यवतमाळ,दि. २० (पवन लताड) – यवतमाळ वनवृत्तात बिबट मृत्यूची मालिकाच सुरू आहे. गत आठवड्यात दारव्हा वनपरीक्षेत्रात बिबटाचा मृत्यू झाल्याची घटना ताजीच असताना, हातणी-माळेगाव शिवारात आज मंगळवारी पाच वर्षीय बिबट मृतावस्थेत आढळल्याने वनविभागाविरोधात वन्यप्रेमीतून संताप व्यक्त होत आहे.

वनसंपदेने नटलेल्या यवतमाळ वनवृत्तातील आठही वनपरीक्षेत्रात बिबटांचा वास्तव असल्याचे वनविभागाच्या प्राणी गणनेतून स्पष्ट झाले आहे. मात्र वन्य प्राण्यांचे जतन करण्याच्या दृष्टीने वनअधिकारी ठोस पाऊले उचलत नसल्याचे अनेकदा उघड झाले आहे. त्यामुळेच गेल्या काही महिन्यात यवतमाळसह अन्य वनपरीक्षेत्रात बिबटांचा मृत्यू झाला आहे. मात्र यातून अधिकाºयांनी बोध घेतला नसून उपाययोजना केल्या नसल्याने गत आठवड्यात दारव्हा वनपरीक्षेत्रातील ब्रम्हणाथ शिवारात बिबटाचा मृत्यू झाला. ही घटना ताजीच असताना, याच वनपरीक्षेत्रातील माळेगाव शिवारात आज मंगळवारी सकाळी एका गुराख्याला पाच वर्षीय बिबट मृतावस्थेत आढळून आला. घटनेची माहिती मिळताच उपविभागीय वनअधिकारी गवई, वनपरीक्षेत्र अधिकारी नाल्हे, क्षेत्रसाहाय्यक धोतरे घटनास्थळी दाखल झाले. पाच दिवसापूर्वीच या बिबटचा मृत्यू झाला असल्याचा प्राथमिक अंदाज वर्तविण्यात आला आहे. जंगलात बिबटचा वास्तव असल्याची साधी माहिती देखील वनपरीक्षेत्र अधिकाºयाकडे नसल्यामुळे आठवड्यात दोन बिबटचा मृत्यू झाल्याचा आरोप वन्यप्रमींनी केला आहे. यापूर्वी आढळलेल्या मृत बिबटाचे दोन दात व एक पंजा गायब असल्याचे प्रत्यक्षदर्शीनी पाहिले होते. आज आढळलेल्या बिबटाचे अवयव मात्र शाबूत दिसून आले. बिबटचा मृत्यू नेमका कशामूळे झाला याचा उलगडा शवविच्छेदन अहवालानंतरच स्पष्ट होणार असल्याचे सांगण्यात आले आहे. प्रत्यक्षात मात्र शवविच्छेदन अहवालच वनविभागाकडून दडपण्यात येतो. कारण यापूर्वी वनवृत्तात मृतावस्थेत आढळलेल्या एकाही बिबटच्या मृत्यूचे कारण अधिकारी सांगू शकलेले नाही.

माझगाव डॉक मुंबई मध्ये मुख्य व्यवस्थापक (5 जागा), मुख्य व्यवस्थापक (सुरक्षा) (1 जागा), सहाय्यक कंपनी सेक्रटरी (1 जागा), वरिष्ठ वैद्यकीय अधिकारी (1 जागा),भाषांतरकार (रशियन) (1 जागा) या पदांसाठी ऑनलाईन अर्ज मागविण्यात येत आहेत. अर्ज करण्याची अंतिम तारीख 22 जानेवारी 2015 आहे. यासंबंधीची जाहिरात एम्प्लॉयमेंट न्यूजच्या 10-16 जानेवारी 2015 च्या अंकात आली आहे. अधिक माहिती www.mazagondock.gov.in या संकेतस्थळावर उपलब्ध आहे.

नवी दिल्ली – भाजपाकडून पैसे घ्या आणि मत ‘आप’लाच द्या असे विधान करुन आचारसंहितेचा भंग केल्याप्रकरणी आम आदमी पक्षाचे प्रमुख अरविंद केजरीवाल यांनी निवडणूक आयोगाने कारणे दाखवा नोटीस बजावली आहे. गेल्या तीन दिवसांत केजरीवाल यांना दुस-यांदा नोटीस हजावण्यात आली आहे.
१८ जानेवारी रोजी उत्तम नगर येथील सभेत भाषणादरम्यान केजरीवाल यांनी निवडणुकीच्या काळात भाजपावाले तुम्हाला पैसे देऊ करतील. त्यासाठी नाही म्हणू नका ते पैसे घ्या आणि तुमचे मत मात्र ‘आप’लाच द्या असे विधान केले होते.
याप्रकरणी निवडणूक आयोगाकडे केजरीवालांविरोधात विविध राजकीय पक्षांकडून तकारी आल्या आहेत. याप्रकरणी त्यांना नोटीस बजावण्यात आली असून गुरुवारी चार वाजेपर्यंत या नोटीशीवर उत्तर देण्यास सांगण्यात आले आहे.
यापूर्वी १७ जानेवारी रोजी निवडणूक आयोगाने निवडणूक आचारसंहितेचा भंग केल्याप्रकऱणी केजरीवालांना कारणे दाखवा नोटीस बजावली होती. या नोटिशीला उत्तर देण्यासाठी आजपर्यंत मुदत देण्यात आली होती.

नवी दिल्ली – भाजपाकडून दिल्लीच्या मुख्यमंत्रीपदाच्या उमेदवार म्हणून किरण बेदी यांचे नाव जाहीर होताच दिल्लीमध्ये भाजपा आणि आपमध्ये वाकयुध्दाला सुरुवात झाली आहे.
मंगळवारी सकाळी किरण बेदी यांचे मुख्य स्पर्धक अरविंद केजरीवाल यांनी टि्वटरवरुन बेदींना मुख्यमंत्रीपदाच्या उमेदवारीबद्दल शुभेच्छा दिल्या आणि लगेचच खुल्या चर्चेचे आव्हान दिले. मी किरण बेदींना खुल्या चर्चेचे आव्हान देतो. लोक धर्म-जात या आधारावर मतदान करतात. त्यांना मुद्यांची कल्पना नसते. जनतेच्या महत्वाच्या प्रश्नांवर एक ते दोन तास वादविवाद झाला पाहिजे. यानिमित्ताने लोकशाहीमध्ये चांगला पायंडा पडेल असे केजरीवाल म्हणाले.
केजरीवालांनी बेदींना टि्वटरवरील त्यांचे बंद केलेले खाते सुरु करण्याची विनंती केली. बेदींनी आपल्या टि्वटर अकाऊंटवरील केजरीवालांचे खाते ब्लॉक केले आहे. केजरीवालांचे टि्वटर अकाऊंट वातावरण दूषित करते. त्यांच्या संदेशातून नकारात्मकता निर्माण होते. त्यामुळे पंधरा महिन्यांपूर्वी मी माझ्या टि्वटर अकाऊंटवरील केजरीवालांचे खाते बंद केले असे बेदी म्हणाल्या.
बेदी यांनी केजरीवालांचे खुल्या चर्चेचे आव्हान स्विकारले असले तरी, ही चर्चा विधानसभेत होऊं द्या असे सांगत त्यांनी अप्रत्यक्षपणे निवडणूक काळातील खुल्या चर्चेचे आव्हान फेटाळून लावले.
दिल्ली विधानसभा निवडणुकीतील काँग्रेसचे प्रचार समितीचे प्रमुख अजय माकन यांनी केजरीवालांचे खुल्या चर्चेचे आव्हान स्विकारण्याची तयारी दाखवली. या निमित्ताने एक चांगाल पायंडा पडेल. परस्पर सहमतीने एखाद्या वृत्तवाहिनीची निवड करुन, त्यावर वादविवाद झाला पाहिजे. जेणेकरुन जनतेसमोर आपल्या योजना, विचार मांडता येतील असे माकन म्हणाले.

आसनगाव – ठाणे जिल्ह्यात आसनगाव रेल्वे स्थानकाजवळ गोदान एक्स्प्रेसच्या धडकेत चार जण ठार झाले. दुपारी अडीच वजेच्या दरम्यान ही घटना घडली. गोदान एक्स्प्रेस मुंबईच्या दिशेने भरधाव वेगाने जात असताना हा अपघात घडला.
शहापूर येथील गुरुद्वारात एका कार्यक्रमासाठी आलेल्या चार महिला आसनगाव स्टेशनवर उतरल्या. चौघीजणी प्लॅटफॉर्म क्रमांक दोन येथील ट्रॅकवरुन चालत असताना त्यांना गोदान एक्स्प्रेसची धडक बसली. यात चारही महिलांचा जागीच मृत्यू झाला.