर केला आहे. त्यापैकी १ हजार रुग्ण महाराष्ट्रातील असल्यानं राज्याच्या आरोग्य विभागाची चिंता वाढली आहे. रक्तातून एचआयव्हीच्या संक्रमणात गुजरात आणि उत्तर प्रदेशपाठोपाठ महाराष्ट्र तिसऱ्या स्थानावर आहे. त्यामुळे राज्य सरकारला तातडीनं ठोस पावलं उचलण्यावाचून पर्याय नाही.
एप्रिल ते ऑक्टोबर २०१४ या कालावधीत देशातील ६२९ जणांना रक्ताद्वारे एचआयव्हीची लागण झाली, त्यात ८० जण राज्यातील आहेत. ही आकडेवारी समोर येताच एचआयव्ही नियंत्रणासाठी कार्यरत असलेल्या संघटनांचं धाबं दणाणलंय आणि त्यांनी आपले हात वर करायला सुरुवात केली आहे. स्टेट ब्लड ट्रान्सफ्युजन काउन्सिल (एसबीटीसी) आणि महाराष्ट्र राज्य एड्स नियंत्रण सोसायटीनं (एमएसएसीएस) एकमेकांकडे बोटं दाखवून स्वतःची जबाबदारी झटकण्याचाच प्रयत्न केलाय. परंतु, अद्ययावत तंत्रज्ञानाचा अभाव, हेच रक्तातून एचआयव्ही संक्रमणामागचं प्रमुख कारण असल्याचं जाणकारांचं म्हणणं आहे.
अजूनही अनेक रक्तपेढ्यांमध्ये enzyme-linked immune-sorbent assay test (ELISA)द्वारे एचआयव्हीची तपासणी केली जाते. त्यातून अचून निदान होऊ शकत नाही. एखाद्या व्यक्तीला नुकतीच एचआयव्हीची बाधा झाली असेल, तर ते या चाचणीतून समजत नाही. त्यासाठी किमान तीन महिन्यांचा कालावधी लागतो. त्याऐवजी, न्युक्लिअर अॅसिड टेस्टिंगद्वारे एचआयव्हीचं अचूक आणि जलद निदान होऊ शकतं. पण हे तंत्रज्ञान खर्चिक असल्यानं शहरातील मोजकीच खासगी हॉस्पिटल वगळता अन्य कुणीही ही चाचणी करत नाही. इतकंच नव्हे तर, राज्य सरकारी किंवा मुंबई महापालिकेच्या एकाही रक्तपेढीत ही सुविधा उपलब्ध नाही, अशी सविस्तर माहिती थिंक फाउंडेशनच्या विनय शेट्टींनी दिली.
रक्तदानावेळी रक्तदात्याचं रक्त घेताना आणि नंतर ते तपासताना योग्य खबरदारी घेतली जात नसल्याची गंभीर बाब एका रक्तपेढीच्या वरिष्ठ तंत्रज्ञानं निदर्शनास आणून दिली. एखादी व्यक्ती एचआयव्हीग्रस्त आढळल्यानंतरही तिला याबाबत कल्पना दिली जात नाही. त्यामुळे तो त्यानंतरही रक्तदान करत राहतो. ही पद्धत तात्काळ बदलण्याची गरज त्यांनी व्यक्त केली. अर्थात, एसबीटीसी मात्र, जे चाललंय त्याबद्दल समाधानी दिसतेय. दरवर्षी सुमारे ११ लाख जण रक्तदान करतात. अशा परिस्थितीत किती नियंत्रण ठेवता येणार?, असा प्रश्न संचालक डॉ. संजय जाधव यांनी केला. सर्वांना रक्त पुरवणं ही जबाबदारी आमची आहे, पुढचं काम एड्स नियंत्रण सोसायटीचं असल्याचंही त्यांनी नमूद केलं.
दरम्यान, एमएसएसीएकडील आकडेवारीनुसार, राज्यात एचआयव्हीची लागण होण्याचं प्रमाण लक्षणीय कमी झालंय. २००७ मध्ये १०,४३१ जणांना एचआयव्हीची बाधा झाली होती, तर २०११ मध्ये हे प्रमाण ५,८९३ इतकं झाल्याकडे ते लक्ष वेधतात. हे आकडे समाधानकारक असले, तरी रक्तातून एचआयव्हीचं संक्रमण थांबवण्यासाठी राज्य सरकारनं, महापालिकेनं आपल्या रक्तपेढ्यांमध्ये अद्ययावत तंत्रज्ञान पुरवणं अपरिहार्यच आहे, हे कुणीही मान्य करेल.

न्यूयॉर्क दि. २९ – दोन अमेरिकी पत्रकार, एक ब्रिटीश आणि एका फ्रेंच नागरिकाचा शिरच्छेद करून क्रोर्याची परिसीमा गाठणाऱ्या आणि संपूर्ण जगासाठीच धोकादायक ठरू शकणाऱ्या आयएसआयएसनं आता थेट महासत्तेच्या महानेत्यालाच आव्हान दिलंय. ‘व्हाइट हाऊस’मध्ये शिरून अमेरिकेचे राष्ट्राध्यक्ष बराक ओबामांचा शिरच्छेद करू आणि अमेरिकेला मुस्लिम राष्ट्र बनवू, अशी धमकी त्यांनी एका व्हिडिओमधून दिल्यानं जगभरात खळबळ उडाली आहे.
आयसिसचे तीन दहशतवादी एका कुर्दिश जवानाचा शिरच्छेद करण्याच्या तयारीत आहेत. त्याच्या मानेवर धारदार सुरा ठेवूनच ते अमेरिकेला धमकावत असल्याचं नव्या व्हिडिओत दिसतंय. ‘ओबामा, आम्ही अमेरिकेला येत आहोत. बॉम्ब आणि स्फोटकं घेऊन आम्ही येऊ. व्हाइट हाऊसमध्ये शिरून तुमचा शिरच्छेद करू आणि अमेरिकेला मुस्लिम राष्ट्र बनवू’, अशी धमकी त्यांनी या व्हिडिओत दिली आहे. त्यानंतर त्यांनी कुर्दिश जवानाला गळा चिरून ठार केल्याचंही व्हिडिओत दिसतंय.
या व्हिडिओत आयसिसनं फ्रान्स आणि बेल्जियमलाही धमकी दिली आहे. आम्ही कार बॉम्ब घेऊन येऊ आणि तुम्हाला उद्ध्वस्त करून टाकू, असा इशारा त्यांनी दिलाय. जितक्या वेळा तुम्ही आमच्यावर क्षेपणास्त्र हल्ला कराल, आम्ही तुमच्या जवानांचा शिरच्छेद करू, अशी धमकी त्यांनी कुर्दिश लष्करालाही दिली आहे.
गेल्या वर्षभरात इस्लामिक स्टेट इन इराक अँड सीरिया (आयएसआयएस) या दहशतवादी संघटनेनं, जगातील सगळ्यात क्रूर दहशतवादी संघटना अशीच स्वतःची ओळख निर्माण केली आहे. या संघटनेचा खात्मा करण्याचा निर्धार मध्यंतरी बराक ओबामा यांनी केला होता. त्यानंतर आता आयसिसनं थेट त्यांच्याशीच पंगा घेतल्यानं येत्या काळात आयसिस विरुद्ध अमेरिका यांच्यातील घमासान पाहायला मिळू शकतं.