कोल्हापूर – कबनूर येथील राजू भाऊसो केटकाळे यांची टोयोटो किर्लोस्कर मोटार प्रायव्हेट लिमिटेडच्या सीनिअर व्हाइस प्रेसिडेंटपदी नुकतीच नियुक्ती करण्यात आली आहे. येत्या जानेवारीपासून ते या पदाची सूत्रे स्वीकारतील. सर्वसामान्य शेतकरी कुटुंबाची पार्श्वभूमी असणाऱ्या केटकाळे यांनी करिअरसाठी धडपडणाऱ्या युवकांसाठी एक प्रेरक उदाहरण यानिमित्ताने घालून दिले आहे.
कबनूर येथील भाऊसो केटकाळे हे अल्पभूधारक शेतकरी. ते साखर कारखान्यात काम करीत. त्यांना जेवणाचा डबा देण्यासाठी जात असताना तेथील वरिष्ठ अधिकाऱ्यांनी राजू केटकाळे यांना इंजीनिअर होण्याचा सल्ला देत. त्यातूनच केटकाळे यांच्यात शिक्षणाबद्दल आवड निर्माण झाली. ते गावातीलच न्यू इंग्लिश स्कूलमध्ये दहावीपर्यंत शिकले. शाळकरी वयात शेतीचे कामे करत कुटुंबाला हातभार लावणाऱ्या केटकाळे यांना जिद्दीमुळे दहावी परिक्षेत चांगले मार्क्स मिळाले. त्यांनी नंतर मित्रांच्या सल्ल्याने विवेकानंद कॉलेजमध्ये शास्त्र शाखेसाठी प्रवेश घेतला. यानंतर एमईपर्यंतचे शिक्षण कराड गर्व्हर्न्मेंट कॉलेजमधून झाले. शिक्षणासाठी लागणाऱ्या पैशांची तजवीज अनेकदा छोटीमोठी कामे करुन करत असताना काही नातेवाईकांनीही त्यांना हातभार लावला.
केटकाळे यांचे शिक्षण एमई (मशीन डिझाइन)पर्यंत झाले आहे. १९९२ साली त्यांनी एमईनंतर त्यांनी पुण्यातील किर्लोस्कर ऑईल इंजिनमधून नोकरीस सुरवात केली. कुठलेही काम अगदी मनापासून करण्याची सवय असणाऱ्या केटकाळे यांच्याकडे साहजिकच व्यवस्थापनाचे लक्ष गेले. कंपनीने १९९८ साली त्यांना असिस्टंट मॅनेंजर ऑफ प्लँट या पदावर संधी दिली. यानंतर कंपनीतील विविध पदे भूषवल्यानंतर त्यांच्यावर २००७ साली थायलंड येथील नवीन प्रकल्पाची जबाबदारी सोपविण्यात आली. थायलंडच्या प्रकल्पाची यशस्वी धुरा सांभाळणाऱ्या केटकाळे यांना भारतातील दुसऱ्या उत्पादन युनिटच्या निमित्ताने भारतात परत बोलवण्यात आले. २०१२ पासून त्यांच्यावर व्हाइस प्रेसिंडेंडपदाची जबाबदारी देण्यात आली. डिझायनिंग, कॉस्ट कटिंग आणि कर्मचाऱ्यांचे व्यवस्थापन यामध्ये केटकाळे यांचे नाव आंतराष्ट्रीय स्तरावर गाजले आहे. कंपनीने त्यांची आता सीनिअर व्हाइस प्रेसिडेंटपदावर निवड केली आहे.

मुंबई – मुख्यमंत्री देवेंद्र फडणवीस यांच्या सरकारने राज्यातील जिल्हावार पालकमंत्र्यांची यादी जाहीर केली.
मुंबई शहर – सुभाष देसाई , मुंबई उपनगर – विनोद तावडे, ठाणे – एकनाथ शिंदे, पालघर – विष्णू सवराm, रायगड – प्रकाश मेहता, रत्नागिरी – रवींद्र वायकर, सिंधुदुर्ग – दीपक केसरकर, सांगली, कोल्हापूर – चंद्रकांत पाटील, जळगाव, बुलडाणा – एकनाथ खडसे, बीड,लातूर – पंकजा मुंडे-पालवे, औरंगाबाद – रामदास कदम , पुणे – गिरीष बापट, परभणी, नांदेड – दिवाकर रावते , अहमदनगर – राम शिंदे, धुळे – दादा भुसे, अकोला, वाशिम – रणजित पाटील , नाशिक, नंदूरबार – गिरीश महाजन , सातारा – विजय शिवतारे , सोलापूर – विजय देशमुख , अमरावती – प्रवीण पोटे, वर्धा – सुधीर मुनगंटीवार, गोंदिया – राजकुमार बडोले , यवतमाळ – संजय राठोड, नागपूर – चंद्रशेखर बावनकुळे, भंडारा, उस्मानाबाद – दीपक सावंत, गडचिरोली – राजे अंबरिशराव अत्राम, जालना – बबन लोणीकर , हिंगोली – दिलीप कांबळे

पेशावर – पाकिस्तानातील पेशावर येथील लष्करी शाळेत झालेल्या दहशतवादी हल्ल्याचा सूत्रधार सद्दाम पाकिस्तानी सैन्याच्या कारवाईत ठार झाला.
गुरुवारी पाकिस्तानी सैन्याने जमरूडमधील गुंडी भागात केलेल्या कारवाईत सद्दाम ठार झाला. यावेळी त्याच्या एका साथीदाराला अटक करण्यात आल्याचे खैबर एजन्सीचे पेशावर राजकीय प्रतिनिधी शाहव अली शाह यांनी सांगितले.
तेहरीक ए-तालिबान संघनेच्या तारिक गेदार समूहाचा तो सदस्य होता. पेशावरमधील लष्करी शाळेतील हल्ल्यामागचा तो मुख्य सूत्रधार होता. १६ डिसेंबर रोजी पेशावरमधील शाळेत झालेल्या दहशतवादी हल्ल्यात सुमारे १५० ठार झाले होते. यामध्ये अधिकतर लहान मुले समावेश होता.
याआधी गेल्यावर्षी खैबर पख्तुनवाला भागात झालेल्या दहशतवादी हल्ल्याचा सूत्रधारही सद्दाम होता. या हल्ल्यात ११ सुरक्षा रक्षक ठार झाले होते.

यवतमाळ –  राज्य उत्पादन शुल्क विभागाने गुप्त माहितीवरून सावरगाव-चिंचोली रोडवर सापळा रचून टाकलेल्या धाडीत गोवा संत्रा ब्रॅंडच्या देशी दारूच्या 480 बॅाटल्स जप्त केल्या. जप्त मद्देमालाची एकून किंमत 3 लाख 15 हजार इतकी आहे. या कार्यवाहीत तीन आरोपींना अटक करण्यात आली आहे. मिळालेल्या गुप्त माहितीवरून यवतमाळच्या भरारी पथकाने ही कार्यवाही केली. MH-32/C-342 या क्रमांकाच्या टाटा सुमोमध्ये सदर देशी दारू असल्याचे कळल्यानंतर सापळा रचून या वाहनासह 480 बॅाटल्स जप्त करण्यात आल्या. तसेच तीन आरोपी निलेश बाबाराव रूपवणे, अंबादास सुकानंद कांबळे, दिनेश भाऊराव शिवरकर यांना अटक करण्यात आली. ही कार्यवाही अधीक्षक पराग नवलकर यांच्या मार्गदर्शनात यवतमाळ भरारी पथकाचे दुय्यम निरिक्षक उमेश शिरभाते, एम.पी.चिटमटवार, एन.के.सुर्वे तसेच जवान शंकर घाटे, महेंद्र रामटेके, ए.ए.पठाण, एम.पी.शेंडे, एन.डी.दहेलकर, एस.एस.दुधे, निलेश मानकर, नितीन कुळसंगे, बी.सी.मेश्राम, सी.डी.चिद्दरवार, यांनी केली. नवीन वर्ष साजरे करतांना कोणतीही अनुचित घटना घडू नये म्हणून 31 डिसेंबर पर्यंत विशेष मोहिम राबविण्यात येत
असून त्याअंतर्गत ही कार्यवाही करण्यात आली आहे. पुढेही ही कार्यवाही सुरू राहणार आहे. अवैध मद्यविक्रीसह गैरकायदेशिर मार्गाने होणारी मद्यविक्रीवर विशेष भरारी पथकाचे लक्ष राहणार आहे. त्यासाठी विशेष पथखे नववर्षाचे स्वागत करतांना मोठ्या प्रमाणावर मद्यसेवेन केले जाते. त्याअनुषंगाने एकदिवशीय मद्यपरवाने
मोठ्या प्रमाणावर देण्यात येत आहे. जिल्ह्यात आतापर्यंत 60 हजार एकदिवशीय मद्य परवाने देण्यात आले आहे.

नागपूर – अस्मानी संकटामुळे यावर्षी शेतकरी संकटात सापडला आहे. सुरुवातीला पावसाची झालेली दिरंगाई व त्यानंतर दुबार तिबार पेरणी करून शेतकरी कसाबसा सावरत असताना सोयाबीनवर आलेल्या विषाणूजन्य रोगामुळे सोयाबीन जाग्यावरच करपली. त्यामुळे शेतकºयांना शेतात राहिलेली थोडीफार सोयाबीन कापणे मजुरीस परवडणारे नव्हते. त्यामुळे ती तशीच शेतातच राहू द्यावी लागली. सोयाबीननंतर मिरचीवर गेलेल्या बोकड्या रोगानेही शेतकºयांना चिंतेत टाकले आहे. तर विदर्भात मोठ्या प्रमाणात घेत असलेल्या कपाशीवर लाल्या रोग गेल्याने होणारे उत्पन्न अर्ध्यावर आले आहे. यामुळे महत्वाच्या सोयाबीन, मिरची व कपाशीवर रोग गेल्याने विदर्भातील शेतकरी संकटात सापडला आहे.
कपाशीवर नायट्रोजन, पोटॅशियम व मॅग्नेशियमच्या कमतरतेमुळे लाल्या जातो. तसेच दहिया (ग्रे मिल्ड्यू) या रोगामुळे कपाशीवर लाल्या गेला की कपाशीची वाढ खुंटते व त्यामुळे कपाशीच्या झाडावर असलेले बोंडे पक्व न होताच फुटत असल्याने शेतकºयांना अपेक्षित उत्पादन मिळत नाही. त्यामुळे शेतकºयांनी वेळीच लाल्या या रोगाचे नियंत्रण केल्यास अधिक उत्पादन मिळणे शक्य आहे. परंतु शेतकरी व कृषी विभागाची अद्याप नाळच जुळली नसल्याने शेतकºयांना कृषी विभागाकडून कोणत्याही प्रकारचे मार्गदर्शन किंवा मदत मिळत नाही. त्यामुळे कृषी विभाग पांढरा हत्ती ठरला आहे. शेतकºयांपर्यंत आधुनिक माहिती व तंत्रज्ञान पोहोचविण्यात प्रशासकीय यंत्रणेचा अभाव असल्याचे सातत्याने दिसून येते. परंतु याकडे सत्ताधाºयांचे लक्ष नाही. सोयाबीन, मिरची व कपाशी तसेच धानावर कीटकनाशकांसोबत अ‍ॅप्सा-८० हे बहुउद्देशीय स्पे्र गुणवर्धक वापरल्याने चांगले परिणाम दिसून आले आहे. कीटकनाशकासोबत अ‍ॅप्साचा उपयोग केल्याने पिकांचे रोेगांपासून परिणामकारक संरक्षण मिळाले आहे. कारंजा घाडगे तालुक्यातील पारडी येथील राजेंद्र चरडे यांच्या शेतातील कपाशी ही अद्याप हिरवीगार असून बाजुच्याच लक्ष्मण टिपले यांच्या शेतातील कपाशीचे पाने लाल्याने सुकले आहेत.
राज्यकर्त्यांच्या उदासीनतेमुळे विदर्भातील शेतीवर निसर्गावर अवलंबून आहे. नेहमीच्या नापिकीने त्यांना शेतात अत्याधुनिक यंत्रसामुग्री खरेदी करून आधुनिक शेतीचा ते विचारही करू शकत नाही. सिंचनाच्या सुविधा नसल्याने विदर्भातील शेतकºयांना नेहमीच अस्मानी व सुलतानी संकटाचा सामना करावा लागतो. त्यामुळे हतबल होत अनेकांना टोकाचा निर्णय घेत आत्महत्या करावी लागते. परंतु आता केंद्रातील व राज्यातील सरकार बदलल्याने विदर्भातील शेतकºयांना चांगले दिवस येण्याची आशा आहे. विदर्भातील शेतकरी सुखी व समृद्ध होण्यासाठी सिंचनाच्या सोयी उपलब्ध करण्यासोबतच आधुनिकतेशी शेतीला जुळण्याची गरज आहे. विदर्भातील शेतकरी हजारो वर्षांपासून करीत असलेली शेतीच्या ज्ञानाचा उपयोग करीत अधिक उत्पादन घेण्याचा आटापिटा करीत आहे. पिकांमध्येही फेरफार करणे किंवा विविध प्रयोग करीत आधुनिक शेतीचा विचार करणारे फारच अल्प शेतकरी असल्याने दिवसेंदिवस रासायनिक खते, कीटकनाशके यांच्या वाढत असलेल्या किंमती व वाहतुकीचा खर्च वाढत असल्याने तसेच तरुणाई शेतीत राबण्यास तयार नसल्याने विदर्भातील शेतीच संकटात सापडली आहे. युती सरकार धडक सिंचन कार्यक्रम राबवित असून विदर्भातील ८३,२०० विहिरींच्या बांधकामांचे उद्दिष्ट पार करण्यासाठी प्रयत्न करीत आहे. जवाहर विहीर योजना राबविण्यात येत आहे. परंतु यासाठी प्रशासकीय यंत्रणा कितपत सक्रिय होते, हे बघावे लागणार आहे.

नवी दिल्ली -पक्षनिधीसाठी वाढवण्यासाठी डिनर, लंच पार्टी सारखे नवनवे फंडे वापरणा-या आम आदमी पक्षाकडून आता चहा पार्टीचे आयोजन केले जात आहे.
‘टी विथ केजरीवाल’ नावाने हा आयोजित केला जाणार आहे. मात्र या कार्यक्रमातील ‘आप’चा चहा हा काही साधासुधा नसून या चहाच्या एका कपसाठी तुम्हाला तब्बल २० हजार रुपये मोजावे लागणार आहेत.
दिल्लीचे माजी कायदा मंत्री सोमनाथ भारती यांनी शनिवारी या कार्यक्रमाचे आयोजन केले आहे. आगामी निवडणुकीच्या पार्श्वभूमीवर पक्षनिधी गोळा करण्यासाठी हा कार्यक्रम आयोजित केला जाणार आहे. या कार्यक्रमात सहभागी होण्यासाठीचा खर्च २० हजार रुपये इतका आहे असे भारती यांनी सांगितले. काही दिवसांपूर्वी पक्षनिधी वाढवण्यासाठी दिल्ली, मुंबई आणि बंगळूरू येथे आपकडून डिनर पार्टीचे आयोजन केले होते. केजरीवालांच्या डिनर पार्टीत जेवणाच्या एका प्लेटची किंमत २० हजार रुपये इतकी ठेवण्यात आली होती.

रांची, दि. २६ – झारखंडमध्ये एकहाती सत्ता मिळवल्यानंतर भाजपाने रघुवर दास यांची राज्याचे नवे मुख्यमंत्री म्हणून निवड केली आहे. थोडयाच वेळात यासंबंधी औपचारिक घोषणा करण्यात येईल.दास यांच्या रुपाने बिगर आदिवासी चेह-याला प्रथमच मुख्यमंत्रीपदाची संधी मिळत आहे. शुक्रवारी भाजपा निरीक्षक जे.पी. नड्डा आणि विनय सहस्त्रबुद्धे यांच्या उपस्थितीत सर्व आमदारांनी मुख्यमंत्री म्हणून दास यांच्या नावाला सहमती दर्शवली. येत्या सोमवारी त्यांचा शपथविधी पार पडणार आहे. दरम्यान झारखंडला आता भ्रष्टाचार मुक्त सरकार मिळेल, अशी प्रतिक्रिया दास यांनी व्यक्त केली. राज्यातील सर्व घटकांचा विकासात समावेश केला जाईल तसेच अनुसूचित जाती-जमातीतील नागरिकांच्या विकासाकडे विशेष लक्ष दिले जाईल, असेही त्यांनी सांगितले. भाजपाचे ज्येष्ठ नेते असलेले रघुवर दास यांनी यापूर्वी उपमुख्यमंत्रीपद भूषवले असून पक्षाचे उपाध्यक्षही होते. एका गरीब कुटुंबात जन्म झालेल्या दास यांचे वडील टाटा स्टीलमध्ये कामगार होते. १९८० साली दास यांनी भारतीय जनता पक्षात प्रवेश केला. १९९५ साली ते पहिल्यांदा आमदार बनले.