यवतमाळ , दि. ३० – नवर्षाला काही तास शिल्लक राहीले असून थर्टीफस्टच्या पार्श्वभूमिवर तरुणाईसह सर्वच जण सज्ज झाले आहे. नववर्षाच्या स्वागत करताना कुठलीही अनुचित घटना घडू नये म्हणून पोलीस दलाच्या वतीने उपाययोजना करण्यात येणार आहे. थर्टीफर्स्टच्या पार्टीवर पोलिसांचा वॉच राहणार आहे. नियमाचे उल्लंघन केल्यास कडक कारवाई करण्यात येणार असल्याची माहिती जिल्हा पोलीस अधीक्षक संजय दराडे यांनी दिली.
सरत्या वर्षाला निरोप आणि नवनवर्षाचे स्वागत मोठ्या उत्साहात करण्यात येणार आहे. यासाठी अनेक ठिकाणी पार्ट्यांचे आयोजन करण्यात आले आहे. थर्टीफर्स्टच्या रात्री मद्यपी चालकांना रोखण्यासाठी पोलिसांनी ‘ड्रंक अ‍ॅन्ड ड्राईव्ह’ मोहीम हाती घेतली आहे. जिल्ह्यातील प्रमुख मार्गावर अतिरिक्त पोलीस बंदोबस्त ठेवल्या जाणार आहे. ३१ डिसेंबरच्या रात्री महामार्गासह शहरात व तालुक्यात महत्वाच्या ठिकाणी नाकाबंदी राहणार आहे. मद्यपी चालकांच्या तपासणीसाठी पोलिसांचे पथक तयार करण्यात आले असल्याची माहिती पोलीस अधीक्षक संजय दराडे यांनी दिली. मद्यपान करून कुणीही सुसाट वेगात वाहने चालवणार नाही. ट्रिपल सीट जाणार नाही, यावरही पोलीस लक्ष ठेवणार आहेत.
जिल्हाभरात अडीच हजार पोलीस कर्मचाºयांसह उपविभागीय अधिकारी, पोलीस निरीक्षक, सहाय्यक पोलीस निरीक्षक, उपनिरीक्षक, स्थानिक गुन्हे शाखा तैनात राहणार आहे. पोलिसांनी हॉटेल, वाईनबार मालकांना सुरक्षिततेच्या दृष्टीने योग्य त्या सूचना दिल्या आहे. या आदेशाचे उल्लंघन करणाºयांवर कडक कारवाईचा बडगा उगारल्या जाणार असल्याचा इशारा पोलीस अधीक्षकांनी दिला.

यवतमाळ , दि. ३० – जिल्ह्यातील जनतेच्या तक्रारी सोडविण्यासाठी जिल्हा परिषदेत टोल फ्रि क्रमांकाची सुविधा करण्यात आली. तक्रार निवारण केंद्राचे उद्घाटन जि.प.अध्यक्ष डॉ. आरती फुफाटे यांच्या हस्ते करण्यात आले. यावेळी मुख्य कार्यकारी अधिकारी डॉ. मल्लिनाथ कलशेट्टी यांनी केले आहे.
स्वच्छ भारत मिशन, रमाई व राजीव गांधी आवास योजना अंतर्गत वैयक्तिक शौचायलाबाबत तक्रारींचे निवारण करण्यासाठी १८००२३३६३२ हा क्रमांक सुरू करण्यात आला आहे. वैयक्तिक तक्रार असल्यास या क्रमांक्रावर संपर्क साधता येणार असून ही सुविधा सकाळी १० वाजतापासून ते सायंकाळी ७ पर्यंत सुरू राहणार आहे. ज्या विभागासंबंधी तक्रार आहे, त्यांच्याशी संपर्क साधून समस्यांचे निवारण करण्यात येईल. या संधीचा लाभ घेण्याचे आवाहन जि.प.अध्यक्ष डॉ. आरती फुफाटे, मुख्य कार्यकारी अधिकारी डॉ. मल्लिनाथ कलशेट्टी यांनी केले. यावेळी उपमुख्य कार्यकारी अधिकारी अरुण मोहोड यांच्यासह विभागप्रमुख उपस्थित होते.

मेलबर्न – ऑस्ट्रेलियाविरूद्धची कसोटी मालिका गमावल्यानंतर भारताचा सर्वात यशस्वी कसोटी कर्णधार महेंद्रसिंग धोनीने कर्णधारपदाचा तडकाफडकी राजीनामा देत कसोटी क्रिकेटमधून निवृत्ती जाहीर केली आहे. धोनीच्या या ‘बॉम्ब’ने सगळ्यांनाच धक्का बसला आहे. दरम्यान, धोनीच्या राजीनाम्यामुळे ६ जानेवारीला सुरू होणाऱ्या चौथ्या आणि शेवटच्या सिडनी कसोटीचे कर्णधारपद विराट कोहलीकडे सोपविण्यात आले आहे. ‘बीसीसीआय’ने याबाबत अधिकृत पत्रक जारी केले आहे.
धोनीच्या नेतृत्वाखाली देशात आणि विदेशातही भारतीय संघाने मोठे यश मिळवले. कसोटीत मागे पडलेल्या भारतीय संघाला धोनीनेच पहिल्या स्थानीही नेऊन ठेवण्याचा पराक्रम केला. धोनीच्या कल्पक नेतृत्वामुळे ऑस्ट्रेलिया, इंग्लंड, द. आफ्रिकेसारख्या कसोटीतील बलाढ्य संघांनाही भारताने तगडे आव्हान उभे केले. आज मात्र ऑस्ट्रेलियाकडून २-० असा मालिका पराभव पदरात पडल्याने धोनीने निवृत्तीचा टोकाचा निर्णय घेतला. वनडे आणि टी-२० कडे लक्ष केंद्रीत करण्यासाठी आपण कसोटी क्रिकेटमधून निवृत्ती घेत असल्याचे धोनीने सांगितले.
धोनीने आपल्या यशस्वी कारकीर्दीत ९० कसोटी सामन्यांमधून ४ हजार ८७६ धावा तडकावल्या आहेत. त्याच्या नावावर ६ शतकं, ३१ अर्धशतकांची नोंद आहे. २२४ ही त्याची वैयक्तिक सर्वाधिक धावसंख्या आहे. २०१४ मध्ये ऑस्ट्रेलियाविरूद्ध चेन्नईत त्याने ही खेळी केली होती.

यवतमाळ, दि. ३० : कमी धारणक्षेत्रामध्ये किफायतशीर शेती होऊ शकत नाही, या संकल्पनेला बाभूळगाव तालुक्यातील उमरी (स्मारक) येथील महादेव छत्रपती ढेपे या शेतकऱ्याने खोटे ठरविले आहे. पारंपारिक पिकांना फाटा देत भाजीपाला पिकांपासून वार्षीक 2 लाखाचे उत्पन्न मिळविणाऱ्या या शेतकऱ्याने परिसरातील शेतकऱ्यांसाठी वेगळा आदर्श निर्माण केला आहे.
ढेपे यांच्याकडे वडीलोपार्जीत 3.50 एकर इतकी शेतजमीन आहे. या शेतीवर दरवर्षी परंपरेने सोयाबीन, कापसाचे पिक घेतले जायचे. या पिकांना खर्च अधिक आणि त्यापासून मिळणारे उत्पन्न कमी अशी स्थिती असल्याने त्यांनी भाजापाला पिकाकडे लक्ष दिले. 1997-98 मध्ये कृषी विभागाच्या मदतीने शेतात विहीर व मोटर बसवून सिंचनाची सुविधा उपलब्ध केली. ओलिताची सोय उपलब्ध झाल्याने त्यांनी पहिल्या वर्षी अर्धा एकर क्षेत्रावर भाजिपाला पिके घेण्यास सुरूवात केली. त्यातून त्यांना चांगला नफा मिळू लागला. ढेपे यांना आत्मा योजनेची माहिती झाल्यानंतर त्यांनी या योजनेंतर्गत भाजीपाला पिकाचे प्रशिक्षण, अभ्यास दौरे आणि भाजीपाला उत्पादक शेतकऱ्यांच्या शेताला भेटी दिल्यानंतर त्यांचा भाजीपाला पिकांबाबत आत्मविश्वास वाढला आणि त्यांनी या पिकाखालील क्षेत्रात वाढ केली. आजमितीस ते दरवर्षी 2.50 एकर क्षेत्रावर टोमॅटो, सांभार, भेंडी, चवळी सारख्या भाजीपाला पिकांची लागवड करीत आहे. उर्वरीत एक एकर क्षेत्रावर कापुस अथवा सोयाबीनचे पिक घेतात.आत्मा योजनेंतर्गत आधुनिक तंत्रज्ञान, पिकांची लागवड, खर्चात बचत, पिकांचे संगोपण आदी बाबी त्यांनी आत्मसात केल्याने गेल्या तिन वर्षात त्यांच्या भाजीपाला उत्पन्नात सातत्याने वाढ होत आहे. सन 2011-12 मध्ये त्यांना भाजीपाल्यापासून 1 लाख 30 हजाराचे उत्पन्न मिळाले होते. दुसऱ्या वर्षी 2012- 13 मध्ये 1 लाख 55 हजार तर गेल्यावर्षी 2 लाखाचे उत्पन्न त्यांना मिळाले. सदर भाजीपाला पिकं स्थानिक बाजारासह बाभूळगाव व यवतमाळ येथे विक्री करतात. शेतीसाठी लागणारा खर्च कमी करण्यासाठी ते कुटुंबासह स्वत: शेतीची कामे करतात त्यामुळे उत्पादन खर्चातही बरीच कपात त्यांनी केली आहे. दैनंदिन स्वयंपाकासाठी बऱ्याच वस्तू लागत असतात. त्यातील बहुतांश वस्तू खरेदी कराव्या लागते. मात्र ढेपे यांनी स्वयंपाकासाठी दररोज लागणाऱ्या मोहरी, जीरे, सोप, ओवा, कांदा यासारख्या वस्तु स्वत: थोड्या क्षेत्रात लागवड करून उत्पादीत करतात त्यामुळे त्यांना या वस्तु बाहेरून पैसे देऊन विकत आणाव्या लागत नाही.