यवतमाळ, दि. ३१- बहिणीसोबत शेतात खेळत असलेला चिमुकला बोअरवेलच्या खड्डयात पडल्याची घटना उमरखेड तालुक्यातील निंगनूर येथे आज दुपारी ३ वाजता दरम्यान घडली. सूरज शंकर आखरे (२) या चिमुकल्याला सुखरुप बाहेर काढण्यासाठी टार्गेट डिजास्टर रिस्पॉन्स फोर्स (टीडीआरएस) युद्धस्तरावर प्रयत्नांची पराकाष्ठा करीत आहे. सूरजची जिवन जगण्यासाठी झुंज सुरू असून, रात्री ९ वाजेपर्यंत बचावकार्य सुरूच होते. या घटनेमुळे तालुक्यात खळबळ उडाली असून, चिमुरडा सुखरुप बाहेर निघावा म्हणून प्रत्येक जण आराधना करीत आहे.
शनिवारी दुपारच्या सुमारास निंगणूर येथील नईम अली यांच्या शेतात काही महिला कापूस वेचन्याचे काम करीत होत्या. शेतातच असलेल्या बोअरवेलनजीव सूरज हा पाच वर्षीय बहीण पूजा सोबत खेळत होता. शेतातील बोअरवेलला पोत्याने झाकून ठेवण्यात आले होते. बोअरवेलजवळ खेळत असलेला सूरज अचानक बोअरवेमध्ये पडला. सूरज आत पडताच पूजाने आरडा-ओरड सुरू केली. शेतातील महिलांनी लगेच घटनास्थळी धाव घेतली. ही वार्ता गावात पसरताच नागरिकांनी घटनास्थळी धाव घेतली. प्रशासनाला ही माहिती मिळताच उपविभागीय अधिकारी दिपक सिंगला, तहसिलदार सचिन शेजाळ, फुलसावंगी प्राथमिक आरोग्य केंद्राचे वैद्यकीय अधिकारी डॉ. पठान, बिटरगावचे ठानेदार एम.बी. मानकर, महागाचे ठाणेदार पी.बी. शेळके आपल्या ताफ्यासह घटनास्थळावर दाखल झाले.
घटनेचे गांभीर्य ओळखून सूरजला बाहेर काढण्यासाठी अवघे प्रशासन कामी लागले. दोन जेसीबी यंत्राच्या सहाय्याने बोअरवेलला समांतर खड्डा खोदण्याला सुरूवात करण्यात आली. ४० फूट खोल खड्यात पडलेल्या सूरजला आॅक्सीजनची कमतरता भासू नये म्हणून डॉक्टरांच्या देखरेखीत आॅक्सीजनच्या सिंलेडरने खड्यात आॅक्सीजनचा पुरवठा सुरू करण्यात आला. दोरीच्या मदतीने बिस्कीट आणि पाणी आत सोडण्यात आले. मोठ्या टॉर्चने नियमीत बालकाच्या हातचालीवर लक्ष दिल्या जात आहे. सूरजची आई तिथेच चिमुकला सुखरुप बाहेर निघावा म्हणून बसून आहे. हे दृश्य उपस्थितांचे हृदय हेलावून सोडत आहे.
घटनेची माहिती तत्काळ जिल्हा प्रशासनाला देण्यात आली. जिल्हा मुख्यालयातून टीडीआरएस पथक सायंकाळी ६ वाजता घटनास्थळावर दाखल झाले. हे पथक दाखल होताच उपविभागीय अधिकाºयांनी बचावकार्याची सुत्रे पथकाकडे सोपविली. घटनेचे गांभीर्य बघून आ. राजेंद्र नजरधने, माजी आ. उत्तमराव इंगळे घटनास्थळावर पोहाचले. बघ्यांच्या गर्दीला नियंत्रणात ठेवण्यासाठी बिटरगाव, महागाव आणि उमरखेडवरून अतिरिक्त पोलीस कुमक मागविण्यात आले. अंधार पडताच वीज वितरण कंपनीच्या वतीने घटनास्थळावर मोठे लाईट लावण्यात आले. वृत्त लिहीपर्यंत बचाव कार्य सुरूच होते.

यवतमाळ : दोन युवकांनी विनयभंग केला. यामुळे अपमानित झालेल्या युवतीने विषारी औषध प्राशन करून आत्महत्येचा प्रयत्न केला. ही घटना राळेगाव तालुक्यातील कळंबनेर येथे घडली.
अमर विलास जुनघरे (२४) याच्यासह अन्य एकाने गावातील युवतीचा हात पकडून विनयभंग केला. तसेच तिच्या वडीलांना जिवे मारण्याची धमकी दिली. यामुळे युवतीने विषारी औषध प्राशन करून आत्महत्या करण्याचा प्रयत्न केला. याप्रकरणी राळेगाव पोलीस ठाण्यात तक्रार देण्यात आली. त्यावरून अमर जुनघरे याच्यासह अन्य एकाविरुद्ध गुन्हा नोंद करण्यात आला आहे.

यवतमाळ, दि. ३१ – तालुक्यातील किन्ही येथील युवतीला शारीरीक सुखाची मागणी करून विनयभंग करणाºया आरोपीस एक महिना कारावासाची शिक्षा सुनावली. येथील प्रथमश्रेणी न्यायदंडाधिकारी (तीसरे) एस.के. शाहु यांनी हा निकाल दिला. उत्तम दत्ता खडके (२३) रा. किन्ही असे आरोपीचे नाव आहे.
किन्ही येथील युवती किराणा दुकानात गेली असता. आरोपी उत्तम खडके याने मुलीला ५० रुपयाची आमिष दाखऊन शारीरीक सुखाची मागणी केली. यावेळी युवतीने या प्रकारास नकार देऊन तेथून काढता पाय घेतला. यावेळी उत्तमने युवतीला ही बाब कोणाला सांगितल्यास जीवे मारण्याची धमकी दिली होती. घरी गेल्यानंतर तीने हा प्रकार आपल्या आईला सांगितला. १९ जून २०११ रोजी घडलेल्या घटनेचा जाब विचारण्यासाठी युवतीची आई आरोपीच्या घरी गेली. यावेळी आरोपी व त्याच्या अन्य तीन साथीदारांनी महिलेला मारहाण केली. याप्रकरणी युवतीच्या आईने दिलेल्या तक्रारीवरून यवतमाळ ग्रामीण पोलिसांनी चारही आरोपीविरूद्घ भादंवि कलम ३५४, ३२४, ५०६, ५०४, ३४ अंतर्गत गुन्हा दाखल केला. जमादार उद्देशन पाटील यांनी तपास करून आरोपींना अटक करून प्रकरण न्यायप्रविष्ठ केले. येथील प्रथमश्रेणी न्यायदंडाधिकारी (तीसरे) एस.के. शाहु यांच्या न्यायालयात या प्रकरणाची सुनावणी पार पडली. यामध्ये सरकारी पक्षाच्या वतीने पाच साक्ष तपासण्यात आल्या. यामध्ये दोष सिद्घ झाल्याने आरोपीस एक महिना सश्रम कारावासाची शिक्षा ठोठावली. तसेच एक हजार रुपये दंड व दंड न भरल्यास सात दिवस अतिरीक्त शिक्षा होणार आहे. सरकारी पक्षाच्या वतीने सहाय्यक सरकारी अभियोक्ता अमित भेंडे यांनी काम पाहिले.

आर्णी , दि ३१ – तालुक्यातील घोनसरा येथील युवकाचा ईवळेश्वर शिवारात अनैतिक संबधातून खून करण्यात आल्याची घटना सकाळी आठ वाजता दरम्यान उघडकीस आली. उबेद खान (२२) रा. घोनसरा असे मृताचे नाव आहे. उबेदचे ईवळेश्वर येथील विवाहीत महिलेसोबत एक वर्षापासुन अनैतिक संबंध होते. तिला भेटण्यासाठी उबेद रात्री दरम्यान जात होता. काल रात्री ८ वाजता दरम्यान घोनसरा येथून जेवन न करता तो घरून गेला होता. रात्रभर घरी न आल्याने घरातील सर्वजन त्याची काळजी करत होते. ईवळेश्वर येथील नारायण कुडमथे यांनी मृतकाचा मोठा भाऊ फयाज खान यास सकाळ दरम्यान फोन करून ईवळेश्वर शिवारातील भाऊराव मडपाजी यांच्या शेताजवळ असलेल्या नालीत उबेदचा मृतदेह पडून असल्याची माहीती दिली. लगेच मृतकाच्या नातेवाईकांनी घटनास्थळ गाठले. त्यावेळी उबेदच्या डाव्या पायाला मार आणि गळा दाबलेल्या अवस्थेत आढळुन आला. याप्रकरणी उबेदचे वडील अमानुल्ला खान अमिर खान (५५ ) यांनी आर्णी पोलीसात तक्रार दिली. त्यावरून उज्वला मडावी, शारदा आडे, चंदू कुडमथे, शंशीकांत कुडमथे, लवकुश कुडमथे, गजानन ठवकर सर्व रा. ईवळेश्वर यांच्या विरुद्ध कलम ३०२, २०१, ३४ नुसार गुन्हा दाखल केला असून घटनेचा तपास ठाणेदार हनुमंतराव गायकवाड यांच्या मार्गदर्शनाखाली दिनेश जाधव करित आहे.