यवतमाळ : आधार हेल्थ फाऊंडेशनने गरीब व गरजू रुग्णांसाठी रुग्णवाहिका उपलब्ध करून दिली आहे. या रुग्णवाहिकेचा लोकार्पण सोहळा केंद्रीय राज्यमंत्री हंसराज अहीर, आ. मदन येरावार, राजू तोडसाम, आ. राजेंद्र नजरधने, आ. संजीवरेड्डे बोदकुलवार, भाजपा जिल्हाध्यक्ष राजेंद्र डांगे, लोकनेते अण्णासाहेब पारवेकर, यांच्या उपस्थितीत पार पडला.
ही रुग्णावाहिका मातोश्री रेवती निलावार फाऊंडेशनचे दिपक निलावार यांनी भेट दिली आहे. आधार हेल्थ फाऊंडेशनच्या या उपक्रमाचे मान्यवरांनी स्वागत केले. यावेळी मनोज इंगोले, अजय बिहाडे, विजय कोटेचा, अंकूश डोळे, रेखा कोठेकर, माया खेरे उपस्थित होते. आधार फाऊंडेशनचे अध्यक्ष राजु पडगीलवार यांनी गरीब व गरजू रुग्णांना रुग्णवाहिकेचा लाभ घेण्याचे आवाहन केले आहे.

मुंबई – ऑस्ट्रेलिया आणि न्यूझीलंडमध्ये पुढल्यावर्षी होणा-या विश्वचषक क्रिकेट स्पर्धेसाठी भारताचा संभाव्य तीस सदस्यीय संघ जाहीर झाला आहे.  अपेक्षेप्रमाणे अनुभवी पण सध्या खराब कामगिरीमुळे संघाबाहेर असलेल्या चार खेळाडूंना ३० जणांच्या संभाव्य संघात स्थान देण्यात आलेले नाही.
या संघात एकवेळचे भारतीय संघाचे आधारस्तंभ समजले जाणारे विरेंद्र सेहवाग, युवराज सिंग, गौतम गंभीर, हरभजन सिंग आणि झहीर खान यांना स्थान मिळालेले नाही. या पाच ही खेळाडूंना गेल्या वर्षभरात एकदिवसीय क्रिकेट सामन्यात चांगली कामगिरी करता आली नव्हती. त्यामुळे त्याचा निवड समितीने विचार केलेला नाही.
संभाव्य संघात आशिष नेहरा, पियुष चावला यांना स्थान मिळाले आहे. तर जम्मू काश्मीरकडून खेळणारा अष्टपैलू परवेझ रसूल, उत्तर प्रदेशचा कुलदीप यादव, मनिष पांडे,केदार जाधव, अक्सर पटेल यांनी देशांतर्गत क्रिकेट स्पर्धेत केलेल्या चांगल्या कामगिरीच्या जोरावर पहिल्या ३०मध्ये स्थान मिळवले आहे.
या विश्वचषकासाठी निवडण्यात आलेल्या ३० जणांमध्ये २०११मध्ये झालेल्या विश्वचषक विजेत्या संघातील खेळाडूंची संख्या अगदी कमी आहे. युवराज, सेहवाग, हरभजन, गंभीर आणि झहीर हे खराब कामगिरीमुळे बाहेर आहेत. तर अन्य खेळाडूंमध्ये सचिन तेंडुलकर याने निवृत्ती घेतली आहे. आणि एस.श्रीसंत यावर स्पॉट फिक्सिंगमुळे बंदी घालण्यात आली आहे.पुढील वर्षी १४ फेब्रुवारीपासून ऑस्ट्रेलिया आणि न्यूझीलंड येथे विश्वचषकाला सुरुवात होणार आहे.

नागपूर – आतापर्यंतच्या अधिवेशनात नागपूर कराराची आठवण देत सहा आठवडे कामकाज चालवण्याची मागणी करणाऱ्या भाजपच्या नव्या सरकारने पहिले हिवाळी अधिवेशन तीन आठवड्यात गुंडाळण्याची तयारी केली आहे. ८ ते २६ डिसेंबरपर्यंतचे कामकाज निश्चित करण्यात आले आहे.
नॅनो मंत्रिमंडळ, शिवसेनेकडून होत असलेली कोंडी आणि अल्पमताची टांगती तलवार सद्यस्थितीत सरकारसमोर आहे. त्यामुळे पहिले अधिवेशन चालवण्याचे मोठे आव्हान उभे ठाकले. मात्र, सेनेने सत्तेत सहभागी होण्याचे संकेत देताच तीन आठवडे अधिवेशन आहे. नवीन मंत्र्यांना संधी मिळावी म्हणून विस्तार करण्याचा निर्णय मुख्यमंत्र्यांनी घेतला. पण, सेनेशी चर्चा लांबली आणि विस्तारही पुढे ढकलण्यात आला. त्यामुळे गेल्या १५ वर्षात विरोधी बाकावर बसून आवाज उठवण्याची सवय असलेले बरेच मंत्री आणि सदस्य अद्याप रुळलेले नाही. त्यात शेतकऱ्यांच्या प्रश्नांवरून काँग्रेस, शेतकरी संघटना, स्वाभिमानी शेतकरी संघटनेने सरकारला धारेवर धरण्याचे मनसुबे आखले आहेत. मात्र, सेना सत्तेत सहभागी झाल्यास विरोधकांचे हल्ले परतवून लावण्यासाठी सरकारला बळ मिळेल.
अधिवेशनाच्या १९ दिवसांच्या कार्यक्रम पत्रिकेत कामकाज सल्लागार समितीने मुंबईत झालेल्या बैठकीत १९ तारखेपर्यंतचे कामकाज निश्चित केले. १८ तारखेला समितीची बैठक होणार असून त्यात पुढील आठवड्याचे कामकाज निश्चित करण्यात येईल. कामकाजात ४ दिवस शनिवार व रविवारची सुट्टी आणि २५ तारखेला नाताळ असे ५ दिवस सुट्टी राहील. प्रत्यक्ष कामकाज १४ दिवसांचे असून त्यातही पहिला दिवस शोक प्रस्तावावर राहील. त्यामुळे २५ तारखेला गुरुवारनंतर शुक्रवारसाठी थांबवण्याऐवजी शेवटच्या दिवशीचे शासकीय कामकाज आधीच आटोपून २४ ला संपण्याचा विचार सुरू असल्याची माहिती सूत्रांनी दिली.

अहमदनगर – अहमदनगरमधील बहुचर्चित जवखेडा हत्याकांडाचे गूढ उकलण्यात यश आल्याचा दावा पोलिसांनी केला आहे. या तिहेरी हत्याकांडातील फिर्यादी प्रशांत जाधवला पोलिसांनी अटक केली असून त्याला आज दुपारी कोर्टासमोर हजर केले असता न्यायालयाने त्याला १० दिवसांची पोलीस कोठडी सुनावली आहे.
जवखेडा येथे २० ऑक्टोबर रोजी दलित कुटुंबातील तिघांची अत्यंत निर्घृणपणे हत्या करण्यात आली होती. या घटनेमुळे राज्यभरात खळबळ माजली होती. पोलिसांची सुमारे सात पथकं या घटनेचा विविध पद्धतीने तपास करत होते. याप्रकरणातील फिर्यादी प्रशांत जाधव याची लाय डिटेक्टर टेस्ट आणि कोर्टाच्या परवानगीनंतर प्रशांतच्या घराची घेतलेली झडती यातून पोलिसांना महत्त्वपूर्ण पुरावे मिळाले आहेत. या आधारे पोलिसांनी प्रशांतला अटक केली आहे.
संजय जाधव, त्यांची पत्नी जयश्री आणि १९ वर्षाचा मुलगा सुनील या तिघांची तीक्ष्ण हत्यारांनी वार करत त्यांचे अवयव विहिरीत फेकण्यात आले होते. याप्रकरणी प्रशांत जाधव यानेच पोलिसांकडे तक्रार दाखल केली असून तो संजय जाधव यांचा पुतणा आहे. या हत्येेचे गूढ उकलल्याचे पोलिसांनी म्हटले असले तरी हत्याकांडाचे नेमके कारण अद्याप स्पष्ट झालेले नाही.

नवी दिल्ली – मुंबईतील अरबी समुद्रात छत्रपती शिवाजी महाराज यांचे आंतरराष्ट्रीय दर्जाचे शिवस्मारक होणार असल्याचा मार्ग मोकळा झाला आहे. छत्रपती शिवाजी महाराज यांच्या शिवस्मारकांस केंद्रीय पर्यावरण खात्याने मंजुरी दिली असल्याची घोषणा केंद्रीय मंत्री प्रकाश जावडेकर यांनी गुरूवारी दिल्लीत केली.
महाराष्ट्र राज्याच्या विधानसभा निवडणुकीवेळी भाजपाने ‘छत्रपतींचा आशीर्वाद, चले चलो मोदी के साथ’ अशा प्रकारचे बॅनरबाजी केल्याने शिवसेना-भाजपामध्ये चांगलेच आरोप-प्रत्यारोप पाहायला मिळाले होते. छत्रपतींचा आशीर्वाद शिवसेनेच्याच पाठीमागे आहे असे शिवसेनेकडून सांगण्यात आले होते. मात्र आता पंतप्रधान नरेंद्र मोदी यांच्या मंत्रिमंडळाने शिवस्मारकाला परवानगी देत महत्वपूर्ण निर्णय घेतला आहे. अरबी समुद्रात ३०९ फूट उंचीचा  शिवरायांचा पुतळा उभारणार असल्याचे जावडेकर यांनी सांगितले. दरम्यान, बैलगाडी शर्यतीला केंद्राकडून परवानगी देण्यात येत असल्याने शंकरपटाचा नाद पुन्हा एकदा अनुभवयास मिळणार आहे. राज्याच्या अनेक कानाकोप-यात बैलगाडी शर्यत पाहण्यासाठी शेतकरी वर्गामध्ये उत्सूकता असते परंतू राज्यात यावर बंदी घालण्यात आल्याने अनेक शेतक-यांचा हिरमोड झाला होता. परंतू आता पुन्हा एकदा शेतक-यांना बैलगाडयांची शर्यत अनुभवायाचा मार्ग मोकळा होणार असल्याचे जावडेकर म्हणाले.