यवतमाळ – यावर्षी दुष्काळामुळे शेतकर्‍यांचे मरणच स्वस्त झाले आहे. हातचे पीक गेल्याने शेतकरी देशोधडीला लागले आहेत. सततची नापिकी, कर्जबाजारीपणामुळे हताश शेतकरी टोकाचे पाऊल उचलत मरणाला कवटाळत आहेत.एकीकडे सरकार हजारो कोटीचे पैकेज व पैकेज देत आहे तर दुसरीकडे उपासमारीला तोंड देत असलेले दररोज दोन दुष्काळग्रस्त शेतकरी चालु अधिवेशनाच्या पहिल्या दोन आठवड्यात आपली जीवन यात्रा आत्महत्या करून संपविली आहे अशा ४० शेतकऱ्यांची नावे विदर्भ जनांदोलन समितीने दिली असुन आज पर्यंत सत्ताधारी वा विरोधकांचा एकही नेता यांच्या दारावर गेला नसुन मात्र हे सारे नेते या दरम्यान विदर्भ दर्शन व भोजनावळीत मग्न असल्याचा आरोप शेतकरी नेते किशोर तिवारी यांनी केला आहे .
विदर्भात दररोज दोन मराठवाड्यात दररोज तीन शेतकरी आत्महत्या करीत असताना दिल्लीचे सरकार मात्र महाराष्ट्रात शेतकरी आत्महत्या कमी झाल्या असा दावा करीत आहे हा प्रकार तर शेतकऱ्यांना अधिक निराश करणारा आहे एकीकडे सरकारने कर्ज वसुली रोखली असल्याचा दावा केला आहे तर याउलट बँकांचे कर्मचारी गावांगावात मध्ये नोटीस घेऊन फिरत आहे. कर्मचार्‍यांनाही शेतकर्‍यांच्या परिस्थितीची जाणीव आहे. परंतु त्यांचाही नाईलाज आहे. वरिष्ठ अधिकारी मात्र याकडे लक्ष द्यायला तयार नाही.
शेतकर्‍यांना दोन वर्षांपासून निसर्गाच्या लहरीपणाचा चांगलाच फटका बसत आहे. सुरूवातीला अतवृदष्टी. गारपिट आणि नंतर यावर्षीखरिपात पावसाने दडी मारल्यामुळे शेतकर्‍यांच्या हातात काहीच लागले नाही. त्यातच जे पीक आले त्यांना भावच मिळत नाही. दुबार-तिबार पेरणी करूनही अपुरा पाऊस आल्याने संपूर्ण खरीप हंगाम उद्ध्वस्त झाला. गतवर्षी ज्यांना १०० पोते सोयाबीन झाले त्यांना यंदा दोन क्विंटलही सोयाबीन झाले नाही. महागडे बियाणे, निंदण, खुरपण करून पीक शेतात बहरले होते. मात्र किडी आणि दुष्काळी परिस्थितीने संपूर्ण शेत उद्ध्वस्त झाले आहे. आता या शेतकर्‍यांना बँका त्रस्त करून सोडत आहे. अनेकांनी पेरणीसाठी पीक कर्ज घेतले होते. काहींनी ट्रॅक्टर तर काहींनी मोटरसायकलसाठी कर्ज घेतले होते. परंतु दुष्काळी परिस्थितीने कर्ज फेडू शकले नाही. बँकांनी आता वसुली मोहीम सुरू केली आहे.

यवतमाळ, दि. २२ – गणवेश अनूदानाचे बिल मंजूर करण्यासाठी लाच मागणारा कनिष्ठ साहाय्यक लिपीक एसीबीच्या जाळ््यात अडकल्याची घटना आज सोमवारी आर्णी पंचायत समितीमध्ये घडली. राजेश मधूकर बुटले (४४) रा. आर्णी असे लाचखोराचे नाव आहे.
आर्णी पंचायत समितीमध्ये कनिष्ठ साहाय्यक वर्ग ३ पदावर कार्यरत असलेल्या राजेश बुटले या लोकसेवकाने तक्रारकर्त्याला गणवेश अनूदानाचे बिल मंजूर करण्यासाठी ६०० रुपयांची लाच मागितली होती. बिल मिळण्यासाठी तक्रारकर्त्याने आवश्यक कागदपत्रे सादर केली होती. कागदपत्रामध्ये कुठलिही त्रुटी नसताना, कनिष्ठ साहाय्यक बिल मंजूर करण्यासाठी पैशाची मागणी करीत होता. लोकसेवकाच्या या प्रकाराची तक्रार त्यांनी लाचलूचपत प्रतिबंधक विभागाकडे केली. त्यानुसार आज एसीबीच्या पथकाने सापळा रचून राजेश बुटले यास ६०० रुपयांची लाख स्विकारताना पंचायत समितीच्या चहा कॅटीनमध्ये रंगेहात पकडले. ही कारवाई उपअधिक्षक सतिष देशमूख, पोलीस निरीक्षक नंदकुमार जामकर, नितीन लेव्हरकर यांच्या नेतृत्वात पथकाने केली. या कारवाईमुळे कर्मचाºयात एकच खळबळ उडाली आहे.

नागपूर – शेतकऱ्यांच्या प्रश्नांवर युवक काँग्रेसच्या कार्यकर्त्यांनी आक्रमक भूमिका घेत नागपूर विधान भवनासमोर आंदोलन केले. यावेळी आक्रमक आंदोलकांनी थेट बॅरिकेड्स तोडत विधान भवनाकडे धाव घेतली. त्यामुळे पोलिसांनी आंदोलकांवर लाठीचार्ज केला.
महाराष्ट्र युवक काँग्रेसचे अध्यक्ष विश्वजित कदम यांच्या नेतृत्त्वाखालील हा मोर्चा काढण्यात आला. युवक काँग्रेसचे पदाधिकारी विधानसभा आवारातील बॅरिकेडस तोडून विधानसभेकडे पुढे सरकले. पोलिसांनी या कार्यकर्त्यांना रोखण्याचा प्रयत्न केला, मात्र आक्रमक झालेले कार्यकर्ते पोलिसांच्या विनंतीला न जुमानता विधान भवनाच्या दिशेने धावत सुटले. अखेर कायदा-सुवस्थेसाठी पोलिसांना लाठीमार करणे भाग पडले.मात्र, लोकशाही मार्गाने काढलेल्या मोर्चावर पोलिसांना लाठीमार करायला भाग पाडून भाजप सरकारने आपल्या ताकदीने आमचा आवाज दाबण्याचा प्रयत्न केला आहे, असा आरोप विश्वजित कदम यांनी केला आहे.

चेन्नई – २०१४ हे वर्षे भारताच्या अंतराळ मोहिमांसाठी अत्यंत चमकदार वर्ष ठरले. भारताची पहिलीच मंगळयान मोहीम यंदा यशस्वी झाली. पहिल्याच प्रयत्नात ही मोहीम यशस्वी करणारा भारत हा जगातील पहिलाच देश ठरला. त्यामुळे जगभरातून भारताचे कौतुक झाले. केवळ या मोहिमेवरच न थांबता भारताने रॉकेट, उपग्रह अंतराळात सोडण्याबरोबरच तंत्रज्ञान विकसित करण्याबाबत मोठी बाजी मारली.
भारत हा यापूर्वी अंतराळ मोहिमांसाठी अमेरिका, रशिया, फ्रान्सवर अवलंबून होता. त्यामुळे भारताने या मोहिमांसाठी स्वदेशी बनावटीचे तंत्रज्ञान विकसित करण्यास प्रारंभ केला. या संशोधनाला २०१४ मध्ये मोठे यश मिळाले. आंतरध्रुवीय मोहीम, क्रायोजनिक इंजिनची चाचणी, अवजड रॉकेटची चाचणी आदी तांत्रिक आघाड्यांवर इस्रेने कमाल केली. भविष्यात भारतातर्फे मानवी मोहीम राबवण्यासाठी हे तंत्रज्ञान उपयुक्त ठरणार आहे, अशी माहिती भारतीय अंतराळ संशोधन संस्थेचे अध्यक्ष के. राधाकृष्णन यांनी दिली.
भारताने भावी अंतराळ मोहिमांसाठी मानवी कुपी तयार केली आहे. या कुपीमध्ये दोन ते तीन अंतराळवीरांची राहण्याची सोय आहे. या कुपीच्या चाचण्याही घेण्यात आल्या आहेत. तसेच क्रायोजेनिक इंजिनविरहित रॉकेटची चाचणीही झाली.

दुबई – भारताचा माजी क्रिकेटपटू सचिन तेंडुलकरची आयसीसी २०१५ विश्वचषकासाठी अॅम्बेसिडर म्हणून निवड करण्यात आली आहे.
आंतरराष्ट्रीय क्रिकेट परिषदेने सोमवारी ही घोषणा केली. आयसीसीच्या सर्वात मोठ्या स्पर्धेचा अॅम्बेसिडर होण्याची सचिनची ही दुसरी वेळ आहे. याआधी २०११ मध्ये झालेल्या विश्वचषकातही तो आयसीसीचा अॅम्बेसिडर होता. मात्र त्यावेळी तो क्रिकेटमध्ये सक्रिय होता. यावेळी सचिन माजी क्रिकेटपटू म्हणून ही भूमिका बजावणार आहे.
अॅम्बेसिडरपदी निवड झालेला सचिन आयसीसीने हाती घेतलेल्या विविध कार्यक्रमांचा प्रचार करणार आहे. येत्या १४ फेब्रुवारी ते २९ मार्च दरम्यान न्यूझीलंड आणि ऑस्ट्रेलियामध्ये विश्चचषक स्पर्धा होणार आहे.
आयसीसीने विश्वचषकाच्या अॅम्बेसिडरपदी दुस-यांदा निवड केल्याबद्दल मी खूप आनंदित आहे. सहा वेळा विश्चचषक स्पर्धेत भाग घेतल्यानंतर यावेळची स्पर्धा काही वेगळीच असणार आहे. कारण यावेळी मैदानाच्या बाहेर राहून मी या स्पर्धेचा आनंद घेणार आहे. विश्वचषक जिंकणे हे प्रत्येक खेळाडूचे स्वप्न असते. २०११ मध्ये सुमारे २२ वर्षानंतर विश्वचषक जिंकण्याचे माझे स्वप्न पूर्ण झाले,असे सचिनने यावेळी सांगितले.२०१३ मध्ये सचिन आंतरराष्ट्रीय क्रिकेटमधून निवृत्त झाला. आपल्या २४ वर्षांच्या क्रिकेट कारकिर्दीत त्याने २०० कसोटी, ४३६ एकदिवसीय आणि एका टी२०मध्ये भारताचे प्रतिनिधित्व केले. यामध्ये ३४ हजार ३५७ धावा केल्या आणि १०० शतके साकारली.

येरवडा – येरवडा येथील जवाहरलाल नेहरू उद्योग केंद्रातून (बालसुधारगृह) २ डिसेंबर रोजी पाच मुले पळून जाण्याची घटना ताजी असतानाच शनिवारी (२०डिसेंबर) सकाळी नऊ वाजण्याच्या सुमारास व्यायाम खोलीतून पुन्हा एकदा पाच मुले पळून गेली. त्यातील एकाला केअर टेकरने पाठलाग करून पकडले; तर चार जण पळून जाण्यात यशस्वी झाले. बालसुधारगृहातून मुले पळून जाण्याची चालू वर्षातील ही चौथी घटना आहे.
विविध गुन्ह्यातील अल्पयवीन मुले सातत्याने पळून जाण्याच्या घटना घडूनही केंद्र सरकारकडून सुरक्षेसाठी कुठलीही ठोस कारवाई होताना दिसत नाही. केंद्रातून पळून गेलेल्या मुलांपैकी तीन मुले ही पुण्यातील असून एक जण पनवेलचा आहे. मुले पळून गेली ती त्या दिवशी शनिवारी केंद्रावर नऊ केअर टेकर, तीन परीविक्षा अधिकारी, एक समुपदेशक आणि २७ मुले केंद्रात होती. डिसेंबर महिन्याच्या दोन तारखेला पाणी भरण्याचे निमित्त साधून रात्री साडे अकरा वाजच्या सुमारास सहा मुले सीमा भिंतीवरून उडी मारून पळून गेली होते. एकाच्या पायाला उडी मारल्यामुळे दुखापत झाल्याने त्याला केंद्रातील केअर टेकरने पकडले होते. पाच दिवसानंतर त्यातील तिघांना गुन्हे शाखेच्या पोलिसांनी चिखली येथे पकडले; तर पंधरा दिवसांनी एकाला सोलापूर जिल्ह्यात पकडले होते. पळून गेलेल्यांपैकी अजूनही एक मुलगा पोलिसांना शोधता आलेला नाही.
शनिवारीही नेहमीप्रमाणे सकाळी आठ वाजता ड्युटीवर असणारे केअरटेकर केंद्रातील काही मुलांना व्यायाम करण्यासाठी व्यायाम खोलीत घेऊन गेले. मुले खोलीत गेल्यावर केअर टेकरने दरवाजाला कडी लावून ते खोलीच्या मागे अंघोळीसाठी पाणी गरम करण्यासाठी गेले. काही वेळातच पाच मुले व्यायाम खोलीच्या मुख्य प्रवेश दराने पळू लागली. हे पाहून तेथील महिलांनी आरडाओरडा केला असता एका मुलाला पाठलाग करून पकडले; मात्र त्यातील चार जण पळून गेले. चार मुलांची विविध ठिकाणी आणि त्यांच्या घरी शोध घेऊन सुद्धा सापडली नसल्याने रात्री पोलिसांकडे मुले हरविल्याची तक्रार दिली.

पुणे – जर्किनचा हट्ट न पुरवल्याने एका १० वर्षीय मुलाने गळफास घेऊन आत्महत्या केल्याचा धक्कादायक प्रकार पुण्यात घडला आहे. घरात कुणीही नसताना या मुलाने पंख्याला ओढणी बांधून गळफास घेत स्वत:चे जीवन संपवले. या घटनेने संपूर्ण शहरात खळबळ माजली आहे.
आदित्य पिसाळ असे आत्महत्या करणाऱ्या मुलाचे नाव आहे. धनकवडी परिसरात राहणारे बांधकाम व्यावसायिक सुनील पिसाळ यांचा तो मुलगा होता. सुनील यांच्या बहिणीचा रविवारी वाढदिवस होता. त्यासाठी हॉटेलमध्ये ठेवलेल्या पार्टीला घरातील सगळेच जाणार होते. यावेळी आदित्यने आईकडे जर्किनसाठी हट्ट धरला. मला आत्ताच्या आत्ता जर्किन हवे नाहीतर मी तुमच्यासोबत येणार नाही, असे त्याने सांगितले. त्यावर आता तुला स्वेटर घेऊ, असे सांगून आईने त्याची समजूत घालण्याचा प्रयत्न केला. मात्र, आदित्यने जर्किनचा हट्ट काही सोडला नाही. आईवर तो रागावलाही. आदित्य काही केल्या ऐकत नसल्याने शेवटी त्याला एकटेच घरी ठेऊन बाकी सगळेजण हॉटेलमध्ये गेले. त्याचवेळी आदित्यने आत्महत्येचा टोकाचा निर्णय घेतला. रात्री सव्वा दहाच्या सुमारास कॉम्प्युटरच्या टेबलवर उभे राहून त्याने पंख्याला ओढणी बांधली आणि ओढणीने गळफास घेऊन आत्महत्या केली. आज सकाळी आदित्यवर अंत्यसंस्कार करण्यात आले असून याप्रकरणी अधिक तपास पोलीस करत आहेत. दरम्यान, अवघ्या १० वर्षाच्या मुलाने आत्महत्या करण्याची ही घटना सर्वांनाच धक्का दोणारी असून मुलांच्या हट्टीपणाचा मुद्दा अधिकच गडद बनला आहे.