नवी दिल्ली – यंदाच्या प्रजासत्ताक दिनाच्या दिवशी ९६७ जणांना पोलीस पदके जाहीर करण्यात आली आहेत. यापैकी २५ जणांना शौर्यासाठी राष्ट्रपतींच्या हस्ते पोलिस पदक, ९८ जणांना विशिष्ट सेवेसाठी राष्ट्रपती पदक तर ७१२ जणांना गुणवत्तापूर्ण सेवेसाठी पोलीस पदकाने गौरविण्यात येणार आहे.
राज्यातील दिवंगत हवालदार गणपत नेवरु मडवी यांना मरणोत्तर राष्ट्रपती पोलीस शौर्यपदक जाहीर झाले आहे. याशिवाय दिवंगत पोलीस नाईक गिरीधर अत्राम, पोलीस अधिक्षक यशवंत काळे, पोलीस उप निरीक्षक प्रकाश वाघमारे, पोलीस नाईक सदाशिव मढवी, पोलीस नाईक गंगाधर सिडाम, पोलीस हवालदार मुरलीधर वेलाडी, पोलीस उप निरीक्षक अतुल तावडे, पोलीस उप निरिक्षक अंकुश माने, पोलीस नाईक विनोद हिचामी, पोलीस हवालदार दिवंगत सुनील मडवी, पोलीस नाईक इंदरशाह सडमेरु, सहाय्यक पोलीस निरीक्षक राजेंद्र कुमार तिवारी, पोलीस उप निरीक्षक अविनाश गडख, पोलीस हवालदार रमेश येडे, पोलीस नाईक वामन पारधी, पोलीस नाईक राधेश्याम गटे, पोलीस नाईक उमेश इंगळे, पोलीस अधिक्षक मोहम्मद, सुवेझ हक यांना पोलीस शौर्य पदक जाहीर करण्यांत आले आहे. याव्यतिरिक्त उर्वरित दोन प्रकारच्या पुरस्कारांमध्येही महाराष्ट्रांतील अनेकांचा समावेश आहे.
जीवनरक्षा पदक पुरस्कार-२०१४ जाहीर
२०१४ या वर्षातील ‘जीवन रक्षक पदक’ पुरस्कारांकरिता राष्ट्रपतींनी ५६ व्यक्तींच्या नावाला मंजूरी दिली. सर्वोत्तम जीवन रक्षा पदकासाठी चार जणांची, उत्तम जीवनरक्षा पदकासाठी १७ जणांची आणि जीवनरक्षा पदकासाठी ३५ जणांची निवड झाली आहे.
यापैकी २७ जणांना मरणोत्तर पुरस्कार जाहीर झाले आहेत. यात उत्तम जीवनरक्षा पदकात महाराष्ट्रातील शशिकांत पवार आणि गणेश अहिरराव यांना मरणोत्तर पुरस्कार जाहीर झाला आहे.

कळंब, दि. २५  –  विदर्भाची पंढरी म्हणून ओळखल्या जाणाºया श्री चिंतामणी जन्मोत्सवानिमित्त २१ जानेवारीपासून विविध कार्यक्रमाचे आयोजन केले आहे. आज रविवारी आयोजीत दंहिहांडी कार्यक्रमासाठी लाखो भक्तांनी गर्दी करून दर्शन घेतले.
श्री चिंतामणी उत्सवानिमित्त शहरातून मिरवणुक काढण्यात आली. त्यानंतर दहिहांडी शोभायात्रा काढण्यात आली. यामध्ये १०० च्यावर भजनी मंडळ व दिंड्यासह लाखो भक्तांनी सहभाग घेतला होता. यामध्ये ज्ञानेश्वर भजनी मंडळ कोठा, मुंगसाजी भजनी मंउळ कळंब, शारदा भजनी मंडळ कळंब, चिंतामणी महिला भजनी मंडळ, गाडगेबाबा महीला भजनी मंडळ, मोरया भजनी मंडळ, तपेश्वर भजनी मंडळ, गुरुदेव दत्तात्र्य भजनी मंडळ, गुरुदेव भजनी मंडळ, भगतसिंग भजनी मंडळ, राणी लक्ष्मी भजनी मंडळ, जयगुरू भजनी मंडळ, गजानन महाराज भजनी मंडळ, मंगलमुर्ती भजी मंडळ, स्वामी समर्थ भजनी मंडळ याच्या अन्य मंडळाचा समावेश होता. त्याच प्रमाणे जिल्हा परिषद बेसिक शाळा, जिल्हा परिषद कन्या शाळा, जिल्हा परिषद प्राथमिक शाळा,  शिवशक्ती कन्या हायस्कुल, कनिष्ठ महाविद्यालय, गणेश विद्यानिकेतन, जिल्हा परिषद प्राथमिक शाळा बोरी महाल व राजुरा येथील विद्यार्थी या मिरवणुकीत सहभागी झाले होते. या शोभायात्रेला चिंतामणी मंदिरापासून सुरूवात करण्यात आली. शहरातील इंदिरा चौक, राममंदिर, पोलीस स्टेशन, गांधी चौक, नेहरु चौक, तथागत नगर, गाडगेबाबा पुतळा मैदान आदि मार्गाने शोभायात्रेने मार्गक्रम केले. यावेळी तरुणांनी चौकाचौकात पिण्याचे पाणी व शरबतची व्यवस्था केली होती. यावेळी अनुचित घटना घडू नये म्हणून पोलीसांनी चोख बंदोबस्त ठेवला होता.

यवतमाळ दि. २५ – जिल्ह्यात विविध ठिकाणी झालेल्या अपघातात तीन जण जागीच ठार झाल्याच्या घटना आज रविवारी घडल्या.
शेतकरी ठार
बोरी (अरब) – भरधाव वाहनाने धडक दिल्याने  कामनदेव येथील शेतकरी जागीच ठार झाल्याची घटना आज रविवारी रात्री ७ वाजता यवतमाळ रोडवर गावालगत घडली.
किसन पवार (६०) रा. कामनदेव असे मृतकाचे नाव आहे. आज सायंकाळी ते शेतात जात होते. अशातच समोरून आलेल्या अज्ञात वाहनाने जोरदार धडक दिल्याने पवार हे रक्ताच्या थारोळ््यात रस्त्यावर कोसळले. यावेळी चालकाने वाहनासह तेथून पोबारा केला. घटनेनंतर अर्धा तास तेथेच पडून राहील्याने पवार यांचा जागीच मृत्यू  झाला. या घटनेची माहिती मिळताच लाडखेड पोलिसांनी घटनास्थळ गाठून पंचनामा केला. त्यानंतर मृतदेह यवतमाळ येथील शासकीय रुग्णालयात शवविच्छेदनासाठी पाठविला. या प्रकरणी अज्ञात वाहन चालकाविरूद्घ गुन्हा दाखल केला असून तपास सुरू आहे.
इसम जागीच ठार
उमरखेड – महागाववरून उमरखेडकडे जात असलेल्या भरधाव ट्रकने धडक दिल्याने इसम जागीच ठार झाल्याची घटना आज सकाळी १० वाजता घडली. किसन रामसिंग पवार (५८) रा. चिल्ली असे मृतकाचे नाव आहे. महागाव वरून उमरखेडकडे जाणाºया एम.एच. ३१/ सी कयु २४२९ क्रमांकाच्या ट्रकने चिल्ली या गावाजवळ पवार यांना जोरदार धडक दिली. यामध्ये त्याचा जागीच मृत्यू झाला. याप्रकरणी इंदल चव्हाण यांनी दिलेल्या तक्रारीवरून पोलिसांनी आरोपी ट्रक चालकाविरूद्घ गुन्हा दाखल केला असून तपास सुरू आहे.
अज्ञात वाहनाने एकाचा मृत्यू
यवतमाळ – अज्ञात वाहनाच्या धडकेत एक ठार झाल्याची घटना दारव्ह्यानजीक घडली. गजानन वाघमारे रा. कुपटा असे मृताकचे नाव आहे. गजानन दुचाकीने जात असताना, समोरून येणाºया भरधाव वाहनाने त्याला धडक दिली. या धडकेत गंभीर जखमी झालेल्या गजाननला रुग्णालयात भरती करण्यात आले होते. उपचारादरम्यान त्याचा मृत्यू झाला असून, याबाबत रमेश वाघमारे यांनी दारव्हा पोलीस स्टेशनला तक्रार दिली. याप्रकरणी पोलिसांनी चालकाविरुद्घ गुन्हा नोंद करून तपास सुरू केला आहे.

नांदेड – तीन सेवक आणि विद्यार्थ्यांकडून सतत होत असलेल्या बलात्काराच्या प्रकाराला कंटाळून मुलीने आत्महत्येचा प्रयत्न केला. यामुळे सामुहिक बलात्काराचे गूढ उकलले आ‌हे. याप्रकरणी बिलोली तालुक्यातील नरसी येथील निवासी मूकबधीर विद्यालयाच्या तीन सेवकांना पोलिसांनी अटक केली.
अल्पवयीन मूकबधीर मुलीला वडील नसल्याने व तिची आईच मोलमजुरी करून तिच्या शिक्षणाचा खर्च चालवत असते. गेल्या दोन वर्षांपासून या शाळेत शिकणाऱ्या या मतीमंद मुलीसोबत काही मुलांनी शारीरिक संबंध प्रस्थापित केले होते. हा प्रकार शाळेतील तीन सेवकांच्या लक्षात येताच त्यानी संस्थाचालक किंवा मुख्याध्यापकाकडे तक्रार न करता त्यांनी ही या मुलीशी अनैतिक संबंध प्रस्थापित केले. मकर संक्रातीच्या सणाला ही मुलगी आईकडे नरसी येथे आली असताना भेदरलेली दिसत होती. कोणालाही काहीही न बोलता तिने १८ जानेवारी रोजी तिने अंगावर रॉकेल ओतून घेतले व काडी लावणार इतक्यात, तिच्या धाकट्या बहिणीने तिच्या जवळील काडीपेटी हिसकावून घेतली. हा प्रकार का ‌करीत आहेस अशी विचारणा केल्यानंतर तिने खाणाखुणाच्या भाषेत झालेल्या सामूहिक अत्याचाराचा पाढा वाचला. त्यानंतर या मुलीच्या आईने या मुलीच्या काकाला बोलावून हा घृणास्पद प्रकार कथन केला. तेंव्हा मुलीच्या काकाने मुकबधीर विद्यालयच्या मुख्याध्यापकास हा प्रकार सांगितला. मुख्यध्यापकांनी तीनही सेवकांना पाठीशी घालत संस्थेची बदनामी होईल म्हणून पालकांना गप्प राहण्याचा सल्ला दिला. त्यानंतर मुलीचे काका,आईने रामतीर्थ पोलिस ठाणे गाठले. मुलीच्या आईने दिलेल्या तक्रारीवरून देवीदास शंकर चिखले, मुजीब बाबूमिया शहजोर आणि चंद्रभान संभाजी भरणे यांना अटक करण्यात आली. बाकी सर्व आरोपी १२ ते १४ वयोगटातील आहेत.

नवी दिल्ली – प्रजासत्ताक दिनाचे मुख्य अतिथी असलेले अमेरिकेचे राष्ट्राध्यक्ष बराक ओबामा भारतात दाखल झाले आहेत. सकाळी साडेनऊच्या सुमारास नवी दिल्लीच्या पालम विमानतळावर बराक ओबामांच्या एअरफोर्स-वन विमानाचे लँण्डीग झाले.
राजशिष्टाचार बाजूला ठेऊन पंतप्रधान नरेंद्र मोदींनी विमानतळावर ओबामा पती-पत्नींचे स्वागत केले. बराक ओबामा यांच्या वाहनांचा ताफा हॉटेलच्या दिशेने रवाना झाला आहे. बराक ओबामा हॉटेलमध्ये थोडावेळ विश्रांती घेऊन, नंतर राष्ट्रपती भवनात जाणार आहेत. राष्ट्रपती भवनात बराक ओबामांना मानवंदना दिली जाईल. तेथे राष्ट्रपती प्रणव मुखर्जींशी ते चर्चा करतील.
त्यानंतर राजघाटावर जाऊन महात्मा गांधीजींच्या समाधीस्थळावर आदरांजली वाहतील. त्यानंतर हैदराबाद हाऊसमध्ये पंतप्रधान मोदी व ओबामा यांच्यात चर्चा होईल. रात्री ओबामा यांच्यासाठी राष्ट्रपती प्रणव मुखर्जी यांनी खास मेजवानीचे आयोजन केले आहे.
ओबामा २६ जानेवारीच्या प्रजासत्ताक दिनाच्या कार्यक्रमाचे मुख्य अतिथी आहेत. प्रजासत्ताक दिनाच्या कार्यक्रमाला प्रमुख पाहुणे म्हणून उपस्थित रहाणारे ते अमेरिकेचे पहिले राष्ट्राध्यक्ष आहेत तसेच राष्ट्राध्यक्षपदाच्या कारर्कीदीत दुस-यांदा भारत दौ-यावर आलेले ते पहिले राष्ट्राध्यक्ष आहेत.
ओबामा यांच्या तीन दिवसीय भारत दौ-याला सुरुवात झाली आहे. ओबामांच्या या दौ-याच्या निमित्ताने दोन्ही देशांतील संबंध अधिक दृढ होतील. या दौ-यात अणू, संरक्षण, तंत्रज्ञान हस्तांतर, आर्थिक, पर्यावरण आदी करार होण्याची शक्यता आहे. दरम्यान, ओबामा यांनी आग्रा येथील ताजमहाल भेटीचा कार्यक्रम रद्द केल्याबद्दल खेद व्यक्त केला.

यवतमाळ दि. 24 : वाचनाशिवाय पर्याय नाही. त्यामुळे प्रत्येकाने वाचन ही आवड म्हणून विकसीत केली पाहिजे. त्याच अनुषंगाने सर्वसामान्यांमध्ये वाचनाची आवड निर्माण होण्यासोबतच
विविध प्रकारची पुस्तके सहजरित्या एकाच ठिकाणी वाचकांना उपलब्ध व्हावी म्हणून ग्रंथोत्सवाचे आयोजन करण्यात येत असल्याची माहिती निवासी उपजिल्हाधिकारी राजेश खवले यांनी दिली.
यवतमाळ येथे दिनांक 31 जानेवारी पासून तीन दिवसीय ग्रंथोत्सवाचे आयोजन करण्यात येत असून त्या निमित्त निवासी उपजिल्हाधिकारी खवले यांच्या अध्यक्षतेखाली जिल्हा माहिती कार्यालय येथे बैठक घेण्यात आली. त्यावेळी ते बोलत होते. बैठकीस समितीचे सदस्य ज्येष्ठ कवी शंकर बडे, प्रा.देवेंद्र पुनसे, प्राचार्य डॅा.आशा देशमुख, प्राचार्य अविनाश शिर्के, ग्रंथालय संघटनेचे कार्यवाह विनोद देशपांडे, अंकुर साहित्य संघाचे जिल्हाध्यक्ष तथा ज्येष्ठ साहित्यिक सुरेश गांजरे, बाबाराव मडावी, कवी आनंद गायकवाड, योगानंद टेभुर्णे, विनोद बुरबुरे, प्रा.निलेश भगत, आनंद कसंबे, प्राथमिक शिक्षणाधिकारी चिंतामण वंजारी, नपचे मुख्याधिकारी रविंद्र पांढरे, जिल्हा ग्रंथालय अधिकारी नितीन सोनोने तथा आयोजन समितीचे सदस्य सचिव प्र.जिल्हा माहिती अधिकारी मंगेश वरकड यावेळी उपस्थित होते.
सुरुवातीस मंगेश वरकड यांनी ग्रंथोत्सव आयोजनाच्या तयारीची माहिती दिली. यावेळी खवले यांनी राज्यातील नामवंत पुस्तक प्रकाशकांसोबतच युवकांना उपयुक्त ठरणाऱ्या पुस्तकांची प्रदर्शनीही ठेवल्या जाईल, असे सांगितले. शासनाच्यावतीने वेळोवेळी प्रकाशीत होणारी परंतु वाचणीय पुस्तके आवर्जुण वाचकांना ग्रंथोत्सवाच्या निमित्ताने उपलब्ध करुन देण्यात यावी, असे ते म्हणाले.ग्रंथोत्सवानिमित्त पुस्तक प्रदर्शन व विक्रीसह विविध सांस्कृतिक कार्यक्रम व स्पर्धांचेही आयोजन करण्यात येणार आहे. त्यासंदर्भातही बैठकीत चर्चा झाली. बैठकीला उपस्थित आयोजन समितीच्या सदस्यांनी मौलिक सूचना केल्या. शेवटी आभार अंकुर साहित्य संघाचे जिल्हाध्यक्ष सुरेश गांजरे यांनी मानले. सदर ग्रंथोत्सव दिनांक 31 जानेवारी ते 2 फेब्रूवारी दरम्यान नगर परिषदेच्या नगर भवन येथे होणार आहे.